᱒᱒ ᱟᱱᱟᱜ ᱯᱟᱹᱨᱥᱤ ᱡᱤᱛᱠᱟᱹᱨ ᱢᱟᱦᱟ ᱩᱛᱛᱚᱨ ᱫᱤᱱᱟᱡᱽᱯᱩᱨ ᱨᱮ

᱒᱐᱐᱓ ᱥᱟᱹᱦᱤᱛ ᱨᱮᱱᱟᱜ ᱒᱒ ᱰᱤᱥᱮᱹᱢᱵᱚᱨ ᱛᱮᱦᱮᱧ ᱞᱮᱠᱟᱱᱟᱜ ᱫᱤᱱ ᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱮᱞᱮᱫ ᱞᱮᱱᱟ ᱥᱚᱝᱵᱤᱫᱷᱟᱱ ᱨᱮᱱᱟᱜ ᱤᱨᱟᱹᱞ ᱟᱱᱟᱜ ᱛᱷᱚᱠ ᱨᱮ ᱾ ᱡᱟᱦᱟᱸ ᱨᱮᱱᱟᱜ ᱨᱟᱹᱥᱠᱟᱹ ᱪᱟᱹᱲᱭᱟᱹᱠᱚᱱ ᱧᱮᱞᱚᱜ ᱠᱟᱱᱟ ᱾ ᱟᱹᱰᱤ ᱵᱷᱟᱹᱨᱤᱼᱵᱷᱚᱨᱚᱢ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜ ᱠᱟᱱᱟ ᱛᱮᱦᱮᱧᱟᱜ ᱢᱟᱦᱟ ᱾ ᱩᱛᱛᱚᱨ ᱫᱤᱱᱟᱡᱽᱯᱩᱨ ᱡᱮᱞᱟ ᱨᱟᱭᱜᱚᱸᱡᱽ ᱨᱮᱱᱟᱜ ᱵᱳᱜᱨᱟᱢ ᱯᱚᱱᱰᱤᱛ ᱨᱚᱜᱷᱩᱱᱟᱛᱷ ᱯᱚᱞᱞᱤ ᱨᱮᱦᱚᱸ ᱦᱩᱭ ᱥᱟᱹᱛ ᱮᱱᱟ ᱯᱟᱹᱨᱥᱤ ᱡᱤᱛᱠᱟᱹᱨ ᱢᱟᱦᱟ ᱾ ᱱᱚᱣᱟ ᱟᱠᱷᱲᱟ ᱨᱮ ᱢᱟᱹᱱᱟᱱ ᱯᱮᱲᱟ ᱞᱮᱠᱟᱛᱮ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱨᱟᱭᱜᱚᱸᱡᱽ ᱨᱮᱱ ᱵᱤᱫᱷᱟᱭᱚᱠ ᱠᱨᱤᱥᱱᱚ ᱠᱚᱞᱞᱟᱱᱤ ᱥᱮᱴᱮᱨ ᱠᱟᱛᱮᱭ ᱢᱮᱱ ᱠᱮᱫᱟ ᱟᱡ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱥᱟᱱᱟᱢ ᱮᱴᱠᱮᱴᱚᱬᱮ ᱨᱮ ᱥᱮᱴᱮᱨᱮ ᱛᱟᱦᱮᱱᱟ ᱾ ᱪᱮᱫᱟᱜ ᱥᱮ ᱟᱹᱫᱤᱵᱟᱹᱥᱤ ᱛᱟᱞᱟ ᱠᱷᱚᱱ ᱡᱟᱦᱟᱸ ᱫᱩᱞᱟᱹᱲᱮ ᱧᱟᱢ ᱟᱠᱟᱫᱟ ᱚᱱᱟᱫᱚ ᱟᱹᱰᱤ ᱟᱨ ᱱᱤᱨᱞᱟᱹ ᱱᱤᱯᱷᱩᱴ ᱫᱩᱞᱟᱹᱲ ᱠᱟᱱᱟ ᱾ ᱟᱨ ᱟᱹᱫᱤᱵᱟᱹᱥᱤ ᱥᱟᱞᱟᱜ ᱡᱟᱦᱟᱸᱭ ᱵᱟᱝᱠᱚ ᱢᱮᱥᱟᱼᱟ ᱩᱱᱠᱩ ᱫᱚ ᱛᱤᱥᱦᱚᱸ ᱥᱟᱺᱜᱤᱧ ᱠᱷᱚᱱ ᱟᱹᱫᱤᱵᱟᱹᱥᱤ ᱵᱟᱝᱠᱚ ᱩᱨᱩᱢ ᱫᱟᱲᱮᱭᱟᱠᱚᱣᱟ ᱾ ᱪᱮᱫᱟᱜ ᱥᱮ ᱟᱹᱫᱤᱵᱟᱹᱥᱤ ᱫᱚ ᱟᱹᱰᱤ ᱥᱚᱨᱚᱞ ᱢᱚᱱᱮᱭᱟᱱ ᱦᱚᱲ ᱠᱟᱱᱟ ᱠᱚ ᱾

ᱢᱟᱹᱱᱟᱱ ᱯᱮᱲᱟᱣᱟᱜ ᱫᱟᱹᱵᱤ ᱠᱚ

ᱱᱚᱣᱟ ᱯᱟᱹᱨᱥᱤ ᱢᱟᱦᱟ ᱨᱮ ᱥᱟᱱᱛᱟᱲ ᱦᱚᱯᱚᱱ ᱟᱯᱱᱟᱨᱟᱜ ᱨᱮᱸᱜᱮᱡ ᱛᱮᱛᱟᱝ ᱠᱚ ᱥᱟᱵ ᱨᱟᱠᱟᱵ ᱠᱮᱫᱟ ᱾ ᱢᱟᱹᱱᱟᱱ ᱯᱮᱲᱟ ᱞᱮᱠᱟᱛᱮ ᱥᱮᱴᱮᱨᱮ ᱛᱟᱦᱮᱸ ᱠᱟᱱ ᱜᱳᱯᱟᱞ ᱢᱩᱨᱢᱩᱭ ᱞᱟᱹᱭ ᱠᱮᱫᱟ ᱥᱟᱱᱛᱟᱲᱤ ᱛᱮ ᱥᱤᱠᱷᱟᱹᱛᱚᱜ ᱦᱩᱭᱩᱜᱼᱟ ᱾ ᱟᱨ ᱥᱤᱠᱷᱱᱟᱹᱛ ᱟᱨᱡᱟᱣ ᱞᱟᱹᱜᱤᱫ ᱛᱮ ᱯᱟᱹᱦᱤᱞ ᱥᱮᱪᱮᱫ ᱟᱥᱲᱟ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱞᱟᱯᱷᱟᱝ ᱥᱮᱪᱮᱫ ᱟᱥᱲᱟ ᱦᱟᱹᱵᱤᱡ ᱚᱞᱚᱜ ᱵᱚᱱᱫᱮᱹᱡᱽ ᱨᱮᱡᱳᱨ ᱮᱢ ᱦᱩᱭᱩᱜᱼᱟ ᱾ ᱟᱨ ᱡᱟᱦᱟᱸ ᱠᱚ ᱟᱥᱲᱟ ᱢᱮᱱᱟᱜᱼᱟ ᱢᱮᱱᱠᱷᱟᱱ ᱢᱟᱪᱮᱫ ᱵᱟᱹᱱᱩᱜ ᱠᱚᱣᱟ ᱚᱱᱟ ᱥᱟᱱᱟᱢ ᱟᱱᱟᱴ ᱥᱚᱨᱠᱟᱨᱤ ᱟᱹᱢᱟᱹᱞᱤᱭᱟᱹ ᱠᱚ ᱵᱟᱰᱟᱭ ᱦᱚᱪᱚ ᱠᱚ ᱦᱩᱭᱩᱜᱼᱟ ᱾

ᱥᱟᱹᱲᱤ, ᱫᱷᱩᱛᱤ, ᱠᱚᱢᱵᱚᱞ ᱮᱢᱟᱱ ᱮᱢ ᱨᱮᱱᱟᱜ ᱵᱚᱱᱫᱷᱮᱹᱡᱽ

ᱱᱚᱣᱟ ᱯᱟᱹᱨᱥᱤ ᱢᱟᱦᱟ ᱢᱟᱱᱟᱣ ᱵᱟᱛᱟᱣ ᱠᱟᱹᱢᱤᱦᱚᱨᱟ ᱨᱮ ᱯᱨᱟᱭ ᱒᱐᱐᱐ ᱜᱟᱱ ᱦᱚᱲ ᱥᱟᱹᱲᱤ, ᱫᱷᱩᱛᱤ, ᱠᱚᱢᱵᱚᱞ ᱮᱢᱟᱱ ᱠᱚ ᱪᱟᱞᱟᱫ ᱠᱚᱣᱟ ᱾ ᱱᱚᱣᱟ ᱠᱚᱢᱵᱚᱞ ᱮᱯᱮᱢ ᱮᱛᱚᱦᱚᱵ ᱞᱮᱱᱟ ᱨᱟᱭᱜᱚᱸᱡᱽ ᱨᱮᱱ ᱵᱤᱫᱷᱟᱭᱚᱠ ᱠᱨᱤᱥᱵᱚ ᱠᱚᱞᱞᱟᱱᱤᱭᱟᱜ ᱥᱟᱹᱜᱩᱱ ᱛᱤᱼᱛᱮ ᱾

ᱮᱱᱮᱡᱼᱥᱮᱨᱮᱧ, ᱨᱟᱹᱥᱠᱟᱹᱼᱨᱚᱢᱚᱡᱽ ᱛᱟᱞᱟ ᱛᱮ ᱟᱹᱰᱤ ᱡᱟᱠᱼᱡᱚᱢᱚᱠ ᱢᱟᱱᱟᱣ ᱵᱟᱛᱟᱣᱮᱱᱟ ᱱᱚᱣᱟ ᱯᱟᱹᱨᱥᱤ ᱢᱟᱦᱟ ᱾ ᱟᱨ ᱱᱚᱣᱟ ᱢᱟᱦᱟ ᱥᱟᱹᱠᱷᱤ ᱥᱚᱵᱷᱟᱭ ᱞᱟᱹᱜᱤᱫ ᱛᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱥᱩᱨᱼᱥᱟᱺᱜᱤᱧ ᱠᱷᱚᱱ ᱥᱟᱭᱼᱥᱟᱥᱟᱭ ᱥᱟᱱᱛᱟᱲ ᱦᱚᱯᱚᱱ ᱾