᱒᱓ ᱠᱷᱚᱱ ᱒᱖ ᱚᱠᱴᱳᱵᱚᱨ ᱵᱚᱱᱫᱚ ᱛᱟᱦᱮᱱᱟ ᱙ ᱴᱤ ᱡᱮᱞᱟ ᱨᱮᱭᱟᱜ ᱡᱚᱛᱚ ᱥᱠᱩᱞ, ᱵᱚᱛᱚᱨᱟᱱ ᱦᱚᱭᱼᱵᱟᱹᱨᱰᱩ ‘ᱫᱟᱱᱟ’ ᱫᱟᱨᱟᱭ ᱠᱟᱱ ᱠᱷᱟᱹᱛᱤᱨ ᱥᱚᱛᱚᱨᱠᱚᱛᱟᱭ ᱡᱟᱹᱨᱤ ᱠᱮᱫᱟ ᱨᱟᱡᱽᱡᱚ

(PAPUL MURMU) Cyclone Dana alert! : ᱵᱚᱝᱜᱚᱯᱳᱥᱟᱜᱚᱨ ᱨᱮ ᱛᱮᱭᱟᱨ ᱟᱠᱟᱱᱟ ᱱᱤᱢᱱᱚᱪᱟᱯ, ᱡᱟᱦᱟᱸ ᱠᱷᱟᱹᱛᱤᱨ ᱫᱟᱨᱟᱭ ᱠᱟᱱᱟ ᱵᱚᱛᱚᱨᱟᱱ ᱦᱚᱭᱼᱵᱟᱹᱨᱰᱩ ‘ᱫᱟᱱᱟ’ ᱾ ᱚᱱᱟ ᱦᱚᱭᱼᱵᱟᱹᱨᱰᱩ ᱨᱮᱭᱟᱜ ᱠᱟᱛᱷᱟ ᱩᱭᱦᱟᱹᱨ ᱠᱟᱛᱮ ᱜᱮ ᱫᱚᱠᱠᱷᱤᱱᱵᱚᱝᱜᱚ ᱨᱮᱭᱟᱜ ᱙ ᱜᱚᱴᱟᱝ ᱦᱚᱱᱚᱛ ᱨᱮᱭᱟᱜ ᱡᱚᱛᱚ ᱥᱠᱩᱞ ᱠᱚ ᱵᱚᱱᱫᱚ ᱛᱟᱦᱮᱱᱟ ᱢᱮᱱᱛᱮᱭ ᱜᱷᱳᱥᱚᱱᱟ ᱠᱮᱫᱟ ᱯᱚᱱᱚᱛ ᱨᱮᱱ ᱥᱤᱨᱟᱹᱢᱚᱱᱛᱨᱤ ᱢᱚᱢᱚᱛᱟ ᱵᱮᱱᱟᱨᱡᱤ ᱾ ᱚᱱᱟ ᱥᱟᱶᱛᱮ ᱜᱷᱩᱨᱱᱤ ᱡᱷᱚᱲ ᱢᱳᱠᱟᱵᱤᱞᱟ ᱞᱟᱹᱜᱤᱫ ᱛᱮ ᱥᱟᱹᱨᱫᱤ ᱢᱟᱦᱟ ᱠᱷᱚᱱ ᱜᱮ ᱥᱟᱹᱢᱩᱫᱽ ᱴᱚᱴᱷᱟ ᱠᱚᱨᱮ ᱠᱷᱚᱱ ᱦᱚᱲ ᱠᱚ ᱮᱴᱟᱜ ᱥᱮᱫ ᱟᱹᱜᱩ ᱦᱩᱭ ᱟᱠᱟᱱᱟ ᱾ ᱒᱓ ᱠᱷᱚᱱ ᱒᱖ ᱚᱠᱴᱳᱵᱚᱨ ᱢᱩᱫᱽ ᱡᱟᱦᱟᱸ ‘ᱫᱟᱱᱟ’ ᱦᱤᱡᱩᱜ ᱠᱟᱱᱟ ᱚᱱᱟ ᱨᱮᱭᱟᱜ ᱮᱥᱮᱨ ᱫᱚᱠᱠᱷᱤᱱᱵᱚᱝᱜᱚ ᱨᱮᱭᱟᱜ ᱟᱨᱮ ᱜᱚᱴᱟᱝ ᱦᱚᱱᱚᱛ ᱨᱮ ᱯᱟᱲᱟᱜᱼᱟ ᱾ ᱡᱟᱦᱟᱸ ᱠᱚ ᱯᱚᱱᱚᱛ ᱨᱮ ᱮᱥᱮᱨ ᱦᱩᱭᱩᱜᱼᱟ ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ ᱩᱛᱛᱚᱨ ᱟᱨ ᱫᱚᱠᱷᱤᱱ ᱒᱔ ᱯᱚᱨᱜᱚᱱᱟ, ᱠᱳᱞᱠᱟᱛᱟ, ᱦᱟᱣᱲᱟ, ᱦᱩᱜᱽᱞᱤ, ᱵᱟᱸᱠᱩᱲᱟ, ᱡᱷᱟᱲᱜᱨᱟᱢ, ᱯᱚᱥᱪᱤᱢ ᱢᱮᱹᱫᱽᱱᱤᱯᱩᱨ ᱟᱨ ᱯᱩᱨᱵᱚ ᱢᱮᱹᱫᱽᱱᱤᱯᱩᱨ ᱨᱮᱭᱟᱜ ᱵᱮᱥ ᱠᱤᱪᱷᱩ ᱴᱚᱴᱷᱟ ᱨᱮ ᱾ ᱵᱚᱛᱚᱨᱟᱱ ᱵᱟᱹᱨᱰᱩ ‘ᱫᱟᱱᱟ’ ᱠᱷᱟᱹᱛᱤᱨ ᱡᱟᱦᱟᱸᱭ ᱥᱟᱹᱢᱩᱫᱽ ᱨᱮ ᱦᱟᱹᱠᱩ ᱜᱚᱡ ᱠᱚ ᱪᱟᱞᱟᱜᱼᱟ ᱩᱱᱠᱩ ᱠᱚᱦᱚᱸ ᱡᱟᱛᱮ ᱦᱚᱭ ᱵᱟᱹᱨᱰᱩ ᱚᱠᱛᱚ ᱵᱟᱝ ᱠᱚ ᱪᱟᱞᱟᱜ ᱞᱟᱹᱜᱤᱫ ᱛᱮ ᱯᱨᱚᱥᱟᱥᱚᱱ ᱯᱟᱥᱴᱟ ᱠᱷᱚᱱ ᱢᱟᱭᱠᱤᱝ ᱠᱚᱨᱟᱣ ᱦᱩᱭᱩᱜ ᱠᱟᱱᱟ ᱾ᱜᱷᱩᱨᱱᱤ ᱡᱷᱚᱲ ᱢᱳᱠᱟᱵᱤᱞᱟ ᱞᱟᱹᱜᱤᱫ ᱥᱚᱨᱠᱟᱨ ᱯᱟᱥᱴᱟ ᱠᱷᱚᱱ ᱠᱚᱱᱴᱨᱳᱞ ᱨᱩᱢ ᱪᱟᱹᱞᱩ ᱦᱩᱭ ᱟᱠᱟᱱᱟ, ᱡᱟᱦᱟᱸ ᱫᱚ ᱵᱟᱹᱨᱰᱩ ᱚᱠᱛᱚ ᱒᱔ ᱜᱷᱚᱱᱴᱟ ᱜᱮ ᱪᱟᱹᱞᱩ ᱛᱟᱦᱮᱱᱟ ᱾