(PAPUL MURMU) AISWA.WB.Br 19th Annual Conference 2024 : ᱡᱟᱣ ᱥᱮᱨᱢᱟ ᱞᱮᱠᱟᱜᱮ ᱱᱮᱥ ᱦᱚᱸ ᱦᱩᱭ ᱥᱟᱹᱛ ᱮᱱᱟ ᱚᱱᱚᱞᱤᱭᱟᱹ ᱜᱟᱶᱛᱟ ᱯᱚᱥᱪᱤᱢ ᱵᱟᱝᱞᱟ ᱪᱟᱸᱜᱷᱟᱣᱟᱜ ᱑᱙ ᱟᱱᱟᱝ ᱥᱮᱨᱢᱟ ᱯᱩᱨᱟᱹᱣ ᱦᱮᱹᱞᱢᱮᱹᱞ ᱾ ᱯᱩᱭᱞᱩ ᱱᱮᱸᱰᱟ ᱞᱮᱠᱟᱛᱮ ᱚᱱᱚᱞᱤᱭᱟᱹ ᱜᱟᱶᱛᱟᱣᱟᱜ ᱦᱮᱹᱞᱢᱮᱹᱞ ᱚᱠᱴᱳᱵᱚᱨ ᱪᱟᱸᱫᱳ ᱨᱮᱭᱟᱜ ᱒᱖ ᱟᱨ ᱒᱗ ᱛᱟᱹᱨᱤᱠᱷ ᱨᱮ ᱦᱩᱭᱩᱜ ᱠᱟᱛᱷᱟ ᱛᱟᱦᱮᱸ ᱠᱟᱱ ᱨᱮᱦᱚ ᱩᱱ ᱚᱠᱛᱚ ᱵᱚᱛᱚᱨᱟᱱ ᱦᱚᱭ ᱵᱟᱹᱨᱰᱩ ‘ᱫᱟᱱᱟ’ ᱦᱮᱡ ᱞᱮᱱ ᱠᱷᱟᱹᱛᱤᱨ ᱵᱟᱝ ᱦᱩᱭ ᱞᱮᱱᱟ ᱾ ᱢᱮᱱᱠᱷᱟᱱ ᱛᱟᱭᱚᱢ ᱛᱮ ᱱᱮᱸᱰᱟ ᱟᱹᱨᱩᱯᱷᱮᱨᱟᱣ ᱠᱟᱛᱮᱫ ᱯᱩᱨᱩᱞᱤᱭᱟᱹ ᱡᱮᱞᱟ ᱨᱮᱭᱟᱜ ᱵᱚᱞᱚᱨᱟᱢᱯᱩᱨ ᱯᱷᱩᱞᱪᱟᱸᱫᱽ ᱦᱟᱭᱥᱠᱩᱞ ᱨᱮ ᱚᱱᱚᱞᱤᱭᱟᱹ ᱜᱟᱶᱛᱟᱟᱜ ᱑᱙ ᱟᱱᱟᱝ ᱥᱮᱨᱢᱟ ᱯᱩᱨᱟᱹᱣ ᱦᱮᱹᱞᱢᱮᱹᱞ ᱦᱩᱭ ᱥᱟᱹᱛ ᱮᱱᱟ ᱒᱙ ᱟᱨ ᱓᱐ ᱚᱠᱴᱳᱵᱚᱨ ᱨᱮ ᱾ ᱯᱩᱨᱩᱞᱤᱭᱟᱹ ᱡᱮᱞᱟ ᱨᱮ ᱚᱱᱚᱞᱤᱭᱟᱹ ᱜᱟᱶᱛᱟᱣᱟᱜ ᱯᱟᱦᱟᱴᱟ ᱠᱷᱚᱱ ᱥᱟᱯᱲᱟᱣ ᱞᱮᱱ ᱦᱮᱹᱞᱢᱮᱹᱞ ᱨᱮ ᱯᱚᱥᱪᱤᱢ ᱵᱟᱝᱞᱟ ᱨᱮᱭᱟᱜ ᱥᱟᱱᱟᱢ ᱡᱮᱞᱟ ᱠᱷᱚᱱ ᱜᱮ ᱜᱟᱶᱛᱟ ᱥᱟᱶ ᱡᱚᱯᱲᱟᱣ ᱟᱠᱟᱱ ᱜᱟᱹᱠᱷᱩᱲᱟᱱ ᱠᱚᱜᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱾ ᱢᱟᱨᱟᱝ ᱯᱮᱲᱟ ᱞᱮᱠᱟᱛᱮ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱡᱷᱟᱲᱜᱨᱟᱢ ᱡᱮᱞᱟ ᱨᱮᱱ ᱮᱢ ᱯᱤ ᱢᱟᱱᱚᱛᱟᱱ ᱠᱷᱮᱨᱣᱟᱞ (ᱠᱟᱞᱤᱯᱚᱫᱚ) ᱥᱚᱨᱮᱱ, ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱡᱷᱟᱲᱜᱨᱟᱢ ᱡᱮᱞᱟ ᱯᱚᱨᱤᱥᱚᱫᱽ ᱨᱮᱱ ᱥᱚᱵᱷᱟᱫᱷᱤᱯᱚᱛᱤ ᱪᱤᱱᱢᱚᱭᱤ ᱢᱟᱨᱟᱱᱰᱤ, ᱯᱨᱤᱛᱷᱤᱵᱤ ᱢᱟᱡᱷᱤ, ᱫᱚᱢᱚᱭᱚᱱᱛᱤ ᱵᱮᱥᱨᱟ ᱞᱮᱠᱟᱱ ᱜᱟᱹᱠᱷᱩᱲᱟᱱ ᱠᱚ ᱾ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱥᱮᱨᱮᱧ ᱛᱮ ᱫᱟᱫᱟ ᱥᱟᱦᱮᱵᱽ ᱯᱷᱟᱞᱠᱮᱹ ᱥᱤᱨᱯᱟᱹ ᱧᱟᱢ ᱟᱠᱟᱫ ᱞᱟᱝᱛᱤᱛᱤ ᱠᱤᱥᱠᱩ ᱦᱚᱸ᱾ ᱓᱐ ᱚᱠᱴᱳᱵᱚᱨ ᱢᱟᱨᱟᱝ ᱯᱮᱲᱟ ᱠᱷᱮᱨᱣᱟᱞ ᱥᱚᱨᱮᱱ ᱪᱤᱨ ᱩᱰᱷᱟᱹᱣ ᱛᱟᱭᱚᱢ ᱜᱮ ᱦᱮᱹᱞᱢᱮᱹᱞ ᱨᱮᱭᱟᱜ ᱠᱟᱹᱢᱤᱦᱚᱨᱟ ᱫᱚ ᱮᱛᱚᱦᱚᱵ ᱞᱮᱱ ᱛᱟᱦᱮᱱᱟ ᱾
ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱚᱱᱚᱞᱤᱭᱟᱹ ᱜᱟᱶᱛᱟᱣᱟᱜ ᱫᱚ ᱯᱚᱛᱚᱵᱽ ᱯᱩᱛᱷᱤ ᱛᱟᱞᱟ ᱛᱮ ᱥᱟᱶᱛᱟ ᱨᱮᱭᱟᱜ ᱞᱟᱭᱼᱞᱟᱠᱪᱟᱨ, ᱟᱹᱨᱤᱪᱟᱹᱞᱤ ᱫᱷᱚᱨᱚᱢ ᱠᱚᱨᱚᱢ ᱡᱚᱜᱟᱣ ᱡᱚᱛᱚᱱ ᱥᱟᱶᱛᱮ ᱥᱟᱶᱛᱟ ᱢᱟᱨᱥᱟᱞ ᱞᱟᱹᱜᱤᱫ ᱱᱟᱦᱟᱜ ᱚᱠᱛᱚ ᱨᱮᱭᱟᱜ ᱪᱤᱛᱟᱹᱨ ᱠᱚᱦᱚᱸᱭ ᱥᱟᱵ ᱨᱟᱠᱟᱵ ᱮᱫᱟ ᱦᱟᱯᱮᱱ ᱫᱤᱱ ᱨᱮᱭᱟᱜ ᱱᱟᱜᱟᱢ ᱞᱟᱜᱤᱫ ᱾ ᱴᱷᱤᱠ ᱚᱱᱠᱟ ᱜᱮ ᱯᱩᱨᱩᱞᱤᱭᱟᱹ ᱡᱮᱞᱟ ᱨᱮ ᱦᱩᱭ ᱥᱟᱹᱛ ᱮᱱ ᱑᱙ ᱟᱱᱟᱝ ᱚᱱᱚᱞᱤᱭᱟᱹ ᱜᱟᱶᱛᱟᱣᱟᱜ ᱠᱟᱹᱢᱤᱦᱚᱨᱟ ᱠᱷᱚᱱ “ᱛᱮᱨᱟᱝ” ᱧᱩᱛᱩᱢᱟᱱ ᱢᱤᱫ ᱯᱩᱛᱷᱤ ᱩᱪᱷᱟᱹᱱ ᱠᱮᱫᱟᱭ ᱚᱱᱚᱞᱤᱭᱟᱹ ᱜᱟᱶᱛᱟ ᱨᱮᱱ ᱱᱚᱨᱛ ᱵᱮᱝᱜᱚᱞ ᱡᱳᱱᱟᱞ ᱥᱮᱹᱠᱨᱮᱹᱴᱟᱨᱤ ᱫᱤᱞᱤᱯ ᱠᱤᱥᱠᱩ ᱾ “ᱛᱮᱨᱟᱝ” ᱤᱫᱤ ᱠᱟᱛᱮᱫ ᱫᱤᱞᱤᱯ ᱠᱤᱥᱠᱩᱣᱟᱜ ᱞᱟᱹᱭ ᱚᱱᱚᱞᱤᱭᱟᱹ ᱠᱚᱣᱟᱜ ᱚᱱᱚᱬᱦᱮ ᱜᱟᱛᱷᱟᱣ ᱠᱟᱛᱮᱫ ᱛᱚᱞ ᱫᱚᱦᱚᱭ ᱞᱟᱹᱜᱤᱫ ᱜᱮ “ᱛᱮᱨᱟᱝ” ᱞᱮᱠᱟᱱ ᱯᱩᱛᱷᱤ ᱫᱚ ᱩᱪᱷᱟᱹᱱ ᱦᱩᱭ ᱟᱠᱟᱱᱟ, ᱡᱟᱛᱮ ᱦᱟᱯᱮᱱ ᱫᱤᱱ ᱨᱮ “ᱛᱮᱨᱟᱝ” ᱠᱷᱚᱱ ᱟᱹᱠᱤᱞ ᱦᱟᱛᱟᱣ ᱠᱟᱛᱮᱫ ᱱᱟᱦᱟᱜ ᱨᱮᱱ ᱡᱩᱣᱟᱹᱱ ᱠᱚ ᱯᱩᱛᱷᱤ ᱯᱚᱛᱚᱵᱽ ᱚᱞ ᱨᱮᱠᱚ ᱞᱟᱦᱟ ᱦᱤᱡᱩᱜ ᱢᱟ ᱾
