(PAPUL MURMU) Maharashtra Election 2024: ᱵᱤ ᱡᱮ ᱯᱤ ᱥᱟᱶᱛᱮ ᱟᱥᱚᱱ ᱨᱚᱯᱷᱟ ᱛᱟᱭᱚᱢ ᱜᱮ ᱢᱚᱦᱟᱨᱟᱥᱴᱨᱚ ᱵᱤᱫᱷᱟᱱᱥᱚᱵᱷᱟ ᱞᱟᱹᱜᱤᱫ ᱠᱮᱱᱰᱤᱰᱮᱹᱴ ᱠᱚᱣᱟᱜ ᱧᱩᱛᱩᱢ ᱠᱚ ᱩᱪᱷᱟᱹᱱ ᱠᱮᱫᱟ ᱥᱤᱵᱽᱥᱮᱱᱟ ᱥᱤᱱᱰᱮᱹ ᱡᱳᱴ ᱟᱨ ᱰᱮᱯᱴᱤ ᱥᱤ ᱮᱢ ᱚᱡᱤᱛ ᱯᱟᱣᱟᱨᱟᱜ ᱮᱱ ᱥᱤ ᱯᱤ ᱾ ᱥᱟᱹᱨᱫᱤ ᱢᱟᱦᱟ ᱦᱤᱞᱚᱹᱜ ᱥᱤᱱᱰᱮᱹ ᱥᱮᱱᱟ ᱔᱕ ᱟᱨ ᱮᱱ ᱥᱤ ᱯᱤ ᱚᱡᱤᱛ ᱓᱘ ᱜᱚᱴᱟᱝ ᱥᱤᱴ ᱨᱮ ᱯᱨᱟᱨᱛᱷᱤ ᱠᱚᱣᱟᱜ ᱧᱩᱛᱩᱢ ᱠᱤᱱ ᱩᱪᱷᱟᱹᱱ ᱠᱮᱫᱟ ᱾
ᱥᱤᱨᱟᱹᱢᱚᱱᱛᱨᱤ ᱮᱠᱱᱟᱛᱷ ᱥᱤᱱᱰᱮᱹ ᱢᱚᱦᱟᱨᱟᱥᱴᱨᱚ ᱨᱮᱭᱟᱜ ᱛᱷᱟᱱᱮ ᱡᱮᱞᱟ ᱨᱮᱭᱟᱜ ᱠᱟᱯᱨᱤᱼᱯᱟᱸᱪᱯᱟᱠᱷᱤᱲᱤ ᱟᱥᱚᱱ ᱠᱷᱚᱱ ᱵᱟᱪᱷᱱᱟᱣ ᱨᱮ ᱫᱟᱣᱮ ᱦᱟᱢᱮᱴ ᱮᱫᱟ ᱾ ᱒᱐᱐᱙ ᱠᱷᱚᱱ ᱒᱐᱑᱙ ᱦᱟᱹᱵᱤᱡ ᱡᱟᱦᱟᱸ ᱚᱠᱛᱚ ᱥᱤᱵᱽᱥᱮᱱᱟ ᱵᱟᱝ ᱦᱟᱹᱴᱤᱧ ᱟᱠᱟᱱ ᱛᱟᱦᱮᱱᱟ ᱩᱱᱼᱚᱠᱛᱚ ᱠᱷᱚᱱ ᱴᱟᱱᱟ ᱯᱮ ᱫᱷᱟᱣ ᱚᱱᱟ ᱟᱥᱚᱱ ᱠᱷᱚᱱ ᱜᱮ ᱡᱤᱛᱠᱟᱹᱨ ᱦᱤᱡᱩᱜ ᱠᱟᱱᱟᱭ ᱾ ᱫᱚᱥᱟᱨ ᱯᱟᱥᱴᱟ ᱢᱚᱦᱟᱨᱟᱥᱴᱨᱚ ᱨᱮᱱ ᱰᱮᱯᱴᱤ ᱥᱤ ᱮᱢ ᱚᱡᱤᱛ ᱯᱟᱣᱟᱨ ᱵᱟᱪᱷᱱᱟᱣ ᱨᱮ ᱫᱟᱣᱮ ᱦᱟᱛᱟᱣᱟ ᱵᱟᱨᱟᱢᱚᱹᱛᱤ ᱟᱥᱚᱱ ᱠᱷᱚᱱ ᱾ ᱱᱟᱥᱤᱠ ᱨᱮᱭᱟᱜ ᱭᱮᱞᱟᱨ ᱟᱥᱚᱱ ᱠᱷᱚᱱ ᱞᱟᱹᱲᱦᱟᱹᱭᱟᱭ ᱥᱤᱱᱰᱮᱹ ᱢᱚᱱᱛᱨᱤᱥᱚᱵᱷᱟ ᱨᱮᱱ ᱥᱚᱫᱚᱥᱥᱚ ᱪᱚᱜᱚᱱ ᱵᱷᱩᱡᱽᱵᱟᱞ ᱾ ᱫᱟᱨᱟᱭ ᱠᱟᱱ ᱒᱐ ᱱᱚᱵᱷᱮᱢᱵᱚᱨ ᱢᱤᱫ ᱛᱷᱚᱠ ᱨᱮ ᱒᱘᱘ ᱜᱚᱴᱟᱝ ᱥᱤᱴ ᱨᱮ ᱦᱩᱭᱩᱜᱼᱟ ᱢᱚᱦᱟᱨᱟᱥᱴᱨᱚ ᱯᱚᱱᱚᱛ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱾ ᱢᱚᱦᱟᱨᱟᱥᱴᱨᱚ ᱨᱮᱭᱟᱜ ᱵᱟᱪᱷᱱᱟᱣ ᱨᱮ ᱢᱩᱞ ᱞᱟᱹᱲᱦᱟᱹᱭ ᱫᱚ ᱦᱩᱭᱩᱜᱼᱟ ᱥᱤᱵᱽᱥᱮᱱᱟ ᱥᱤᱱᱰᱮᱹ, ᱮᱱ ᱥᱤ ᱯᱤ ᱚᱡᱤᱛ ᱵᱤ ᱡᱮ ᱯᱤ ᱟᱨ ᱠᱚᱝᱜᱨᱮᱹᱥ ᱥᱤᱵᱽᱥᱮᱱᱟ ᱩᱫᱽᱫᱷᱚᱵᱽ, ᱟᱨ ᱮᱱ ᱥᱤ ᱯᱤ ᱥᱚᱨᱚᱫᱽ ᱯᱟᱣᱟᱨᱟᱜ ᱢᱚᱦᱟᱵᱤᱠᱟᱥ ᱟᱜᱟᱲᱤ ᱢᱩᱫᱽ ᱨᱮ ᱾ ᱛᱚᱵᱮ ᱢᱚᱦᱟᱨᱟᱥᱴᱨᱚ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱥᱟᱥᱚᱠ ᱡᱳᱴ ᱨᱮᱱ ᱡᱚᱛᱚ ᱠᱷᱚᱱ ᱢᱟᱨᱟᱝ ᱫᱚᱞ ᱵᱤ ᱡᱮ ᱯᱤ ᱠᱚ ᱞᱟᱹᱲᱦᱟᱹᱭ ᱠᱟᱱᱟ ᱑᱕᱕ ᱴᱤ ᱟᱥᱚᱱ ᱨᱮ ᱾
