ᱦᱚᱨᱤᱭᱟᱱᱟ ᱨᱮ ᱯᱚᱨᱤᱵᱚᱨᱛᱚᱱ ᱥᱮ ᱯᱨᱚᱛᱛᱟᱵᱚᱨᱛᱚᱱ ᱮᱛᱚᱦᱚᱵ ᱮᱱᱟ
ᱦᱚᱨᱤᱭᱟᱱᱟ ᱨᱮᱭᱟᱜ ᱵᱷᱳᱴ ᱨᱮ ᱵᱤ ᱡᱮ ᱯᱤ ᱨᱮᱱ ᱯᱨᱚᱛᱤᱫᱚᱱᱫᱤ ᱠᱚᱝᱜᱨᱮᱹᱥ
ᱵᱟᱪᱷᱱᱟᱣ ᱨᱮ ᱢᱚᱞᱚᱝ ᱞᱤᱠᱷᱚᱱ ᱡᱚᱯᱲᱟᱣ ᱟᱠᱟᱱᱟ ᱵᱷᱤᱱᱮᱥ ᱯᱷᱳᱜᱟᱴ ᱥᱟᱶᱛᱮ ᱟᱭᱢᱟ ᱠᱚᱣᱟᱜ
(PAPUL MURMU)Haryana Assembly Election : ᱒᱐᱒᱔ ᱨᱮᱭᱟᱜ ᱞᱳᱠ ᱥᱚᱵᱷᱟ ᱵᱟᱪᱷᱱᱟᱣ ᱛᱟᱭᱚᱢ ᱯᱩᱭᱞᱩ ᱫᱷᱟᱣ ᱵᱟᱨᱭᱟ ᱯᱚᱱᱚᱛ ᱠᱟᱥᱢᱤᱨ ᱟᱨ ᱦᱚᱨᱤᱭᱟᱱᱟ ᱨᱮ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱾ ᱛᱚᱵᱮ ᱠᱟᱥᱢᱤᱨ ᱨᱮᱭᱟᱜ ᱵᱟᱪᱷᱱᱟᱣ ᱫᱚ ᱦᱩᱭ ᱥᱟᱹᱛ ᱟᱠᱟᱱᱟ, ᱟᱨ ᱛᱮᱦᱮᱧ ᱫᱚ ᱦᱚᱨᱤᱭᱟᱱᱟ ᱨᱮᱭᱟᱜ ᱙᱐ ᱟᱥᱚᱱ ᱱᱤᱨᱵᱟᱪᱚᱱ ᱪᱟᱞᱟᱜ ᱠᱟᱱᱟ᱾
ᱦᱚᱨᱤᱭᱟᱱᱟ ᱨᱮᱭᱟᱜ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱠᱷᱚᱢᱚᱛᱟᱥᱤᱱ ᱵᱤ ᱡᱮ ᱯᱤ ᱨᱮᱱ ᱯᱨᱚᱫᱷᱟᱱ ᱯᱨᱚᱛᱤᱫᱚᱱᱫᱤ ᱫᱚ ᱠᱚᱝᱜᱨᱮᱹᱥ ᱾ ᱫᱚᱥᱥᱟᱱᱛ ᱪᱳᱣᱛᱟᱞᱟᱣᱟᱜ ᱡᱚᱱᱚᱱᱟᱭᱟᱠ ᱡᱚᱱᱚᱛᱟ ᱯᱟᱨᱴᱤ, ᱪᱚᱸᱫᱨᱚ ᱥᱮᱠᱷᱚᱨ ᱟᱡᱟᱫᱟᱜ ᱟᱡᱟᱫᱽ ᱥᱚᱢᱟᱡᱽ ᱯᱟᱨᱴᱤ, ᱵᱤ ᱮᱥ ᱯᱤ, ᱟᱢ ᱟᱫᱽᱢᱤ ᱯᱟᱨᱴᱤ ᱞᱮᱠᱟᱱ ᱟᱹᱰᱤ ᱜᱟᱱ ᱨᱟᱡᱽᱼᱟᱹᱨᱤ ᱫᱚᱞ ᱜᱮ ᱦᱚᱨᱤᱭᱟᱱᱟ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱫᱟᱣ ᱠᱚ ᱦᱟᱛᱟᱣ ᱟᱠᱟᱫᱟ ᱾ ᱛᱚᱵᱮ ᱢᱤᱫ ᱚᱠᱛᱚ ᱦᱚᱨᱤᱭᱟᱱᱟ ᱨᱮ ᱟᱧᱪᱚᱞᱤᱠ ᱫᱚᱞ ᱠᱚᱣᱟᱜ ᱵᱮᱯᱚᱠ ᱯᱨᱚᱵᱷᱟᱵᱽ ᱛᱟᱦᱮᱸ ᱠᱟᱱᱟ ᱾ ᱢᱮᱱᱠᱷᱟᱱ ᱒᱐᱑᱔ ᱨᱮ ᱵᱤ ᱡᱮ ᱯᱤ ᱠᱷᱚᱢᱚᱛᱟ ᱨᱮ ᱦᱮᱡ ᱠᱟᱛᱮᱫ ᱟᱧᱪᱚᱞᱤᱠ ᱫᱚᱞ ᱠᱚᱣᱟᱜ ᱯᱨᱚᱵᱷᱟᱵᱽ ᱟᱫᱚᱜ ᱥᱮᱫ ᱞᱟᱦᱟᱣᱟᱠᱟᱱᱟ ᱾ ᱛᱚᱵᱮ ᱨᱟᱡᱽᱱᱤᱛᱤᱵᱤᱫᱽ ᱠᱚᱣᱟᱜ ᱢᱮᱱ ᱦᱚᱨᱤᱭᱟᱱᱟ ᱨᱮᱭᱟᱜ ᱵᱟᱪᱷᱱᱟᱣ ᱨᱮ ᱟᱹᱰᱤ ᱜᱟᱱ ᱨᱟᱡᱽᱼᱟᱹᱨᱤ ᱯᱟᱨᱴᱤ ᱢᱮᱱᱟᱜ ᱟᱠᱟᱫ ᱠᱚ ᱨᱮᱦᱚᱸ ᱞᱟᱹᱲᱦᱟᱹᱭ ᱫᱚ ᱠᱚᱝᱜᱨᱮᱹᱥ ᱟᱨ ᱵᱤ ᱡᱮ ᱯᱤ ᱢᱩᱫᱽ ᱨᱮᱜᱮ ᱾ ᱜᱮᱞ (᱑᱐) ᱥᱮᱨᱢᱟ ᱠᱷᱚᱢᱚᱛᱟ ᱨᱮ ᱛᱟᱦᱮᱸ ᱠᱟᱛᱮᱫ ᱯᱨᱚᱛᱤᱥᱴᱷᱟᱱ ᱵᱤᱨᱳᱫᱷᱤ ᱦᱟᱣᱟ ᱠᱷᱟᱹᱛᱤᱨ ᱵᱮᱥ ᱪᱟᱯ ᱨᱮ ᱢᱮᱱᱟᱭᱟ ᱵᱤ ᱡᱮ ᱯᱤ ᱾ ᱫᱚᱥᱟᱨ ᱯᱟᱥᱴᱟ ᱠᱚᱝᱜᱨᱮᱹᱥ ᱦᱚᱸ ᱪᱟᱯ ᱨᱮ ᱢᱮᱱᱟᱭᱟ ᱫᱚᱞ ᱢᱩᱫᱽ ᱨᱮ ᱮᱯᱮᱨᱦᱮᱰᱮᱡ ᱠᱷᱟᱹᱛᱤᱨ ᱾
(GRAPHIC: RABINATH SOREN)
ᱦᱚᱨᱤᱭᱟᱱᱟ ᱨᱮ ᱱᱤᱨᱵᱟᱪᱚᱱ ᱮᱛᱚᱦᱚᱵ ᱠᱷᱚᱱ ᱜᱮ ᱵᱷᱳᱴ ᱠᱮᱱᱫᱨᱚ ᱨᱮ ᱟᱹᱰᱤ ᱡᱤᱞᱤᱧ ᱞᱟᱭᱤᱱ ᱦᱚᱸ ᱧᱮᱞᱧᱟᱢ ᱟᱠᱟᱱᱟ ᱾ ᱟᱨ ᱦᱚᱨᱤᱭᱟᱱᱟ ᱨᱮᱱ ᱡᱚᱱᱚᱛᱟ ᱠᱚ ᱵᱷᱳᱴ ᱮᱢ ᱞᱟᱹᱜᱤᱫ TWEET ᱛᱟᱞᱟ ᱛᱮ ᱯᱨᱚᱫᱷᱟᱱᱢᱚᱱᱛᱨᱤ ᱥᱟᱱᱟᱢ ᱦᱚᱲᱴᱮᱱ ᱟᱨᱫᱟᱥᱮ ᱫᱚᱦᱚᱣᱟᱠᱟᱫᱟ᱾
