(PAPUL MURMU) ONE NATION, ONE VOTE RAM NATH KOVIND : ᱢᱤᱫ ᱫᱤᱥᱚᱢ ᱨᱮ ᱢᱤᱫ ᱵᱷᱳᱴ ( ONE NATION, ONE VOTE) ᱠᱤᱪᱷᱩ ᱛᱮᱜᱮ ᱥᱚᱝᱵᱤᱫᱷᱟᱱ ᱵᱤᱨᱳᱫᱷᱤ ᱵᱟᱝ ᱠᱟᱱᱟ ᱥᱟᱶᱛᱮ ᱚᱱᱟ ᱫᱚ ᱡᱚᱛᱚ ᱵᱮᱵᱚᱥᱛᱷᱟ ᱨᱮᱭᱟᱜ ᱯᱚᱨᱤᱯᱚᱱᱛᱷᱤ ᱦᱚᱸ ᱵᱟᱝ ᱠᱟᱱᱟ ᱢᱮᱱᱛᱮ ᱫᱟᱹᱵᱤ ᱠᱮᱫᱟᱭ ᱢᱟᱨᱮ ᱨᱟᱥᱴᱨᱚᱯᱚᱛᱤ ᱟᱨᱵᱟᱝ ᱢᱤᱫ ᱫᱤᱥᱚᱢ ᱨᱮ ᱢᱤᱫ ᱵᱷᱳᱴ ᱠᱚᱢᱤᱴᱤ ᱨᱮᱱ ᱯᱨᱚᱫᱷᱟᱱ ᱨᱟᱢᱱᱟᱛᱷ ᱠᱳᱵᱤᱱᱫᱽ ᱾ ᱠᱳᱵᱤᱱᱫᱟᱜ ᱢᱮᱱ ᱥᱚᱝᱵᱤᱫᱷᱟᱱ ᱵᱮᱱᱟᱣ ᱚᱠᱛᱚ ᱨᱮ ᱡᱟᱦᱟᱸᱭ ᱠᱚ ᱵᱮᱱᱟᱣ ᱞᱮᱫ ᱛᱟᱦᱮᱱᱟ ᱩᱱᱠᱩ ᱦᱚᱸ ᱢᱤᱫ ᱫᱤᱥᱚᱢ ᱨᱮ ᱢᱤᱫ ᱵᱷᱳᱴ ᱨᱮᱭᱟᱜ ᱠᱟᱛᱷᱟ ᱠᱚ ᱩᱭᱦᱟᱹᱨ ᱞᱮᱫ ᱛᱟᱦᱮᱱ ᱾
ᱩᱱᱤᱭᱟᱜ ᱢᱮᱱ ᱢᱤᱫ ᱫᱤᱥᱚᱢ ᱨᱮ ᱢᱤᱫ ᱵᱷᱳᱴ ( ONE NATION, ONE VOTE) ᱦᱩᱭ ᱦᱚᱦᱪᱚᱭ ᱞᱟᱹᱜᱤᱫ ᱛᱮ ᱥᱚᱝᱵᱤᱫᱷᱟᱱ ᱨᱮ ᱡᱟᱦᱟᱸᱼᱡᱟᱦᱟᱸ ᱥᱚᱝᱥᱳᱫᱷᱚᱱ ᱠᱚ ᱞᱟᱹᱠᱛᱤ ᱢᱮᱱᱟᱜ ᱟᱠᱟᱫᱟ ᱳᱚᱱᱟ ᱠᱚᱭ ᱧᱮᱞᱟ ᱠᱳᱵᱤᱱᱫᱟᱜ ᱱᱮᱛᱨᱤᱛᱛᱚᱫᱷᱤᱱ ᱵᱟᱥᱛᱚᱵᱟᱭᱚᱱ ᱠᱚᱢᱤᱴᱤ ᱾ ᱢᱮᱱᱠᱷᱟᱱ ᱴᱷᱟᱹᱣᱠᱟᱹ ᱜᱚᱴᱟ ᱦᱩᱭᱩᱜ ᱛᱟᱭᱟ ᱯᱟᱨᱞᱟᱢᱮᱱᱴ ᱜᱮ ᱾ᱱᱤᱭᱩ ᱫᱤᱞᱞᱤ ᱞᱟᱞ ᱵᱟᱦᱟᱫᱩᱨ ᱥᱟᱥᱛᱨᱤ ᱢᱮᱢᱚᱨᱤᱭᱟᱞ ᱨᱮ ᱵᱷᱟᱥᱚᱱ ᱮᱢ ᱚᱠᱛᱚ ᱢᱤᱫ ᱫᱤᱥᱚᱢ ᱨᱮ ᱢᱤᱫ ᱵᱷᱳᱴ (ONE NATION, ONE VOTE) ᱨᱮᱭᱟᱜ ᱠᱟᱛᱷᱟ ᱜᱮᱭ ᱞᱟᱹᱭ ᱞᱮᱫ ᱛᱟᱦᱮᱱᱟ ᱾ ᱠᱳᱵᱤᱱᱫᱟᱜ ᱡᱩᱠᱛᱤ ᱵᱷᱟᱨᱚᱛ ᱨᱮ ᱑᱙᱕᱒ ᱠᱷᱚᱱ ᱑᱙᱖᱗ ᱥᱟᱞ ᱦᱟᱹᱵᱤᱡ ᱛᱮ ᱫᱤᱥᱚᱢ ᱨᱮ ᱢᱤᱫ ᱥᱟᱶᱛᱮᱜᱮ ᱞᱳᱠᱥᱚᱵᱷᱟ ᱟᱨ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱦᱩᱭ ᱦᱮᱡ ᱟᱠᱟᱱᱟ, ᱚᱱᱟ ᱠᱷᱟᱹᱛᱤᱨ ᱱᱤᱛ ᱟᱨᱦᱚᱸ ᱫᱚᱲᱦᱟ ᱛᱮ ᱢᱤᱫ ᱥᱟᱶᱛᱮ ᱵᱷᱳᱴ ᱦᱩᱭ ᱞᱮᱱᱠᱷᱟᱱ ᱠᱤᱪᱷᱩ ᱛᱮᱜᱮ ᱥᱚᱝᱵᱤᱫᱷᱟᱱ ᱵᱤᱨᱳᱫᱷᱤ ᱵᱟᱝ ᱦᱩᱭ ᱫᱟᱲᱮᱭᱟᱜᱼᱟ ᱾ ᱢᱮᱱᱠᱷᱟᱱ ᱫᱤᱥᱚᱢ ᱨᱮᱭᱟᱜ ᱟᱭᱢᱟ ᱴᱷᱟᱶ ᱠᱷᱚᱱ ᱟᱸᱡᱚᱢ ᱧᱟᱢᱚᱜ ᱠᱟᱱᱟ ᱡᱮ ᱵᱟᱝᱢᱟ ᱢᱤᱫ ᱫᱤᱥᱚᱢ ᱨᱮ ᱢᱤᱫ ᱵᱷᱳᱴ ᱥᱚᱝᱵᱤᱫᱷᱟᱱ ᱵᱤᱨᱳᱫᱷᱤ ᱠᱟᱱᱟ ᱾ ᱵᱮᱥ ᱠᱤᱪᱷᱩ ᱥᱮᱨᱢᱟ ᱞᱟᱦᱟ ᱨᱮ ᱤᱞᱮᱠᱥᱚᱱ ᱠᱚᱢᱤᱥᱚᱱ ᱦᱚᱸ ᱢᱤᱫ ᱫᱤᱥᱚᱢ ᱢᱤᱫ ᱵᱷᱳᱴ (ONE NATION, ONE VOTE) ᱤᱫᱤ ᱠᱟᱛᱮᱫ ᱥᱚᱦᱚᱢᱚᱛ ᱛᱟᱦᱮᱸᱠᱟᱱ ᱛᱟᱭᱟ ᱢᱮᱱᱛᱮ ᱫᱟᱹᱵᱤ ᱟᱠᱟᱫᱟᱭ ᱠᱚᱢᱤᱴᱤ ᱨᱮᱱ ᱪᱮᱭᱟᱨᱢᱮᱱ ᱨᱟᱢᱱᱟᱛᱷ ᱠᱳᱵᱤᱱᱫᱽ ᱾ ᱠᱳᱵᱤᱱᱫᱟᱜ ᱢᱮᱱ ᱥᱚᱨᱠᱟᱨᱟᱜ ᱯᱮᱭᱟ ᱛᱷᱚᱠ ᱢᱮᱱᱫᱚ ᱞᱳᱠᱥᱚᱵᱷᱟ, ᱵᱤᱫᱷᱟᱱᱥᱚᱵᱷᱟ ᱟᱨ ᱯᱚᱧᱪᱟᱭᱮᱹᱛ ᱵᱟᱪᱷᱱᱟᱣ ᱢᱤᱫ ᱥᱟᱶᱛᱮ ᱦᱩᱭ ᱞᱮᱱᱠᱷᱟᱱ ᱫᱤᱥᱚᱢ ᱨᱮᱭᱟᱜ ᱡᱚᱛᱚ ᱨᱟᱥᱴᱨᱤᱭᱚ ᱠᱟᱴᱷᱟᱢᱳ (Federal Structure ᱠᱮᱴᱮᱡᱚᱜᱼᱟ ᱾
ᱢᱟᱨᱮ ᱨᱟᱥᱴᱨᱚᱯᱚᱛᱤᱭᱟᱜ ᱢᱮᱱ ᱵᱷᱟᱨᱚᱛ ᱨᱮ ᱑᱙᱖᱗ ᱥᱟᱞ ᱦᱟᱹᱵᱤᱡ ᱛᱮ ᱯᱚᱱᱭᱟ ᱞᱳᱠᱥᱚᱵᱷᱟ ᱵᱟᱪᱷᱱᱟᱣ ᱢᱤᱫ ᱥᱟᱶ ᱛᱮᱜᱮ ᱦᱩᱭ ᱟᱠᱟᱱᱟ, ᱢᱮᱱᱠᱷᱟᱱ ᱥᱚᱨᱠᱟᱨ ᱠᱤᱪᱷᱩ ᱠᱤᱪᱷᱩ ᱯᱚᱱᱚᱛ ᱨᱮ ᱨᱟᱥᱴᱨᱚᱯᱚᱛᱤ ᱥᱟᱥᱚᱱ ᱟᱨᱵᱟᱝ ᱚᱸᱰᱮᱱᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱚᱠᱛᱚ ᱨᱮ ᱵᱟᱝ ᱦᱩᱭᱞᱮᱱ ᱠᱷᱟᱹᱛᱤᱨ ᱯᱚᱨᱤᱥᱛᱷᱤᱛᱤ ᱵᱚᱫᱚᱞ ᱞᱮᱱ ᱛᱟᱦᱮᱱᱟ ᱾ ᱚᱱᱟ ᱠᱷᱟᱹᱛᱤᱨ ᱠᱳᱵᱤᱱᱫᱟᱜ ᱢᱮᱱ ᱫᱤᱥᱚᱢ ᱨᱮ ᱵᱟᱨᱼᱵᱟᱨ ᱵᱷᱳᱴ ᱦᱩᱭ ᱞᱮᱱ ᱠᱷᱟᱱ ᱥᱚᱨᱠᱟᱨᱟᱜ ᱩᱛᱱᱟᱹᱣ ᱠᱟᱹᱢᱤ ᱨᱮ ᱮᱴᱠᱮᱴᱚᱬᱮ ᱧᱮᱞᱚᱜ ᱠᱟᱱᱟ ᱟᱨ ᱤᱞᱞᱤᱜᱮᱞ ᱠᱟᱹᱣᱰᱤ ᱨᱮᱭᱟᱜ ᱞᱮᱱᱫᱮᱱ ᱵᱟᱹᱲᱛᱤᱜ ᱠᱟᱱ ᱛᱮ ᱵᱟᱪᱷᱱᱟᱣ ᱨᱮᱭᱟᱜ ᱯᱚᱵᱤᱛᱛᱨᱚᱛᱟ ᱠᱩᱭᱟᱹᱜ ᱠᱟᱱᱟ᱾
