highlights
᱑᱖ ᱚᱠᱴᱳᱵᱚᱨ ᱨᱮ ᱡᱚᱢᱢᱩ ᱠᱟᱥᱢᱤ ᱨᱮ ᱥᱚᱨᱠᱟᱨᱮ ᱜᱚᱴᱷᱚᱱᱟ ᱮᱱ ᱥᱤ
ᱥᱤᱨᱟᱹ ᱢᱚᱱᱛᱨᱤ ᱞᱮᱠᱟᱛᱮ ᱠᱤᱨᱭᱟᱹᱭ ᱦᱟᱛᱟᱣᱟ ᱳᱢᱚᱨ ᱟᱵᱽᱫᱩᱞᱞᱟ
ᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ ᱴᱷᱮᱱ ᱪᱤᱴᱷᱤᱛᱮ ᱥᱚᱨᱠᱟᱨ ᱜᱚᱴᱷᱚᱱ ᱨᱮᱭᱟᱜ ᱟᱨᱫᱟᱥ ᱮᱞ ᱡᱤᱭᱟᱜ
cpim, aap ᱟᱨ ᱱᱤᱨᱫᱚᱞ ᱵᱤᱫᱷᱟᱭᱚᱠ ᱠᱚᱦᱚᱸ ᱜᱚᱲᱚ ᱠᱚ ᱮᱢᱟᱣᱟᱫᱮᱭᱟ ᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ
(PAPUL MURMU) Omar Abdullah will take oath as CM on Wednesday : ᱦᱩᱭ ᱥᱟᱹᱛ ᱟᱠᱟᱱᱟ ᱡᱚᱢᱢᱩ ᱠᱟᱥᱢᱤᱨ ᱨᱮᱭᱟᱜ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ, ᱟᱨ ᱘ ᱚᱠᱴᱳᱵᱚᱨ ᱨᱮ ᱚᱨᱡᱚ ᱦᱚᱸ ᱩᱪᱷᱟᱹᱱ ᱟᱠᱟᱱᱟ ᱾ ᱤᱱᱰᱤᱭᱟ ᱡᱳᱴ ᱥᱟᱞᱟᱜ ᱔᱘ ᱜᱚᱴᱟᱝ ᱥᱤᱴ ᱨᱮ ᱡᱤᱛᱠᱟᱹᱨ ᱠᱟᱛᱮᱫ ᱥᱚᱨᱠᱟᱨ ᱜᱚᱴᱷᱚᱱ ᱨᱮᱭᱟᱜ ᱫᱟᱹᱵᱤᱭ ᱫᱚᱦᱚ ᱞᱮᱫᱟ ᱳᱢᱚᱨ ᱟᱵᱽᱫᱩᱞᱞᱟ ᱾ ᱟᱨ ᱚᱱᱟ ᱛᱟᱭᱚᱢ ᱜᱮ ᱞᱮᱯᱷᱴᱮᱱᱮᱱᱴ ᱜᱚᱵᱷᱚᱨᱱᱚᱨ (Lieutenant Governor) ᱯᱟᱥᱴᱟ ᱠᱷᱚᱱ NC ᱱᱮᱛᱟ ᱳᱢᱚᱨ ᱟᱵᱽᱫᱩᱞᱞᱟ ᱴᱷᱮᱱ ᱪᱤᱴᱷᱤ ᱥᱟᱠᱟᱢ ᱛᱟᱞᱟ ᱛᱮ ᱥᱚᱨᱠᱟᱨ ᱜᱚᱴᱷᱚᱱ ᱞᱟᱹᱜᱤᱫ ᱟᱨᱫᱟᱥ ᱟᱫᱮᱭᱟᱭ ᱾
ᱡᱚᱢᱢᱩ ᱠᱟᱥᱢᱤᱨ ᱵᱟᱪᱷᱱᱟᱣ ᱨᱮ ᱔᱒ ᱜᱚᱴᱟᱝ ᱥᱤᱴ ᱨᱮ ᱡᱤᱛᱠᱟᱹᱨ ᱠᱟᱛᱮᱫ ᱡᱚᱛᱚ ᱠᱷᱚᱱ ᱢᱟᱨᱟᱝ ᱯᱟᱨᱴᱤ ᱞᱮᱠᱟᱛᱮ ᱵᱟᱪᱷᱱᱟᱣ ᱮᱱᱟᱭ ᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ ᱾ ᱟᱨ ᱚᱱᱟ ᱥᱟᱶᱛᱮ ᱠᱚᱝᱜᱨᱮᱹᱥ ᱟᱯ, ᱟᱨ ᱱᱤᱨᱫᱚᱞᱤᱭᱚ ᱵᱤᱫᱷᱟᱭᱚᱠ ᱠᱚ ᱥᱚᱨᱠᱟᱨ ᱜᱚᱴᱷᱚᱱ ᱞᱟᱹᱜᱤᱫ ᱜᱚᱲᱚ ᱮᱢ ᱨᱮᱭᱟᱜ ᱠᱟᱛᱷᱟ ᱠᱚ ᱞᱟᱹᱭ ᱟᱠᱟᱫᱟ ᱾
ᱵᱟᱰᱟᱭ ᱛᱮᱭᱱᱜ ᱠᱟᱛᱷᱟ ᱡᱚᱢᱢᱩ ᱠᱟᱥᱢᱤᱨ ᱵᱟᱪᱷᱱᱟᱣ ᱨᱮ ᱡᱤᱛᱠᱟᱹᱨᱮ ᱧᱟᱢ ᱟᱠᱟᱫᱟ ᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ ᱟᱨ ᱠᱚᱝᱜᱨᱮᱹᱥ ᱡᱳᱴ ᱾ ᱟᱨ ᱡᱳᱴ ᱨᱮᱱ ᱱᱮᱛᱟ ᱞᱮᱠᱟᱛᱮᱭ ᱵᱟᱪᱷᱱᱟᱣ ᱮᱱᱟ NC ᱨᱮᱱ ᱵᱷᱟᱭᱤᱥ ᱯᱨᱮᱹᱥᱤᱰᱮᱱᱴ ᱳᱢᱚᱨ ᱟᱵᱽᱫᱩᱞᱞᱟ ᱾ ᱯᱟᱨᱚᱢᱮᱱ ᱑᱓ ᱚᱠᱴᱳᱵᱚᱨ ᱜᱮ ᱯᱚᱱᱚᱛ ᱠᱷᱚᱱ ᱨᱟᱥᱴᱨᱚᱯᱚᱛᱤ ᱥᱟᱥᱚᱱ ᱚᱪᱚᱜ ᱦᱩᱭ ᱟᱠᱟᱱᱟ, ᱡᱟᱦᱟᱸ ᱫᱚ ᱥᱚᱨᱠᱟᱨ ᱜᱚᱴᱷᱚᱱ ᱞᱟᱹᱜᱤᱫ ᱰᱟᱦᱟᱨᱮ ᱥᱟᱯᱷᱟ ᱠᱮᱫᱟ ᱾ ᱥᱚᱨᱠᱟᱨ ᱜᱚᱴᱷᱚᱱ ᱞᱟᱹᱜᱤᱫ ᱮᱞ ᱡᱤ ᱯᱟᱥᱴᱟ ᱠᱷᱚᱱ ᱦᱮᱡ ᱟᱠᱟᱱ ᱪᱤᱴᱷᱤ ᱨᱮᱭᱟᱜ ᱳᱢᱚᱨ ᱟᱵᱽᱫᱩᱞᱞᱟ ᱟᱡᱟᱜ ᱴᱩᱣᱤᱴ ᱛᱟᱞᱟ ᱛᱮᱭ ᱞᱟᱹᱭ ᱥᱚᱫᱚᱨ ᱠᱮᱫᱟ ᱾ ᱴᱩᱣᱤᱴ ᱨᱮ ᱳᱢᱚᱨᱟᱜ ᱚᱞᱞ ᱮᱞ ᱡᱤ ᱯᱟᱥᱴᱟ ᱠᱷᱚᱱ ᱥᱚᱨᱠᱟᱨ ᱵᱮᱱᱟᱣ ᱨᱮᱭᱟᱜ ᱪᱤᱴᱷᱤ ᱧᱟᱢ ᱠᱟᱛᱮᱫ ᱨᱟᱹᱥᱠᱟᱹᱭ ᱥᱚᱫᱚᱨ ᱠᱮᱫᱟ ᱾
LG ᱭᱟᱜ ᱪᱤᱴᱷᱤ ᱨᱮ ᱚᱞ ᱟᱠᱟᱱᱟ ᱡᱮ ᱡᱚᱢᱢᱩ ᱠᱟᱥᱢᱤᱨ ᱵᱤᱫᱷᱟᱱ ᱥᱚᱵᱷᱟ ᱨᱮ ᱫᱚᱞᱚᱱᱮᱛᱟ ᱞᱮᱠᱟᱛᱮᱭ ᱵᱟᱪᱷᱱᱟᱣ ᱟᱠᱟᱱᱟ ᱳᱢᱚᱨ ᱟᱵᱽᱫᱩᱞᱞᱟ ᱾
ᱚᱱᱟ ᱥᱟᱶᱛᱮ ᱠᱚᱝᱜᱨᱮᱹᱥ ᱥᱚᱵᱷᱟᱯᱚᱛᱤ ᱛᱟᱨᱤᱠ ᱦᱟᱢᱤᱫᱽ ᱠᱟᱨᱨᱟ (Tariq Hamid Karra), ᱥᱤ ᱯᱤ ᱮᱢ ᱥᱮᱹᱠᱨᱮᱹᱴᱟᱨᱤ ᱡᱮ ᱮᱱ ᱢᱟᱞᱤᱠ (JN MALIK), ᱟᱯ ᱱᱮᱛᱟ ᱯᱚᱝᱠᱚᱡᱽ ᱠᱩᱢᱟᱨ ᱜᱩᱯᱛᱟ (PANGKAJ KUMAR GUPTA), ᱱᱤᱨᱫᱚᱞ ᱵᱤᱫᱷᱟᱭᱚᱠ ᱯᱮᱭᱟᱨᱮ ᱞᱟᱞ ᱥᱚᱨᱢᱟ (PEYARE LAL SHARMA), ᱥᱚᱛᱤᱥ ᱥᱚᱨᱢᱟ (SATISH SHARMA), ᱮᱢ ᱰᱤ ᱟᱠᱨᱟᱢ ( MD AKRAM), ᱨᱟᱢᱮᱥᱥᱚᱨ ᱥᱤᱝ (RAMESHWAR SINGH) ᱞᱮᱠᱟᱱ ᱵᱤᱫᱷᱟᱭᱚᱠ ᱠᱚᱣᱟᱜ ᱪᱤᱴᱷᱤ ᱦᱚᱸᱭ ᱧᱟᱢ ᱟᱠᱟᱫᱟ, ᱡᱟᱦᱟᱸ ᱫᱚ ᱩᱱᱠᱩ ᱥᱚᱨᱠᱟᱨ ᱜᱚᱴᱷᱚᱱ ᱞᱟᱹᱜᱤᱫ ᱳᱢᱚᱨ ᱟᱵᱽᱫᱩᱞᱞᱟ ᱥᱚᱢᱚᱨᱛᱷᱚᱱ ᱠᱚ ᱮᱢ ᱟᱠᱟᱣᱫᱮᱭᱟ ᱾
