highlight
ᱥᱤᱨᱟᱹ ᱢᱚᱱᱛᱨᱤ ᱞᱮᱠᱟᱛᱮ ᱫᱚᱥᱟᱨ ᱤᱱᱤᱝᱥ ᱮᱛᱚᱦᱚᱵ ᱠᱮᱫᱟᱭ ᱱᱚᱭᱟᱵᱽ ᱥᱤᱝ ᱥᱟᱭᱱᱤ
ᱯᱤ ᱮᱢ ᱢᱳᱫᱤ ᱥᱟᱶᱛᱮ ᱥᱟᱭᱱᱤᱣᱟᱜ ᱠᱤᱨᱭᱟᱹ ᱦᱟᱛᱟᱣ ᱠᱟᱹᱢᱤ ᱨᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱵᱤ ᱡᱮ ᱯᱤ ᱨᱮᱱ ᱢᱟᱨᱟᱝ ᱟᱹᱜᱩᱣᱟᱹᱱ ᱠᱚ
ᱥᱟᱭᱱᱤᱣᱟᱜ ᱢᱚᱱᱛᱨᱤ ᱥᱚᱵᱷᱟ ᱨᱮ ᱚᱱᱤᱞ ᱵᱷᱤᱡᱽ ᱦᱚᱸ ᱠᱤᱨᱭᱟᱹᱭ ᱦᱟᱛᱟᱣ ᱠᱮᱫᱟ
(PAPUL MURMU) Nayab Singh Saini took oath as CM : ᱯᱟᱨᱚᱢᱮᱱ ᱥᱟᱹᱨᱫᱤ ᱢᱟᱦᱟ ᱦᱤᱞᱚᱜ ᱠᱮᱱᱫᱨᱤᱭᱚ ᱥᱚᱨᱟᱥᱴᱨᱚ ᱢᱚᱱᱛᱨᱤ ᱚᱢᱤᱫ ᱥᱟᱣᱟᱜ ᱥᱚᱨᱵᱚ ᱥᱚᱢᱢᱚᱛᱤ ᱦᱚᱛᱮᱛᱮ ᱦᱚᱨᱤᱭᱟᱱᱟ ᱵᱤ ᱡᱮ ᱯᱤ ᱯᱚᱨᱤᱥᱚᱫᱤᱭᱚ ᱫᱚᱞ ᱨᱮᱱ ᱱᱮᱛᱟ ᱞᱮᱠᱟᱛᱮ ᱵᱟᱪᱷᱱᱟᱣ ᱞᱮᱱᱟᱭ ᱱᱚᱭᱟᱵᱽ ᱥᱤᱝ ᱥᱟᱭᱱᱤ ᱾ ᱟᱨ ᱚᱱᱟ ᱛᱟᱭᱚᱢ ᱥᱟᱹᱜᱩᱱ ᱢᱟᱦᱟ ᱨᱮ ᱦᱚᱨᱤᱭᱟᱱᱟ ᱨᱮᱭᱟᱜ ᱯᱚᱧᱪᱚᱠᱩᱞᱟ ᱥᱟᱞᱤᱢᱟᱨ ᱜᱨᱟᱣᱩᱱᱰ ᱨᱮ ᱥᱤᱨᱟᱹ ᱢᱚᱱᱛᱨᱤ ᱞᱮᱠᱟᱛᱮ ᱠᱤᱨᱭᱟᱹᱭ ᱦᱟᱛᱟᱣ ᱠᱮᱫᱟ ᱱᱚᱭᱟᱵᱽ ᱥᱤᱝ ᱥᱟᱭᱱᱤ ᱾ ᱥᱟᱭᱱᱤ ᱫᱚ ᱨᱟᱡᱽᱡᱚᱯᱟᱞ ᱵᱚᱱᱫᱟᱨᱩ ᱫᱚᱛᱛᱟᱭᱮᱨ ᱴᱷᱮᱱ ᱠᱤᱨᱭᱟᱹᱭ ᱦᱟᱛᱟᱣ ᱠᱮᱫᱟ ᱾ ᱦᱚᱨᱤᱭᱟᱱᱟ ᱨᱮᱭᱟᱜ ᱱᱟᱣᱟ ᱢᱚᱱᱛᱨᱤᱥᱚᱵᱷᱟ ᱨᱮ ᱱᱚᱭᱟᱵᱽ ᱥᱤᱝ ᱥᱟᱭᱱᱤ ᱥᱟᱶᱛᱮ ᱟᱨᱦᱚᱸ ᱜᱮᱞᱵᱟᱨ ᱜᱚᱴᱟᱝ ᱵᱤᱫᱷᱟᱭᱚᱠ ᱦᱚᱸ ᱢᱚᱱᱛᱨᱤ ᱞᱮᱠᱟᱛᱮ ᱠᱤᱨᱭᱟᱹ ᱠᱚ ᱦᱟᱛᱟᱣ ᱟᱠᱟᱫᱟ ᱾ ᱩᱱᱠᱩ ᱢᱩᱫᱽ ᱨᱮ ᱢᱮᱱᱟᱜ ᱠᱚᱣᱟ ᱚᱱᱤᱞ ᱵᱷᱤᱡᱽ, ᱠᱨᱤᱥᱱᱚᱞᱟᱞ ᱯᱟᱱᱣᱟᱨ ᱞᱮᱠᱟᱱ ᱢᱟᱨᱟᱝ ᱟᱹᱜᱩᱣᱟᱹᱱ ᱠᱚ ᱾ ᱦᱚᱨᱤᱭᱟᱱᱟ ᱨᱮ ᱱᱚᱭᱟᱵᱽ ᱥᱤᱝ ᱥᱟᱭᱱᱤᱣᱟᱜ ᱠᱤᱨᱭᱟᱹ ᱦᱟᱛᱟᱣ ᱠᱟᱹᱢᱤᱦᱚᱨᱟ ᱨᱮ ᱯᱚᱱᱚᱛ ᱨᱮᱭᱟᱜ ᱟᱭᱢᱟ ᱴᱚᱴᱷᱟ ᱠᱷᱚᱱ ᱞᱟᱜᱽᱵᱷᱟᱜᱽ ᱕᱐ ᱦᱟᱡᱟᱨ ᱞᱮᱠᱟ ᱫᱚᱨᱥᱚᱠ ᱥᱟᱶᱛᱮ ᱵᱤ ᱡᱮ ᱯᱤ ᱱᱮᱛᱟ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱾
ᱯᱚᱧᱪᱚᱠᱩᱞᱟ ᱨᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱵᱤ ᱡᱮ ᱯᱤ ᱥᱟᱥᱤᱛᱚ ᱯᱚᱱᱚᱛ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱠᱚ ᱾ ᱙᱐ ᱟᱥᱚᱱ ᱨᱮᱭᱟᱜ ᱦᱚᱨᱤᱭᱟᱱᱟ ᱵᱤᱫᱷᱟᱱᱥᱚᱵᱷᱟ ᱨᱮ ᱟᱹᱨᱤ ᱞᱮᱠᱟᱛᱮ ᱥᱤᱨᱟᱹ ᱢᱚᱱᱛᱨᱤ ᱢᱮᱥᱟ ᱠᱟᱛᱮᱫ ᱑᱒ ᱜᱚᱴᱟᱝ ᱵᱤᱫᱷᱟᱭᱚᱠ ᱢᱚᱱᱛᱨᱤ ᱞᱮᱠᱟᱛᱮ ᱠᱚ ᱛᱟᱦᱮᱸ ᱫᱟᱲᱮᱭᱟᱜᱼᱟ ᱾ ᱦᱚᱨᱤᱭᱟᱱᱟ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱙᱐ ᱜᱚᱴᱟᱝ ᱥᱤᱴ ᱢᱩᱫᱽᱨᱮ ᱵᱤ ᱡᱮ ᱯᱤ ᱔᱘ ᱜᱚᱴᱟᱝ ᱥᱤᱴ ᱨᱮᱠᱚ ᱡᱤᱛᱠᱟᱹᱨ ᱟᱠᱟᱱᱟ ᱾ ᱚᱯᱚᱡᱤᱥᱚᱱ ᱯᱟᱨᱴᱤ ᱠᱚᱝᱜᱨᱮᱹᱥ ᱠᱚ ᱧᱟᱢ ᱟᱠᱟᱫᱟ ᱓᱗ ᱜᱚᱴᱟᱝ ᱥᱤᱴ ᱟᱨ ᱳᱢ ᱯᱨᱚᱠᱟᱥ ᱪᱳᱣᱛᱟᱞᱟᱣᱟᱜ ᱱᱮᱥᱱᱟᱞ ᱞᱳᱠᱫᱚᱞ ᱵᱟᱨᱭᱟ ᱟᱨ ᱱᱤᱨᱫᱚᱞ ᱯᱨᱟᱨᱛᱷᱤ ᱠᱚ ᱯᱮᱭᱟ ᱥᱤᱴ ᱨᱮ ᱡᱤᱛᱠᱟᱹᱨ ᱟᱠᱟᱱᱟ᱾
