ᱟᱭᱢᱟ ᱛᱟᱺᱜᱤ ᱛᱟᱲᱟᱜ ᱛᱟᱭᱚᱢ ᱥᱚᱱᱛᱳᱥ ᱴᱨᱚᱯᱷᱤ ᱠᱚ ᱡᱤᱛᱠᱟᱹᱨ ᱟᱠᱟᱱᱟ ᱵᱟᱝᱞᱟ ᱾ ᱚᱱᱟᱛᱮ ᱠᱷᱮᱹᱞᱳᱰᱤᱭᱟᱹ ᱠᱚ ᱟᱛᱟᱝ ᱫᱟᱨᱟᱢ ᱠᱚ ᱞᱟᱹᱜᱤᱫ ᱛᱮ ᱵᱷᱟᱹᱨᱤᱼᱵᱷᱚᱨᱚᱢᱟᱛᱮ ᱥᱟᱹᱦᱤᱡᱩᱦᱤ ᱦᱩᱭ ᱞᱮᱱᱟ ᱾ ᱨᱩ ᱥᱟᱰᱮᱛᱮ ᱜᱩᱢᱜᱩᱢᱟᱹᱜ ᱠᱟᱱ ᱛᱟᱦᱮᱸᱫ ᱵᱤᱢᱟᱱᱵᱚᱱᱫᱚᱨ ᱴᱚᱴᱷᱟ ᱾ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱯᱚᱱᱚᱛ ᱨᱮᱱ ᱠᱷᱮᱹᱞ ᱢᱚᱱᱛᱨᱤ ᱚᱨᱩᱯ ᱵᱤᱥᱥᱟᱥ ᱾ ᱱᱚᱣᱟ ᱵᱮᱜᱚᱨ ᱦᱚᱸ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱟᱭᱹᱮᱯᱷᱹᱮ ᱥᱚᱪᱤᱵᱽ ᱚᱱᱤᱨᱵᱟᱱ ᱫᱚᱛᱛᱚ, ᱥᱚᱵᱷᱟᱯᱚᱛᱤ ᱚᱡᱤᱛ ᱵᱚᱱᱫᱚᱹᱯᱟᱫᱽᱫᱷᱟᱭ, ᱥᱚᱦᱚᱼᱥᱚᱵᱷᱟᱯᱚᱛᱤ ᱥᱚᱨᱩᱯ ᱵᱤᱥᱥᱟᱥ ᱥᱟᱶᱛᱮ ᱟᱭᱢᱟ ᱢᱟᱨᱟᱝᱼᱢᱟᱨᱟᱝ ᱟᱹᱜᱩᱣᱟᱹᱱ ᱠᱚ ᱾ ᱵᱤᱢᱟᱱᱵᱚᱱᱫᱚᱨ ᱨᱮᱱᱟᱜ ᱞᱚᱵᱤᱨᱮ ᱡᱚᱠᱷᱚᱱ ᱥᱚᱧᱡᱚᱭ ᱥᱮᱱ, ᱨᱚᱵᱤ ᱦᱟᱸᱥᱫᱟ, ᱪᱟᱠᱩ ᱢᱟᱱᱰᱤ ᱮᱢᱟᱱ ᱵᱤᱢᱟᱱ ᱠᱷᱚᱱᱠᱚ ᱟᱲᱜᱳᱱ ᱠᱟᱱ ᱛᱟᱦᱮᱸᱫ ᱩᱱ ᱚᱠᱛᱚ ᱥᱟᱹᱜᱩᱱ ᱵᱮᱣᱨᱟᱭ ᱪᱟᱞ ᱟᱠᱚ ᱠᱟᱱ ᱛᱟᱦᱮᱸᱫ ᱠᱷᱮᱹᱞᱳᱰ ᱢᱚᱱᱛᱨᱤ ᱾ ᱩᱱᱤ ᱥᱚᱱᱛᱳᱥ ᱴᱨᱚᱯᱷᱤ ᱠᱚ ᱪᱟᱞ ᱟᱫᱮᱭᱟ ᱵᱟᱝᱞᱟ ᱨᱮᱱ ᱯᱷᱩᱴᱵᱚᱞ ᱠᱷᱮᱹᱞᱳᱰᱤᱭᱟᱹ ᱠᱚ ᱾ ᱚᱱᱟ ᱚᱠᱛᱚ ᱵᱟᱦᱨᱮ ᱨᱮ ᱛᱟᱺᱜᱤ ᱛᱟᱲᱟᱜ ᱠᱚ ᱛᱟᱦᱮᱸ ᱠᱟᱱᱟ ᱯᱷᱩᱴᱵᱚᱞ ᱠᱷᱮᱹᱞᱳᱰ ᱫᱩᱞᱟᱹᱲᱤᱭᱟᱹ ᱠᱚ ᱾
ᱵᱷᱟᱨᱚᱛᱤᱭᱚ ᱯᱷᱩᱴᱵᱚᱞ ᱨᱮᱱᱟᱜ ᱜᱟᱲ ᱞᱮᱠᱟᱛᱮ ᱩᱯᱨᱩᱢ ᱢᱮᱱᱟᱜᱼᱟ ᱵᱟᱝᱞᱟ ᱨᱮᱱᱟᱜ ᱾ ᱱᱚᱰᱮ ᱱᱚᱣᱟ ᱠᱷᱮᱹᱞ ᱵᱟᱵᱚᱫᱽ ᱟᱵᱮᱹᱜᱽ ᱨᱮᱱᱟᱜ ᱡᱟᱦᱟᱱ ᱠᱷᱟᱹᱢᱛᱤ ᱵᱟᱹᱱᱩᱜᱼᱟ ᱾ ᱮᱱᱦᱤᱞᱳᱜ ᱦᱚᱸ ᱚᱱᱟᱜᱮ ᱦᱩᱭᱮᱱᱟ ᱾ ᱥᱚᱱᱛᱳᱥ ᱴᱨᱚᱯᱷᱤ ᱡᱤᱛᱠᱟᱹᱨᱤᱭᱟᱹ ᱠᱚ ᱢᱤᱫ ᱫᱷᱟᱣ ᱡᱚᱴᱮᱫ ᱞᱟᱹᱜᱤᱫ ᱛᱮ ᱫᱩᱨᱩᱢᱼᱫᱩᱨᱩᱢ ᱠᱚ ᱥᱮᱴᱮᱨ ᱞᱮᱱᱟ ᱯᱷᱮᱱ ᱠᱚ ᱾ ᱵᱟᱝᱞᱟ ᱫᱚᱞ ᱥᱟᱹᱜᱩᱱ ᱵᱮᱣᱨᱟ ᱪᱟᱞ ᱞᱟᱹᱜᱤᱫ ᱛᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱯᱮᱭᱟ ᱯᱨᱚᱫᱷᱟᱱ ᱢᱮᱱᱫᱚ ᱤᱥᱴᱵᱮᱝᱜᱚᱞ, ᱢᱳᱦᱳᱱᱵᱟᱜᱟᱱ ᱟᱨ ᱢᱚᱦᱟᱢᱮᱰᱟᱱ ᱠᱞᱟᱵᱽ ᱨᱮᱱ ᱢᱩᱲᱦᱩᱫ ᱠᱚ ᱾ ᱛᱚᱵᱮ ᱱᱚᱣᱟ ᱠᱚ ᱵᱷᱤᱛᱤᱨ ᱠᱷᱚᱱ ᱦᱚᱸ ᱱᱤᱡᱮ ᱥᱟᱦᱟ ᱠᱟᱛᱮᱭ ᱛᱟᱦᱮᱸᱠᱟᱱᱟ ᱡᱤᱛᱠᱟᱹᱨ ᱨᱮᱱ ᱟᱥᱚᱞ ᱠᱟᱹᱨᱤᱜᱚᱞ ᱠᱳᱪ ᱥᱚᱧᱡᱚᱭ ᱥᱮᱱ ᱾ ᱢᱤᱫᱴᱮᱱ ᱚᱠᱛᱚ ᱜᱟᱹᱰᱤ ᱨᱮ ᱫᱮᱡᱚᱜ ᱞᱟᱹᱜᱤᱫ ᱛᱮ ᱛᱮᱭᱟᱨ ᱞᱮᱱᱟᱭ, ᱢᱮᱱᱠᱷᱟᱱ ᱠᱷᱮᱹᱞᱳᱰ ᱢᱚᱱᱛᱨᱤᱭᱟᱜ ᱦᱚᱦᱚᱛᱮ ᱨᱩᱣᱟᱹᱲ ᱦᱮᱡ ᱮᱱᱟᱭ ᱾ ᱚᱱᱟ ᱛᱟᱭᱚᱢ ᱢᱟᱹᱱᱢᱤᱭᱟᱜ ᱜᱟᱫᱮᱞ ᱛᱮ ᱦᱟᱞᱚᱛ ᱵᱟᱹᱲᱤᱡ ᱪᱟᱞᱟᱜ ᱠᱟᱱ ᱛᱟᱦᱮᱸᱫ ᱾ ᱡᱟᱦᱟᱸ ᱠᱷᱟᱹᱛᱤᱨ ᱜᱚᱴᱟ ᱫᱚᱞ ᱟᱨᱦᱚᱸ ᱵᱤᱢᱟᱱᱵᱚᱱᱫᱚᱨ ᱵᱷᱤᱛᱤᱨ ᱛᱮᱠᱚ ᱟᱫᱮᱨ ᱞᱮᱫ ᱠᱚᱣᱟ ᱾
ᱵᱤᱢᱟᱱᱵᱚᱱᱫᱚᱨ ᱨᱮ ᱨᱚᱵᱤ ᱦᱟᱸᱥᱫᱟ ᱨᱮᱱ ᱮᱨᱟᱼᱩᱨᱩ
ᱥᱟᱹᱜᱩᱱ ᱫᱟᱨᱟᱢ ᱞᱟᱹᱜᱤᱫ ᱛᱮ ᱵᱤᱢᱟᱱᱵᱚᱱᱫᱚᱨ ᱨᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱨᱚᱵᱤ ᱦᱟᱸᱥᱫᱟ ᱨᱮᱱ ᱮᱨᱟᱼᱩᱨᱩ ᱥᱟᱶᱛᱮ ᱜᱷᱟᱨᱚᱸᱡᱽ ᱦᱚᱲ ᱠᱚ ᱾ ᱯᱷᱮᱱ ᱠᱚᱣᱟᱜ ᱟᱵᱽᱫᱟᱨ ᱢᱮᱴᱟᱣ ᱠᱟᱛᱮ ᱵᱟᱹᱭᱼᱵᱟᱹᱭᱛᱮ ᱜᱷᱟᱨᱚᱸᱡᱽ ᱦᱚᱲ ᱴᱷᱮᱱᱮ ᱥᱮᱴᱮᱨ ᱨᱚᱵᱤ ᱦᱟᱸᱥᱫᱟ ᱾ ᱥᱮᱴᱮᱨ ᱠᱟᱛᱮᱜᱮ ᱦᱮᱢ ᱠᱮᱫᱮᱭᱟᱭ ᱟᱡᱨᱮᱱ ᱦᱩᱰᱤᱧ ᱢᱟᱹᱭ ᱨᱤᱢᱤ ᱾
ᱥᱚᱱᱛᱳᱥ ᱴᱨᱚᱯᱷᱤ ᱡᱤᱛᱠᱟᱹᱨ ᱨᱮ ᱥᱟᱱᱛᱟᱲ ᱠᱚᱲᱟ
ᱱᱮᱥᱟᱜ ᱥᱚᱱᱛᱳᱥ ᱴᱨᱚᱯᱷᱤ ᱡᱤᱛᱠᱟᱹᱨ ᱨᱮ ᱮᱭᱟᱭ ᱜᱚᱴᱟᱝ ᱥᱟᱱᱛᱟᱲ ᱠᱚᱲᱟᱣᱟᱜ ᱮᱱᱮᱢ ᱥᱚᱱᱟ ᱟᱠᱷᱚᱨ ᱛᱮ ᱠᱷᱚᱫᱟ ᱛᱟᱦᱮᱱᱟ ᱾ ᱩᱱᱠᱩ ᱢᱩᱫᱽ ᱨᱮ ᱠᱷᱮᱹᱞᱳᱰ ᱡᱤᱛᱠᱟᱹᱨ ᱨᱮᱱ ᱱᱟᱭᱚᱠ ᱨᱚᱵᱤ ᱦᱟᱸᱥᱫᱟ ᱾ ᱵᱟᱝᱞᱟ ᱫᱚᱞ ᱨᱮᱱ ᱠᱮᱯᱴᱮᱱ ᱪᱟᱠᱩ ᱢᱟᱱᱰᱤ ᱾ ᱵᱷᱟᱭᱤᱥ ᱠᱮᱯᱴᱮᱱ ᱛᱟᱨᱚᱠ ᱦᱮᱢᱵᱨᱚᱢ ᱾ ᱱᱩᱠᱩ ᱵᱮᱜᱚᱨ ᱦᱚᱸ ᱢᱚᱫᱚᱱ ᱢᱟᱱᱰᱤ, ᱨᱚᱵᱤᱞᱟᱞ ᱢᱟᱱᱰᱤ, ᱵᱟᱥᱩᱫᱮᱹᱵᱽ ᱢᱟᱱᱰᱤ ᱟᱨ ᱚᱢᱚᱨᱱᱟᱛᱷ ᱵᱟᱥᱠᱮᱹ ᱫᱚᱞ ᱵᱷᱤᱛᱤ ᱨᱮ ᱛᱟᱦᱮᱸ ᱠᱟᱛᱮ ᱟᱠᱳᱣᱟᱜ ᱧᱩᱛᱩᱢ ᱠᱚ ᱠᱷᱚᱫᱟᱣᱟᱠᱟᱫᱟ ᱾
