(PAPUL MURMU) Mandal Murmu joined BJP : ᱡᱷᱟᱲᱠᱷᱚᱸᱰ ᱨᱮ ᱦᱩᱭᱩᱜ ᱞᱟᱹᱜᱤᱫ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ, ᱵᱟᱪᱷᱱᱟᱣ ᱞᱟᱦᱟ ᱨᱮ ᱯᱚᱱᱚᱛ ᱨᱮᱱ ᱥᱟᱛᱛᱟᱫᱷᱟᱨᱤ ᱫᱚᱞ ᱡᱮᱹᱮᱢᱹᱮᱢ ᱠᱚ ᱧᱟᱢ ᱠᱮᱫᱟ ᱢᱤᱫ ᱢᱟᱨᱟᱝ ᱡᱷᱟᱴᱠᱟ ᱾ ᱥᱤᱝᱜᱟᱹ ᱢᱟᱦᱟ ᱦᱤᱞᱳᱜ ᱥᱟᱫᱷᱤᱱᱚᱛᱟ ᱥᱚᱝᱜᱨᱟᱢᱤ ᱥᱚᱦᱤᱫᱽ ᱥᱤᱫᱷᱩᱼᱠᱟᱹᱱᱩ ᱨᱮᱱ ᱵᱚᱝᱥᱚᱫᱷᱚᱨ ᱢᱚᱱᱰᱚᱞ ᱢᱩᱨᱢᱩ ᱵᱤᱹᱡᱮᱹᱯᱤ ᱨᱮᱭ ᱡᱳᱜᱽᱫᱟᱱ ᱠᱮᱫᱟ ᱾ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱢᱚᱱᱰᱚᱞ ᱢᱩᱨᱢᱩ ᱫᱚ ᱥᱤᱨᱟᱹ ᱢᱚᱱᱛᱨᱤ ᱦᱮᱢᱚᱱᱛ ᱥᱚᱨᱮᱱ ᱨᱮᱱ ᱯᱨᱚᱥᱛᱟᱵᱚᱠ ᱦᱚᱸ ᱠᱟᱱᱟᱭ ᱾
ᱡᱷᱟᱲᱠᱷᱚᱸᱰ ᱨᱮᱭᱟᱜ ᱨᱟᱡᱽᱱᱤᱛᱤ ᱨᱮ ᱵᱮᱹᱥ ᱠᱤᱪᱷᱩ ᱫᱤᱱ ᱠᱷᱚᱱ ᱜᱮ ᱪᱚᱨᱪᱟ ᱨᱮᱭ ᱛᱟᱦᱮᱸ ᱠᱟᱱᱟ ᱢᱚᱱᱰᱚᱞ ᱢᱩᱨᱢᱩ ᱾ ᱠᱤᱪᱷᱩ ᱫᱤᱱ ᱞᱟᱦᱟ ᱜᱮ ᱜᱳᱰᱰᱟ ᱨᱮᱱ ᱥᱟᱝᱥᱚᱫᱽ ᱱᱤᱥᱤᱠᱟᱱᱛ ᱫᱩᱵᱮᱹ ᱢᱚᱱᱰᱚᱞ ᱢᱩᱨᱢᱩ ᱥᱟᱶᱛᱮᱭ ᱧᱟᱯᱟᱢ ᱞᱮᱱ ᱛᱟᱦᱮᱱᱟ ᱾ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱥᱟᱱᱛᱟᱞ ᱯᱟᱨᱜᱟᱱᱟ ᱨᱮᱭᱟᱜ ᱵᱟᱨᱦᱮᱹᱴ ᱥᱤᱴ ᱠᱷᱚᱱ ᱡᱮᱹᱮᱢᱹᱮᱢ ᱨᱮᱱ ᱯᱨᱟᱨᱛᱷᱤ ᱦᱮᱢᱚᱱᱛ ᱥᱚᱨᱮᱱ, ᱵᱟᱨᱦᱮᱹᱴ ᱥᱤᱴ ᱠᱷᱚᱱ ᱱᱚᱢᱤᱱᱮᱥᱚᱱ ᱦᱚᱸᱭ ᱡᱚᱢᱟ ᱠᱮᱫᱟ ᱾ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱢᱚᱱᱰᱚᱞ ᱢᱩᱨᱢᱩ ᱫᱚ ᱦᱮᱢᱚᱱᱛ ᱥᱚᱨᱮᱱ ᱨᱮᱱ ᱯᱨᱚᱥᱛᱟᱵᱚᱠ ᱦᱚᱸ ᱠᱟᱱᱟᱭ ᱾
ᱢᱚᱱᱰᱚᱞ ᱢᱩᱨᱢᱩᱣᱟᱜ ᱡᱳᱜᱽᱫᱟᱱ ᱠᱟᱹᱢᱤ ᱦᱚᱨᱟ ᱨᱮ ᱥᱮᱞᱮᱫ ᱠᱚ ᱛᱟᱦᱮᱸ ᱠᱟᱱᱟ ᱠᱮᱱᱫᱨᱤᱭᱚ ᱢᱚᱱᱛᱨᱤ ᱥᱤᱵᱽᱨᱟᱡᱽ ᱥᱤᱝ ᱪᱳᱣᱦᱟᱱ, ᱟᱥᱟᱢ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱟᱨᱵᱟᱝ ᱡᱷᱟᱲᱠᱷᱸᱚᱰ ᱨᱮᱱ ᱵᱤᱹᱡᱮᱹᱯᱤ ᱚᱵᱽᱡᱟᱨᱵᱷᱟᱨ ᱦᱤᱢᱚᱱᱛᱚ ᱵᱤᱥᱥᱚ ᱥᱚᱨᱢᱟ, ᱡᱟᱨᱛᱟᱲᱟ ᱥᱤᱴ ᱨᱮᱱ ᱵᱤᱹᱡᱮᱹᱯᱤ ᱯᱨᱟᱨᱛᱷᱤ ᱥᱤᱛᱟ ᱥᱚᱨᱮᱱ ᱟᱨ ᱥᱟᱱᱛᱟᱞ ᱯᱟᱨᱜᱟᱱᱟ ᱨᱮᱱ ᱵᱤᱹᱡᱮᱹᱯᱤ ᱠᱮᱹᱱᱰᱤᱰᱮᱹᱴ ᱠᱚ ᱾
ᱵᱤᱹᱡᱮᱹᱯᱤ ᱨᱮ ᱥᱮᱞᱮᱫ ᱛᱟᱭᱚᱢ ᱜᱮ ᱢᱚᱱᱰᱚᱞ ᱢᱩᱨᱢᱩᱣᱟᱜ ᱞᱟᱹᱭ ᱥᱟᱱᱛᱟᱞ ᱯᱟᱨᱜᱟᱱᱟ ᱨᱮ ᱵᱟᱝᱞᱟᱫᱮᱹᱥᱤ ᱚᱱᱩᱯᱨᱚᱵᱮᱹᱥ ᱤᱫᱤ ᱠᱟᱛᱮᱫ ᱡᱟᱦᱟᱸ ᱮᱴᱠᱮᱴᱚᱬᱮ ᱢᱮᱱᱟᱜᱼᱟ ᱚᱱᱟ ᱪᱟᱵᱟᱭ ᱞᱟᱹᱜᱤᱫ ᱜᱮ ᱵᱤᱹᱡᱮᱹᱯᱤ ᱨᱮ ᱫᱚᱭ ᱥᱮᱞᱮᱫ ᱟᱠᱟᱱᱟ ᱾
ᱫᱟᱨᱟᱭ ᱠᱟᱱ ᱑᱓ ᱟᱨ ᱒᱐ ᱱᱚᱵᱷᱮᱹᱢᱵᱚᱨ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱘᱑ ᱥᱤᱴ ᱨᱮ ᱵᱟᱪᱷᱱᱟᱣ ᱟᱨ ᱚᱨᱡᱚ ᱩᱪᱷᱟᱹᱱ ᱦᱩᱭᱩᱜᱼᱟ ᱒᱓ ᱱᱚᱵᱷᱮᱹᱢᱵᱚᱨ ᱨᱮ ᱾
