ᱨᱟᱡᱽᱱᱤᱛᱤ ᱵᱟᱭᱨᱮ ᱨᱮᱦᱚᱸ ᱱᱤᱡᱮᱨᱟᱜ ᱡᱤᱭᱚᱱ ᱢᱮ ᱾ ᱢᱟᱡᱷᱮᱼᱢᱟᱡᱷᱮ ᱜᱮ ᱚᱱᱟ ᱡᱤᱭᱚᱱ ᱠᱚ ᱠᱷᱟᱸᱰᱟᱣᱟ ᱾ ᱚᱱᱟᱛᱮ ᱱᱟᱦᱟᱜ ᱡᱩᱜᱽ ᱨᱮ ᱨᱟᱡᱽᱼᱟᱹᱨᱤ ᱟᱹᱭᱩᱨᱤᱭᱟᱹ ᱠᱚᱣᱟᱜ ᱦᱚᱸ ᱵᱷᱮᱜᱟᱨ ᱮᱱᱮᱢ ᱧᱮᱞᱚᱜ ᱠᱟᱱ ᱛᱟᱠᱚᱣᱟ ᱾ ᱦᱟᱞᱮᱜᱮ ᱫᱤᱞᱞᱤ ᱨᱮᱱᱟᱜ ᱯᱷᱮᱥᱚᱱ ᱥᱳ ᱨᱮᱭ ᱛᱟᱲᱟᱢ ᱞᱮᱫᱟ ᱵᱤ.ᱡᱮ.ᱯᱤ ᱥᱟᱝᱥᱚᱫᱽ ᱥᱩᱠᱟᱱᱛᱚ ᱢᱚᱡᱩᱢᱫᱟᱨ ᱾ ᱚᱱᱟ ᱛᱟᱭᱚᱢ ᱨᱮᱢᱯ ᱨᱮᱭ ᱧᱮᱞᱧᱟᱢᱮᱱᱟ ᱯᱚᱱᱚᱛ ᱨᱮᱱ ᱢᱚᱱᱛᱨᱤ ᱡᱳᱛᱥᱱᱟ ᱢᱟᱱᱰᱤ ᱾ ᱩᱱᱤ ᱟᱹᱫᱤᱵᱟᱹᱥᱤ ᱯᱷᱮᱥᱚᱱ ᱥᱳ ᱨᱮᱭ ᱛᱟᱲᱟᱢ ᱠᱮᱫᱟ ᱾
ᱵᱟᱸᱠᱩᱲᱟ ᱡᱮᱞᱟ ᱯᱨᱚᱥᱟᱥᱚᱱ ᱯᱟᱦᱴᱟ ᱠᱷᱚᱱ ᱓᱗ ᱟᱱᱟᱜ ᱵᱤᱥᱱᱩᱯᱩᱨ ᱢᱮᱞᱟ ᱠᱚ ᱥᱟᱹᱦᱤᱡᱩᱦᱤ ᱞᱮᱫᱟ ᱾ ᱚᱱᱟ ᱢᱮᱞᱟ ᱨᱮᱱᱟᱜ ᱢᱩᱞ ᱢᱚᱧᱪᱚ ᱨᱮ ᱟᱹᱫᱤᱵᱟᱹᱥᱤ ᱯᱷᱮᱥᱚᱱ ᱥᱳ ᱨᱮ ᱨᱮᱢᱯᱼᱮ ᱛᱟᱲᱟᱢ ᱠᱮᱫᱟ ᱡᱳᱛᱥᱱᱟ ᱢᱟᱱᱰᱤ ᱾ ᱟᱹᱫᱤᱵᱟᱹᱥᱤ ᱵᱚᱭᱦᱟᱼᱵᱩᱦᱤᱱ ᱠᱚ ᱥᱟᱞᱟᱜ ᱨᱮᱢᱯ ᱨᱮᱭ ᱛᱟᱲᱟᱢ ᱠᱮᱫᱟ ᱯᱚᱱᱚᱛ ᱨᱮᱱ ᱢᱚᱱᱛᱨᱤ ᱡᱳᱛᱥᱱᱟ ᱢᱟᱱᱰᱤ ᱾ ᱞᱟᱹᱭ ᱠᱮᱫᱟᱭ ᱟᱹᱫᱤᱵᱟᱹᱥᱤ ᱚᱠᱟᱥᱮᱫ ᱛᱮᱦᱚᱸ ᱛᱟᱭᱚᱢ ᱨᱮ ᱵᱟᱹᱱᱩᱜ ᱠᱚᱣᱟ ᱾ ᱥᱚᱢᱟᱡᱽ ᱨᱮᱱᱟᱜ ᱥᱟᱱᱟᱢ ᱴᱷᱟᱶ ᱨᱮᱜᱮ ᱟᱹᱫᱵᱟᱹᱥᱤ ᱥᱚᱢᱟᱡᱽ ᱨᱮᱱ ᱟᱹᱜᱩᱣᱟᱹᱱ ᱠᱚ ᱢᱮᱱᱟᱜ ᱠᱚᱣᱟ ᱾
ᱟᱹᱫᱤᱵᱟᱹᱥᱤᱭᱟᱜ ᱟᱹᱨᱤᱪᱟᱹᱞᱤ ᱥᱟᱵ ᱨᱟᱠᱟᱵ ᱞᱟᱹᱜᱤᱫ ᱜᱮ ᱱᱚᱣᱟ ᱯᱷᱮᱥᱚᱱ ᱥᱳ ᱥᱟᱹᱦᱤᱡᱩᱦᱤ ᱦᱩᱭ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ ᱪᱤᱨᱜᱟᱹᱞ ᱞᱟᱹᱜᱤᱫ ᱛᱮᱦᱚᱸ ᱥᱟᱹᱦᱤᱡᱩᱦᱤ ᱦᱩᱭ ᱟᱠᱟᱱᱟ ᱾ ᱠᱮᱱᱥᱟᱨ ᱵᱟᱵᱚᱫᱽ ᱥᱚᱱᱛᱚᱨ ᱞᱟᱹᱜᱤᱫ ᱛᱮ ᱢᱤᱫᱴᱮᱱ ᱠᱟᱹᱢᱤᱦᱚᱨᱟ ᱦᱚᱸ ᱥᱟᱯᱲᱟᱣ ᱞᱮᱱᱟ ᱾ ᱚᱸᱰᱮ ᱮᱱᱮᱡᱼᱮ ᱥᱟᱵ ᱡᱳᱛᱥᱱᱟ ᱢᱟᱱᱰᱤ ᱦᱚᱸ ᱾ ᱢᱤᱫ ᱠᱟᱛᱷᱟ ᱛᱮ ᱟᱹᱰᱤᱜᱮ ᱡᱚᱢᱠᱟᱣ ᱟᱠᱟᱱ ᱛᱟᱦᱮᱸᱫ ᱟᱠᱷᱲᱟ ᱾ ᱢᱮᱱᱠᱷᱟᱱ ᱨᱟᱡᱽᱼᱟᱹᱨᱤ ᱢᱚᱧᱪᱚ ᱠᱷᱚᱱ ᱨᱮᱢᱯᱼᱚᱣᱟᱠ, ᱪᱤᱠᱟᱹᱛᱮᱭ ᱥᱟᱢᱲᱣᱟ ?
ᱛᱮᱞᱟ ᱨᱮ ᱞᱟᱹᱭ ᱠᱮᱫᱟᱭ, ‘ᱱᱩᱱᱟᱹᱜ ᱫᱤᱱ ᱨᱟᱡᱽᱼᱟᱹᱨᱤ ᱞᱟᱹᱜᱤᱫ ᱰᱟᱦᱟᱨ ᱨᱮᱧ ᱛᱟᱲᱟᱢ ᱾ ᱱᱤᱭᱟᱹᱫᱷᱟᱣ ᱨᱮᱢᱯᱼᱚᱣᱟᱠ ᱾ ᱯᱷᱟᱨᱟᱠ ᱢᱮᱱᱟᱜᱼᱟ ᱾ ᱟᱹᱫᱤᱵᱟᱹᱥᱤᱭᱟᱜ ᱱᱚᱣᱟ ᱯᱷᱮᱥᱚᱱ ᱥᱳ ᱟᱹᱰᱤᱜᱮ ᱱᱟᱣᱟ ᱜᱮᱭᱟ ᱾ ᱱᱤᱭᱟᱹ ᱞᱟᱦᱟ ᱢᱩᱠᱩᱴᱢᱚᱱᱤᱯᱩᱨ ᱨᱮᱦᱚᱧ ᱠᱚᱨᱟᱣ ᱟᱠᱟᱫᱟ ᱾ ᱱᱤᱭᱟᱹᱫᱷᱟᱣ ᱵᱤᱥᱱᱩᱯᱩᱨ ᱨᱮ ᱾’ ᱯᱚᱱᱚᱛ ᱥᱚᱨᱠᱟᱨᱟᱜ ᱱᱟᱯᱟᱭ ᱯᱚᱨᱛᱚᱱ ᱵᱟᱵᱚᱫᱽ ᱦᱚᱸᱭ ᱢᱮᱱ ᱟᱠᱟᱫᱟ ᱡᱳᱛᱥᱱᱟ ᱢᱟᱱᱰᱤ ᱾ ᱩᱱᱤᱭᱟᱜ ᱠᱟᱛᱷᱟ ᱛᱮ, “ᱟᱞᱮ ᱡᱟᱦᱟᱸᱭ ᱛᱚᱯᱚᱥᱤᱞᱤ ᱡᱟᱛᱤ ᱟᱨ ᱩᱯᱚᱡᱟᱛᱤ, ᱥᱤᱨᱟᱹ ᱢᱚᱱᱛᱨᱤᱭᱟᱜ ᱩᱫᱽᱜᱟᱹᱣ ᱛᱮ, ᱩᱱᱤᱭᱟᱜ ᱜᱚᱲᱚᱥᱚᱯᱚᱦᱚᱫ ᱛᱮ, ᱥᱚᱨᱠᱟᱨᱤ ᱯᱚᱨᱛᱚᱱ ᱨᱮᱱᱟᱜ ᱥᱩᱵᱤᱫᱷᱟ ᱧᱟᱢ ᱠᱟᱛᱮ ᱞᱟᱯᱷᱟᱝ ᱥᱟᱹᱨ ᱨᱮᱞᱮ ᱥᱮᱴᱮᱨ ᱟᱠᱟᱱᱟ ᱾ ᱟᱹᱫᱤᱵᱟᱹᱥᱤ ᱯᱷᱮᱥᱚᱱ ᱥᱳ ᱛᱟᱞᱟᱛᱮ ᱟᱞᱮ ᱞᱮ ᱥᱟᱵ ᱨᱟᱠᱟᱵ ᱠᱮᱫᱟ ᱾ ᱟᱹᱫᱤᱵᱟᱹᱥᱤ ᱵᱚᱭᱦᱟ ᱠᱚ ᱞᱟᱹᱜᱤᱫ ᱵᱮᱣᱨᱟ ᱦᱚᱸᱭ ᱪᱟᱞ ᱠᱮᱫᱟ, “ᱥᱮᱪᱮᱫ, ᱥᱮᱪᱮᱫ, ᱥᱮᱪᱮᱫ ᱾ ᱚᱞᱼᱯᱟᱲᱦᱟᱣ ᱞᱮᱱᱠᱷᱟᱱ ᱜᱮ ᱥᱚᱢᱟᱡᱽ ᱪᱤᱨᱜᱟᱹᱞ ᱜᱟᱱᱚᱜᱼᱟ, ᱵᱚᱱᱚᱫᱚᱞ ᱜᱟᱱᱚᱜᱚᱜᱼᱟ ᱾ ᱯᱩᱞᱤᱥ, ᱩᱠᱤᱞ ᱡᱚᱛᱚᱜᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱾ ᱟᱹᱫᱤᱢ ᱠᱚ ᱚᱠᱟᱥᱮᱫ ᱛᱮᱦᱚᱸ ᱛᱟᱭᱚᱢ ᱨᱮ ᱵᱟᱹᱱᱩᱜ ᱠᱚᱣᱟ ᱾ ᱟᱞᱮ ᱥᱟᱱᱟᱢ ᱯᱨᱚᱯᱷᱮᱹᱥᱚᱱ ᱨᱮᱜᱮ ᱢᱮᱱᱟᱜ ᱞᱮᱭᱟ, ᱡᱟᱦᱟᱸᱞᱮ ᱡᱷᱟᱞᱠᱟᱣ ᱨᱟᱠᱟᱵ ᱠᱮᱫᱟ ᱯᱷᱮᱥᱚᱱ ᱥᱳ ᱛᱟᱞᱟᱛᱮ ᱾
