ᱛᱮᱥᱟᱨ ᱚᱠᱴᱳᱵᱚᱨ ᱠᱷᱚᱱ ᱮᱛᱚᱦᱚᱵ ᱟᱠᱟᱱᱟ ᱛᱤᱨᱞᱟᱹ ᱠᱚᱣᱟᱜ ᱴᱤᱼᱴᱩᱭᱮᱱᱴᱤ ᱚᱣᱨᱞᱰ ᱠᱟᱯ ᱾ ᱵᱟᱜᱮ ᱚᱠᱴᱳᱵᱚᱨ ᱦᱤᱞᱳᱜ ᱢᱮᱱᱟᱜ ᱟᱠᱟᱫᱟ ᱯᱷᱟᱭᱱᱟᱞ ᱢᱮᱪ ᱾ ᱱᱤᱭᱟᱹᱫᱷᱟᱣ ᱠᱷᱮᱹᱞ ᱦᱩᱭᱩᱜ ᱠᱟᱱᱟ ᱭᱩᱱᱟᱭᱴᱮᱹᱰ ᱟᱨᱚᱵᱽ ᱮᱢᱟᱭᱨᱮᱹᱴᱥ ᱨᱮ ᱾ ᱡᱚᱛᱚ ᱠᱚᱛᱮ ᱜᱮᱞ ᱜᱚᱴᱟᱝ ᱴᱤᱢ ᱫᱟᱣ ᱠᱚ ᱦᱟᱛᱟᱣᱟᱠᱟᱫᱟ ᱾ ᱱᱚᱣᱟ ᱴᱤᱼᱴᱩᱭᱮᱱᱴᱤ ᱥᱤᱡᱤᱱ ᱨᱮ ᱵᱟᱜᱮ ᱯᱮ ᱜᱚᱴᱟᱝ ᱢᱮᱪ ᱦᱩᱭᱩᱜᱼᱟ ᱾ ᱦᱳᱥᱴ ᱴᱤᱢ ᱞᱮᱠᱟᱛᱮ ᱢᱮᱱᱟᱭᱟ ᱵᱟᱝᱞᱟᱫᱮᱹᱥ ᱾ ᱤᱱᱟᱹ ᱵᱟᱫᱽ ᱠᱟᱛᱮᱫ ᱦᱚᱸ ᱢᱮᱱᱟᱜ ᱠᱚᱣᱟ ᱚᱥᱴᱨᱮᱞᱤᱭᱟ, ᱤᱝᱞᱮᱱᱰ, ᱤᱱᱰᱤᱭᱟ, ᱥᱟᱣᱩᱛᱷ ᱟᱯᱷᱨᱤᱠᱟ, ᱱᱤᱭᱩᱡᱤᱞᱮᱱᱰ, ᱚᱭᱮᱥᱴ ᱤᱱᱰᱤᱡᱽ, ᱯᱟᱠᱤᱥᱛᱷᱟᱱ, ᱥᱠᱚᱴᱞᱮᱱᱰ ᱟᱨ ᱥᱨᱤᱞᱚᱝᱠᱟ ᱾ ᱵᱟᱨᱭᱟ ᱜᱨᱩᱯ ᱨᱮ ᱦᱟᱹᱴᱤᱧ ᱠᱟᱛᱮ ᱦᱩᱭᱩᱜᱼᱟ ᱠᱷᱮᱹᱞ ᱾ ‘A’ ᱜᱨᱩᱯ ᱨᱮ ᱢᱮᱱᱟᱜ ᱠᱚᱣᱟ ᱱᱤᱭᱩᱡᱤᱞᱮᱱᱰ, ᱚᱥᱴᱨᱮᱞᱤᱭᱟ, ᱯᱟᱠᱤᱥᱛᱷᱟᱱ, ᱥᱨᱤᱞᱚᱝᱠᱟ ᱟᱨ ᱤᱱᱰᱤᱭᱟ ᱾ ‘B’ ᱜᱨᱩᱯ ᱨᱮ ᱢᱮᱱᱟᱜ ᱠᱚᱣᱟ ᱤᱝᱞᱮᱱᱰ, ᱥᱟᱣᱩᱛᱷ ᱟᱯᱷᱨᱤᱠᱟ, ᱵᱟᱝᱞᱟᱫᱮᱹᱥ, ᱚᱭᱮᱥᱴ ᱤᱱᱰᱤᱡᱽ ᱟᱨ ᱥᱠᱚᱴᱞᱮᱱᱰ ᱾ ‘A’ ᱜᱨᱩᱯ ᱠᱷᱚᱱ ᱪᱮᱛᱟᱱ ᱥᱟᱹᱨ ᱨᱮᱱ ᱵᱟᱨᱭᱟ ᱟᱨ ‘B’ ᱜᱨᱩᱯ ᱠᱷᱚᱱ ᱦᱚᱸ ᱪᱮᱛᱟᱱ ᱥᱟᱹᱨ ᱨᱮᱱ ᱵᱟᱨᱭᱟ ᱴᱤᱢ ᱥᱮᱢᱤ ᱯᱷᱟᱭᱱᱟᱞ ᱨᱮᱠᱤᱱ ᱨᱟᱠᱟᱵᱼᱟ ᱾ ᱒᱐ ᱛᱟᱹᱨᱤᱠᱷ ᱦᱤᱞᱳᱜ ᱦᱩᱭᱩᱜᱼᱟ ᱯᱷᱟᱭᱱᱟᱞ ᱢᱮᱪ ᱾
ᱵᱟᱰᱟᱭ ᱡᱚᱝ ᱞᱟᱹᱜᱽ ᱠᱟᱱᱟ ᱢᱮᱹᱱᱥ ᱴᱤᱼᱴᱩᱭᱮᱱᱴᱤ ᱥᱟᱶᱼᱥᱟᱶᱛᱮ ᱛᱤᱨᱞᱟᱹ ᱠᱚᱣᱟᱜ ᱴᱤᱼᱴᱩᱭᱮᱱᱴᱤ ᱦᱚᱸ ᱵᱷᱟᱜᱮ ᱡᱚᱱᱚᱯᱨᱤᱭᱚᱛᱟᱭ ᱧᱟᱢ ᱟᱠᱟᱫᱟ ᱾ ᱢᱮᱹᱱᱥ ᱴᱤᱼᱴᱩᱭᱮᱱᱴᱤ ᱚᱣᱟᱨᱞᱰ ᱠᱟᱯ ᱮᱛᱚᱦᱚᱵ ᱞᱮᱱᱟ 2007 ᱥᱟᱹᱦᱤᱛ ᱠᱷᱚᱱ ᱾ ᱚᱱᱟᱠᱟᱜᱮ ᱛᱤᱨᱞᱟᱹ ᱠᱚᱣᱟᱜ ᱴᱤᱼᱴᱩᱭᱮᱱᱴᱤ ᱚᱣᱟᱨᱞᱰ ᱠᱟᱯ ᱮᱛᱚᱦᱚᱵ ᱞᱮᱱᱟ 2009 ᱥᱟᱹᱦᱤᱛ ᱠᱷᱚᱱ ᱾ ᱯᱟᱨᱚᱢᱮᱱ ᱥᱮᱨᱢᱟ ᱛᱤᱨᱞᱟᱹ ᱠᱚᱣᱟᱜ ᱴᱤᱼᱴᱩᱭᱮᱱᱴᱤ ᱚᱣᱟᱨᱞᱰ ᱠᱟᱯ ᱨᱮ ᱪᱮᱢᱯᱤᱭᱚᱱ ᱞᱮᱱᱟ ᱠᱚ ᱚᱥᱴᱨᱮᱞᱤᱭᱟ ᱾ ᱡᱚᱛᱚ ᱠᱷᱚᱱ ᱡᱟᱹᱥᱛᱤ ᱚᱥᱴᱨᱮᱞᱤᱭᱟ ᱜᱮ ᱢᱮᱱᱫᱚ ᱴᱤᱼᱴᱩᱭᱮᱱᱴᱤ ᱚᱣᱟᱨᱞᱰ ᱠᱟᱯ ᱨᱮ ᱛᱩᱨᱩᱭ ᱫᱷᱟᱣ ᱠᱚ ᱪᱮᱢᱯᱤᱭᱚᱱ ᱟᱠᱟᱱᱟ ᱾ ᱤᱝᱞᱮᱱᱰ ᱟᱨ ᱚᱭᱮᱥᱴ ᱤᱱᱰᱤᱡᱽ ᱦᱚᱸ ᱢᱤᱫ ᱫᱷᱟᱣ ᱠᱟᱛᱮ ᱠᱤᱱ ᱪᱮᱢᱯᱤᱭᱚᱱ ᱟᱠᱟᱱᱟ ᱾
