ᱠᱷᱚᱭᱨᱟᱥᱳᱞ ᱠᱳᱞᱤᱭᱟᱨᱤ ᱨᱮ ᱵᱚᱛᱚᱨᱟᱱ ᱵᱞᱟᱥᱴ, ᱢᱚᱲᱮ ᱜᱚᱴᱟᱝ ᱠᱟᱹᱢᱤᱭᱟᱹ ᱜᱩᱨ ᱜᱩᱨ ᱨᱮᱱᱟᱜ ᱟᱭᱼᱩᱢᱟᱹᱱ ᱾ ᱜᱷᱟᱹᱞ ᱟᱠᱟᱱᱟᱠᱚ ᱟᱭᱢᱟ ᱜᱟᱱ ᱾ ᱫᱟᱱᱟᱝ ᱰᱚᱜᱚᱨ ᱠᱷᱚᱱ ᱵᱟᱰᱟᱭ ᱧᱟᱢᱟᱠᱟᱱᱟ, ᱠᱷᱳᱭᱨᱟᱥᱳᱞ ᱨᱮᱱᱟᱜ ᱵᱷᱟᱫᱩᱞᱤᱭᱟ ᱟᱹᱛᱩ ᱨᱮ ᱠᱚᱭᱞᱟ ᱦᱟᱞᱟᱝ ᱠᱚ ᱪᱟᱞᱟᱣ ᱞᱮᱱᱟ ᱠᱤᱪᱷᱩᱜᱟᱱ ᱦᱚᱲ ᱾ ᱩᱱ ᱚᱠᱛᱚ ᱨᱮᱜᱮ ᱱᱚᱣᱟ ᱜᱷᱚᱴᱚᱱ ᱜᱷᱚᱴᱟᱣ ᱟᱠᱟᱱᱟ ᱾ ᱥᱚᱨᱠᱟᱨᱤ ᱠᱷᱟᱹᱫᱟᱹᱱ ᱨᱮ ᱵᱮᱹᱼᱟᱭᱤᱱᱤ ᱞᱮᱠᱟᱛᱮ ᱠᱚᱭᱞᱟ ᱦᱟᱞᱟᱝ ᱦᱩᱭᱩᱜ ᱠᱟᱱ ᱛᱟᱦᱮᱸᱫ ᱥᱮ ᱵᱟᱝ ᱚᱱᱟᱫᱚ ᱯᱩᱞᱤᱥ ᱠᱚ ᱛᱩᱱᱠᱷᱤᱭᱮᱫᱟ ᱾ ᱜᱷᱚᱴᱚᱱ ᱴᱷᱟᱶ ᱨᱮᱠᱚ ᱥᱮᱴᱮᱨ ᱟᱠᱟᱱᱟ ᱠᱳᱞᱤᱭᱟᱨᱤ ᱨᱮᱱ ᱟᱹᱢᱟᱹᱞᱤᱭᱟᱹ ᱠᱚ ᱾
ᱠᱷᱚᱭᱨᱟᱥᱳᱞ ᱞᱳᱠᱯᱩᱨ ᱛᱷᱟᱱᱟ ᱨᱮᱱᱟᱜ ᱵᱷᱟᱫᱩᱞᱤᱭᱟ ᱟᱹᱛᱩ ᱨᱮ ᱢᱮᱱᱟᱜᱼᱟ ᱱᱚᱣᱟ ᱠᱷᱟᱹᱫᱟᱹᱱ ᱾ ᱱᱚᱣᱟ ᱠᱷᱟᱹᱫᱟᱹᱱ ᱨᱮ ᱢᱤᱫᱴᱮᱱ ᱴᱨᱟᱠ ᱨᱮ ᱟᱹᱰᱤᱜᱟᱱ ᱵᱚᱛᱚᱨᱟᱱ ᱵᱤᱥᱯᱷᱳᱨᱚᱠ ᱵᱟᱨᱩᱫᱽ ᱛᱟᱦᱮᱸ ᱠᱟᱱᱟ ᱢᱮᱱᱛᱮ ᱵᱟᱰᱟᱭ ᱧᱟᱢᱚᱜ ᱠᱟᱱᱟ ᱾ ᱚᱱᱟ ᱴᱨᱟᱠ ᱠᱷᱚᱱᱜᱮ ᱵᱞᱟᱥᱴ ᱟᱠᱟᱱᱟ ᱾ ᱟᱨ ᱚᱱᱟ ᱠᱷᱚᱱᱟᱜ ᱜᱮ ᱡᱤᱣᱤ ᱪᱟᱞᱟᱜ ᱨᱮᱱᱟᱜ ᱟᱭᱼᱩᱢᱟᱹᱱᱚᱜ ᱠᱟᱱᱟ ᱾ ᱫᱟᱱᱟᱝ ᱰᱚᱜᱚᱨ ᱠᱷᱚᱱ ᱵᱟᱰᱟᱭ ᱧᱟᱢ ᱟᱠᱟᱱᱟ, ᱮᱛᱚᱦᱚᱵ ᱨᱮᱜᱮ ᱵᱟᱨ ᱦᱚᱲᱟᱜ ᱜᱩᱨ ᱨᱮᱱᱟᱜ ᱠᱷᱚᱵᱚᱨ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾ ᱛᱟᱭᱚᱢ ᱛᱮ ᱟᱨᱦᱚᱸ ᱠᱤᱪᱷᱩ ᱡᱚᱱᱟᱜ ᱜᱩᱨ ᱨᱮᱱᱟᱜ ᱠᱷᱚᱵᱚᱨ ᱧᱟᱢᱟᱠᱟᱱᱟ ᱾ ᱜᱷᱟᱹᱞᱟᱠᱟᱱ ᱦᱚᱲᱠᱚ ᱩᱫᱽᱫᱷᱟᱹᱨ ᱠᱟᱛᱮᱫ ᱥᱩᱨ ᱨᱮᱱᱟᱜ ᱦᱟᱥᱯᱟᱛᱟᱞ ᱥᱤᱣᱲᱤ, ᱫᱩᱵᱽᱨᱟᱡᱽᱯᱩᱨ ᱮᱢᱟᱱ ᱦᱟᱥᱯᱟᱛᱟᱞ ᱠᱚᱠᱚ ᱤᱫᱤᱭᱟᱠᱟᱫ ᱠᱚᱣᱟ ᱾ ᱢᱮᱱᱠᱷᱟᱱ ᱪᱮᱠᱟᱛᱮ ᱱᱚᱣᱟ ᱵᱞᱟᱥᱴ, ᱪᱮᱠᱟᱛᱮ ᱵᱤᱥᱯᱷᱳᱨᱚᱠ ᱞᱳᱰᱟᱱ ᱴᱨᱟᱠ ᱚᱸᱰᱮ ᱥᱮᱴᱮᱨᱮᱱᱟ, ᱮᱴᱟᱜ ᱡᱟᱦᱟᱱ ᱩᱭᱦᱟᱹᱨᱼᱵᱷᱟᱵᱽᱱᱟ ᱛᱟᱦᱮᱸᱠᱟᱱᱟ ᱥᱮ ᱵᱟᱝ ᱚᱱᱟ ᱥᱟᱱᱟᱢ ᱠᱚ ᱛᱩᱱᱠᱷᱤᱭᱮᱫᱟ ᱾ ᱜᱚᱴᱟ ᱮᱞᱟᱠᱟ ᱱᱤᱛ ᱯᱩᱞᱤᱥ ᱠᱚ ᱮᱥᱮᱫ ᱟᱠᱟᱫᱟ ᱾ ᱛᱚᱵᱮ ᱟᱭᱢᱟ ᱴᱷᱟᱶ ᱠᱷᱚᱱ ᱯᱨᱚᱥᱟᱥᱚᱱᱟᱜ ᱠᱟᱹᱢᱤᱦᱚᱨᱟ ᱵᱟᱵᱚᱫᱽ ᱠᱩᱠᱞᱤ ᱠᱚ ᱨᱟᱠᱟᱵ ᱟᱠᱟᱫᱟ ᱾
