(PAPUL MURMU) WB CM is going on district tour : ᱫᱩᱨᱜᱟᱯᱩᱡᱟᱹ ᱠᱷᱚᱱ ᱮᱛᱚᱦᱚᱵ ᱠᱟᱛᱮᱫ ᱠᱟᱨᱱᱤᱵᱷᱟᱞ ᱥᱟᱱᱟᱢ ᱠᱟᱹᱢᱤ ᱜᱮ ᱦᱩᱭ ᱥᱟᱹᱛ ᱮᱱᱟ, ᱟᱨ ᱱᱤᱛ ᱫᱚ ᱵᱟᱹᱠᱤ ᱢᱮᱱᱟᱜᱼᱟ ᱠᱟᱞᱤᱯᱩᱡᱟᱹ ᱾ ᱫᱩᱨᱜᱟᱯᱩᱡᱟᱹ ᱟᱨ ᱠᱟᱨᱱᱤᱵᱷᱟᱞ ᱚᱠᱛᱮ ᱡᱩᱱᱤᱭᱟᱨ ᱰᱟᱠᱛᱟᱨ ᱠᱚ ᱢᱤᱫ ᱠᱷᱚᱱ ᱢᱤᱫ ᱠᱚᱨᱢᱚᱥᱩᱪᱤ ᱥᱟᱯᱲᱟᱣ ᱞᱮᱫ ᱛᱟᱦᱮᱱᱟ ᱾ ᱟᱨ ᱩᱱᱠᱩᱣᱟᱜ ᱚᱱᱟ ᱠᱟᱹᱢᱤᱦᱚᱨᱟ ᱠᱚ ᱤᱫᱤ ᱠᱟᱛᱮᱫ ᱟᱹᱰᱤᱜᱟᱱ ᱥᱚᱢᱟᱞᱳᱪᱚᱱᱟ ᱦᱚᱸ ᱦᱩᱭᱩᱜ ᱠᱟᱱᱟ ᱾ ᱛᱚᱵᱮ ᱠᱤᱪᱷᱩᱜᱟᱱ ᱦᱚᱲ ᱫᱚ ᱰᱟᱠᱛᱟᱨ ᱠᱟᱹᱢᱤ ᱨᱮ ᱥᱚᱢᱚᱨᱛᱷᱚᱱ ᱠᱚ ᱮᱢ ᱮᱫᱟ ᱾ ᱟᱨ ᱱᱚᱛᱮ ᱥᱤ ᱯᱤ ᱟᱭ ᱮᱢ ᱟᱨ ᱵᱤ ᱡᱮ ᱯᱤ ᱵᱟᱱᱟᱨ ᱨᱟᱡᱽᱼᱟᱹᱨᱤ ᱫᱚᱞ ᱜᱮ ᱚᱱᱟ ᱥᱩᱡᱳᱜᱽ ᱠᱟᱹᱢᱤ ᱨᱮ ᱞᱟᱜᱟᱣ ᱠᱟᱛᱮᱫ ᱵᱟᱝᱞᱟ ᱠᱚ ᱵᱚᱫᱽᱱᱟᱢ ᱮᱫᱟ ᱢᱮᱱᱛᱮ ᱚᱵᱷᱤᱡᱳᱜᱽ ᱠᱚ ᱨᱟᱠᱟᱵ ᱮᱫᱟ ᱛᱨᱤᱱᱚᱢᱩᱞ ᱠᱚᱝᱜᱨᱮᱹᱥ ᱾
ᱚᱱᱟ ᱛᱮ ᱯᱩᱡᱟᱹ ᱯᱚᱨᱵᱚ ᱢᱮᱴᱟᱣ ᱥᱟᱶᱛᱮ ᱵᱟᱝᱞᱟ ᱵᱤᱨᱩᱫᱷ ᱨᱮ ᱪᱟᱞᱟᱜ ᱠᱟᱱ ᱵᱚᱫᱽᱱᱟᱢ ᱨᱮᱭᱟᱜ ᱡᱚᱵᱟᱵᱽ ᱮᱢ ᱞᱟᱹᱜᱤᱫ ᱛᱮ ᱡᱮᱞᱟ ᱥᱚᱯᱷᱚᱨ ᱨᱮ ᱪᱟᱞᱟᱜ ᱨᱮᱭᱟᱜ ᱠᱩᱨᱩᱢᱩᱴᱩᱭ ᱦᱟᱛᱟᱣ ᱟᱠᱟᱫᱟ ᱢᱚᱢᱚᱛᱟ ᱵᱚᱱᱫᱳᱯᱟᱫᱽᱫᱷᱟᱭ ᱾
ᱛᱚᱵᱮ ᱡᱮᱞᱟ ᱥᱚᱯᱷᱚᱨ ᱮᱛᱚᱦᱚᱵ ᱞᱟᱦᱟ ᱡᱮᱞᱟ ᱨᱮᱱ ᱱᱮᱛᱟ ᱠᱚ ᱪᱮᱛᱟᱱ ᱨᱮ ᱱᱤᱨᱫᱮᱹᱥᱮ ᱮᱢ ᱠᱮᱫᱟ ᱥᱤᱨᱟᱹᱢᱚᱱᱛᱨᱤ ᱢᱚᱢᱚᱛᱟ ᱵᱚᱱᱫᱳᱯᱟᱫᱽᱫᱷᱟᱭ ᱾ ᱚᱲᱟᱜ ᱚᱲᱟᱜ ᱪᱟᱞᱟᱣ ᱠᱟᱛᱮᱫ ᱯᱨᱚᱪᱟᱨ, ᱦᱳᱰᱤᱝ, ᱢᱤᱴᱤᱝ ᱟᱨ ᱢᱤᱪᱷᱤᱞ ᱨᱮᱭᱟᱜ ᱱᱤᱨᱫᱮᱹᱥ ᱮᱢ ᱦᱩᱭ ᱟᱠᱟᱱᱟ ᱡᱮᱞᱟ ᱨᱮᱱ ᱱᱮᱛᱟ ᱠᱚ ᱪᱮᱛᱟᱱ ᱨᱮ ᱾ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱥᱟᱱᱟᱢ ᱯᱚᱱᱚᱛ ᱨᱮᱱ ᱦᱚᱲᱠᱚ ᱵᱤᱡᱚᱭᱟ ᱨᱮᱭᱟᱜ ᱥᱟᱨᱦᱟᱣᱮ ᱪᱟᱞ ᱟᱠᱟᱫ ᱠᱚᱣᱟ ᱥᱤᱨᱟᱹ ᱢᱚᱱᱛᱨᱤ ᱾
ᱯᱚᱱᱚᱛ ᱨᱮ ᱵᱟᱭᱼᱤᱞᱮᱹᱠᱥᱚᱱ ᱨᱮᱭᱟᱜ ᱱᱮᱸᱰᱟ ᱢᱟᱦᱟ ᱦᱚᱸ ᱩᱪᱷᱟᱹᱱ ᱟᱠᱟᱱᱟ ᱤᱞᱮᱠᱥᱚᱱ ᱠᱚᱢᱤᱥᱚᱱ ᱯᱟᱥᱴᱟ ᱠᱷᱚᱱ ᱾ ᱑᱓ ᱱᱚᱵᱷᱮᱢᱵᱚᱨ ᱨᱮ ᱦᱩᱭᱩᱜᱼᱟ ᱖ ᱜᱚᱴᱟᱝ ᱥᱤᱴ ᱨᱮ ᱫᱚᱲᱷᱟ ᱵᱟᱪᱷᱱᱟᱣ ᱾ ᱡᱟᱦᱟᱸ ᱵᱤᱫᱷᱟᱱᱥᱚᱵᱷᱟ ᱠᱚᱨᱮ ᱵᱟᱪᱷᱱᱟᱣ ᱢᱮᱱᱟᱜ ᱟᱠᱟᱫᱟ ᱚᱱᱟ ᱠᱚ ᱴᱚᱴᱷᱟ ᱠᱚᱨᱮ ᱦᱚᱸᱭ ᱪᱟᱞᱟᱜᱼᱟ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱚᱱᱫᱳᱯᱟᱫᱽᱫᱷᱟᱭ ᱾
