(PAPUL MURMU) JHARKHAND ELECTION : ᱡᱷᱟᱲᱠᱷᱚᱸᱰ ᱵᱤᱫᱷᱟᱱᱥᱚᱵᱷᱟ ᱵᱷᱳᱴ ᱨᱮ ᱯᱩᱭᱞᱩ ᱫᱚᱯᱷᱟ ᱨᱮᱭᱟᱜ ᱯᱨᱟᱨᱛᱷᱤ ᱛᱟᱞᱤᱠᱟᱭ ᱯᱨᱚᱠᱟᱥ ᱠᱮᱫᱟ ᱠᱚᱝᱜᱨᱮᱹᱥ ᱾ ᱫᱤᱞᱞᱤ ᱠᱚᱝᱜᱨᱮᱹᱥᱟᱜ ᱥᱚᱫᱚᱨ ᱫᱚᱯᱛᱚᱨ ᱨᱮ ᱯᱟᱨᱚᱢᱮᱱ ᱚᱛᱮ ᱢᱟᱦᱟ ᱦᱤᱞᱳᱜ ᱠᱚᱝᱜᱨᱮᱹᱥ ᱥᱚᱵᱷᱟᱯᱚᱛᱤ ᱢᱚᱞᱞᱤᱠᱟᱨᱡᱩᱱ ᱠᱷᱟᱲᱜᱮᱹ, ᱢᱟᱨᱮ ᱥᱚᱵᱷᱟᱯᱚᱛᱤ ᱥᱚᱱᱤᱭᱟ ᱜᱟᱱᱫᱷᱤ, ᱟᱨ ᱨᱟᱦᱩᱞ ᱜᱟᱱᱫᱷᱤ ᱛᱟᱠᱚᱣᱟᱜ ᱥᱮᱴᱮᱨ ᱨᱮ ᱡᱷᱟᱲᱠᱷᱚᱸᱰ ᱠᱚᱝᱜᱨᱮᱹᱥ ᱞᱟᱹᱜᱤᱫ ᱯᱨᱟᱨᱛᱷᱤ ᱠᱚᱣᱟᱜ ᱧᱩᱛᱩᱢ ᱴᱷᱟᱣᱠᱟᱹ ᱜᱚᱴᱟ ᱟᱠᱟᱱᱟ ᱾
ᱡᱷᱟᱲᱠᱷᱚᱸᱰ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱞᱟᱹᱜᱤᱫ ᱠᱚᱝᱜᱨᱮᱹᱥᱟᱜ ᱯᱨᱟᱨᱛᱷᱤ ᱛᱟᱞᱤᱠᱟ ᱨᱮ ᱢᱮᱱᱟᱭᱟ ᱡᱷᱟᱲᱠᱷᱚᱸᱰ ᱢᱚᱱᱛᱨᱤᱥᱚᱵᱷᱟ ᱨᱮᱱ ᱥᱚᱫᱚᱥᱥᱚ ᱨᱟᱢᱮᱥᱥᱚᱨ ᱳᱨᱟᱶ ᱾ ᱩᱱᱤ ᱫᱚ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱞᱳᱦᱟᱨᱫᱟᱜᱟ ᱥᱤᱴ ᱠᱷᱚᱱ ᱵᱟᱪᱷᱱᱟᱣ ᱨᱮ ᱫᱟᱣᱮ ᱦᱟᱛᱟᱣ ᱮᱫᱟ ᱾ ᱡᱟᱢᱥᱮᱹᱫᱽᱯᱩᱨ ᱯᱩᱨᱵᱚ ᱥᱤᱴ ᱠᱷᱚᱱ ᱠᱚᱝᱜᱨᱮᱹᱥᱟᱜ ᱴᱤᱠᱤᱴ ᱛᱮᱭ ᱞᱟᱹᱲᱦᱟᱹᱭᱟ ᱢᱟᱨᱮ AICC ᱨᱮᱱ ᱥᱟᱫᱷᱟᱨᱚᱱ ᱥᱚᱢᱯᱟᱫᱚᱠ ᱟᱨ ᱵᱟᱝ ᱢᱟᱨᱮ IPS ᱚᱡᱚᱭ ᱠᱩᱢᱟᱨ ᱾ ᱒᱐᱑᱑ ᱨᱮ ᱪᱟᱹᱠᱨᱤ ᱵᱟᱹᱜᱤ ᱠᱟᱛᱮᱫ ᱵᱟᱵᱩᱞᱟᱞ ᱢᱟᱨᱟᱱᱰᱤ ᱨᱟᱡᱽᱼᱟᱹᱨᱤ ᱫᱚᱞ ᱡᱮ ᱵᱷᱤ ᱮᱢ ᱨᱮᱭ ᱥᱮᱞᱮᱫ ᱞᱮᱱᱟ, ᱢᱮᱱᱠᱷᱟᱱ ᱛᱟᱭᱚᱢ ᱛᱮ ᱡᱮ ᱵᱷᱤ ᱮᱢ ᱵᱟᱹᱜᱤ ᱠᱟᱛᱮᱫ ᱠᱚᱝᱜᱨᱮᱹᱥ ᱨᱮᱭ ᱥᱮᱞᱮᱫ ᱞᱮᱱᱟ ᱾
ᱡᱟᱢᱛᱟᱲᱟ ᱥᱤᱴ ᱨᱮ ᱠᱚᱝᱜᱨᱮᱹᱥ ᱯᱟᱥᱴᱟ ᱠᱷᱚᱱ ᱞᱟᱹᱲᱦᱟᱹᱭ ᱠᱟᱱᱟᱭ ᱤᱨᱯᱷᱟᱱ ᱟᱱᱥᱟᱨᱤ, ᱢᱟᱱᱫᱟᱨ ᱠᱷᱚᱱ ᱴᱤᱠᱤᱴᱮ ᱧᱟᱢ ᱟᱠᱟᱫᱟ ᱠᱚᱝᱜᱨᱮᱹᱥ ᱱᱮᱛᱟ ᱵᱚᱱᱫᱩ ᱛᱤᱨᱠᱤ ᱨᱮᱱ ᱦᱚᱯᱚᱱ ᱮᱨᱟ ᱥᱤᱞᱯᱤ ᱱᱮᱦᱟ ᱛᱤᱨᱠᱤ, ᱟᱨ ᱡᱷᱟᱨᱤᱭᱟ ᱠᱷᱚᱱ ᱴᱤᱠᱤᱴᱮ ᱧᱟᱢ ᱟᱠᱟᱫᱟ ᱯᱩᱨᱱᱤᱢᱟ ᱥᱤᱝ ᱾ ᱯᱚᱱᱚᱛ ᱨᱮᱭᱟᱜ ᱘᱒ ᱴᱤ ᱥᱤᱴ ᱢᱩᱫᱽ ᱨᱮ ᱠᱚᱝᱜᱨᱮᱹᱥ ᱒᱙ ᱴᱤ ᱥᱤᱴ ᱨᱮᱠᱚ ᱞᱟᱹᱲᱦᱟᱹᱭ ᱫᱟᱨᱮᱭᱟᱜᱼᱟ? ᱒᱐᱑᱙ ᱵᱤᱫᱷᱟᱱᱥᱚᱵᱷᱟ ᱵᱷᱳᱴ ᱨᱮ ᱡᱮ ᱮᱢ ᱮᱢ, ᱠᱚᱝᱜᱨᱮᱹᱥ, ᱟᱨ ᱟᱨ ᱡᱮ ᱰᱤ ᱢᱤᱫ ᱠᱟᱛᱮᱫ ᱵᱟᱪᱷᱱᱟᱣ ᱨᱮᱠᱚ ᱞᱟᱹᱲᱦᱟᱹᱭ ᱞᱮᱱ ᱛᱟᱦᱮᱱᱟ ᱾ ᱢᱮᱱᱠᱷᱟᱱ ᱱᱤᱭᱟᱹ ᱫᱷᱟᱣ ‘ᱢᱚᱦᱟᱜᱟᱴᱵᱚᱱᱫᱷᱚᱱ’ ᱥᱟᱶᱛᱮ ᱵᱟᱪᱷᱱᱟᱣ ᱨᱮ ᱢᱮᱱᱟᱜ ᱟᱠᱟᱫ ᱠᱚᱣᱟ ᱥᱤ ᱯᱤ ᱟᱭ ᱮᱢ ᱮᱞ ᱞᱤᱵᱟᱨᱮᱥᱚᱱ ᱟᱨ ᱮᱢ ᱥᱤ ᱥᱤ ᱾
