highlights
ᱩᱪᱷᱟᱹᱱ ᱮᱱᱟ ᱢᱚᱦᱟᱨᱟᱥᱴᱨᱚ, ᱡᱷᱟᱲᱠᱷᱚᱸᱰ ᱵᱟᱪᱷᱱᱟᱣ ᱨᱮᱭᱟᱜ ᱢᱟᱦᱟ
ᱢᱚᱦᱟᱨᱟᱥᱴᱨᱚ ᱨᱮ ᱢᱤᱫ ᱛᱷᱚᱠ ᱟᱨ ᱡᱷᱟᱲᱠᱷᱚᱸᱰ ᱨᱮ ᱵᱟᱨ ᱛᱷᱚᱠ ᱨᱮ ᱵᱟᱪᱷᱱᱟᱣ
ᱵᱟᱨᱭᱟ ᱯᱚᱱᱚᱛ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱥᱟᱶᱛᱮ ᱤᱭᱩ ᱯᱤ, ᱵᱟᱝᱜᱟᱞ ᱨᱮᱦᱚᱸ ᱫᱚᱲᱦᱟ ᱵᱟᱪᱷᱱᱟᱣ
ᱵᱟᱪᱷᱱᱟᱣ ᱨᱮᱭᱟᱜ ᱚᱨᱡᱚ ᱩᱪᱷᱟᱹᱱᱚᱜᱼᱟ ᱒᱓ ᱱᱚᱵᱷᱮᱢᱵᱚᱨ ᱨᱮ
(PAPUL MURMU) Maharashtra, Jharkhand Election 2024 Dates : ᱡᱚᱢᱢᱩ ᱠᱟᱥᱢᱤ ᱟᱨ ᱦᱚᱨᱤᱭᱟᱱᱟ ᱛᱟᱭᱚᱢ ᱢᱚᱦᱟᱨᱟᱥᱴᱨᱚ ᱟᱨ ᱡᱷᱟᱲᱠᱷᱚᱸᱰ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱾ ᱢᱚᱦᱟᱨᱟᱥᱴᱨᱚ ᱟᱨ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱵᱟᱪᱷᱱᱟᱣ ᱨᱮᱭᱟᱜ ᱢᱟᱦᱟᱭ ᱞᱟᱹᱭ ᱠᱮᱫᱟ ᱤᱞᱮᱠᱥᱚᱱ ᱠᱚᱢᱤᱥᱚᱱ ᱚᱯᱷ ᱤᱱᱰᱤᱭᱟ ᱨᱮᱱ ᱪᱤᱯ ᱤᱞᱮᱠᱥᱚᱱ ᱠᱚᱢᱤᱥᱚᱱᱟᱨ ᱨᱟᱡᱤᱵᱽ ᱠᱩᱢᱟᱨ ᱾ ᱡᱟᱦᱟᱸ ᱫᱚ ᱢᱚᱦᱟᱨᱟᱥᱴᱨᱚ ᱨᱮ ᱢᱤᱫ ᱛᱷᱚᱠ ᱨᱮᱜᱮ ᱵᱟᱪᱷᱱᱟᱣ ᱦᱩᱭ ᱥᱟᱹᱛᱚᱜᱼᱟ ᱾ ᱫᱟᱨᱟᱭ ᱠᱟᱱ ᱑᱓ ᱱᱚᱵᱷᱮᱢᱵᱚᱨ ᱢᱚᱦᱟᱨᱟᱥᱴᱨᱚ ᱨᱮᱭᱟᱜ ᱒᱘᱘ ᱜᱚᱴᱟᱝ ᱥᱤᱴ ᱨᱮᱜᱮ ᱵᱟᱪᱷᱱᱟᱣ ᱦᱩᱭᱩᱜᱼᱟ ᱾ ᱛᱚᱵᱮ ᱢᱚᱦᱟᱨᱟᱥᱴᱨᱚ ᱨᱮ ᱢᱤᱫ ᱫᱚᱯᱷᱟ ᱨᱮ ᱵᱷᱳᱴ ᱦᱩᱭᱩᱜ ᱨᱮᱦᱚᱸ ᱡᱷᱟᱲᱠᱷᱚᱸᱰ ᱨᱮᱫᱚ ᱵᱟᱨ ᱛᱷᱚᱠ ᱨᱮ ᱵᱷᱳᱴ ᱦᱩᱭᱩᱜᱼᱟ ᱾ ᱯᱩᱭᱞᱩ ᱫᱚᱯᱷᱟ ᱑᱓ ᱱᱚᱵᱷᱮᱢᱵᱚᱨ ᱟᱨ ᱫᱚᱥᱟᱨ ᱛᱷᱚᱠ ᱫᱚ ᱒᱐ ᱱᱚᱵᱷᱮᱢᱵᱚᱨ ᱨᱮ ᱾
ᱢᱚᱦᱟᱨᱟᱥᱴᱨᱚ ᱨᱮ ᱵᱤ ᱡᱮ ᱯᱤᱭᱟᱜ ᱜᱮ ᱥᱚᱨᱠᱟᱨ ᱢᱮᱱᱟᱜᱼᱟ, ᱢᱮᱱᱠᱷᱟᱱ ᱡᱷᱟᱲᱠᱷᱚᱸᱰ ᱨᱮ ᱡᱮ ᱮᱢ ᱮᱢ ᱟᱨ ᱠᱚᱝᱜᱨᱮᱹᱥ ᱡᱳᱴ ᱦᱟᱨᱟᱣ ᱠᱟᱛᱮᱫ ᱵᱤ ᱡᱮ ᱯᱤ ᱠᱷᱚᱢᱚᱛᱟ ᱨᱮᱠᱚ ᱦᱤᱡᱩᱜᱼᱟ ᱟᱸᱥ ᱵᱤ ᱡᱮ ᱯᱤ ᱱᱮᱛᱟ ᱠᱚᱣᱟᱜ ᱾
ᱪᱤᱯ ᱤᱞᱮᱠᱥᱚᱱ ᱠᱚᱢᱤᱥᱚᱱᱟᱨ ᱨᱟᱡᱤᱵᱽ ᱠᱩᱢᱟᱨᱟᱜ ᱞᱟᱹᱭ ᱫᱤᱥᱚᱢ ᱨᱮᱭᱟᱜ ᱔᱗ ᱜᱚᱴᱟᱝ ᱵᱤᱫᱷᱟᱱ ᱥᱚᱵᱷᱟ ᱨᱮ ᱫᱚᱲᱦᱟ ᱵᱟᱪᱷᱱᱟᱣ ᱥᱟᱶᱛᱮ ᱠᱮᱨᱟᱞᱟ ᱨᱮᱭᱟᱜ ᱚᱣᱟᱱᱟᱲ ᱞᱳᱠᱥᱚᱵᱷᱟ ᱨᱮᱦᱚᱸ ᱫᱚᱲᱦᱟ ᱵᱟᱪᱷᱱᱟᱣ ᱦᱩᱭᱩᱜᱼᱟ ᱑᱓ ᱱᱚᱵᱷᱮᱢᱵᱚᱨ ᱨᱮ ᱾ ᱟᱨ ᱚᱱᱟ ᱥᱟᱶᱛᱮ ᱑᱓ ᱱᱚᱵᱷᱮᱢᱵᱚᱨ ᱜᱮ ᱯᱚᱪᱷᱤᱢ ᱵᱟᱝᱞᱟ ᱨᱮᱭᱟᱜ ᱖ ᱜᱚᱴᱟᱝ ᱥᱤᱴ ᱨᱮ ᱦᱩᱭᱩᱜᱼᱟ ᱫᱚᱲᱦᱟ ᱵᱟᱪᱷᱱᱟᱣ ᱾ ᱒᱐ ᱱᱚᱵᱷᱮᱢᱵᱚᱨ ᱩᱛᱛᱚᱨᱟᱠᱷᱚᱸᱰ ᱨᱮᱭᱟᱜ ᱢᱤᱫ ᱵᱤᱫᱷᱟᱱ ᱥᱚᱵᱷᱟ ᱥᱟᱶᱛᱮ ᱢᱚᱦᱟᱨᱟᱥᱴᱨᱚ ᱨᱮᱭᱟᱜ ᱢᱤᱫ ᱞᱳᱠᱥᱚᱵᱷᱟ ᱨᱮᱦᱚᱸ ᱫᱚᱲᱦᱟ ᱵᱟᱪᱷᱱᱟᱣ ᱦᱩᱭᱩᱜ ᱨᱮᱦᱚᱸ ᱯᱚᱪᱷᱤᱢ ᱵᱟᱝᱞᱟ ᱵᱚᱥᱤᱨᱦᱟᱴ ᱞᱳᱠᱥᱚᱵᱷᱟ ᱨᱮᱭᱟᱜ ᱫᱚᱲᱦᱟ ᱵᱟᱪᱷᱱᱟᱣ ᱨᱮᱭᱟᱜ ᱱᱮᱸᱰᱟ ᱫᱚ ᱵᱟᱭ ᱥᱚᱫᱚᱨ ᱞᱮᱫᱟ ᱠᱚᱢᱤᱥᱚᱱ ᱾
