ᱢᱚᱦᱟᱨᱟᱥᱴᱨᱚ ᱨᱮᱭᱟᱜ ᱑᱒ ᱟᱥᱚᱱ ᱨᱮ ᱯᱨᱟᱨᱛᱷᱤ ᱥᱚᱢᱟᱡᱽᱵᱟᱫᱤ ᱯᱟᱨᱴᱤ ᱠᱷᱚᱱ

(PAPUL MURMU) SP will fight for 12 seats in Maharashtra :  ᱫᱟᱨᱟᱭ ᱠᱟᱱ ᱒᱐ ᱱᱚᱵᱷᱮᱢᱵᱚᱨ ᱢᱚᱦᱟᱨᱟᱥᱴᱨᱚ ᱨᱮ ᱒᱘᱘ ᱜᱚᱴᱟᱝ ᱥᱤᱴ ᱨᱮ ᱢᱤᱫ ᱛᱷᱚᱠ ᱨᱮ ᱵᱟᱪᱷᱱᱟᱣ ᱾ ᱢᱚᱦᱟᱨᱟᱥᱴᱨᱚ ᱨᱮ ᱵᱟᱪᱷᱱᱟᱣ ᱨᱮᱭᱟᱜ ᱢᱟᱹᱦᱤᱛ ᱩᱪᱷᱟᱹᱱ ᱥᱟᱶᱛᱮ ᱜᱮ ᱥᱟᱱᱟᱢ ᱨᱟᱡᱽᱼᱟᱹᱨᱤ ᱯᱟᱨᱴᱤ ᱯᱨᱚᱪᱟᱨ ᱨᱮᱠᱚ ᱪᱷᱩᱴᱟᱹᱣ ᱟᱠᱟᱱᱟ ᱾ ᱢᱚᱦᱟᱨᱟᱥᱴᱨᱚ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱢᱤᱫ ᱯᱟᱥᱴᱟ ᱢᱮᱱᱟᱜ ᱠᱚᱣᱟ ᱵᱤ ᱡᱮ ᱯᱤ ᱥᱟᱶᱛᱮ ᱥᱤᱵᱽᱥᱮᱱᱟ ᱥᱤᱱᱰᱮᱹ ᱡᱳᱴ ᱟᱨ ᱚᱡᱤᱛ ᱯᱟᱣᱟᱨᱟᱜ ᱮᱱ ᱥᱤ ᱯᱤ ᱟᱛᱮ NDA ᱾ ᱟᱨ ᱫᱚᱥᱟᱨ ᱯᱟᱥᱴᱟ ᱨᱮ ᱢᱮᱱᱟᱜ ᱟᱠᱟᱫ ᱠᱚᱣᱟ ᱠᱚᱝᱜᱨᱮᱹᱥ ᱥᱟᱶᱛᱮ ᱥᱤᱵᱽᱥᱮᱱᱟ ᱩᱫᱽᱫᱷᱚᱵᱽ ᱡᱳᱴ ᱟᱨ ᱥᱚᱨᱚᱫᱽ ᱯᱟᱣᱟᱨᱟᱜ ᱮᱱ ᱥᱤ ᱯᱤ  ᱟᱛᱮ ᱤᱱᱰᱤᱭᱟ ᱢᱚᱦᱟᱜᱟᱴᱵᱚᱱᱫᱷᱚᱱ ᱾ ᱒᱘᱘ ᱜᱚᱴᱟᱝ ᱥᱤᱴ ᱢᱩᱫᱽ ᱨᱮ ᱤᱱᱰᱤᱭᱟ ᱢᱚᱦᱟᱜᱟᱴᱵᱚᱱᱫᱷᱚᱱ ᱚᱫᱷᱤᱠᱟᱝᱥᱚ ᱥᱤᱴ ᱨᱮ ᱟᱥᱚᱱ ᱥᱚᱢᱡᱷᱚᱛᱟ ᱦᱩᱭ ᱟᱠᱟᱱ ᱨᱮᱦᱚᱸ ᱒᱕ ᱜᱚᱴᱟᱝ ᱥᱤᱴ ᱮᱫᱤ ᱠᱟᱛᱮᱫ ᱮᱴᱠᱮᱴᱚᱬᱮ ᱛᱮᱭᱟᱨ ᱟᱠᱟᱱᱟ ᱾ ᱢᱚᱦᱟᱨᱟᱥᱴᱨᱚ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱑᱒ ᱜᱚᱴᱟᱝ ᱥᱤᱴ ᱞᱟᱹᱲᱦᱟᱹᱭᱟᱭ ᱥᱚᱢᱟᱡᱽᱵᱟᱫᱤ ᱯᱟᱨᱴᱤ ᱞᱟᱹᱭ ᱠᱮᱫᱟᱭ ᱚᱠᱷᱤᱞᱮᱹᱥ ᱡᱟᱫᱚᱵᱽ ᱾ ᱩᱱᱤᱭᱟᱜ ᱢᱮᱱ ᱯᱚᱱᱚᱛ ᱨᱮ ᱡᱟᱦᱟᱸ ᱡᱟᱦᱟᱸ ᱴᱚᱴᱷᱟ ᱠᱚᱨᱮ ᱮᱥ ᱯᱤ ᱭᱟᱜ ᱥᱚᱝᱜᱚᱴᱷᱚᱱ ᱠᱮᱴᱮᱡᱼᱟ ᱚᱱᱟ ᱴᱚᱴᱷᱟ ᱠᱚᱨᱮ ᱵᱟᱪᱷᱱᱟᱣ ᱨᱮ ᱫᱟᱣᱼᱮ ᱦᱟᱛᱟᱣᱟ ᱥᱚᱢᱟᱡᱽᱵᱟᱫᱤ ᱯᱟᱨᱴᱤ ᱾