highlight
ᱢᱚᱱᱤᱯᱩᱨ ᱦᱤᱝᱥᱟᱹ ᱨᱮᱭᱟᱜ ᱥᱟᱱᱛᱤ ᱵᱚᱭᱴᱷᱚᱠ
ᱛᱟᱞᱢᱟ ᱥᱚᱨᱠᱟᱨᱟᱜ ᱦᱚᱦᱚᱛᱮ ᱫᱤᱞᱞᱤ ᱨᱮ ᱵᱚᱭᱴᱷᱚᱠ
ᱵᱚᱭᱴᱷᱚᱠ ᱨᱮᱠᱚ ᱥᱮᱞᱮᱫᱚᱜᱼᱟ ᱢᱮᱹᱭᱛᱤ, ᱠᱩᱠᱤ ᱟᱨ ᱱᱟᱜᱟ ᱥᱚᱫᱚᱥᱥᱚ ᱠᱚ
(PAPUL MURMU) Peace meeting on Manipur ᱺ ᱞᱟᱹᱭ ᱜᱟᱱᱚᱜᱼᱟ ᱢᱤᱫ ᱥᱮᱨᱢᱟ ᱠᱷᱚᱱ ᱵᱟᱨᱭᱟ ᱡᱚᱱᱚ ᱜᱳᱥᱴᱷᱤ ᱨᱮᱱ ᱦᱚᱲ ᱠᱚᱣᱟᱜ ᱛᱟᱯᱟᱢ ᱠᱷᱟᱹᱛᱤᱨ ᱩᱛᱛᱟᱞ ᱪᱟᱵᱟ ᱟᱠᱟᱱᱟ ᱜᱚᱴᱟ ᱢᱚᱱᱤᱯᱩᱨ ᱾ ᱟᱨ ᱟᱭᱢᱟ ᱫᱤᱱ ᱛᱟᱭᱚᱢ ᱯᱩᱭᱞᱩ ᱫᱷᱟᱣ ᱞᱟᱹᱜᱤᱫ ᱢᱚᱱᱤᱯᱩᱨ ᱥᱟᱱᱛᱤ ᱮᱫᱤ ᱠᱟᱛᱮᱫ ᱜᱟᱯᱟᱞ ᱢᱟᱨᱟᱚᱣ ᱨᱮ ᱦᱚᱦᱚᱣᱟᱜ ᱠᱚᱣᱟᱠᱚ ᱠᱩᱠᱤ ᱟᱨ ᱢᱮᱹᱭᱛᱤ ᱜᱟᱛᱟᱠ ᱨᱮᱱ ᱵᱤᱫᱷᱟᱭᱚᱠ ᱠᱚ ᱾ ᱛᱚᱵᱮ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱫᱟᱨᱟᱭ ᱠᱟᱱ ᱵᱟᱞᱮ ᱢᱟᱦᱟ ᱦᱤᱞᱳᱜ ᱛᱟᱞᱢᱟ ᱥᱚᱨᱠᱟᱨᱟᱜ ᱥᱚᱨᱟᱥᱴᱨᱚ ᱢᱚᱱᱛᱨᱚᱠ ᱦᱚᱛᱮᱛᱛᱮ ᱜᱟᱯᱟᱞᱼᱢᱟᱨᱟᱣ ᱫᱚ ᱥᱟᱯᱲᱟᱣ ᱟᱠᱟᱱᱟ ᱾ ᱛᱚᱵᱮ ᱥᱩᱛᱨᱚ ᱞᱮᱠᱟᱛᱮ ᱵᱟᱰᱟᱭ ᱧᱟᱢᱚᱜ ᱠᱟᱱᱟ ᱡᱮ ᱚᱱᱟ ᱜᱟᱯᱟᱞᱼᱢᱟᱨᱟᱣ ᱨᱮ ᱱᱟᱜᱟ ᱵᱤᱫᱷᱟᱭᱚᱠ ᱠᱚᱦᱚᱸ ᱥᱮᱞᱮᱫ ᱠᱚ ᱛᱟᱦᱮᱱᱟ ᱾ ᱱᱟᱜᱟ ᱵᱤᱫᱷᱟᱭᱚᱠ ᱯᱟᱥᱴᱟ ᱠᱷᱚᱱ ᱜᱟᱯᱟᱞᱼᱢᱟᱨᱟᱣ ᱨᱮ ᱫᱟᱣ ᱠᱚ ᱦᱟᱛᱟᱣᱟ ᱟᱣᱟᱝᱵᱟᱣ ᱱᱤᱭᱩᱢᱟᱭ, ᱮᱞ ᱰᱤᱠᱷᱳ, ᱟᱨ ᱨᱟᱢ ᱢᱩᱭᱵᱷᱟ ᱾ ᱪᱮᱫᱟᱜ ᱥᱮ ᱩᱱᱠᱩ ᱫᱚ NDA ᱥᱚᱨᱤᱠ ᱱᱟᱜᱟ ᱯᱤᱯᱚᱞᱥ ᱯᱷᱨᱚᱱᱴ (NPF) ᱨᱮᱱ ᱢᱮᱢᱵᱟᱨ ᱠᱟᱱᱟ ᱠᱚ ᱾ ᱢᱮᱱᱠᱷᱟᱱ ᱱᱤᱛ ᱦᱟᱹᱵᱤᱡ ᱛᱮ ᱵᱟᱝ ᱵᱟᱰᱟᱭ ᱧᱟᱢ ᱟᱠᱟᱱᱟ ᱢᱮᱹᱭᱛᱤ ᱟᱨ ᱠᱩᱠᱤ ᱨᱮ ᱛᱤᱱᱟᱹᱜ ᱜᱟᱱ ᱵᱤᱫᱷᱟᱭᱚᱠ ᱠᱚ ᱥᱮᱴᱮᱨ ᱠᱚ ᱛᱟᱦᱮᱱᱟ ᱾
᱒᱐᱒᱓ ᱥᱮᱨᱢᱟ ᱨᱮᱭᱟᱜ ᱢᱮᱹ ᱪᱟᱸᱫᱳ ᱠᱷᱚᱱ ᱠᱷᱟᱹᱯᱟᱹᱨᱤᱭᱟᱹ ᱠᱷᱟᱹᱛᱤᱨ ᱚᱥᱟᱱᱛᱤ ᱟᱠᱟᱱᱟ ᱢᱚᱱᱤᱯᱩᱨ ᱾ ᱟᱨ ᱚᱱᱟ ᱢᱚᱱᱤᱯᱩᱨ ᱦᱤᱝᱥᱟᱹ ᱦᱩᱞᱟᱹᱝ ᱠᱷᱟᱹᱛᱤᱨ ᱒᱐᱐ ᱠᱷᱚᱱ ᱦᱚᱸ ᱵᱟᱹᱲᱛᱤ ᱦᱚᱲ ᱠᱚ ᱜᱚᱡᱼᱜᱩᱨ ᱟᱠᱟᱱᱟ ᱾ ᱢᱚᱱᱤᱯᱩᱨ ᱥᱟᱱᱛᱚᱭ ᱞᱟᱹᱜᱤᱫ ᱛᱮ ᱟᱨᱦᱚᱸ ᱛᱩᱨᱩᱭ ᱪᱟᱸᱫᱳ ᱞᱟᱹᱜᱤᱫ ᱥᱮᱱᱴᱨᱟᱞ ᱵᱟᱦᱤᱱᱤ ᱠᱚᱣᱟᱜ ᱛᱤ ᱨᱮ ᱵᱤᱥᱮᱥ ᱠᱷᱚᱢᱚᱛᱟᱟᱭᱱ (ᱟᱨᱢᱰ ᱯᱷᱳᱨᱥᱮᱹᱥ ᱥᱯᱮᱹᱥᱟᱥ ᱯᱟᱣᱟᱨ ᱠᱟᱱᱩᱱ ᱟᱨ ᱵᱟᱝ ‘ᱟᱯᱥᱯᱟ’) ᱨᱮᱭᱟᱜ ᱢᱮᱭᱟᱫᱽ ᱵᱟᱹᱲᱛᱤ ᱦᱩᱭ ᱟᱠᱟᱱᱟ ᱾ ᱯᱟᱨᱚᱢᱮᱱ ᱪᱟᱸᱫᱳ ᱢᱮᱱᱫᱚ ᱥᱮᱹᱯᱴᱮᱹᱢᱵᱚᱨ ᱪᱟᱸᱫᱳ ᱨᱮ ᱢᱚᱱᱤᱯᱩᱨ ᱨᱮᱭᱟᱜ ᱠᱚᱝᱯᱚᱠᱚᱯᱤ ᱟᱨ ᱯᱟᱹᱪᱷᱤᱢ ᱤᱢᱯᱷᱚᱞ ᱨᱮᱭᱟᱜ ᱵᱟᱨᱭᱟ ᱴᱚᱴᱷᱟ ᱨᱮ ᱰᱨᱳᱱ ᱦᱟᱢᱞᱟ ᱦᱩᱭ ᱟᱠᱟᱱ ᱠᱷᱟᱹᱛᱤᱨ ᱯᱚᱨᱤᱥᱛᱷᱤᱛᱤ ᱟᱨᱦᱚᱸ ᱫᱚᱲᱦᱟ ᱛᱮ ᱚᱥᱟᱱᱛᱤ ᱨᱩᱣᱟᱹᱲ ᱟᱠᱟᱱᱟ ᱾ ᱚᱱᱟ ᱥᱩᱢᱩᱝ ᱫᱚ ᱵᱟᱝ ᱢᱚᱱᱤᱯᱩᱨ ᱨᱮᱱ ᱥᱤᱨᱟᱹ ᱢᱚᱱᱛᱨᱤᱭᱟᱜ ᱚᱲᱟᱜ ᱨᱮᱦᱚᱸ ᱨᱚᱠᱮᱴ ᱦᱟᱢᱞᱟ ᱦᱩᱭ ᱟᱠᱟᱱᱟ ᱾
ᱟᱨ ᱚᱱᱟ ᱛᱟᱭᱚᱢ ᱜᱮ ᱜᱚᱴᱟ ᱢᱚᱱᱤᱯᱩᱨ ᱴᱚᱴᱷᱟ ᱨᱮᱜᱮ ᱚᱥᱟᱱᱛᱤ ᱵᱟᱹᱲᱛᱤ ᱟᱠᱟᱱᱟ ᱾ ᱢᱚᱱᱤᱯᱩᱨ ᱥᱚᱨᱠᱟᱨ ᱨᱮᱱ ᱱᱤᱨᱟᱯᱚᱛᱛᱟ ᱩᱯᱚᱫᱮᱥᱴᱟ ᱠᱩᱞᱫᱤᱯ ᱥᱤᱝᱼᱟᱜ ᱫᱟᱹᱵᱤ ᱰᱨᱳᱱ ᱦᱟᱢᱞᱟ ᱨᱮᱭᱟᱜ ᱥᱤᱠᱷᱱᱟᱹᱛ ᱦᱟᱛᱟᱣ ᱟᱠᱟᱫ ᱙᱐᱐ ᱜᱚᱴᱟᱝ ᱠᱩᱠᱤ ᱡᱚᱝᱜᱤ ᱢᱟᱭᱟᱱᱢᱟᱨ ᱠᱷᱚᱱ ᱢᱚᱱᱤᱯᱩᱨ ᱠᱚ ᱵᱚᱞᱚ ᱟᱠᱟᱱᱟ ᱾
