(PAPUL MURMU) Priyanka was nominated on Wednesday : ᱢᱚᱦᱟᱨᱟᱥᱴᱨᱚ ᱡᱷᱟᱲᱠᱷᱚᱸᱰ ᱥᱟᱶᱛᱮ ᱠᱮᱨᱟᱞᱟ ᱨᱮᱭᱟᱜ ᱚᱣᱟᱱᱟᱲ ᱞᱳᱠᱥᱚᱵᱷᱟ ᱨᱮᱦᱚᱸ ᱫᱚᱲᱦᱟ ᱵᱟᱪᱷᱱᱟᱣ ᱢᱮᱱᱟᱜ ᱟᱠᱟᱫᱟ ᱾ ᱑᱓ ᱱᱚᱵᱷᱮᱢᱵᱚᱨ ᱨᱮ ᱦᱩᱭᱩᱜᱼᱟ ᱫᱚᱲᱦᱟ ᱵᱟᱪᱷᱱᱟᱣ ᱾ ᱚᱣᱟᱱᱟᱲ ᱥᱤᱴ ᱨᱮ ᱠᱚᱝᱜᱨᱮᱹᱥ ᱠᱚ ᱯᱨᱟᱨᱛᱷᱤ ᱟᱠᱟᱫᱮᱭᱟ ᱯᱨᱤᱭᱟᱝᱠᱟ ᱜᱟᱱᱫᱷᱤ ᱾ ᱟᱨ ᱵᱤ ᱡᱮ ᱯᱤ ᱯᱟᱥᱴᱟ ᱠᱷᱚᱱ ᱯᱨᱟᱨᱛᱷᱤ ᱱᱚᱵᱽᱵᱟ ᱦᱚᱨᱤᱫᱟᱥ ᱾ ᱫᱟᱨᱟᱭᱠᱟᱱ ᱥᱟᱹᱨᱫᱤ ᱢᱟᱦᱟ ᱨᱮ ᱚᱣᱟᱱᱟᱲ ᱞᱟᱹᱜᱤᱫ ᱱᱚᱢᱤᱱᱮᱥᱚᱱᱮ ᱮᱢᱟ ᱯᱨᱤᱭᱟᱝᱠᱟ ᱜᱟᱱᱫᱷᱤ, ᱟᱨ ᱩᱱᱤᱭᱟᱜ ᱱᱚᱢᱤᱱᱮᱥᱚᱱ ᱨᱮ ᱥᱮᱴᱮᱨ ᱠᱚ ᱛᱟᱦᱮᱱᱟ ᱢᱟᱨᱮ ᱠᱚᱝᱜᱨᱮᱹᱥ ᱥᱚᱵᱷᱟᱱᱮᱛᱨᱤ ᱥᱚᱱᱤᱭᱟ ᱜᱟᱱᱫᱷᱤ, ᱠᱚᱝᱜᱨᱮᱹᱥ ᱥᱚᱵᱷᱟᱯᱚᱛᱤ ᱢᱚᱞᱞᱤᱠᱟᱨᱡᱩᱱ ᱠᱷᱟᱲᱜᱮ, ᱟᱨ ᱞᱳᱠᱥᱚᱵᱷᱟ ᱨᱮᱱ ᱵᱤᱨᱳᱫᱷᱤ ᱫᱚᱞᱚᱱᱮᱛᱟ ᱨᱟᱦᱩᱞ ᱜᱟᱱᱫᱷᱤ ᱞᱮᱠᱟᱱ ᱢᱟᱨᱟᱝ ᱟᱹᱜᱩᱣᱟᱹᱱ ᱠᱚ ᱾ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱒᱐᱒᱔ ᱞᱳᱠᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱠᱚᱝᱜᱨᱮᱹᱥ ᱱᱮᱛᱟ ᱨᱟᱦᱩᱞ ᱜᱟᱱᱫᱷᱤ ᱨᱟᱭᱵᱮᱹᱨᱮᱹᱞᱤ ᱥᱟᱶᱛᱮ ᱚᱣᱟᱱᱟᱲ ᱠᱷᱚᱱ ᱦᱚᱸᱭ ᱡᱤᱛᱠᱟᱹᱨ ᱞᱮᱱ ᱛᱟᱦᱮᱱᱟ, ᱢᱮᱱᱠᱷᱟᱱ ᱞᱳᱠᱥᱚᱵᱷᱟ ᱨᱮᱱ ᱥᱟᱝᱥᱚᱫᱽ ᱞᱮᱠᱟᱛᱮ ᱠᱤᱨᱭᱟᱹ ᱦᱟᱛᱟᱣ ᱞᱟᱦᱟ ᱨᱮ ᱚᱣᱟᱱᱟᱲ ᱥᱤᱴ ᱠᱷᱚᱱ ᱨᱤᱡᱟᱭᱤᱱᱮ ᱮᱢ ᱞᱮᱫ ᱛᱟᱦᱮᱱᱟ, ᱚᱱᱟ ᱥᱤᱴ ᱨᱮᱜᱮ ᱫᱚᱲᱦᱟ ᱵᱟᱪᱷᱱᱟᱣ ᱢᱮᱱᱟᱜ ᱟᱠᱟᱫᱟ ᱾ ᱑᱓ ᱱᱚᱵᱷᱮᱢᱵᱚᱨ ᱨᱮ ᱫᱚᱲᱦᱟ ᱵᱟᱪᱷᱱᱟᱣ ᱢᱮᱱᱟᱜ ᱟᱠᱟᱫ ᱨᱮᱦᱚᱸ ᱚᱨᱡᱚ ᱫᱚ ᱩᱪᱷᱟᱹᱱᱚᱜᱼᱟ ᱒᱓ ᱱᱚᱵᱷᱮᱢᱵᱚᱨ ᱨᱮ ᱾
ᱱᱮᱦᱮᱨᱩ ᱜᱷᱟᱨᱚᱸᱡᱽ ᱨᱮᱱ ᱯᱩᱭᱞᱩ ᱡᱟᱦᱟᱸᱭ ᱫᱚᱠᱠᱷᱤᱱ ᱵᱷᱟᱨᱚᱛ ᱠᱷᱚᱱ ᱵᱟᱪᱷᱱᱟᱣ ᱨᱮ ᱞᱟᱹᱲᱦᱟᱭ ᱠᱟᱛᱮᱫ ᱥᱚᱝᱥᱚᱫᱤᱭᱚ ᱨᱟᱡᱽᱱᱤᱛᱤ ᱨᱮ ᱛᱟᱲᱟᱢ ᱰᱟᱦᱟᱨᱮ ᱮᱛᱚᱦᱚᱵᱼᱟ ᱾ ᱨᱟᱦᱩᱞ ᱜᱟᱱᱫᱷᱤ ᱟᱨ ᱤᱱᱫᱤᱨᱟ ᱜᱟᱱᱫᱷᱤ ᱫᱚᱠᱠᱷᱤᱱ ᱵᱷᱟᱨᱚᱛ ᱠᱷᱚᱱ ᱞᱳᱠᱥᱚᱵᱷᱟ ᱞᱟᱹᱲᱦᱟᱹᱭ ᱠᱟᱛᱮᱫ ᱯᱟᱨᱞᱟᱢᱮᱱᱴ ᱠᱤᱱ ᱥᱮᱴᱮᱨ ᱟᱠᱟᱱ ᱨᱮᱦᱚᱸ ᱨᱟᱡᱽᱱᱤᱛᱤ ᱨᱮᱭᱟᱜ ᱞᱟᱹᱲᱦᱟᱹᱭ ᱫᱚ ᱩᱛᱛᱚᱨ ᱯᱨᱚᱫᱮᱹᱥ ᱠᱷᱚᱱ ᱠᱤᱱ ᱮᱛᱚᱦᱚᱵ ᱞᱮᱫ ᱛᱟᱦᱮᱱᱟ ᱾ ᱥᱚᱱᱤᱭᱟ ᱜᱟᱱᱫᱷᱤ ᱑᱙᱙᱙ ᱥᱟᱹᱦᱤᱛ ᱨᱮ ᱩᱛᱛᱚᱨ ᱯᱨᱚᱫᱮᱹᱥ ᱨᱮᱭᱟᱜ ᱨᱟᱭᱵᱮᱹᱨᱮᱹᱞᱤ ᱥᱟᱶᱛᱮ ᱠᱚᱨᱱᱟᱴᱚᱠ ᱨᱮᱭᱟᱜ ᱵᱚᱞᱞᱟᱨᱤ ᱠᱷᱚᱱ ᱦᱚᱸ ᱯᱨᱚᱛᱤᱫᱚᱱᱫᱤᱛᱟ ᱞᱮᱫ ᱛᱟᱦᱮᱱᱟ ᱾
ᱚᱣᱟᱱᱟᱲ ᱨᱮᱭᱟᱜ ᱞᱳᱠᱥᱚᱵᱷᱟ ᱨᱮᱭᱟᱜ ᱫᱚᱲᱦᱟ ᱵᱟᱪᱷᱱᱟᱣ ᱨᱮ ᱯᱨᱤᱭᱟᱝᱠᱟ ᱜᱟᱱᱫᱷᱤᱣᱟᱜ ᱴᱚᱠᱠᱚᱨ ᱥᱤ ᱯᱤ ᱟᱭ ᱨᱮᱱ ᱢᱟᱨᱮ ᱵᱤᱫᱷᱟᱭᱚᱠ ᱥᱚᱛᱛᱮᱱ ᱢᱚᱠᱮᱨᱤ ᱟᱨ ᱵᱤ ᱡᱮ ᱯᱤ ᱨᱮᱱ ᱨᱟᱡᱽᱡᱚ ᱢᱚᱦᱤᱞᱟ ᱢᱳᱨᱪᱟ ᱨᱮᱱ ᱥᱟᱫᱷᱟᱨᱚᱱ ᱥᱚᱢᱯᱟᱫᱚᱠ ᱱᱚᱵᱽᱵᱟ ᱦᱚᱨᱤᱫᱟᱥ ᱥᱟᱶᱛᱮ ᱾
