ᱤᱭᱮᱩᱪᱩᱨᱤᱣᱟᱜ ᱩᱫᱩᱜ ᱰᱟᱦᱟᱨ ᱛᱮᱜᱮ ᱛᱟᱲᱟᱢᱟᱭ ᱫᱚᱞ ᱞᱟᱹᱭ ᱠᱮᱫᱟᱭ ᱠᱟᱨᱟᱴᱫᱟᱨᱟᱭᱠᱟᱱ ᱯᱟᱨᱴᱤ ᱠᱚᱝᱜᱨᱮᱹᱥᱟᱜ ᱵᱚᱭᱴᱷᱚᱠ ᱨᱮ ᱩᱫᱩᱜ ᱰᱟᱦᱟᱨ ᱛᱮᱜᱮ ᱠᱚ ᱛᱟᱲᱟᱢᱟ ᱥᱤ ᱯᱤ ᱟᱭ ᱮᱢᱯᱚᱞᱤᱴᱵᱩᱨᱳ ᱯᱟᱥᱴᱟ ᱠᱷᱚᱱ ᱥᱚᱢᱚᱱᱱᱭ ᱨᱮᱭᱟᱜ ᱫᱟᱭᱵᱷᱟᱨ ᱧᱟᱢ ᱠᱟᱛᱮᱫ ᱯᱩᱭᱞᱩ ᱵᱟᱝᱞᱟ ᱥᱚᱯᱦᱚᱨ ᱨᱮ ᱠᱟᱨᱟᱴ
(PAPUL MURMU) Politics Politburo INDIA : ᱦᱟᱥᱯᱟᱛᱟᱞ ᱨᱮ ᱪᱟᱞᱟᱜ ᱢᱟᱲᱟᱝ ᱨᱮᱦᱚᱸ ᱯᱚᱞᱤᱴᱵᱩᱨᱳᱣᱟᱜ (POLITBURO) ᱢᱩᱪᱟᱹᱫ ᱢᱤᱴᱤᱝ ᱨᱮᱜᱮ ᱫᱟᱨᱟᱭᱠᱟᱱ ᱫᱤᱱ ᱨᱮ ᱯᱟᱨᱴᱤ ᱠᱚᱝᱜᱨᱮᱹᱥ ᱵᱟᱠᱷᱨᱟ ᱠᱟᱹᱢᱤᱦᱚᱨᱟᱭ ᱮᱛᱚᱦᱚᱵ ᱞᱮᱫ ᱛᱟᱦᱮᱱᱟ ᱾ ᱪᱤᱠᱤᱛᱥᱟ ᱚᱠᱛᱚ ᱦᱟᱥᱯᱟᱛᱟᱞ ᱨᱮ ᱫᱩᱲᱩᱵ ᱠᱟᱛᱮᱫ ᱦᱚᱸ ᱯᱟᱨᱴᱤ ᱠᱚᱝᱜᱨᱮᱹᱥ ᱞᱟᱹᱜᱤᱫ ᱨᱟᱡᱽᱱᱤᱛᱤ ᱨᱮ ᱫᱚᱞᱟᱜ ᱛᱟᱲᱟᱢ ᱰᱟᱦᱟᱨ ᱚᱠᱟ ᱞᱮᱠᱟᱛᱮ ᱱᱟᱯᱟᱭᱚᱜ`ᱟ ᱚᱱᱟ ᱵᱟᱵᱚᱫᱽ ᱪᱷᱩᱴᱟᱹᱣ ᱨᱮᱜᱮ ᱛᱟᱦᱮᱸ ᱠᱟᱱᱟᱭ ᱾ ᱢᱤᱫ ᱠᱟᱛᱷᱟ ᱛᱮ ᱞᱟᱹᱭ ᱜᱟᱱᱚᱜᱼᱟ ᱵᱚᱸᱜᱟ ᱛᱟᱞᱟ ᱟᱠᱟᱱ ᱥᱟᱫᱷᱟᱨᱚᱱ ᱥᱚᱢᱯᱟᱫᱚᱠ ᱥᱤᱛᱟᱨᱟᱢ ᱤᱭᱮᱩᱪᱩᱨᱤ ᱵᱮᱱᱟᱣ ᱦᱚᱨᱼᱰᱟᱦᱟᱨ ᱛᱮᱜᱮ ᱛᱟᱲᱟᱢᱟᱭ ᱥᱤ ᱯᱤ ᱟᱭ ᱮᱢ ᱨᱟᱡᱽᱼᱟᱹᱨᱤ ᱯᱟᱨᱴᱤ ᱾ ᱕0 ᱜᱮ ᱥᱮᱨᱢᱟ ᱠᱷᱚᱱ ᱢᱤᱫ ᱥᱟᱶᱛᱮ ᱠᱟᱹᱢᱤ ᱟᱹᱜᱩᱭᱮᱫ ᱠᱟᱱ ᱵᱚᱸᱜᱟ ᱛᱟᱞᱟ ᱟᱠᱟᱱ ᱤᱭᱮᱩᱪᱩᱨᱤ ᱩᱭᱦᱟᱹᱨ ᱫᱤᱥᱟᱹ ᱠᱟᱛᱮᱫ ᱧᱩᱢ ᱦᱟᱞᱟᱝ ᱞᱟᱹᱜᱤᱫ ᱠᱚᱞᱠᱟᱛᱟ ᱨᱮ ᱦᱮᱡ ᱠᱟᱛᱮᱫ ᱚᱱᱟ ᱠᱟᱛᱷᱟ ᱜᱮ ᱞᱟᱹᱭ ᱠᱮᱫᱟᱭ ᱥᱤ ᱯᱤ ᱟᱭ ᱮᱢ ᱨᱮᱱ ᱯᱚᱞᱤᱴᱵᱩᱨᱳ ᱠᱳᱼᱚᱨᱰᱤᱱᱮᱴᱚᱨ ᱯᱨᱚᱠᱟᱥ ᱠᱟᱨᱟᱴ ᱾ ᱤᱭᱮᱩᱪᱩᱨᱤ ᱵᱚᱸᱜᱟ ᱛᱟᱞᱟ ᱛᱟᱭᱚᱢ ᱯᱚᱞᱤᱴᱵᱩᱨᱳ ᱠᱳᱼᱚᱨᱰᱤᱱᱮᱴᱚᱨ ᱞᱮᱠᱟᱛᱮ ᱫᱟᱭᱵᱷᱟᱨᱮ ᱜᱚᱜ ᱟᱠᱟᱫᱟ ᱥᱤ ᱯᱤ ᱟᱭ ᱮᱢ ᱨᱮᱱ ᱢᱟᱨᱮ ᱥᱟᱫᱷᱟᱨᱚᱱ ᱥᱚᱢᱯᱟᱫᱚᱠ ᱯᱨᱚᱠᱟᱥ ᱠᱟᱨᱟᱴ᱾ ᱟᱨ ᱚᱱᱟ ᱫᱟᱭᱵᱷᱟᱨ ᱦᱟᱛᱟᱣ ᱛᱟᱭᱚᱢ ᱯᱩᱭᱞᱩ ᱵᱚᱝᱜᱚ ᱥᱚᱯᱷᱚᱨ ᱠᱟᱱ ᱛᱟᱭᱟ ᱠᱟᱨᱟᱴᱟᱜ ᱾ ᱵᱟᱝᱞᱟ ᱨᱮ ᱦᱮᱡ ᱠᱟᱛᱮᱫ ᱯᱨᱚᱢᱳᱫᱽ ᱫᱟᱥᱜᱩᱯᱛᱟ ᱵᱷᱚᱵᱚᱱ ᱨᱮ ᱥᱤ ᱯᱤ ᱟᱭ ᱮᱢ ᱯᱟᱥᱴᱟ ᱠᱷᱚᱱ ᱥᱟᱯᱲᱟᱣ ᱞᱮᱱ ᱤᱭᱮᱩᱪᱩᱨᱤᱣᱟᱜ ᱧᱩᱢ ᱦᱟᱞᱟᱝ (SARAN SOBHA) ᱢᱟᱦᱟ ᱨᱮ ᱠᱟᱨᱟᱴᱟᱜ ᱞᱟᱹᱭ, ᱥᱤᱛᱟᱨᱟᱢ ᱡᱟᱦᱟᱸ ᱚᱠᱛᱚ ᱯᱟᱨᱴᱤ ᱨᱮᱭᱟᱜ ᱫᱟᱭᱵᱷᱟᱨᱮ ᱦᱟᱛᱟᱣ ᱞᱮᱫ ᱛᱟᱦᱮᱱᱟ ᱚᱱᱟ ᱚᱠᱛᱚ ᱨᱮᱜᱮ ᱫᱤᱥᱚᱢ ᱨᱮᱭᱟᱜ ᱥᱟᱥᱚᱱ ᱠᱷᱚᱢᱚᱛᱟ ᱪᱟᱞᱟᱣ ᱞᱮᱱ ᱛᱟᱦᱮᱱᱟ ᱵᱤ ᱡᱮ ᱯᱤᱭᱟᱜ ᱛᱤᱨᱮ ᱾ ᱵᱤ ᱡᱮ ᱯᱤ ᱟᱨ ᱟᱨ ᱮᱥ ᱮᱥ ᱟᱜ ᱚᱥᱛᱤᱛᱛᱚ ᱪᱟᱵᱟᱭ ᱞᱟᱹᱜᱤᱫ ᱜᱮ ᱥᱤᱛᱟᱨᱟᱢ ᱤᱭᱮᱩᱪᱩᱨᱤ ᱫᱚ ᱦᱚᱨᱼᱰᱟᱦᱟᱨᱮ ᱵᱮᱱᱟᱣ ᱦᱚᱴᱚ ᱟᱠᱟᱫᱟ ᱾ ᱱᱚᱣᱟ ᱥᱮᱨᱢᱟ (᱒᱐᱒᱔) ᱨᱮᱭᱟᱜ ᱞᱳᱠᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱵᱤ ᱡᱮ ᱯᱤ ᱮᱠᱚᱠ ᱥᱚᱝᱠᱷᱟ ᱜᱚᱨᱤᱥᱴᱷᱚᱛᱟ ᱵᱟᱭ ᱧᱟᱢ ᱟᱠᱟᱫᱟ, ᱤᱭᱮᱩᱪᱩᱨᱤᱣᱟᱜ ᱠᱚᱣᱥᱚᱞᱜᱚᱛᱚ ᱞᱟᱭᱤᱱ ᱠᱷᱟᱹᱛᱤᱨ ᱜᱮ ᱾ ᱪᱮᱫᱟᱜ ᱥᱮ ᱫᱤᱞᱞᱤ ᱨᱮ ᱥᱤᱛᱟᱨᱟᱢᱟᱜ ᱧᱩᱢ ᱦᱟᱞᱟᱝ ᱢᱟᱦᱟ ᱨᱮ ᱦᱮᱡ ᱠᱟᱛᱮᱫ ᱵᱤᱨᱳᱫᱷᱤ ᱚᱠᱚᱭ ᱜᱮᱞᱵᱟᱨ (᱑᱒) ᱜᱚᱴᱟᱝ ᱨᱟᱡᱽᱼᱟᱹᱨᱤ ᱯᱟᱨᱴᱤ ᱨᱮᱱ ᱱᱮᱛᱟ ᱠᱚ ᱩᱱᱤᱭᱟᱜ ᱢᱟᱨᱟᱝ ᱵᱷᱩᱢᱤᱠᱟ ᱨᱮᱭᱟᱜ ᱠᱟᱛᱷᱟ ᱠᱚ ᱞᱟᱹᱭ ᱟᱠᱟᱫᱟ ᱾ ᱦᱟᱯᱮᱱ ᱫᱤᱱ ᱨᱮ ᱥᱤ ᱯᱤ ᱟᱭ ᱮᱢ ᱪᱤᱠᱟᱹᱛᱮ ᱛᱤᱸᱜᱩ ᱠᱮᱴᱮᱡ ᱥᱟᱶᱛᱮ ᱵᱤ ᱡᱮ ᱯᱤ ᱫᱤᱥᱚᱢ ᱨᱮᱭᱟᱜ ᱥᱟᱥᱚᱱ ᱠᱷᱚᱢᱚᱛᱟ ᱠᱷᱚᱱ ᱚᱪᱚᱜ ᱦᱩᱭᱩᱜᱼᱟ, ᱫᱟᱨᱟᱭ ᱠᱟᱱ ᱯᱟᱨᱴᱤ ᱠᱚᱝᱜᱨᱮᱹᱥ ᱞᱟᱹᱜᱤᱫ ᱰᱟᱦᱟᱨ ᱛᱮᱭᱟᱨ ᱜᱮ ᱛᱟᱦᱮᱸ ᱠᱟᱱᱟ ᱥᱤᱛᱟᱨᱟᱢᱟᱜ ᱞᱚᱠᱠᱚ ᱫᱚ ᱾ ᱤᱭᱮᱩᱪᱩᱨᱤ ᱵᱟᱝ ᱛᱟᱦᱮᱱ ᱚᱠᱛᱚ ᱨᱮ ᱥᱤ ᱯᱤ ᱟᱭ ᱮᱢ ᱨᱮᱱ ᱥᱟᱱᱟᱢ ᱠᱚ ᱢᱤᱫ ᱠᱟᱛᱮᱫ ᱠᱟᱹᱢᱤᱦᱚᱨᱟ ᱜᱮ ᱦᱩᱭᱩᱜᱼᱟ ᱥᱤᱛᱟᱨᱟᱢ ᱤᱭᱮᱩᱪᱩᱨᱤ ᱞᱟᱹᱜᱤᱫ ᱡᱚᱛᱷᱟᱛ ᱢᱟᱹᱱ ᱾
ᱫᱤᱞᱞᱤ JNU ᱨᱮ ᱯᱟᱲᱦᱟᱣ ᱚᱠᱛᱚ ᱑᱙᱗᱓ᱼ᱗᱔ ᱥᱟᱹᱦᱤᱛ ᱠᱷᱚᱱ ᱜᱮ ᱤᱭᱮᱩᱪᱩᱨᱤ ᱥᱟᱶ ᱛᱟᱲᱟᱢ ᱰᱟᱦᱟᱨᱮ ᱮᱛᱚᱦᱚᱵ ᱞᱮᱫᱟ ᱠᱟᱨᱟᱴ ᱫᱚ ᱾ ᱢᱟᱨᱮ ᱠᱟᱛᱷᱟ ᱠᱚ ᱩᱭᱩᱦᱟᱹᱨ ᱠᱟᱛᱮᱫ ᱤᱭᱮᱩᱪᱩᱨᱤ ᱤᱫᱤ ᱠᱟᱛᱮᱫ ᱠᱟᱨᱟᱴᱟᱜ ᱞᱟᱹᱭ ᱢᱚᱫᱽᱫᱷᱚ ᱵᱤᱛᱛᱚ ᱯᱚᱨᱤᱵᱟᱨ ᱠᱷᱚᱱ ᱢᱮᱫᱷᱟᱵᱤ ᱪᱷᱟᱛᱨᱚᱭ ᱛᱟᱦᱮᱸ ᱠᱟᱱᱟ ᱟᱨ ᱩᱱᱟᱜ ᱜᱟᱱ ᱰᱤᱜᱽᱨᱤ ᱛᱟᱦᱮᱸ ᱠᱟᱱ ᱛᱟᱭᱟ ᱡᱮ ᱟᱭ ᱮ ᱮᱥ, ᱟᱭ ᱮᱯᱷ ᱮᱥ,ᱠᱚᱨᱯᱳᱨᱮᱹᱴ ᱟᱨᱵᱟᱝ ᱵᱮᱝᱠ ᱨᱮᱦᱚᱸ ᱪᱟᱹᱠᱨᱤ ᱧᱟᱢ ᱫᱟᱲᱮ ᱠᱮᱭᱟᱭ ᱾ ᱢᱮᱱᱠᱷᱟᱱ ᱩᱱᱤᱫᱚ ᱚᱱᱟ ᱠᱚ ᱵᱟᱝ ᱠᱟᱹᱢᱤ ᱠᱟᱛᱮᱫ ᱵᱤᱯᱞᱚᱵᱤ ᱪᱮᱛᱚᱱᱟ ᱠᱟᱷᱹᱛᱤᱨ ᱢᱟᱨᱠᱥᱵᱟᱫᱽ ᱥᱟᱶᱛᱮ ᱥᱟᱜᱟᱹᱭᱮ ᱛᱚᱯᱚᱞ ᱞᱮᱫ ᱛᱟᱦᱮᱱᱟ ᱾ ᱦᱚᱲᱢᱚ ᱨᱮ ᱟᱡᱟᱨ ᱠᱷᱟᱹᱛᱤᱨ ᱑᱙ ᱟᱜᱚᱥᱴ ᱦᱟᱥᱯᱟᱛᱟᱞ ᱨᱮ ᱛᱤᱠᱪᱷᱟᱹ ᱞᱟᱹᱜᱤᱫ ᱵᱷᱩᱨᱛᱤ ᱞᱮᱱ ᱛᱟᱦᱮᱱᱟ ᱾ ᱦᱟᱥᱯᱟᱛᱟᱞ ᱨᱮ ᱠᱟᱨᱟᱴ ᱩᱱᱤ ᱥᱟᱶᱛᱮ ᱧᱟᱯᱟᱢ ᱪᱟᱞᱟᱣ ᱠᱟᱛᱮᱫ ᱜᱟᱞᱢᱟᱨᱟᱣ ᱞᱮᱫᱟᱠᱤᱱ ᱯᱟᱨᱴᱤ ᱠᱚᱝᱜᱨᱮᱹᱥ ᱨᱮᱭᱟᱜ ᱠᱟᱹᱢᱤᱦᱚᱨᱟ ᱤᱫᱤ ᱠᱟᱛᱮᱫ ᱾ ᱚᱱᱟ ᱠᱷᱟᱹᱛᱤᱨ ᱤᱭᱮᱩᱪᱩᱨᱤᱭᱟᱜ ᱵᱟᱝ ᱯᱩᱨᱟᱹᱣ ᱟᱠᱟᱱ ᱯᱚᱨᱤᱠᱚᱞᱯᱚᱱᱟ ᱜᱮ ᱯᱩᱨᱟᱹᱣ ᱨᱮᱭᱟᱜ ᱠᱟᱛᱷᱟᱭ ᱞᱟᱹᱭ ᱠᱮᱫᱟ ᱯᱨᱚᱠᱟᱥ ᱠᱟᱨᱟᱴ ᱾ ᱢᱮᱱᱠᱷᱟᱱ ᱥᱤ ᱯᱤ ᱟᱭ ᱮᱢ ᱨᱮᱱ ᱨᱟᱡᱽᱡᱚ ᱥᱚᱢᱯᱟᱫᱚᱠ ᱢᱚᱦᱚᱢᱢᱚᱫᱽ ᱥᱮᱞᱤᱢᱟᱜ ᱞᱟᱹᱭ ᱡᱮ ᱵᱟᱝᱞᱟ ᱨᱮ ᱵᱟᱢ ᱯᱚᱱᱛᱷᱟ ᱠᱚᱣᱟᱜ ᱯᱩᱱᱱᱚ ᱡᱟᱜᱚᱨᱚᱱ ᱵᱟᱝ ᱦᱩᱭ ᱞᱮᱱᱠᱷᱟᱱ ᱫᱤᱥᱚᱢ ᱨᱮ ᱛᱤᱸᱜᱩ ᱫᱚ ᱢᱩᱥᱠᱤᱞ ᱜᱮᱭᱟ ᱾ ᱵᱟᱝᱞᱟ ᱨᱮ ᱵᱤ ᱡᱮ ᱯᱤ, ᱛᱨᱤᱱᱚᱢᱩᱞ ᱵᱟᱱᱟᱨ ᱨᱟᱡᱽᱼᱟᱹᱨᱤ ᱫᱚᱞᱟᱜ ᱵᱤᱯᱚᱨᱤᱛ ᱢᱩᱠᱷᱤ ᱨᱮ ᱚᱵᱚᱥᱛᱷᱟᱱ ᱤᱫᱤ ᱠᱟᱛᱮᱫ ᱥᱮᱞᱤᱢᱟᱜ ᱞᱟᱹᱭ, ᱵᱟᱝᱞᱟ ᱨᱮ ᱪᱟᱞᱟᱜ ᱠᱟᱱ ᱥᱚᱱᱛᱨᱟᱥ ᱦᱚᱛᱮᱛᱮ ᱠᱚᱪᱞᱚᱱ ᱦᱚᱪᱚᱣᱟᱠᱟᱱ ᱦᱚᱲ ᱠᱚ ᱟᱛᱮ ᱡᱚᱠᱷᱚᱱ ᱠᱟᱹᱢᱤᱦᱚᱨᱟ ᱠᱚᱠᱚ ᱥᱟᱯᱲᱟᱣ ᱮᱫᱟ ᱩᱱ ᱚᱠᱛᱚ ᱩᱱᱠᱩ ᱠᱚ ᱢᱮᱱ ᱞᱮᱫ ᱛᱟᱦᱮᱱᱟ ᱡᱮ, ᱥᱤ ᱯᱤ ᱟᱭ ᱮᱢ ᱫᱚ ᱫᱩᱨᱵᱤᱱ ᱛᱮᱦᱚᱸ ᱵᱟᱝᱠᱚ ᱧᱮᱞ ᱧᱟᱢᱚᱜᱼᱟ, ᱢᱮᱱᱠᱷᱟᱱ ᱩᱱᱤ ᱥᱤ ᱯᱤ ᱟᱭ ᱮᱢ ᱜᱮ ᱡᱚᱠᱷᱚᱱ ᱟᱨᱹᱡᱤ ᱠᱚᱨ ᱤᱫᱤ ᱠᱟᱛᱮᱫ ᱯᱨᱚᱛᱤᱵᱟᱫᱽ ᱮᱫᱟᱭ ᱛᱚᱠᱷᱚᱱ ᱥᱤ ᱯᱤ ᱟᱭ ᱮᱢ ᱠᱚ ᱧᱮᱞ ᱧᱟᱢᱮᱫ ᱠᱚᱣᱟ ᱥᱟᱥᱚᱠ ᱨᱮ ᱫᱩᱲᱩᱵ ᱟᱠᱟᱱ ᱴᱤ ᱮᱢ ᱥᱤ ᱞᱮᱠᱟᱱ ᱨᱟᱡᱽᱼᱟᱹᱨᱤ ᱫᱚᱞ ᱾ ᱛᱚᱵᱮ ᱦᱟᱯᱮᱱ ᱫᱤᱱ ᱨᱮ ᱛᱤᱸᱜᱩ ᱠᱮᱴᱮᱡ ᱞᱟᱹᱜᱤᱫ ᱥᱤ ᱯᱤ ᱟᱭ ᱮᱢ ᱨᱮᱱ ᱠᱟᱹᱢᱤᱭᱟᱹ ᱠᱚ ᱟᱨᱦᱚᱸ ᱟᱹᱰᱤᱜᱟᱱ ᱯᱚᱨᱤᱥᱨᱚᱢ ᱞᱟᱹᱠᱛᱤ ᱢᱮᱱᱟᱜ ᱟᱠᱟᱫᱟ ᱢᱮᱱᱛᱮᱠᱤᱱ ᱞᱟᱹᱭ ᱠᱮᱫᱟ ᱯᱚᱞᱤᱴᱵᱩᱨᱳ ᱨᱮᱱ ᱢᱮᱢᱵᱟᱨ ᱥᱩᱨᱡᱚᱠᱟᱱᱛᱚ ᱢᱤᱥᱨᱚ ᱟᱨ ᱵᱤᱢᱟᱱ ᱵᱚᱥᱩ ᱾
