ᱦᱟᱦᱟᱲᱟᱜ ᱪᱤᱛᱟᱹᱨ ᱯᱟᱨᱠᱚᱢ ᱨᱮ ᱨᱩᱜᱤ, ᱮᱢᱵᱩᱞᱮᱱᱥ ᱵᱚᱫᱚᱞ ᱛᱮ ᱜᱚᱜ ᱠᱟᱛᱮᱫ ᱦᱟᱥᱯᱟᱛᱟᱞ ᱛᱮ ᱤᱫᱤ ᱦᱩᱭᱮᱱᱟ ᱨᱩᱜᱤ

(PAPUL MURMU) ᱟᱹᱰᱤ ᱜᱮ ᱵᱟᱹᱲᱤᱡ ᱰᱟᱦᱟᱨ ᱨᱮᱭᱟᱜ ᱦᱟᱞᱚᱛ, ᱵᱟᱝᱜᱮ ᱪᱟᱞᱟᱜ ᱠᱟᱱᱟ ᱴᱳᱴᱳ ᱥᱮ ᱮᱢᱵᱩᱞᱮᱱᱥ ᱞᱮᱠᱟᱱ ᱡᱟᱱᱵᱟᱦᱚᱱ ᱠᱚ ᱾ ᱜᱟᱹᱰᱤ ᱠᱚ ᱵᱟᱝ ᱪᱟᱞᱟᱜ ᱦᱤᱡᱩᱜ ᱠᱷᱟᱹᱛᱤᱨ ᱟᱹᱛᱩ ᱚᱲᱟᱜ ᱠᱚᱨᱮ ᱡᱟᱦᱟᱸᱭ ᱠᱚ ᱨᱩᱣᱟᱹ ᱟᱡᱟᱨ ᱞᱮᱱᱠᱷᱟᱱ ᱩᱱᱠᱩ ᱫᱚ ᱮᱢᱵᱩᱞᱮᱱᱥ ᱛᱮ ᱦᱟᱥᱯᱟᱛᱟᱞ ᱵᱟᱝ ᱤᱫᱤ ᱠᱟᱛᱮᱫ ᱯᱟᱨᱠᱚᱢ ᱛᱮ ᱜᱚᱜ ᱠᱟᱛᱮᱫ ᱤᱫᱤ ᱦᱩᱭᱩᱜᱼᱟ ᱾ ᱟᱨ ᱚᱱᱠᱟ ᱜᱮ ᱢᱤᱫ ᱦᱟᱦᱟᱲᱟᱜ ᱪᱤᱛᱟᱹᱨ ᱧᱮᱞ ᱧᱟᱢ ᱮᱱᱟ ᱢᱟᱞᱫᱟ ᱡᱮᱞᱟ ᱦᱚᱵᱤᱵᱽᱯᱩᱨ ᱵᱞᱚᱠ ᱨᱮᱭᱟᱜ ᱢᱮᱥᱛᱚᱨ ᱯᱟᱲᱟ ᱟᱹᱛᱩ ᱨᱮ ᱾ ᱢᱮᱥᱛᱚᱨ ᱯᱟᱲᱟ ᱨᱮᱱ ᱟᱹᱛᱩ ᱨᱮᱱ ᱠᱟᱹᱱᱩ ᱦᱮᱢᱵᱨᱚᱢ ᱟᱪᱠᱟ ᱜᱮ ᱟᱡᱟᱨ ᱨᱮᱭ ᱯᱟᱲᱟᱣ ᱞᱮᱱᱠᱷᱟ ᱢᱮᱛᱚᱨ ᱯᱟᱲᱟ ᱪᱟᱞᱟᱜ ᱰᱟᱦᱟᱨ ᱨᱮ ᱮᱢᱵᱩᱞᱞᱮᱥ ᱥᱮ ᱴᱳᱴᱳ ᱵᱟᱝ ᱪᱟᱞᱟᱜ ᱠᱷᱟᱹᱛᱤᱨ ᱯᱟᱨᱠᱚᱢ ᱨᱮ ᱜᱚᱜ ᱠᱟᱛᱮᱫ ᱤᱫᱤ ᱦᱩᱭ ᱞᱮᱱᱟ ᱦᱟᱥᱯᱟᱛᱟᱞ ᱛᱮ ᱾ ᱠᱟᱹᱱᱩ ᱦᱮᱢᱵᱨᱚᱢ ᱯᱟᱨᱠᱚᱢ ᱛᱮ ᱜᱚᱜ ᱨᱮᱭᱟᱜ ᱪᱤᱛᱟᱹᱨ ᱥᱳᱥᱟᱞ ᱢᱤᱰᱤᱭᱟ ᱨᱮ ᱵᱷᱟᱭᱨᱟᱞ ᱛᱟᱭᱚᱢ ᱢᱟᱞᱫᱟ ᱨᱮᱭᱟᱜ ᱨᱟᱡᱽᱼᱟᱹᱨᱤ ᱨᱮ ᱮᱛᱚᱦᱚᱵ ᱟᱠᱟᱱᱟ ᱪᱟᱯᱟᱱᱳᱛᱚᱨ ᱾ ᱢᱮᱥᱛᱚᱨ ᱯᱟᱲᱟ ᱨᱮᱱ ᱟᱹᱛᱩ ᱦᱚᱲ ᱠᱚᱣᱟᱜ ᱞᱟᱹᱭ, ᱟᱹᱛᱩ ᱠᱷᱚᱱ ᱮᱴᱟᱜ ᱥᱮᱫ ᱪᱟᱞᱟᱜ ᱨᱮᱭᱟᱜ ᱚᱱᱟ ᱠᱟᱱ ᱜᱮᱭᱟ ᱢᱮᱹᱱ ᱰᱟᱦᱟᱨ, ᱛᱚᱵᱮ ᱵᱟᱹᱨᱥᱟᱹ ᱚᱠᱛᱚ ᱨᱮ ᱪᱟᱞᱟᱜ ᱦᱤᱡᱩᱜ ᱨᱮ ᱟᱨᱦᱚᱸ ᱟᱹᱰᱤ ᱜᱮ ᱦᱟᱨᱠᱮᱹᱛ ᱨᱮᱠᱚ ᱯᱟᱲᱟᱜᱼᱟ ᱾
᱒᱐᱒᱔ ᱨᱮ ᱛᱤᱸᱜᱩ ᱠᱟᱛᱮᱫ ᱴᱮᱹᱠᱱᱳᱞᱳᱡᱤ ᱞᱮᱠᱟᱛᱮ ᱟᱹᱰᱤ ᱞᱟᱦᱟ ᱟᱠᱟᱱᱟ ᱫᱤᱥᱚᱢ, ᱚᱥᱥᱤᱠᱟᱹᱨ ᱨᱮᱭᱟᱜ ᱪᱮᱫ ᱦᱚᱸ ᱵᱟᱝ ᱠᱟᱱᱟ, ᱢᱮᱱᱠᱷᱟᱱ ᱪᱮᱫᱟᱜ ᱱᱤᱛ ᱦᱚᱸ ᱢᱟᱞᱫᱟ ᱡᱮᱞᱟ ᱨᱮᱭᱟᱜ ᱢᱮᱥᱛᱚᱨ ᱯᱟᱲᱟ ᱨᱮ ᱩᱛᱱᱟᱹᱣ ᱨᱮᱭᱟᱜ ᱪᱤᱛᱟᱹᱨ ᱫᱚ ᱵᱟᱝ ᱧᱮᱞᱚᱜ ᱠᱟᱱᱟ ᱾ ᱡᱟᱦᱟᱸ ᱚᱠᱛᱚ ᱨᱮ ᱢᱟᱹᱱᱢᱤ ᱪᱟᱸᱫᱚᱹ ᱨᱮᱠᱚ ᱥᱮᱴᱮᱨ ᱟᱠᱟᱱᱟ ᱚᱱᱠᱟᱱ ᱚᱠᱛᱚ ᱨᱮᱦᱚᱸ ᱯᱟᱨᱠᱚᱢ ᱨᱮ ᱜᱚᱜ ᱠᱟᱛᱮᱫ ᱤᱫᱤ ᱦᱩᱭᱩᱜ ᱠᱟᱱᱟ ᱨᱩᱜᱤ ᱾
ᱢᱮᱥᱛᱚᱨ ᱯᱟᱲᱟ ᱨᱮᱭᱟᱜ ᱰᱟᱦᱟᱨ ᱤᱫᱤ ᱠᱟᱛᱮᱫ ᱦᱚᱵᱤᱵᱽᱯᱩᱨ ᱨᱮᱱ ᱵᱤᱫᱷᱟᱭᱚᱠ ᱡᱩᱭᱮᱞ ᱢᱩᱨᱢᱩᱣᱟᱜ ᱞᱟᱹᱭ ᱰᱟᱦᱟᱨ ᱟᱹᱰᱤ ᱡᱤᱞᱤᱧ ᱠᱷᱟᱹᱛᱤᱨ ᱯᱚᱧᱪᱟᱭᱮᱹᱛ ᱨᱮᱭᱟᱜ ᱵᱟᱡᱮᱹᱴ ᱛᱮ ᱵᱟᱝ ᱜᱮ ᱦᱩᱭᱩᱜ ᱠᱟᱱᱟ ᱾ ᱢᱮᱱᱠᱷᱟᱱ ᱦᱟᱯᱮᱱ ᱫᱤᱱ ᱨᱮ ᱟᱡᱟᱜ ᱵᱤᱫᱷᱟᱭᱚᱠ ᱯᱷᱟᱱᱰ ᱠᱷᱚᱱ ᱜᱮ ᱠᱟ,ᱢᱤ ᱨᱮᱭᱟᱜ ᱠᱟᱛᱷᱟᱭ ᱞᱟᱹᱭ ᱟᱠᱟᱫᱟ ᱾