(PAPUL MURMU) Tata’s state funeral : ᱥᱟᱹᱨᱫᱤ ᱢᱟᱦᱟ ᱟᱹᱭᱩᱵ ᱵᱮᱲᱟ ᱢᱩᱢᱵᱟᱭ ᱨᱮᱭᱟᱜ ᱳᱨᱞᱤ ᱨᱮ ᱢᱩᱪᱟᱹᱫ ᱠᱟᱹᱢᱤ ᱦᱩᱭ ᱥᱟᱹᱛ ᱮᱱᱟ ᱨᱚᱛᱚᱱ ᱴᱟᱴᱟᱣᱟᱜ ᱾ ᱠᱮᱱᱫᱨᱤᱭᱚ ᱯᱟᱥᱴᱟ ᱠᱷᱚᱱ ᱨᱚᱛᱚᱱ ᱴᱟᱴᱟᱣᱟᱜ ᱢᱩᱪᱟᱹᱫ ᱠᱟᱹᱢᱤ ᱦᱚᱨᱟ ᱨᱮ ᱥᱮᱴᱮᱨ ᱛᱟᱦᱮᱸ ᱠᱟᱱᱟᱭ ᱥᱚᱨᱟᱥᱴᱨᱚ ᱢᱚᱱᱛᱨᱤ ᱚᱢᱤᱛ ᱥᱟ ᱾ ᱯᱨᱚᱫᱷᱟᱱ ᱢᱚᱱᱛᱨᱤ ᱵᱤᱫᱮᱹᱥ ᱥᱚᱯᱷᱚᱨ ᱨᱮ ᱛᱟᱦᱮᱱ ᱠᱷᱟᱹᱛᱤᱨ ᱠᱮᱱᱫᱨᱤᱭᱚ ᱥᱚᱨᱠᱟᱨ ᱯᱟᱥᱴᱟ ᱠᱷᱚᱱ ᱥᱮᱴᱮᱨ ᱞᱮᱱᱟᱭ ᱚᱢᱤᱛ ᱥᱟ ᱾ ᱢᱚᱦᱟᱨᱟᱥᱴᱨᱚ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱮᱠᱱᱟᱛᱷ ᱥᱤᱱᱰᱮᱹ ᱞᱟᱭ ᱪᱷᱟᱹᱴᱤᱭᱟᱹᱨ ᱠᱮᱫᱟᱭ ᱡᱮ ᱨᱟᱡᱚᱠᱤᱭᱚ ᱢᱟᱹᱱ ᱟᱛᱮ ᱜᱮ ᱢᱩᱪᱟᱹᱫ ᱠᱟᱹᱢᱤᱦᱚᱨᱟ ᱦᱩᱭ ᱮᱱᱟ ᱴᱟᱴᱟ ᱜᱳᱥᱴᱷᱤ ᱨᱮᱱ ᱪᱮᱭᱟᱨᱢᱮᱱ ᱨᱚᱛᱚᱱ ᱴᱟᱴᱟᱣᱟᱜ ᱾ ᱚᱱᱟ ᱥᱟᱶᱛᱮ ᱥᱟᱹᱨᱫᱤ ᱢᱟᱦᱟ ᱦᱤᱞᱳᱜ ᱢᱚᱦᱟᱨᱟᱥᱴᱨᱚ ᱯᱚᱱᱚᱛ ᱨᱮ ᱨᱟᱥᱴᱨᱤᱭᱚ ᱥᱳᱠ ᱦᱚᱸᱭ ᱜᱷᱳᱥᱚᱱᱟ ᱟᱠᱟᱫᱟ ᱥᱤᱱᱰᱮᱹ ᱾ ᱥᱟᱹᱨᱫᱤ ᱢᱟᱦᱟ ᱦᱤᱞᱳᱜ ᱟᱹᱭᱩᱵ ᱵᱮᱲᱟ ᱯᱩᱱ ᱵᱟᱡᱟᱜ ᱚᱠᱛᱚ ᱳᱨᱞᱤ ᱨᱮᱭᱟᱜ ‘ᱚᱱᱛᱚᱥᱴᱷᱤ’ ᱨᱮ ᱨᱚᱛᱚᱱ ᱴᱟᱴᱟᱣᱟᱜ ᱜᱚᱡ ᱦᱚᱲᱢᱚ ᱟᱹᱜᱩ ᱦᱩᱭ ᱞᱮᱱ ᱛᱟᱦᱮᱱᱟ ᱾ ᱚᱱᱟ ᱞᱟᱦᱟ ᱱᱚᱨᱤᱢᱮᱱ ᱯᱚᱭᱮᱱᱴ ᱮᱱ ᱥᱤ ᱯᱤ ᱮ ᱞᱚᱱᱨᱮ ᱠᱟᱺᱪ ᱨᱮᱭᱟᱜ ᱵᱟᱠᱥᱚ ᱨᱮ ᱩᱱᱤᱭᱟᱜ ᱜᱚᱡ ᱦᱚᱲᱢᱚ ᱫᱚ ᱫᱚᱦᱚᱣ ᱠᱟᱱᱟ ᱾ ᱡᱟᱦᱟᱸ ᱦᱚᱞᱨᱮ ᱨᱚᱛᱚᱱ ᱴᱟᱴᱟᱣᱟᱜ ᱜᱚᱡ ᱦᱚᱲᱢᱚ ᱫᱚᱦᱚ ᱛᱟᱦᱮᱸ ᱠᱟᱱᱟ ᱚᱱᱟ ᱵᱟᱠᱥᱚ ᱫᱚ ᱵᱷᱟᱨᱚᱛ ᱨᱮᱭᱟᱜ ᱡᱟᱹᱛᱤᱭᱟᱹᱨᱤ ᱪᱤᱨ ᱛᱮ ᱩᱭᱩ ᱮᱥᱮᱫ ᱛᱟᱦᱮᱸ ᱠᱟᱱᱟ ᱾ ᱟᱨ ᱩᱱᱤ ᱯᱟᱥᱮ ᱨᱮ ᱫᱚᱦᱚ ᱛᱟᱦᱮᱸ ᱠᱟᱱᱟ ᱨᱚᱛᱚᱱ ᱴᱟᱴᱟᱣᱟᱜ ᱞᱟᱸᱫᱟ ᱟᱠᱟᱫ ᱪᱤᱛᱟᱹᱨ ᱾
ᱚᱢᱤᱛ ᱥᱟ ᱪᱷᱟᱲᱟ ᱦᱚᱸ ᱨᱚᱛᱚᱱ ᱴᱟᱴᱟᱣᱟᱜ ᱢᱩᱪᱟᱹᱫ ᱠᱟᱹᱢᱤᱦᱚᱨᱟ ᱨᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱢᱚᱦᱟᱨᱟᱥᱴᱨᱚ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱮᱠᱱᱟᱛᱷ ᱥᱤᱱᱰᱮ, ᱫᱮᱵᱮᱱᱫᱨᱚ ᱯᱷᱚᱰᱚᱱᱵᱤᱥ ᱜᱩᱡᱽᱨᱟᱴ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱵᱷᱩᱯᱮᱱᱫᱨᱚ ᱯᱮᱴᱮᱞ ᱾ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱴᱟᱴᱟ ᱜᱳᱥᱴᱷᱤ ᱨᱮᱱ ᱢᱟᱨᱟᱝ ᱟᱢᱟᱞᱤᱭᱟᱹ ᱟᱨ ᱫᱤᱥᱚᱢ ᱨᱮᱱ ᱢᱟᱹᱱᱟᱱ ᱦᱚᱲ ᱠᱚ ᱾
ᱯᱟᱨᱚᱢᱮᱱ ᱥᱟᱹᱜᱩᱱ ᱢᱟᱦᱟ ᱦᱤᱞᱳᱜ ᱢᱚᱦᱟᱱᱚᱜᱚᱨ ᱢᱩᱢᱵᱟᱭ ᱨᱮᱭᱟᱜ ᱢᱤᱫ ᱦᱟᱥᱯᱟᱛᱟᱞ ᱨᱮ ᱵᱚᱸᱜᱟ ᱛᱟᱞᱟ ᱞᱮᱱ ᱛᱟᱦᱮᱱᱟ ᱨᱚᱛᱚᱱ ᱴᱟᱴᱟ ᱾ ᱵᱚᱸᱜᱟ ᱛᱟᱞᱟ ᱚᱠᱛᱚ ᱨᱮ ᱨᱚᱛᱚᱱ ᱴᱟᱴᱟᱣᱟᱜ ᱩᱢᱮᱨ ᱦᱩᱭ ᱞᱮᱱ ᱛᱟᱦᱮᱱᱟ ᱘᱗ ᱥᱮᱨᱢᱟ ᱾
ᱛᱚᱵᱮ ᱴᱟᱴᱟ ᱜᱳᱥᱴᱷᱤ ᱥᱟᱞᱟᱜ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱟᱹᱰᱤ ᱜᱟᱹᱦᱤᱨ ᱥᱟᱹᱜᱟᱹᱭ ᱢᱮᱱᱟᱜ ᱟᱠᱟᱫᱟ ᱞᱟᱹᱭ ᱠᱮᱫᱟᱭ ᱡᱷᱟᱲᱠᱷᱚᱸᱰ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱦᱮᱢᱚᱱᱛ ᱥᱚᱨᱮᱱ ᱾ ᱚᱱᱟᱛᱮ ᱢᱚᱦᱟᱨᱟᱥᱴᱨᱚ ᱥᱟᱞᱟᱜ ᱡᱷᱟᱲᱠᱷᱚᱸᱰ ᱨᱮᱦᱚᱸ ᱢᱤᱫ ᱢᱟᱦᱟ ᱨᱮᱭᱟᱜ ᱨᱟᱥᱴᱨᱤᱭᱚ ᱥᱳᱠᱮ ᱜᱷᱳᱥᱚᱱᱟ ᱟᱠᱟᱫᱟ ᱦᱮᱢᱚᱱᱛ ᱥᱚᱨᱮᱱ ᱾
