(PAPUL MURMU) Lois Marandi & three ex-MLAs, join JMM ahead of polls : ᱡᱷᱟᱲᱠᱷᱚᱸᱰ ᱵᱤᱫᱷᱟᱱᱥᱚᱵᱷᱟ ᱵᱟᱪᱷ ᱱᱟᱣ ᱑᱓ ᱟᱨ ᱒᱐ ᱱᱚᱵᱷᱮᱢᱵᱚᱨ ᱨᱮ ᱢᱮᱱᱟᱜ ᱟᱠᱟᱫᱟ᱾ ᱵᱤᱹᱡᱮᱹᱯᱤ ᱯᱟᱥᱴᱟ ᱠᱷᱚᱱ ᱠᱮᱱᱰᱤᱴᱮᱹᱴ ᱠᱚᱣᱟᱜ ᱧᱩᱛᱩᱢ ᱦᱚᱸ ᱩᱪᱷᱟᱹᱱ ᱦᱩᱭ ᱟᱠᱟᱱᱟ ᱾ ᱟᱨ ᱚᱱᱠᱟᱱ ᱚᱠᱛᱚ ᱨᱮᱜᱮ ᱡᱷᱟᱲᱠᱷᱚᱸᱰ ᱵᱤᱹᱡᱮᱹᱯᱤ ᱨᱮ ᱢᱤᱫ ᱢᱟᱨᱟᱝ ᱡᱷᱟᱴᱠᱟ ᱾ ᱞᱩᱭᱤᱥ ᱢᱟᱨᱟᱱᱰᱤ ᱥᱟᱶᱛᱮ ᱟᱨᱦᱚᱸ ᱯᱮᱭᱟ ᱢᱟᱨᱮ ᱵᱤᱹᱡᱮᱹᱯᱤ ᱵᱤᱫᱷᱟᱭᱚᱠ ᱠᱩᱱᱟᱞ ᱥᱟᱨᱚᱝᱜᱤ, ᱞᱚᱠᱠᱷᱚᱱ ᱴᱩᱰᱩ ᱟᱨ ᱠᱮᱫᱟᱨ ᱦᱟᱡᱽᱨᱟ ᱡᱮᱹᱮᱢᱹᱮᱢ ᱨᱮᱠᱚ ᱥᱮᱞᱮᱫ ᱮᱱᱟ ᱾ ᱵᱟᱪᱷᱱᱟᱣ ᱞᱟᱦᱟ ᱨᱮ ᱫᱚᱞ ᱨᱮ ᱡᱟᱦᱟᱸ ᱵᱷᱟᱸᱜᱚᱱ ᱧᱮᱞᱮᱜ ᱠᱟᱱᱟ ᱚᱱᱟᱫᱚ ᱵᱤᱹᱡᱮᱹᱯᱤ ᱥᱟᱢᱩ ᱫᱚ ᱵᱟᱝ, ᱵᱷᱟᱸᱜᱚᱱ ᱟᱡᱽᱥᱩ ᱨᱮᱦᱚᱸ ᱦᱩᱭ ᱟᱠᱟᱱᱟ ᱾ ᱟᱡᱽᱥᱩ ᱱᱮᱛᱟ ᱩᱢᱟᱠᱟᱱᱛ ᱨᱚᱡᱚᱠ ᱦᱚᱸ ᱯᱟᱴᱤ ᱵᱟᱹᱜᱤ ᱠᱟᱛᱮᱫ ᱡᱮᱹᱮᱢᱹᱮᱢ ᱨᱮᱭ ᱥᱮᱞᱮᱫ ᱟᱠᱟᱱᱟ ᱾
ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱒᱐᱑᱔ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱞᱩᱭᱤᱥ ᱢᱟᱨᱟᱱᱰᱤ ᱴᱷᱮᱱ ᱫᱩᱢᱠᱟ ᱠᱷᱚᱱ ᱕ ᱦᱟᱡᱟᱨ ᱠᱷᱚᱱ ᱦᱚᱸ ᱵᱟᱹᱲᱛᱤ ᱵᱷᱳᱴ ᱛᱮᱭ ᱦᱟᱨᱟᱳ ᱦᱚᱪᱚ ᱞᱮᱱᱟ ᱥᱤᱨᱟᱹᱢᱚᱱᱛᱨᱤ ᱦᱮᱢᱚᱱᱛ ᱥᱚᱨᱮᱱ ᱾ ᱞᱩᱭᱤᱥ ᱢᱟᱨᱟᱱᱰᱤ ᱡᱮᱹᱮᱢᱹᱮᱢ ᱨᱮ ᱥᱮᱞᱮᱫ ᱥᱟᱶᱛᱮ ᱫᱚᱞ ᱨᱮ ᱟᱛᱟᱝ ᱫᱟᱨᱟᱢ ᱠᱮᱫᱮᱭᱟᱭ ᱥᱤᱨᱟᱹᱢᱚᱱᱛᱨᱤ ᱦᱮᱢᱚᱱᱛ ᱥᱚᱨᱮᱱ ᱾ ᱞᱩᱭᱤᱥ ᱢᱟᱨᱟᱱᱰᱤ ᱤᱫᱤ ᱠᱟᱛᱮᱫ ᱦᱮᱢᱚᱱᱛ ᱥᱚᱨᱮᱱᱟᱜ ᱴᱩᱭᱤᱴ ᱵᱤᱹᱡᱮᱹᱯᱤ ᱨᱮᱱ ᱢᱟᱨᱮ ᱩᱯᱟᱫᱽᱫᱷᱟᱠᱥ ᱞᱩᱭᱤᱥ ᱢᱟᱨᱟᱱᱰᱤᱣᱟᱜ ᱫᱚᱞᱨᱮ ᱢᱟᱹᱱ ᱟᱛᱮ ᱟᱛᱟᱝᱼᱫᱟᱨᱟᱢ ᱢᱮᱱᱟᱜ ᱟᱠᱟᱫᱟ᱾
᱒᱐᱑᱔ ᱨᱮᱭ ᱦᱟᱨᱟᱣ ᱞᱮᱱ ᱨᱮᱦᱚᱸ ᱒᱐᱑᱙ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱑᱓᱑᱘᱘ ᱵᱷᱳᱴ ᱛᱮᱭ ᱡᱤᱛᱠᱟᱹᱨ ᱞᱮᱱᱟ ᱦᱮᱢᱚᱱᱛ ᱥᱚᱨᱮᱱ, ᱢᱮᱱᱠᱷᱟᱱ ᱛᱟᱭᱚᱢ ᱫᱟᱨᱟᱢ ᱚᱱᱟ ᱥᱤᱴ ᱠᱷᱚᱱ ᱨᱤᱡᱟᱭᱤᱱ ᱮᱢ ᱠᱟᱛᱮᱫ ᱵᱟᱨᱦᱮᱹᱴ ᱟᱥᱚᱱ ᱜᱮ ᱟᱡ ᱴᱷᱮᱱᱮ ᱫᱚᱦᱚ ᱞᱮᱫᱟ ᱾
ᱞᱩᱭᱤᱥ ᱢᱟᱨᱟᱱᱰᱤ ᱯᱟᱨᱴᱤ ᱠᱷᱚᱱ ᱨᱤᱡᱟᱭᱤᱱ ᱮᱢ ᱨᱮᱭᱟᱜ ᱠᱟᱛᱷᱟ ᱵᱤᱹᱡᱮᱹᱯᱤ ᱨᱮᱱ ᱯᱚᱱᱚᱛ ᱯᱟᱨᱥᱮᱫ ᱵᱟᱵᱩᱞᱟᱞ ᱢᱟᱨᱟᱱᱰᱤ ᱪᱤᱴᱷᱤ ᱛᱟᱞᱟᱛᱮ ᱵᱟᱰᱟᱭ ᱦᱚᱪᱚ ᱟᱠᱟᱫᱮᱭᱟ ᱾ ᱛᱚᱵᱮ ᱪᱤᱴᱷᱤ ᱨᱮ ᱱᱚᱣᱟ ᱦᱚᱸᱭ ᱞᱟᱹᱭ ᱟᱠᱟᱫᱟ ᱡᱷᱟᱲᱠᱷᱚᱸᱰ ᱧᱟᱢ ᱛᱟᱭᱚᱢ ᱯᱚᱱᱚᱛ ᱨᱮ ᱒᱐᱑᱔ ᱨᱮᱜᱮ ᱯᱩᱭᱞᱩ ᱫᱷᱟᱣ ᱵᱤᱹᱡᱮᱹᱯᱤ ᱫᱩᱢᱠᱟ ᱥᱤᱴᱮ ᱡᱤᱛᱠᱟᱹᱨ ᱞᱮᱱ ᱛᱟᱦᱮᱱᱟ, ᱡᱟᱦᱟᱸ ᱫᱚ ᱡᱮᱹᱮᱢᱹᱮᱢᱼᱟᱜ ‘ᱜᱟᱲ’ ᱢᱮᱱᱛᱮ ᱢᱟᱱᱟᱣ ᱦᱤᱡᱩᱜ ᱠᱟᱱ ᱛᱟᱦᱮᱱᱟ ᱾
