ᱵᱟᱸᱫᱷᱜᱟᱶ ᱨᱮᱭᱟᱜ ᱵᱤᱫᱷᱟᱭᱚᱠ ᱥᱤᱴ ᱠᱷᱚᱱ ᱨᱤᱡᱟᱭᱤᱱᱮ ᱮᱢ ᱠᱮᱫᱟ ᱳᱢᱳᱨ ᱟᱵᱽᱫᱩᱞᱞᱟ, ᱱᱤᱡᱮᱹᱨ ᱜᱷᱟᱨᱚᱸᱡᱽ ᱥᱟᱶ ᱡᱚᱯᱲᱟᱣ ᱟᱠᱟᱱ ᱜᱟᱱᱰᱮᱹᱨᱣᱟᱨ ᱥᱤᱴᱮ ᱫᱚᱦᱚ ᱠᱮᱫᱟ ᱳᱢᱳᱨ ᱟᱵᱽᱫᱩᱞᱞᱟ

ᱦᱟᱞᱮ ᱜᱮ ᱦᱩᱭ ᱥᱟᱹᱛ ᱟᱠᱟᱱᱟ ᱡᱚᱢᱢᱩ ᱠᱟᱥᱢᱤᱨ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ, ᱟᱨ ᱚᱱᱟ ᱵᱟᱪᱷᱱᱟᱣ ᱛᱟᱞᱟᱛᱮ ᱯᱚᱱᱚᱛ ᱨᱮᱭᱟᱜ ᱙᱐ ᱜᱚᱴᱟᱝ ᱥᱤᱴ ᱢᱩᱫᱽ ᱨᱮ  ᱔᱒ ᱜᱚᱴᱟᱝ ᱥᱤᱴ ᱨᱮᱭ ᱡᱤᱛᱠᱟᱹᱨ ᱟᱠᱟᱱᱟ ᱯᱷᱟᱨᱩᱠ ᱟᱵᱽᱫᱩᱞᱞᱟᱣᱟᱜ ᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ ᱾ ᱟᱨ ᱚᱱᱟ ᱛᱟᱭᱚᱢ ᱜᱮ ᱡᱚᱢᱢᱩ ᱠᱟᱥᱢᱤᱨ ᱨᱮᱱ ᱥᱤᱨᱟᱹᱢᱚᱱᱛᱨᱤ ᱞᱮᱠᱟᱛᱮ ᱵᱟᱪᱷᱱᱟᱣ ᱟᱠᱟᱱᱟᱭ ᱳᱢᱳᱨ ᱟᱵᱽᱫᱩᱞᱞᱟ ᱾ ᱵᱟᱸᱫᱷᱜᱟᱶ ᱥᱤᱴ ᱠᱷᱚᱱ ᱳᱢᱳᱨ ᱟᱵᱽᱫᱩᱞᱞᱟᱣᱟᱜ ᱨᱤᱡᱟᱭᱤᱱ ᱨᱮᱭᱟᱜ ᱠᱟᱛᱷᱟᱭ ᱞᱟᱹᱭ ᱠᱮᱫᱟ ᱡᱚᱢᱢᱩ ᱠᱟᱥᱢᱤᱨ ᱵᱤᱫᱷᱟᱱᱥᱚᱵᱷᱟ ᱨᱮᱱ ᱯᱨᱚᱴᱮᱢ ᱥᱯᱤᱠᱟᱨ ᱢᱩᱵᱟᱨᱚᱠ ᱜᱩᱞ ᱾

ᱛᱚᱵᱮ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱡᱚᱢᱢᱩ ᱠᱟᱥᱢᱤᱨ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱳᱢᱳᱨ ᱟᱵᱽᱫᱩᱞᱞᱟ ᱵᱟᱨᱭᱟ ᱥᱤᱴ ᱠᱷᱚᱱ ᱫᱟᱣᱮ ᱦᱟᱛᱟᱣ ᱞᱮᱫ ᱛᱟᱦᱮᱱᱟ, ᱢᱤᱫ ᱫᱚ ᱵᱟᱸᱫᱷᱜᱟᱶ ᱟᱨ ᱫᱚᱥᱟᱨ ᱫᱚ ᱜᱟᱱᱰᱮᱨᱣᱟᱞ ᱾ ᱵᱟᱱᱟᱨ ᱥᱤᱴ ᱠᱷᱚᱱ ᱜᱮ ᱡᱤᱛᱠᱟᱹᱨ ᱞᱮᱱᱟᱭ ᱳᱢᱳᱨ ᱟᱵᱽᱫᱩᱞᱞᱟ ᱾

ᱩᱱᱤᱭᱟᱜ ᱞᱟᱹᱭ ᱜᱟᱱᱰᱮᱨᱣᱟᱞ ᱥᱤᱴ ᱥᱟᱶᱛᱮ ᱟᱡᱟᱜ ᱜᱷᱟᱨᱚᱸᱡᱽ ᱨᱮᱭᱟᱜ ᱥᱟᱹᱜᱟᱭ ᱟᱹᱰᱤ ᱢᱟᱨᱮ ᱜᱮᱭᱟ ᱾ ᱳᱢᱳᱨ ᱟᱵᱽᱫᱩᱞᱞᱟ ᱨᱮᱱ ᱟᱯᱟᱛ ᱯᱷᱟᱨᱩᱠ ᱟᱵᱽᱫᱩᱞᱞᱟ ᱟᱨ ᱟᱡ ᱜᱚᱲᱚᱢ ᱦᱟᱲᱟᱢ ᱥᱮᱹᱠᱷ ᱟᱵᱽᱫᱩᱞᱞᱟ ᱦᱚᱸ ᱚᱱᱟ ᱜᱟᱱᱰᱮᱹᱨᱣᱟᱞ ᱥᱤᱴ ᱠᱷᱚᱱ ᱡᱤᱛᱠᱟᱹᱨ ᱠᱟᱛᱮᱫ ᱥᱤᱨᱟᱹᱢᱚᱱᱛᱨᱤ ᱦᱚᱸᱠᱤᱱ ᱵᱮᱱᱟᱣ ᱞᱮᱱᱟ ᱾ ᱚᱱᱟᱛᱮᱜᱮ ᱜᱟᱱᱰᱮᱹᱨᱣᱟᱞ ᱥᱤᱴ ᱱᱤᱡᱮᱨ ᱴᱷᱮᱱ ᱫᱚᱦᱚ ᱠᱟᱛᱮᱫ ᱵᱟᱸᱫᱷᱜᱟᱶ ᱠᱷᱚᱱ ᱨᱤᱡᱟᱭᱤᱱ ᱮᱢ ᱠᱮᱫᱟᱭ ᱳᱢᱳᱨ ᱟᱵᱽᱫᱩᱞᱞᱟ ᱾