(PAPUL MURMU) PM Modi to attend BRICS summit : 

ᱵᱨᱤᱠᱥ ᱜᱳᱥᱴᱷᱤ ᱫᱤᱥᱚᱢ (ᱵᱷᱟᱨᱟᱛ, ᱨᱟᱥᱤᱭᱟ, ᱪᱤᱱ, ᱵᱨᱟᱡᱤᱞ, ᱫᱚᱠᱷᱤᱱ ᱟᱯᱨᱤᱠᱟ) ᱨᱮᱭᱟᱜ ᱵᱚᱭᱴᱷᱚᱠ ᱨᱮ ᱥᱮᱞᱮᱫ ᱞᱟᱹᱜᱤᱫ ᱫᱟᱨᱟᱭ ᱦᱟᱯᱛᱟ ᱨᱟᱥᱤᱭᱟ ᱥᱚᱯᱷᱚᱨ ᱛᱮᱭ ᱪᱟᱞᱟᱜ ᱠᱟᱱᱟ ᱵᱷᱟᱨᱟᱛ ᱨᱮᱱ ᱯᱨᱚᱫᱷᱟᱱ ᱢᱚᱱᱛᱨᱤ ᱱᱚᱨᱮᱱᱫᱨᱚ ᱢᱳᱫᱤ ᱾ ᱥᱟᱹᱜᱩᱱ ᱢᱟᱦᱟ ᱦᱤᱞᱳᱜ ᱵᱤᱫᱮᱹᱥ ᱢᱚᱱᱛᱨᱚᱠ ᱯᱟᱥᱴᱟ ᱠᱷᱚᱱ ᱱᱚᱣᱟ ᱠᱟᱛᱷᱟ ᱞᱟᱹᱭ ᱦᱩᱭ ᱟᱠᱟᱱᱟ ᱾ ᱒᱒ᱼ᱒᱓ ᱚᱠᱴᱳᱵᱚᱨ ᱠᱟᱡᱟᱱ ᱥᱤᱴᱤ ᱨᱮ ᱵᱨᱤᱠᱥ ᱨᱮᱭᱟᱜ ᱥᱚᱢᱢᱮᱞᱚᱱ ᱫᱚ ᱦᱩᱭᱩᱜᱼᱟ ᱾ ᱵᱮᱯᱟᱨᱼᱵᱟᱹᱱᱤᱡ ᱥᱟᱶᱛᱮ ᱤᱭᱩᱠᱨᱮᱹᱱ ᱟᱨ ᱯᱚᱥᱪᱷᱤᱢ ᱮᱥᱤᱭᱟ ᱨᱮ ᱪᱟᱞᱟᱜ ᱠᱟᱱ ᱣᱟᱨ ᱤᱫᱤ ᱠᱟᱛᱮᱫ ᱦᱚᱸ ᱜᱟᱯᱟᱞᱢᱟᱨᱟᱣ ᱦᱩᱭ ᱫᱟᱲᱮᱭᱟᱜᱼᱟ ᱢᱮᱱᱛᱮ ᱟᱭᱼᱩᱢᱟᱹᱱᱚᱜ ᱠᱟᱱᱟ ᱾

ᱛᱚᱵᱮ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱯᱩᱱ ᱪᱟᱸᱫᱳ ᱢᱩᱫᱽ ᱨᱮ ᱫᱚᱥᱟᱨ ᱫᱷᱟᱣ ᱨᱟᱥᱤᱟ ᱥᱚᱯᱷᱚᱨ ᱨᱮᱭ ᱪᱟᱞᱟᱜ ᱠᱟᱱᱟ ᱵᱷᱟᱨᱚᱛ ᱨᱮᱱ ᱯᱨᱚᱫᱷᱟᱱ ᱢᱚᱱᱛᱨᱤ ᱾ ᱒᱐᱒᱔ ᱨᱮᱭᱟᱜ ᱡᱩᱞᱟᱭ ᱪᱟᱸᱫᱳ ᱨᱮ ᱵᱷᱞᱟᱫᱤᱢᱤᱨ ᱯᱩᱛᱤᱱᱟᱜ ᱫᱤᱥᱚᱢ ᱛᱮᱭ ᱪᱟᱞᱟᱣ ᱞᱮᱱᱟ ᱱᱚᱨᱮᱱᱫᱨᱚ ᱢᱳᱫᱤ ᱾ ᱠᱩᱴᱱᱚᱭᱛᱤᱠ ᱵᱤᱥᱮᱹᱥᱚᱜᱽᱜᱚ ᱠᱚᱣᱟᱜ ᱫᱷᱟᱨᱚᱱᱟ, ᱪᱤᱱ ᱟᱨ ᱨᱟᱥᱤᱟᱣᱟᱜ ᱞᱚᱠᱠᱷᱚ ᱦᱩᱭᱩᱜ ᱠᱟᱱᱟ ᱤᱱᱴᱟᱨᱱᱮᱥᱱᱟᱞ ᱞᱮᱹᱵᱮᱹᱞ ᱨᱮ ᱱᱚᱝᱠᱟᱱ ᱢᱤᱫᱴᱟᱝ ᱜᱳᱥᱴᱤ ᱵᱮᱱᱟᱣ ᱞᱟᱹᱠᱛᱤ ᱠᱟᱱᱟ ᱡᱟᱦᱟᱸ ᱨᱮᱭᱟᱜ ᱨᱟᱥ ᱟᱠᱚᱣᱟᱜ ᱛᱤ ᱨᱮᱜᱮ ᱛᱟᱦᱮᱱᱟ ᱾ ᱢᱤᱫ ᱠᱟᱛᱷᱟ ᱛᱮ ᱞᱟᱹᱭ ᱜᱟᱱᱚᱜᱼᱟ ᱟᱢᱮᱨᱤᱠᱟ ᱵᱤᱨᱩᱫᱷ ᱨᱮ ᱢᱤᱫ ᱠᱮᱴᱮᱡ ᱡᱳᱴ ᱵᱮᱱᱟᱣ ᱾

ᱵᱨᱤᱠᱥ ᱨᱮ ᱢᱮᱱᱟᱜ ᱟᱠᱟᱫ ᱠᱚ ᱚᱫᱷᱤᱠᱟᱝᱥᱚ ᱫᱤᱥᱚᱢ ᱜᱮ ᱯᱚᱥᱪᱤᱢᱤ ᱵᱤᱨᱳᱫᱷᱤ ᱡᱳᱴᱥᱚᱠᱛᱤ ᱨᱮᱱ ᱚᱝᱥᱚ ᱠᱟᱱᱟ ᱠᱚ ᱢᱮᱱᱛᱮ ᱜᱟᱹᱠᱷᱩᱲᱟᱱ ᱠᱚᱣᱟᱜ ᱞᱟᱹᱭ ᱾ ᱱᱚᱵᱷᱮᱢᱵᱚᱨ ᱪᱟᱸᱫᱳ ᱨᱮ ᱜᱟᱡᱟ ᱨᱮᱭᱟᱜ ᱯᱚᱨᱤᱥᱛᱷᱤᱛᱤ ᱤᱫᱤ ᱠᱟᱛᱮᱫ ᱵᱨᱤᱠᱥ ᱫᱤᱥᱚᱢ ᱠᱚ ᱟᱛᱮ ᱢᱤᱫ ᱵᱷᱟᱨᱪᱩᱣᱟᱞᱤ ᱜᱟᱯᱟᱞᱢᱟᱨᱟᱣ ᱨᱮ ᱵᱷᱟᱨᱟᱛ ᱫᱤᱥᱚᱢ ᱯᱟᱥᱴᱟ ᱠᱷᱚᱱ ᱢᱳᱫᱤ ᱵᱟᱝ ᱛᱟᱦᱮᱸ ᱫᱟᱲᱮᱭᱟᱜ ᱛᱮ ᱚᱱᱟ ᱨᱮ ᱥᱮᱞᱮᱫ ᱞᱮᱱᱟᱭ ᱵᱤᱫᱮᱹᱥ ᱢᱚᱱᱛᱨᱤ ᱮᱥ ᱡᱚᱭᱥᱚᱝᱠᱚᱨ ᱾