ᱨᱟᱢᱜᱚᱲᱺ ᱜᱨᱟᱢ ᱥᱚᱵᱷᱟ ᱢᱚᱧᱪ ᱨᱮᱱ ᱟᱹᱜᱩᱣᱟᱹᱱ ᱠᱚ ᱢᱚᱲᱮ ᱫᱚᱯᱷᱟ ᱫᱟᱹᱵᱤ ᱠᱚ ᱪᱟᱞ ᱠᱮᱫᱟ ᱰᱤᱹᱥᱤ ᱴᱷᱮᱱ ᱡᱷᱟᱲᱠᱷᱚᱸᱰ ᱯᱚᱱᱚᱛ ᱨᱮᱱᱟᱜ ᱨᱟᱢᱜᱚᱲ ᱡᱮᱞᱟ ᱨᱮ ᱠᱚᱞᱥᱟ ᱢᱟᱜᱟᱞᱚᱜ ᱠᱟᱱᱟ ᱵᱚᱱᱟᱫᱷᱤᱠᱟᱨ ᱟᱹᱱ ᱾ ᱟᱹᱫᱤᱵᱟᱹᱥᱤ ᱠᱚ ᱟᱨ ᱵᱤᱨ ᱴᱚᱴᱷᱟ ᱨᱮ ᱛᱟᱦᱮᱱ ᱦᱚᱲᱠᱚ ᱪᱷᱩᱰᱟᱹᱨᱚᱜ ᱠᱟᱱᱟ ᱟᱯᱱᱟᱨᱟᱜ ᱟᱹᱭᱫᱟᱹᱨ ᱠᱷᱚᱱ ᱾ ᱵᱤᱨ ᱵᱤᱵᱷᱟᱜᱽ ᱨᱮᱱ ᱟᱹᱢᱟᱹᱞᱤᱭᱟᱹ ᱟᱠᱳ ᱠᱩᱥᱤ ᱡᱟᱦᱟᱸᱢᱟᱱᱛᱟᱦᱟᱸ ᱠᱚ ᱠᱟᱹᱢᱤᱭᱮᱫᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱛᱮ ᱮᱴᱠᱮᱴᱚᱬᱮ ᱨᱮᱠᱚ ᱯᱟᱲᱟᱜ ᱠᱟᱱᱟ ᱢᱟᱹᱱᱢᱤ ᱠᱚ ᱾ ᱱᱚᱣᱟ ᱜᱷᱚᱴᱚᱱ ᱵᱟᱵᱚᱫᱽ ᱚᱛᱮ ᱢᱟᱦᱟ ᱦᱤᱞᱳᱜ ᱡᱮᱞᱟ ᱜᱨᱟᱢ ᱥᱚᱵᱷᱟ ᱢᱚᱧᱪ ᱨᱮᱱ ᱟᱹᱜᱩᱣᱟᱹᱱ ᱦᱤᱨᱟᱞᱟᱞ ᱢᱩᱨᱢᱩᱣᱟᱜ ᱟᱹᱭᱩᱨ ᱛᱮ ᱵᱤᱨᱩᱫᱷ ᱠᱚ ᱥᱚᱫᱚᱨ ᱠᱮᱫᱟ ᱾ ᱱᱚᱣᱟ ᱛᱟᱲᱟᱢ ᱰᱟᱦᱟᱨ ᱨᱮ ᱥᱟᱭᱼᱥᱟᱭ ᱟᱹᱫᱤᱵᱟᱹᱥᱤ ᱠᱳᱴᱷᱟᱨ ᱳᱵᱷᱟᱨ ᱵᱨᱤᱡᱽ ᱠᱷᱚᱱ ᱠᱷᱚᱱ ᱰᱤᱹᱥᱤ ᱚᱯᱷᱤᱥ ᱦᱟᱹᱵᱤᱡ ᱠᱚ ᱛᱟᱲᱟᱢ ᱠᱮᱫᱟ ᱾ ᱡᱟᱹᱛᱤᱭᱟᱹᱨᱤ ᱦᱚᱨᱚᱜᱼᱵᱟᱸᱫᱮ ᱟᱨ ᱡᱟᱹᱛᱤᱭᱟᱹᱨᱤ ᱥᱟᱯᱟᱵ ᱥᱟᱵ ᱠᱟᱛᱮᱫ ᱟᱯᱱᱟᱨᱟᱜ ᱨᱟᱸᱜᱟᱣᱱᱟ ᱠᱚ ᱩᱫᱩᱜ ᱥᱚᱫᱚᱨ ᱠᱮᱫᱟ ᱾ ᱰᱟᱦᱟᱨ ᱛᱟᱲᱟᱢ ᱛᱟᱭᱚᱢ ᱟᱹᱜᱩᱣᱟᱹᱱ ᱠᱚ ᱰᱤᱹᱥᱤ ᱪᱚᱱᱫᱚᱱ ᱠᱩᱢᱟᱨ ᱥᱟᱶ ᱧᱟᱯᱟᱢ ᱠᱟᱛᱮᱫ ᱢᱚᱲᱮ ᱫᱚᱯᱷᱟ ᱫᱟᱹᱵᱤ ᱥᱟᱠᱟᱢ ᱠᱚ ᱪᱟᱞ ᱟᱫᱮᱭᱟ ᱾ ᱵᱤᱨᱩᱫᱷ ᱥᱚᱫᱚᱨ ᱚᱠᱛᱚ ᱡᱮᱞᱟ ᱜᱨᱟᱢ ᱥᱚᱵᱷᱟ ᱟᱹᱜᱩᱣᱟᱹᱱ ᱦᱤᱨᱟᱞᱟᱞ ᱢᱩᱨᱢᱩ ᱞᱟᱹᱭ ᱟᱠᱟᱫᱟᱭ, ᱨᱟᱢᱜᱚᱲ ᱡᱮᱞᱟ ᱨᱮ ᱵᱚᱱᱟᱫᱷᱤᱠᱟᱨ ᱟᱹᱱ ᱒᱐᱐᱖ ᱱᱮᱭᱟᱢ ᱒᱐᱐᱘ ᱟᱨ ᱥᱩᱫᱷᱟᱹᱨ ᱱᱮᱭᱟᱢ ᱒᱐᱑᱒ ᱞᱤᱜᱮᱞᱤ ᱵᱟᱝᱠᱚ ᱞᱟᱹᱜᱩᱭᱮᱫᱟ ᱾ ᱵᱚᱱᱟᱫᱷᱤᱠᱟᱨ ᱢᱟᱢᱞᱟ ᱨᱮ ᱵᱚᱱ ᱵᱤᱵᱷᱟᱜᱽ ᱤᱪᱪᱷᱟᱹ ᱢᱚᱛᱚ ᱠᱚ ᱠᱟᱹᱢᱤᱭᱮᱫᱟ ᱾
ᱵᱚᱱᱟᱫᱷᱤᱠᱟᱨ ᱟᱹᱱ ᱞᱮᱠᱟᱛᱮ ᱵᱤᱨ ᱴᱚᱴᱷᱟ ᱨᱮ ᱡᱟᱦᱟᱱ ᱠᱟᱹᱢᱤ ᱦᱩᱭ ᱞᱮᱱᱠᱷᱟᱱ ᱜᱨᱟᱢ ᱥᱚᱵᱷᱟ ᱟᱨ ᱵᱚᱱᱟᱫᱷᱤᱠᱟᱨ ᱥᱚᱢᱤᱛᱤ ᱞᱟᱹᱭᱟᱠᱚ ᱦᱩᱭᱩᱜᱼᱟ, ᱢᱮᱱᱠᱷᱟᱱ ᱱᱚᱝᱠᱟ ᱵᱟᱝ ᱦᱩᱭᱩᱜ ᱠᱟᱱᱟ ᱾ ᱵᱤᱨ ᱦᱟᱥᱟ ᱨᱮᱱᱟᱜ ᱯᱟᱴᱴᱟ ᱨᱮ ᱛᱮᱨᱮᱞ ᱥᱟᱠᱟᱢ ᱵᱮᱯᱟᱨ ᱨᱮᱱᱟᱜ ᱟᱹᱭᱫᱟᱹᱨ ᱟᱨ ᱫᱷᱟᱨᱟ 31(b) ᱨᱮ ᱴᱷᱟᱹᱣᱠᱟᱹ ᱢᱮᱱᱟᱜᱼᱟ ᱫᱷᱟᱨᱟ 31 (d) ᱨᱮ ᱮᱴᱟᱜ ᱦᱚᱠ ᱠᱚ ᱢᱩᱫᱽ ᱨᱮ ᱥᱟᱦᱟᱱᱼᱥᱟᱠᱟᱢ ᱟᱹᱜᱩ, ᱵᱤᱨ ᱦᱟᱥᱟ ᱟᱹᱜᱩ ᱮᱢᱟᱱ ᱠᱚᱫᱚ ᱟᱹᱭᱫᱟᱹᱨ ᱵᱟᱝ ᱠᱟᱱᱟ ᱾ ᱫᱷᱟᱨᱟ 31(j) ᱞᱮᱠᱟᱛᱮ ᱜᱨᱟᱢ ᱥᱚᱵᱷᱟ ᱫᱚ ᱵᱤᱨ ᱨᱩᱠᱷᱤᱭᱟᱹ, ᱩᱛᱱᱟᱹᱣ ᱟᱨ ᱥᱟᱡᱟᱣᱼᱥᱟᱢᱴᱟᱣᱟᱭ ᱾ ᱢᱮᱱᱠᱷᱟᱱ ᱚᱱᱟᱦᱚᱸ ᱵᱟᱝᱠᱚ ᱮᱢᱚᱜ ᱠᱟᱱᱟ ᱾ ᱱᱚᱝᱠᱟ ᱠᱟᱛᱮ ᱟᱭᱢᱟ ᱞᱮᱠᱟᱛᱮ ᱟᱹᱱ ᱠᱚ ᱠᱚᱞᱥᱟ ᱢᱟᱜᱟᱞᱮᱫᱟ ᱾ ᱢᱟᱱᱰᱩ ᱴᱚᱴᱷᱟ ᱨᱮᱱᱟᱜ ᱡᱤᱛᱨᱟ ᱴᱩᱜᱽᱨᱤ ᱨᱮ ᱵᱚᱱᱟᱫᱷᱤᱠᱟᱨ ᱥᱚᱢᱤᱛᱤ, ᱵᱤᱨ ᱨᱮ ᱜᱤᱨᱟᱹᱵᱟᱹᱥᱤᱭᱟᱠᱟᱱ ᱛᱤᱨᱞᱟᱹ ᱟᱨ ᱜᱨᱟᱢ ᱥᱚᱵᱷᱟ ᱨᱮᱱ ᱨᱟᱹᱥᱤᱭᱟᱹ ᱪᱮᱛᱟᱱ ᱯᱷᱮᱹᱠ ᱠᱮᱹᱥ ᱦᱩᱭᱩᱜ ᱠᱟᱱᱟ ᱾ ᱢᱟᱱᱰᱩ ᱴᱚᱴᱷᱟ ᱨᱮᱜᱮ ᱥᱤᱹᱥᱤᱹᱮᱞ ᱠᱳᱞᱤᱭᱟᱨᱤ ᱫᱟᱨᱟᱡᱽᱛᱮ ᱥᱟᱱᱛᱟᱲ ᱟᱹᱫᱤᱵᱟᱹᱥᱤᱭᱟᱜ ᱢᱟᱲᱜᱷᱟᱹᱴᱤ ᱠᱚ ᱱᱟᱥᱟᱣ ᱟᱠᱟᱫᱟ ᱾ ᱚᱱᱟ ᱠᱷᱟᱹᱛᱤᱨ ᱛᱮ ᱰᱤᱹᱥᱤ ᱪᱚᱱᱫᱚᱱ ᱠᱩᱢᱟᱨ ᱴᱷᱮᱱ ᱫᱟᱹᱵᱤ ᱠᱚ ᱫᱚᱦᱚᱣᱟᱠᱟᱫᱟ ᱞᱚᱜᱚᱱ ᱜᱮ ᱵᱚᱱᱟᱫᱷᱤᱠᱟᱨ ᱟᱹᱱ ᱠᱚ ᱞᱟᱹᱜᱩᱭ ᱢᱟ, ᱟᱹᱱᱼᱟᱹᱨᱤ ᱠᱚ ᱞᱮᱵᱮᱫᱼᱞᱚᱴᱚᱢ ᱟᱠᱟᱫ ᱥᱚᱨᱠᱟᱨᱤ ᱟᱹᱢᱟᱹᱞᱤᱭᱟᱹ, ᱠᱟᱢᱤᱭᱟᱹ ᱟᱨ ᱡᱚᱱᱚᱯᱨᱚᱛᱤᱱᱤᱫᱷᱤ ᱥᱟᱶ ᱮᱥᱹᱴᱤ, ᱮᱥᱹᱥᱤ ᱮᱠᱴ ᱞᱮᱠᱟᱛᱮ ᱛᱩᱱᱠᱷᱤ ᱦᱩᱭᱩᱜ ᱢᱟ ᱾ ᱵᱚᱱᱟᱫᱷᱤᱠᱟᱨ ᱞᱟᱹᱜᱩᱭ ᱞᱟᱹᱜᱤᱫ ᱛᱮ ᱥᱤᱢᱤᱛᱤ ᱪᱮᱛᱟᱱ ᱨᱮ ᱱᱟᱦᱟᱪᱟᱨ ᱦᱟᱹᱯᱤᱫᱚᱜ ᱢᱟ ᱾ ᱵᱚᱱᱟᱫᱷᱤᱠᱟᱨ ᱠᱟᱹᱢᱤᱭᱟᱹ ᱠᱚ ᱪᱮᱛᱟᱱ ᱡᱟᱦᱟᱸ ᱯᱷᱹᱮᱠ ᱠᱮᱹᱥ ᱦᱩᱭ ᱟᱠᱟᱱᱟ ᱚᱱᱟ ᱵᱟᱹᱛᱤᱞ ᱦᱩᱭᱩᱜ ᱢᱟ ᱾ ᱢᱮᱱᱠᱷᱟᱱ ᱟᱹᱫᱤᱵᱟᱹᱥᱤ ᱪᱮᱛᱟᱱ ᱟᱭᱤᱱᱤ ᱱᱟᱦᱟᱪᱟᱨ ᱦᱟᱹᱯᱤᱫᱚᱜᱼᱟ ᱥᱮ ᱵᱟᱝ ᱚᱱᱟᱫᱚ ᱚᱠᱛᱚ ᱜᱮᱭ ᱞᱟᱹᱭᱟ ᱾
