ᱨᱤᱞᱤᱡᱽ ᱟᱠᱟᱱᱟ ᱚᱱᱩᱯᱚᱢ ᱠᱷᱮᱹᱨᱟᱜ ‘ᱫᱟ ᱥᱤᱜᱽᱱᱮᱹᱪᱟᱨ’ ᱾ ᱢᱟᱨᱟᱴᱷᱤ ᱥᱤᱱᱮᱹᱢᱟ ‘ᱚᱱᱩᱢᱚᱛᱤ’ ᱯᱤᱪᱷᱟᱹ ᱠᱟᱛᱮᱫ ᱛᱮᱭᱟᱨ ᱟᱠᱟᱱᱟ ᱚᱱᱩᱯᱚᱢ ᱠᱷᱮᱹᱨᱟᱜ ᱥᱤᱜᱽᱱᱮᱹᱪᱟᱨ ᱾ ᱥᱤᱱᱮᱹᱢᱟ ᱨᱮ ᱞᱟᱹᱠᱛᱤᱭᱟᱱ ᱪᱩᱨᱤᱛ ᱨᱮ ᱢᱮᱱᱟᱭᱟ ᱢᱚᱦᱤᱢᱟ ᱪᱳᱣᱫᱷᱩᱨᱤ ᱾
ᱥᱟᱹᱦᱤᱛ ᱨᱮ ᱢᱚᱦᱮᱥ ᱵᱷᱚᱴᱟᱜ ᱰᱤᱨᱮᱠᱥᱮᱱ ᱛᱮ ᱛᱮᱭᱟᱨ ‘ᱥᱟᱨᱟᱝᱥᱚ’ ᱥᱤᱱᱮᱹᱢᱟ ᱡᱚᱠᱷᱚᱱ ᱩᱪᱷᱟᱹᱱᱚᱜ, ᱩᱱ ᱚᱱᱩᱯᱚᱢ ᱠᱷᱮᱹᱨᱟᱜ ᱩᱢᱮᱨ ᱛᱟᱦᱮᱸ ᱠᱟᱱ ᱛᱟᱭᱟ 29 ᱥᱮᱨᱢᱟ ᱾ ᱩᱱ 65 ᱥᱮᱨᱢᱟ ᱩᱢᱮᱨ ᱨᱮᱱᱟᱜᱼᱮ ᱮᱠᱴᱤᱝ ᱞᱮᱫᱟ ᱚᱱᱩᱯᱚᱢ ᱠᱷᱹᱮᱨ ᱾ 65 ᱥᱮᱨᱢᱟ ᱩᱢᱮᱨ ᱨᱮ ᱪᱟᱹᱠᱨᱤ ᱠᱷᱚᱱ ᱡᱤᱨᱟᱹᱣᱟᱠᱟᱱ ᱦᱚᱲᱟᱜ ᱪᱩᱨᱤᱛ ᱨᱮ ᱮᱠᱴᱤᱝ ᱠᱟᱛᱮᱫ ᱢᱟᱹᱱᱢᱤᱭᱟᱜ ᱢᱚᱱᱮᱭ ᱢᱩᱦᱱᱤ ᱞᱮᱫᱟ ᱾ ᱱᱤᱛ ᱩᱱᱤᱭᱟᱜ ᱩᱢᱮᱨ ᱛᱟᱭ 69 ᱾ ᱟᱨᱦᱚᱸ ᱢᱤᱫ ᱡᱤᱨᱟᱹᱣᱟᱠᱟᱱ ᱦᱟᱲᱟᱢ ᱦᱚᱲᱟᱜ ᱪᱩᱨᱤᱛ ᱨᱮ ᱮᱠᱴᱤᱝ ᱠᱮᱫᱟᱭ ᱚᱱᱩᱯᱚᱢ ᱠᱷᱮᱹᱨ ᱾ ᱢᱮᱱᱠᱷᱟᱱ ᱟᱴᱮᱨ ᱫᱚᱥᱚᱠ ᱨᱮ ᱡᱟᱦᱟᱸ ᱢᱮᱡᱤᱠ ᱛᱟᱦᱮᱸ ᱠᱟᱱᱟ ᱚᱱᱟ ᱫᱚ ᱱᱚᱣᱟ ᱥᱤᱱᱮᱹᱢᱟ ᱨᱮ ᱵᱟᱝ ᱧᱮᱞᱧᱟᱢ ᱞᱮᱱᱟ ᱾ ᱱᱚᱣᱟ ᱥᱤᱱᱮᱹᱢᱟ ᱨᱮ ᱚᱨᱵᱤᱱᱫᱟᱜ ᱪᱩᱨᱤᱛ ᱨᱮ ᱮᱠᱴᱤᱝ ᱟᱠᱟᱫᱟᱭ ᱚᱱᱩᱯᱚᱢ ᱠᱷᱮᱹᱨ ᱾
ᱜᱤᱫᱟᱹᱨᱼᱯᱤᱫᱟᱹᱨᱟᱛᱮ ᱥᱩᱠᱷ ᱨᱮᱱᱟᱜ ᱥᱚᱝᱥᱟᱨ ᱛᱟᱭ ᱚᱨᱵᱤᱱᱫᱽ ᱟᱨ ᱟᱡᱨᱮᱱ ᱚᱲᱟᱜ ᱮᱨᱟ ᱢᱚᱫᱷᱩᱣᱟᱜ ᱾ ᱥᱟᱨᱟ ᱡᱤᱭᱚᱱ ᱫᱟᱭᱵᱷᱟᱨ ᱜᱚᱜ ᱠᱟᱛᱮᱫ, ᱡᱤᱨᱟᱹᱣ ᱚᱠᱛᱚ ᱨᱮ ᱨᱟᱹᱥᱠᱟᱹ ᱵᱟᱱᱟ ᱦᱚᱲᱟᱜ ᱡᱤᱭᱚᱱ ᱨᱮ ᱾ ᱢᱮᱱᱠᱷᱟᱱ ᱚᱱᱟ ᱥᱩᱠᱷ ᱥᱮ ᱨᱟᱹᱥᱠᱟᱹ ᱦᱚᱸ ᱟᱹᱰᱤ ᱜᱷᱟᱹᱲᱤᱡ ᱫᱚ ᱵᱟᱝ ᱛᱟᱦᱮᱸ ᱞᱮᱱᱟ ᱾ ᱫᱟᱲᱟᱱ ᱥᱮᱱᱚᱜ ᱢᱟᱲᱟᱝ ᱨᱮ ᱮᱭᱟᱨᱯᱳᱨᱴ ᱨᱮᱜᱮ ᱞᱟᱛᱣᱟᱜ ᱵᱷᱤᱸᱫᱟᱹᱲᱮᱱᱟᱭ ᱢᱚᱫᱷᱩ ᱾ ᱵᱟᱰᱟᱭ ᱧᱟᱢᱮᱱᱟ ᱵᱨᱮᱹᱱ ᱦᱮᱢᱟᱨᱮᱹᱡᱽ ᱦᱩᱭ ᱟᱠᱟᱱ ᱛᱟᱭᱟ ᱾ ᱦᱟᱥᱯᱟᱛᱟᱞ ᱨᱮᱱᱟᱜ ᱵᱷᱮᱹᱱᱴᱤᱞᱮᱥᱮᱱ ᱨᱮ ᱵᱷᱩᱨᱛᱤ ᱦᱩᱭᱮᱱᱟ ᱢᱚᱫᱷᱩ ᱾ ᱟᱹᱰᱤ ᱟᱢᱫᱟ ᱠᱷᱚᱨᱪᱟ ᱛᱤᱠᱪᱷᱟᱹ ᱨᱮ ᱾ ᱢᱮᱱᱠᱷᱟᱱ ᱮᱱᱦᱚᱸ ᱡᱤᱣᱤᱼᱡᱩᱨᱤ ᱵᱟᱧᱪᱟᱣ ᱨᱩᱣᱟᱹᱲᱮ ᱨᱮᱱᱟᱜᱼᱮ ᱜᱚᱴᱟᱣᱟᱠᱟᱫᱟ ᱾ ᱱᱚᱣᱟ ᱞᱟᱹᱜᱤᱫ ᱛᱮ ᱦᱚᱯᱚᱱᱛᱮᱫ ᱠᱚ ᱥᱟᱞᱟᱜ ᱦᱚᱸ ᱥᱟᱺᱜᱤᱧᱟᱠᱟᱱᱟ ᱥᱟᱹᱜᱟᱹᱭ ᱾ ᱦᱚᱯᱚᱱ ᱮᱨᱟᱛ ᱴᱷᱮᱱ, ᱵᱚᱭᱦᱟ ᱴᱷᱮᱱ ᱡᱚᱛᱚ ᱦᱚᱲ ᱴᱷᱮᱱ ᱜᱮ ᱟᱛᱟᱝ ᱟᱠᱟᱫᱟᱭ ᱛᱤ ᱾ ᱞᱟᱹᱭ ᱜᱟᱱᱚᱜᱼᱟ ᱥᱟᱱᱟᱢᱟᱜᱼᱮ ᱟᱫ ᱟᱠᱟᱫᱟ ᱚᱨᱵᱤᱱᱫᱽ ᱾ ᱢᱮᱱᱠᱷᱟᱱ ᱱᱚᱝᱠᱟᱱ ᱚᱠᱛᱚᱨᱮ ᱫᱟᱲᱮᱭᱟᱜᱼᱟᱭ ᱠᱤ ᱚᱲᱟᱜ ᱜᱚᱝᱠᱮ ᱵᱟᱧᱪᱟᱣ ?
ᱱᱚᱣᱟ ᱥᱤᱱᱮᱹᱢᱟ ᱨᱮ ᱟᱹᱰᱤ ᱫᱤᱱ ᱛᱟᱭᱚᱢ ᱧᱮᱞᱧᱟᱢᱚᱜᱼᱟᱭ ᱢᱚᱦᱤᱢᱟ ᱪᱳᱣᱫᱷᱩᱨᱤ ᱾ ᱢᱮᱱᱠᱷᱟᱱ ᱩᱱᱟᱹᱜ ᱫᱤᱱ ᱛᱟᱭᱚᱢ ᱨᱩᱣᱟᱹᱲ ᱦᱮᱡ ᱠᱟᱛᱮᱫ ᱨᱮᱦᱚᱸ ᱵᱟᱭ ᱫᱟᱲᱮᱭᱟᱫᱟ ᱢᱟᱹᱱᱢᱤᱭᱟᱜ ᱢᱚᱱᱮ ᱵᱷᱩᱞᱟᱹᱣ ᱾ ᱚᱱᱩᱯᱚᱢ ᱠᱷᱮᱹᱨᱟᱜ ᱪᱩᱨᱤᱛ ᱨᱮᱦᱚᱸ ᱯᱩᱨᱟᱹᱯᱩᱨᱤ ᱥᱟᱱᱟᱢᱟᱜ ᱵᱟᱭ ᱮᱢ ᱫᱟᱲᱮᱭᱟᱫᱟ ᱾ ᱚᱠᱟᱴᱷᱮᱱᱪᱚ ᱢᱚᱱᱮ ᱦᱩᱭᱮᱱᱟ ᱜᱚᱴᱟ ᱥᱤᱱᱮᱹᱢᱟᱜᱮ ᱠᱷᱟᱯᱪᱷᱟᱲᱟ ᱜᱮᱭᱟ ᱾ ᱮᱠᱼᱜᱷᱮᱸᱭᱮᱢᱤ ᱥᱤᱱᱮᱹᱢᱟ ᱨᱮᱱᱟᱜ ᱜᱚᱞᱯᱚ ᱦᱚᱸ ᱟᱨ ᱚᱱᱩᱯᱚᱢ ᱠᱷᱮᱹᱨᱟᱜ ᱪᱩᱨᱤᱛ ᱦᱚᱸ ᱾ ᱱᱚᱣᱟ ᱥᱤᱱᱮᱹᱢᱟ ᱛᱟᱞᱟᱛᱮ ᱩᱫᱩᱜ ᱨᱮᱱᱟᱜ ᱠᱩᱨᱩᱢᱩᱴᱩᱣᱟᱠᱟᱱ ᱱᱚᱣᱟ ᱫᱤᱥᱚᱢ ᱨᱮ ᱛᱤᱠᱪᱷᱟᱹ ᱨᱮ ᱟᱹᱰᱤ ᱡᱟᱹᱥᱛᱤ ᱠᱷᱚᱨᱪᱟ ᱾ ᱟᱨ ᱱᱚᱣᱟ ᱨᱮ ᱡᱟᱹᱥᱛᱤ ᱮᱴᱠᱮᱴᱚᱬᱮ ᱨᱮᱠᱚ ᱧᱩᱨᱩᱜᱼᱟ ᱢᱤᱰᱤᱞ ᱠᱞᱟᱥ ᱨᱮᱱ ᱢᱟᱹᱱᱢᱤ ᱠᱚ ᱾ ᱛᱚᱵᱮ ᱵᱟᱥᱛᱚᱵᱽ ᱡᱤᱱᱤᱥ ᱥᱤᱱᱮᱹᱢᱟ ᱞᱮᱠᱟᱛᱮ ᱩᱫᱩᱜ ᱞᱟᱹᱜᱤᱫ ᱛᱮ ᱱᱟᱥᱮᱱᱟᱜ ᱛᱚ ᱜᱚᱞᱯᱚ ᱟᱨ ᱥᱠᱨᱤᱱᱯᱞᱮᱹ ᱨᱮ ᱡᱳᱨ ᱛᱟᱦᱮᱱ ᱞᱟᱜᱟᱜᱼᱟ ᱾ ᱚᱱᱟ ᱡᱳᱨ ‘ᱫᱟ ᱥᱤᱜᱽᱱᱮᱹᱪᱟᱨ’ ᱨᱮ ᱵᱟᱝ ᱧᱮᱞ ᱞᱮᱱᱟ ᱾
