ᱥᱟᱱᱛᱟᱲ ᱥᱟᱶᱛᱟ ᱨᱮ ᱟᱭᱢᱟ ᱞᱮᱠᱟᱱ ᱥᱮᱨᱣᱟ ᱟᱹᱨᱤᱪᱟᱹᱞᱤ ᱢᱮᱱᱟᱜᱼᱟ ᱾ ᱢᱮᱱᱫᱚ ᱜᱮᱞᱵᱟᱨ ᱪᱟᱸᱫᱳ ᱨᱮ ᱜᱮᱞᱵᱟᱨ ᱜᱚᱴᱟᱝ ᱯᱚᱨᱚᱵᱽᱼᱯᱟᱹᱞ, ᱵᱚᱸᱜᱟᱼᱵᱩᱨᱩ ᱠᱚ ᱢᱮᱱᱟᱜᱼᱟ ᱾ ᱞᱟᱹᱭ ᱜᱟᱱᱚᱜᱼᱟ ᱞᱟᱭᱚᱝ ᱥᱟᱶᱼᱥᱟᱶᱛᱮ ᱛᱟᱲ ᱢᱤᱞᱟᱹᱣ ᱠᱟᱛᱮ ᱠᱟᱹᱢᱤ ᱜᱮ ᱠᱟᱱᱟ ᱥᱟᱱᱛᱟᱲ ᱦᱚᱯᱚᱱᱟᱜ ᱢᱟᱨᱟᱝ ᱩᱨᱜᱟᱹᱱ ᱾ ᱡᱟᱦᱟᱸᱞᱮᱠᱟ ᱱᱟᱣᱟ ᱥᱟᱠᱟᱢ ᱥᱟᱜᱮᱱᱚᱜ ᱠᱷᱟᱱ, ᱱᱚᱣᱟ ᱵᱟᱦᱟ ᱵᱟᱦᱟᱜ ᱠᱷᱟᱱ, ᱱᱟᱣᱟ ᱡᱚᱼᱵᱤᱞᱤ ᱡᱚᱢᱛᱮ ᱡᱟᱦᱟᱱ ᱟᱡᱟᱨᱼᱵᱮᱢᱟᱨ ᱟᱞᱚ ᱦᱩᱭᱩᱜᱼᱢᱟ ᱚᱱᱟ ᱠᱷᱟᱹᱛᱤᱨ ᱡᱟᱦᱟᱸᱞᱮᱠᱟᱵᱚᱱ ᱵᱟᱦᱟᱜᱼᱟ ᱾ ᱴᱷᱤᱠ ᱚᱝᱠᱟᱜᱮ ᱥᱟᱱᱟᱢ ᱞᱮᱠᱟᱱ ᱦᱟᱞᱚᱛ ᱨᱮ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤᱦᱚᱨᱟ ᱥᱮ ᱵᱚᱸᱜᱟᱼᱵᱩᱨᱩ ᱠᱚ ᱢᱮᱱᱟᱜᱼᱟᱠᱟᱫᱟ ᱾ ᱥᱟᱪᱟᱨᱦᱮ ᱨᱮ ᱡᱟᱦᱟᱸ ᱚᱠᱛᱚ ᱱᱟᱥᱮ ᱩᱫᱽᱜᱟᱹᱨ ᱱᱟᱥᱮ ᱨᱟᱵᱟᱝ ᱨᱮᱱᱟᱜ ᱦᱤᱥᱤᱫ ᱦᱚᱭ ᱦᱚᱲᱢᱚᱭ ᱜᱟᱭᱜᱚᱢᱟ, ᱡᱟᱦᱟᱸ ᱚᱠᱛᱚ ᱠᱟᱹᱥᱤ ᱵᱟᱦᱟ ᱧᱮᱞᱛᱮ ᱚᱱᱛᱚᱨ ᱢᱚᱱᱮᱨᱮ ᱵᱷᱮᱜᱟᱨ ᱢᱤᱫ ᱟᱹᱭᱠᱟᱹᱣ ᱟᱢᱮ ᱤᱠᱤᱞᱥᱤᱠᱤᱞ ᱢᱮᱭᱟ, ᱩᱱᱜᱮ ᱵᱩᱡᱽ ᱦᱩᱭᱩᱜᱼᱟ ᱫᱟᱸᱥᱟᱭ ᱵᱚᱸᱜᱟ ᱥᱮᱴᱮᱨ ᱟᱠᱟᱱᱟ ᱾ ᱟᱨ ᱫᱟᱸᱥᱟᱭ ᱵᱚᱸᱜᱟ ᱥᱮᱴᱮᱨ ᱥᱟᱶᱛᱮ ᱡᱩᱜᱽ ᱡᱟᱯᱟᱜ ᱠᱷᱚᱱ ᱫᱟᱸᱥᱟᱭ ᱫᱟᱲᱟᱱ ᱨᱮᱱᱟᱜ ᱪᱚᱞ ᱢᱮᱱᱟᱜᱼᱟ ᱾ ᱡᱩᱫᱤᱭᱳ ᱟᱭᱢᱟ ᱜᱟᱹᱠᱷᱩᱲᱟᱱ ᱠᱚᱣᱟᱜ ᱟᱭᱢᱟ ᱞᱮᱠᱟ ᱢᱚᱛ ᱠᱟᱱ ᱛᱟᱠᱚᱣᱟ ᱱᱚᱣᱟ ᱫᱟᱸᱥᱟᱭ ᱵᱟᱵᱚᱫᱽ ᱛᱮ ᱾
ᱛᱮᱦᱮᱧ ᱟᱵᱚ ᱵᱚᱱ ᱛᱩᱞᱟᱹᱡᱚᱠᱷᱟᱭᱟ ᱫᱟᱸᱥᱟᱭ ᱟᱨ ᱦᱩᱫᱩᱲ ᱫᱩᱨᱜᱟᱹᱣᱟᱜ ᱠᱟᱛᱷᱟ ᱾ ᱢᱮᱱᱫᱚ ᱟᱭᱢᱟ ᱦᱚᱲ ᱠᱚ ᱢᱮᱱᱟ ᱦᱩᱫᱩᱲ ᱫᱩᱨᱜᱟᱹ ᱯᱟᱸᱡᱟ ᱠᱷᱟᱹᱛᱤᱨ ᱛᱮᱜᱮ ᱵᱟᱝᱢᱟ ᱫᱟᱸᱥᱟᱭ ᱵᱚᱱ ᱫᱟᱲᱟᱱᱟ ᱾ ᱦᱩᱫᱩᱲ ᱫᱩᱨᱜᱟᱹ ᱧᱩᱛᱩᱢᱟᱱ ᱢᱤᱫᱴᱮᱱ ᱪᱩᱨᱤᱛ ᱡᱳᱨ ᱠᱟᱛᱮ ᱫᱟᱸᱥᱟᱭ ᱨᱮᱠᱚ ᱥᱮᱞᱮᱫᱮ ᱠᱟᱱᱟ ᱾ ᱟᱨ ᱱᱚᱝᱠᱟ ᱠᱟᱛᱮ ᱢᱤᱫ ᱥᱟᱹᱨ ᱨᱮᱱ ᱢᱟᱹᱱᱢᱤ ᱥᱟᱱᱛᱟᱲᱟᱜ ᱥᱮᱹᱱᱴᱤᱢᱮᱱᱴ ᱥᱟᱞᱟᱜ ᱡᱚᱯᱲᱟᱣ ᱠᱟᱛᱮᱫ ᱨᱟᱡᱽᱼᱟᱹᱨᱤ ᱨᱮᱱᱟᱜ ᱪᱤᱨ ᱠᱚ ᱦᱤᱯᱤᱲᱮᱫᱟ ᱾
ᱪᱮᱫᱟᱜ ᱦᱩᱫᱩᱲ ᱫᱩᱨᱜᱟᱹ ᱥᱟᱞᱟᱜ ᱫᱟᱸᱥᱟᱭ ᱨᱮᱱᱟᱜ ᱥᱟᱹᱜᱟᱹᱭ ᱵᱟᱹᱱᱩᱜᱼᱟ ᱼ
ᱚᱠᱚᱭ ᱠᱚᱠᱚ ᱢᱮᱢᱮᱱ ᱠᱟᱱᱟ ᱦᱩᱫᱩᱲ ᱫᱩᱨᱜᱟᱹ ᱫᱚ ᱥᱟᱱᱛᱟᱲ ᱦᱚᱯᱚᱱ ᱠᱚᱨᱮᱱ ᱵᱤᱨ ᱡᱚᱫᱷᱟᱭ ᱛᱟᱦᱮᱸ ᱠᱟᱱᱟ ᱾ ᱟᱨ ᱩᱱᱤ ᱜᱮᱵᱚ ᱯᱟᱸᱡᱟᱭᱮ ᱠᱟᱱᱟ ᱡᱩᱜᱽ ᱡᱟᱯᱟᱜ ᱠᱷᱚᱱ ᱾ ᱢᱮᱱᱠᱷᱟᱱ ᱠᱩᱠᱞᱤ ᱦᱚᱸ ᱱᱚᱰᱮ ᱦᱤᱡᱩᱜ ᱠᱟᱱᱟ,
- ᱡᱩᱫᱤ ᱦᱩᱫᱩᱲ ᱫᱩᱨᱜᱟᱹ ᱯᱟᱸᱡᱟ ᱜᱮ ᱫᱟᱸᱥᱟᱭ ᱫᱟᱲᱟᱱ ᱠᱟᱱᱟ, ᱮᱱᱛᱮ ᱠᱷᱟᱱ ᱩᱱᱤ ᱧᱩᱛᱩᱢ ᱛᱮ ᱪᱮᱫᱟᱜ ᱫᱟᱸᱥᱟᱭ ᱥᱮᱨᱮᱧ ᱵᱟᱹᱱᱩᱜᱼᱟ ?
- ᱡᱩᱫᱤ ᱦᱩᱫᱩᱲ ᱫᱩᱨᱜᱟᱹ ᱯᱟᱸᱡᱟ ᱜᱮ ᱫᱟᱸᱥᱟᱭ ᱫᱟᱲᱟᱱ ᱠᱟᱱᱟ, ᱮᱱᱛᱮ ᱠᱷᱟᱱ ᱪᱮᱫᱟᱜ ᱩᱱᱟᱹᱜ ᱫᱤᱱ ᱠᱷᱚᱱ ᱥᱟᱱᱛᱟᱲ ᱦᱚᱯᱚᱱᱟᱜ ᱵᱟᱠᱷᱳᱞᱼᱵᱟᱠᱷᱳᱞ ᱵᱚᱱ ᱦᱟᱭᱻᱦᱟᱭᱮᱫᱟ ? ᱪᱮᱫᱟᱜ ᱵᱟᱹᱭᱨᱤ ᱠᱚᱣᱟᱜ ᱵᱟᱠᱷᱳᱞ ᱨᱮᱫᱚ ᱯᱟᱸᱡᱟ ᱵᱟᱵᱚᱱ ᱥᱮᱱᱚᱜ ᱠᱟᱱᱟ ?
- ᱦᱩᱫᱩᱲ ᱫᱩᱨᱜᱟᱹ ᱡᱩᱫᱤ ᱥᱟᱹᱨᱤᱜᱮ ᱥᱟᱱᱛᱟᱲ ᱦᱚᱯᱚᱱᱮ ᱛᱟᱦᱮᱸ ᱠᱟᱱᱟ ᱮᱱᱛᱮᱠᱷᱟᱱ ᱚᱱᱟ ᱢᱟ ᱱᱟᱜᱟᱢ ᱨᱮ ᱞᱮᱠᱷᱟᱜ ᱨᱮᱭᱟᱜ ᱠᱟᱛᱷᱟ ᱾ ᱫᱟᱸᱥᱟᱭ ᱫᱟᱲᱟᱱ ᱥᱟᱞᱟᱜ ᱪᱤᱠᱟᱹᱛᱮ ᱥᱮᱞᱮᱫ ᱫᱟᱲᱮᱭᱟᱜᱼᱟ ?
- ᱥᱟᱱᱛᱟᱲ ᱦᱚᱯᱚᱱᱟᱜ ᱟᱹᱫᱽ ᱨᱮ ᱥᱟᱨ, ᱠᱟᱹᱯᱤ ᱛᱮ ᱞᱟᱹᱲᱦᱟᱹᱭ ᱨᱮᱱᱟᱜ ᱡᱟᱦᱟᱱ ᱥᱮᱨᱮᱧ ᱜᱮ ᱵᱟᱝ ᱟᱸᱡᱚᱢᱚᱜᱼᱟ ᱾ ᱡᱟᱦᱟᱸ ᱟᱸᱡᱚᱢᱚᱜᱼᱟ ᱚᱱᱟᱫᱚ ᱫᱟᱨᱮ ᱵᱟᱦᱟ ᱨᱮᱱᱟᱜ ᱥᱟᱨᱼᱠᱟᱹᱯᱤ ᱛᱮᱠᱚ ᱛᱟᱯᱟᱢ ᱾ ᱮᱱᱛᱮᱠᱷᱟᱱ ᱵᱩᱡᱽ ᱞᱟᱜᱟᱜᱼᱟ ᱥᱟᱱᱛᱟᱲ ᱦᱚᱯᱚᱱᱟᱜ ᱛᱟᱯᱟᱢ ᱠᱷᱟᱹᱯᱟᱹᱨᱤ ᱦᱚᱸ ᱛᱤᱱᱟᱹᱜ ᱥᱤᱵᱤᱞᱟᱱᱟᱜ ᱛᱟᱦᱮᱸ ᱠᱟᱱᱟ ᱾
ᱟᱨᱦᱚᱸ ᱟᱭᱢᱟ ᱦᱚᱲᱠᱚ ᱢᱮᱱᱟ ᱦᱩᱫᱩᱲ ᱫᱩᱨᱜᱟᱹ ᱫᱚ ᱥᱟᱱᱛᱟᱲ ᱠᱚᱨᱮᱱ ᱵᱚᱸᱜᱟ ᱠᱟᱱᱟᱭ ᱾ ᱱᱚᱰᱮ ᱟᱨᱦᱚᱸ ᱠᱩᱠᱞᱤ ᱦᱤᱡᱩᱜᱼᱟᱼ
- ᱡᱩᱫᱤ ᱦᱩᱫᱩᱲ ᱫᱩᱨᱜᱟᱹ ᱵᱚᱸᱜᱟ ᱠᱟᱱᱟᱭ ᱮᱱᱛᱮᱠᱷᱟᱱ ᱦᱩᱫᱩᱲ ᱫᱩᱨᱜᱟᱹ ᱨᱮᱱ ᱫᱟᱬᱮ ᱫᱚ ᱪᱤᱞᱤ ᱠᱟᱱᱟᱭ ? ᱪᱤᱞᱤ ᱫᱟᱬᱮᱛᱮ ᱵᱚᱫᱷᱟᱜᱼᱟᱭ ? ᱪᱮᱫᱟᱜ ᱥᱮ ᱥᱟᱱᱛᱟᱲ ᱦᱚᱯᱚᱱ ᱨᱮᱱ ᱵᱚᱸᱜᱟᱼᱵᱩᱨᱩ ᱠᱚᱫᱚ ᱢᱟᱭᱟᱢ ᱠᱚ ᱦᱟᱛᱟᱣᱟ ᱟᱨ ᱫᱟᱬᱮ ᱦᱚᱸᱠᱚ ᱵᱷᱮᱜᱟᱨ ᱜᱮᱭᱟ ᱾
- ᱡᱩᱫᱤ ᱵᱚᱸᱜᱟ ᱠᱟᱱᱟᱭ ᱥᱟᱱᱛᱟᱲ ᱨᱮᱱ ᱮᱱᱛᱮᱠᱷᱟᱱ ᱪᱮᱫᱟᱜ ᱢᱩᱴᱷᱟᱹᱱ ᱵᱮᱱᱟᱣ ᱠᱟᱛᱮ ᱵᱚᱸᱜᱟᱣᱟᱭ ᱨᱮᱱᱟᱜ ᱞᱟᱹᱠᱛᱤ ᱯᱟᱲᱟᱣᱮᱱᱟ ? ᱪᱮᱫᱟᱜ ᱥᱮ ᱥᱟᱱᱛᱟᱲ ᱦᱚᱯᱚᱱ ᱫᱚ ᱢᱩᱴᱷᱟᱹᱱ ᱫᱚ ᱵᱟᱝᱠᱚ ᱵᱚᱸᱜᱟᱣᱟᱜᱼᱟ ᱾
ᱱᱚᱣᱟ ᱥᱟᱱᱟᱢ ᱡᱩᱠᱛᱤ ᱠᱚ ᱧᱮᱞ ᱞᱮᱠᱷᱟᱱ ᱜᱮ ᱵᱟᱰᱟᱭ ᱧᱟᱢᱚᱜᱼᱟ ᱥᱟᱱᱛᱟᱲᱟᱜ ᱫᱟᱸᱥᱟᱭ ᱥᱟᱞᱟᱜ ᱦᱩᱫᱩᱲ ᱫᱩᱨᱜᱟᱹᱣᱟᱜ ᱡᱟᱦᱟᱱ ᱥᱟᱹᱜᱟᱹᱭ ᱜᱮ ᱵᱟᱹᱱᱩᱜᱼᱟ ᱾ ᱢᱮᱱᱠᱷᱟᱱ ᱢᱤᱫ ᱥᱟᱹᱨ ᱨᱮᱱ ᱦᱚᱲ ᱟᱠᱚᱣᱟᱜ ᱨᱟᱡᱽᱼᱟᱹᱨᱤ ᱥᱟᱨᱛᱷᱚ ᱥᱤᱫᱽᱫᱷᱤ ᱞᱟᱹᱜᱤᱫ ᱥᱟᱱᱛᱟᱲ ᱦᱚᱯᱚᱱᱟᱜ ᱥᱮᱹᱱᱴᱤᱢᱮᱱᱴ ᱨᱮ ᱥᱮᱸᱜᱮᱞ ᱠᱚ ᱡᱩᱸᱰᱤᱭᱟᱜ ᱠᱟᱱᱟ ᱾
ᱵᱟᱰᱟᱭ ᱡᱚᱝ ᱞᱟᱹᱜᱽ ᱠᱟᱱᱟ ᱥᱟᱱᱛᱟᱲ ᱦᱚᱯᱚᱱᱟᱜ ᱫᱟᱸᱥᱟᱭ ᱫᱚ ᱱᱟᱲᱟᱼᱯᱤᱲᱟᱹ ᱠᱷᱚᱱ ᱫᱳᱜᱚᱜ ᱞᱟᱹᱜᱤᱫ ᱛᱮ ᱫᱟᱸᱥᱟᱭ ᱠᱟᱱᱟ ᱾ ᱴᱷᱟᱹᱠᱩᱨᱼᱴᱷᱟᱹᱠᱨᱟᱹᱱᱟᱜ ᱟᱨᱟᱫᱷᱚᱱ ᱜᱮ ᱫᱟᱸᱥᱟᱭ ᱠᱟᱱᱟ ᱾ ᱜᱩᱨᱩᱼᱪᱮᱞᱟᱣᱟᱜ ᱫᱤᱥᱚᱢ ᱥᱟᱸᱜᱷᱟᱨ ᱜᱮ ᱫᱟᱸᱥᱟᱭ ᱠᱟᱱᱟ ᱾ ᱴᱷᱟᱹᱠᱨᱟᱹᱱᱟᱜ ᱥᱩᱱᱩᱢᱼᱥᱤᱸᱫᱩᱨ ᱫᱮᱹᱥᱼᱫᱤᱥᱚᱢ ᱟᱥᱮᱱ ᱜᱮ ᱫᱟᱸᱥᱟᱭ ᱠᱟᱱᱟ ᱾
