ᱫᱚᱲᱦᱟ ᱵᱟᱪᱷᱱᱟᱣ ᱨᱮᱭᱟᱜ ᱵᱷᱳᱴ ᱯᱨᱚᱪᱟᱨ ᱨᱮ ᱯᱚᱨᱤᱵᱚᱨᱛᱚᱱ ᱾ ᱢᱟᱨᱟᱝ ᱥᱚᱵᱷᱟ ᱵᱟᱝ ᱠᱟᱛᱮᱫ ᱦᱩᱰᱤᱧᱼᱦᱩᱰᱤᱧ ᱥᱚᱵᱷᱟ ᱨᱮ ᱡᱳᱨ

(PAPUL MURMU) WEST BENGAL BY ELECTION 2024 :  ᱫᱟᱨᱟᱭ ᱠᱟᱱ ᱑᱓ ᱱᱚᱵᱷᱮᱢᱵᱚᱨ ᱯᱚᱥᱪᱤᱢ ᱵᱟᱝᱞᱟ ᱨᱮᱭᱟᱜ ᱛᱩᱨᱩᱭ ᱜᱚᱴᱟᱝ ᱥᱤᱴ ᱨᱮ ᱫᱚᱲᱦᱟ ᱵᱟᱪᱷᱱᱟᱣ ᱢᱮᱱᱟᱜᱼᱟ ᱾ ᱡᱚᱛᱚ ᱥᱤᱴ ᱠᱚᱨᱮ ᱜᱮ ᱯᱨᱟᱨᱛᱷᱤ ᱠᱚᱣᱟᱜ ᱧᱩᱛᱩᱢ ᱩᱪᱷᱟᱹᱱ ᱛᱟᱭᱚᱢ ᱯᱨᱚᱪᱟᱨ ᱦᱚᱠᱚ ᱮᱛᱚᱦᱚᱵᱽ ᱟᱠᱟᱫᱟ ᱨᱟᱡᱽᱼᱟᱹᱨᱤ ᱫᱚᱞᱠᱚ ᱾ ᱢᱮᱱᱠᱷᱟᱱ ᱩᱛᱥᱚᱵᱽ ᱨᱮᱭᱟᱜ ᱚᱠᱛᱚ ᱪᱟᱞᱟᱜ ᱠᱟᱱ ᱠᱷᱟᱹᱛᱤᱨ ᱯᱨᱚᱪᱟᱨ ᱚᱠᱛᱚ ᱦᱚᱲ ᱠᱚᱣᱟᱜ ᱥᱟᱲᱟ ᱵᱟᱝ ᱠᱚ ᱧᱟᱢ ᱮᱫᱟ ᱨᱟᱡᱽᱼᱟᱹᱨᱤ ᱱᱮᱛᱟ ᱠᱚ ᱾ ᱟᱨ ᱚᱱᱠᱟᱱ ᱯᱚᱨᱤᱥᱛᱷᱤᱛᱤ ᱨᱮ ᱯᱨᱚᱪᱟᱨ ᱨᱮᱭᱟᱜ ᱠᱩᱣᱥᱚᱞ ᱠᱚ ᱵᱚᱫᱚᱞ ᱠᱮᱫᱟ ᱨᱟᱡᱽᱡᱚ ᱨᱮᱱ ᱥᱟᱥᱚᱠ ᱫᱚᱞ ᱞᱟᱹᱴᱩ ᱞᱟᱹᱴᱩ ᱡᱚᱱᱚᱥᱚᱵᱷᱟ ᱵᱟᱝ ᱠᱟᱛᱮᱫ ᱦᱩᱴᱤᱧᱼᱦᱩᱰᱤᱧ ᱥᱚᱵᱷᱟ ᱥᱟᱶᱛᱮ ᱚᱲᱟᱜ ᱚᱲᱟᱜ ᱯᱨᱚᱪᱟᱨ ᱪᱮᱛᱟᱱ ᱜᱮ ᱡᱳᱨ ᱠᱚ ᱮᱢᱟ ᱾

ᱫᱚᱲᱦᱟ ᱵᱟᱪᱷᱱᱟᱣ ᱨᱮ ᱵᱷᱳᱴ ᱯᱨᱚᱪᱟᱨ ᱤᱫᱤ ᱠᱟᱛᱮᱫ ᱛᱨᱤᱱᱚᱢᱩᱞ ᱨᱮᱱ ᱢᱟᱨᱟᱝ ᱱᱮᱛᱟ ᱠᱚᱣᱟᱜ ᱞᱟᱹᱭ, ᱡᱟᱦᱟᱸ ᱛᱩᱨᱩᱭ ᱜᱚᱴᱟᱝ ᱥᱤᱴ ᱨᱮ ᱵᱟᱪᱷᱱᱟᱣ ᱢᱮᱱᱟᱜᱼᱟ, ᱚᱱᱟ ᱥᱤᱴ ᱨᱮᱱ ᱯᱨᱚᱪᱟᱨ ᱨᱮᱭᱟᱜ ᱫᱟᱭᱵᱷᱟᱨ ᱨᱮ ᱢᱮᱱᱟᱜ ᱟᱠᱟᱫ ᱠᱚ ᱱᱮᱛᱟ ᱠᱚ ᱚᱲᱟᱜ ᱚᱲᱟᱜ ᱪᱟᱞᱟᱣ ᱠᱟᱛᱮᱫ ᱦᱚᱲ ᱠᱚᱣᱟᱜ ᱮᱴᱠᱮᱴᱚᱬᱮ ᱨᱮᱭᱟᱜ ᱠᱟᱛᱷᱟ ᱠᱚ ᱟᱸᱡᱚᱢᱼᱟ ᱾ ᱛᱚᱵᱮ ᱛᱟᱭᱚᱢ ᱛᱮ ᱴᱤ ᱮᱢ ᱥᱤ ᱨᱮᱱ ᱯᱨᱟᱨᱛᱷᱤ ᱡᱤᱛᱠᱟᱹᱨ ᱞᱮᱠᱷᱟᱱ ᱡᱟᱦᱟᱸ ᱠᱚ ᱴᱚᱴᱷᱟ ᱨᱮ ᱮᱴᱠᱮᱴᱚᱬᱮ ᱢᱮᱱᱟᱜᱼᱟ ᱚᱱᱟ ᱠᱚ ᱴᱚᱴᱷᱟ ᱨᱮ ᱠᱟᱹᱢᱤ ᱨᱮᱭᱟᱜ ᱱᱤᱨᱫᱮᱹᱥ ᱦᱚᱸᱠᱚ ᱮᱢ ᱟᱠᱟᱣ ᱫᱮᱭᱟ ᱾

ᱦᱟᱞᱮ ᱜᱮ ᱢᱩᱪᱟᱹᱫ ᱟᱠᱟᱱᱟ ᱫᱩᱨᱜᱟᱹ ᱯᱩᱡᱟᱹ, ᱢᱮᱱᱠᱷᱟᱱ ᱩᱛᱥᱚᱵᱽ ᱨᱮᱭᱟᱜ ᱨᱟᱥ ᱫᱚ ᱱᱤᱛ ᱦᱚᱸ ᱵᱟᱝ ᱜᱮ ᱪᱟᱵᱟ ᱟᱠᱟᱱᱟ ᱾ ᱫᱟᱨᱟᱭ ᱠᱟᱱ ᱓᱑ ᱚᱠᱴᱳᱵᱚᱨ ᱢᱮᱱᱟᱜᱼᱟ ᱠᱟᱹᱞᱤ ᱯᱩᱡᱟᱹ, ᱚᱱᱟ ᱛᱟᱭᱚᱢ ᱜᱮ ᱪᱷᱚᱴ ᱯᱩᱡᱟᱹ ᱾ ᱪᱷᱚᱴ ᱯᱩᱡᱟᱹ ᱛᱟᱭᱚᱢ ᱡᱚᱜᱚᱫᱷᱟᱛᱨᱤ ᱯᱩᱡᱟᱹ ᱟᱨ ᱚᱱᱟ ᱛᱟᱭᱚᱢ ᱜᱮ ᱨᱟᱥᱯᱩᱨᱱᱤᱢᱟ ᱾ ᱚᱱᱟ ᱠᱷᱟᱹᱛᱤᱨ ᱱᱚᱱᱠᱟᱱ ᱯᱩᱡᱟᱹ ᱚᱠᱛᱮ ᱦᱚᱲ ᱧᱟᱢ ᱢᱟ ᱢᱩᱠᱤᱞ ᱜᱮ, ᱢᱮᱱᱠᱷᱟᱱ ᱴᱤ ᱮᱢ ᱥᱤ ᱱᱮᱛᱟ ᱠᱚᱦᱚᱸ ᱩᱛᱥᱚᱵᱽ ᱨᱮᱭᱟᱜ ᱨᱟᱥ ᱨᱮᱜᱮ ᱢᱮᱱᱟᱜ ᱠᱚᱣᱟ ᱾ ᱚᱱᱟ ᱛᱮ ᱢᱟᱨᱟᱝ ᱥᱚᱵᱷᱟ ᱵᱟᱝ ᱠᱟᱛᱮᱫ ᱦᱩᱰᱤᱧ ᱥᱚᱵᱷᱟ ᱛᱟᱞᱟ ᱛᱮᱜᱮ ᱵᱤᱨᱳᱫᱷᱤ ᱫᱚᱞ ᱠᱷᱚᱱ ᱯᱨᱚᱪᱟᱨ ᱨᱮ ᱞᱟᱦᱟ ᱨᱮ ᱛᱟᱦᱮᱱ ᱨᱮᱭᱟᱜ ᱠᱚ ᱠᱩᱨᱩᱢᱩᱴᱩ ᱟᱠᱟᱫᱟ ᱛᱨᱤᱱᱚᱢᱩᱞ ᱾