᱘ ᱰᱤᱥᱮᱢᱵᱚᱨ ᱦᱟᱭᱫᱨᱟᱵᱟᱫᱽ ᱨᱮᱱᱟᱜ ᱥᱚᱱᱫᱷᱟ ᱥᱤᱱᱮᱹᱢᱟ ᱦᱚᱞ ᱨᱮ ᱛᱟᱦᱮᱸ ᱠᱟᱱᱟ ᱯᱩᱥᱯᱟ ᱒ ᱫᱟ ᱨᱩᱞ ᱥᱤᱱᱮᱹᱢᱟ ᱨᱮᱱᱟᱜ ᱥᱯᱮᱹᱥᱟᱞ ᱥᱳ ᱾ ᱟᱨ ᱚᱱᱟ ᱥᱯᱮᱹᱥᱟᱞ ᱥᱳ ᱨᱮ ᱟᱞᱞᱩ ᱚᱨᱡᱩᱱ ᱥᱮᱴᱮᱨᱮ ᱛᱟᱦᱮᱸᱠᱟᱱ ᱛᱮ ᱟᱹᱰᱤ ᱡᱟᱹᱥᱛᱤ ᱦᱚᱲ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱵᱷᱤᱲ ᱨᱮᱱᱟᱜ ᱴᱷᱮᱞᱟᱼᱴᱷᱤᱞᱤ ᱛᱮ ᱧᱩᱨ ᱠᱟᱛᱮ ᱢᱤᱫ ᱛᱤᱨᱞᱟᱹ ᱞᱮᱵᱮᱫ ᱛᱮ ᱡᱤᱣᱤ ᱪᱟᱞᱟᱣᱮᱱ ᱛᱟᱭᱟ ᱾ ᱚᱱᱟ ᱜᱷᱚᱴᱚᱱ ᱨᱮ ᱮᱯᱷᱹᱟᱭᱹᱟᱨ ᱠᱚ ᱫᱟᱭᱮᱨ ᱞᱮᱫᱟ ᱦᱟᱭᱫᱨᱟᱵᱟᱫᱽ ᱯᱩᱞᱤᱥ ᱾ ᱡᱟᱹᱨᱩᱢ ᱢᱟᱦᱟ ᱦᱤᱞᱳᱜ ᱟᱞᱞᱩ ᱚᱨᱡᱩᱱ ᱟᱭᱟᱜ ᱚᱲᱟᱜ ᱠᱷᱚᱱᱟᱜ ᱠᱚ ᱮᱨᱮᱹᱥᱴ ᱞᱮᱫᱮᱭᱟ ᱾ ᱟᱞᱞᱩ ᱚᱨᱡᱩᱱ ᱥᱟᱶ ᱗ ᱡᱚᱱ ᱵᱤᱨᱩᱫᱷ ᱨᱮ ᱮᱯᱷᱹᱟᱭᱹᱟᱨ ᱠᱚ ᱫᱟᱭᱮᱨ ᱞᱮᱫᱟ ᱯᱩᱞᱤᱥ ᱾ ᱡᱟᱹᱨᱩᱢ ᱢᱟᱦᱟ ᱦᱤᱞᱳᱜ ᱟᱞᱞᱩ ᱚᱨᱡᱩᱱ ᱥᱟᱶ ᱟᱨ ᱵᱟᱨ ᱦᱚᱲ ᱠᱚ ᱮᱨᱮᱹᱥᱴ ᱞᱮᱫ ᱠᱤᱱᱟᱹ ᱯᱩᱞᱤᱥ ᱾ ᱚᱱᱟ ᱢᱩᱫᱽ ᱨᱮ ᱢᱮᱱᱟᱭᱟ ᱥᱚᱱᱫᱷᱟ ᱛᱷᱤᱭᱮᱴᱟᱨ ᱨᱮᱱ ᱢᱟᱹᱞᱤᱠ ᱦᱚᱸ ᱾ ᱚᱱᱟ ᱛᱟᱭᱚᱢ ᱡᱟᱢᱤᱱ ᱦᱚᱭ ᱧᱟᱢ ᱟᱠᱟᱫᱟ ᱟᱞᱞᱩ ᱚᱨᱡᱩᱱ ᱾ ᱟᱞᱞᱩ ᱚᱨᱡᱩᱱ ᱡᱟᱢᱤᱱᱮ ᱮᱢᱟᱫᱮᱭᱟ ᱛᱮᱞᱮᱝᱜᱟᱱᱟ ᱦᱟᱭᱼᱠᱳᱨᱴ ᱾ ᱕᱐ ᱦᱟᱡᱟᱨ ᱴᱟᱠᱟ ᱨᱮᱱᱟᱜ ᱵᱚᱱᱰ ᱛᱮ ᱩᱱᱤᱭᱟᱜ ᱚᱱᱛᱚᱨᱵᱚᱨᱛᱤ ᱡᱟᱢᱤᱱ ᱦᱩᱭ ᱟᱠᱟᱱᱟ ᱾ ᱚᱱᱟ ᱢᱟᱲᱟᱝ ᱦᱟᱭᱫᱨᱟᱵᱟᱫᱽ ᱨᱮᱱᱟᱜ ᱱᱤᱢᱱᱚ ᱟᱫᱟᱞᱚᱛ ᱑᱔ ᱫᱤᱱ ᱨᱮᱱᱟᱜ ᱡᱮᱹᱞ ᱦᱮᱯᱟᱡᱚᱛ ᱨᱮᱱᱟᱜ ᱟᱸᱫᱮᱭ ᱮᱢ ᱞᱮᱫᱟ ᱾ ᱟᱨ ᱚᱱᱟ ᱜᱨᱮᱹᱯᱷᱛᱟᱨ ᱪᱮᱞᱮᱧᱡᱽ ᱠᱟᱛᱮ ᱮᱯᱷᱹᱟᱭᱹᱟᱨ ᱠᱷᱟᱨᱤᱡᱽ ᱨᱮᱱᱟᱜ ᱟᱵᱮᱹᱫᱚᱱ ᱟᱛᱮ ᱦᱟᱭᱼᱠᱳᱨᱴ ᱛᱮᱭ ᱪᱟᱞᱟᱣ ᱞᱮᱱᱟ ᱟᱞᱞᱩ ᱚᱨᱡᱩᱱ ᱾ ᱟᱨ ᱚᱱᱟ ᱟᱵᱮᱹᱫᱚᱱ ᱜᱮ ᱢᱚᱧᱡᱩᱨ ᱟᱠᱟᱱ ᱛᱟᱭᱟ ᱾ ᱛᱮᱞᱮᱝᱜᱟᱱᱟ ᱦᱟᱭᱠᱳᱨᱴ ᱨᱮ ᱵᱤᱪᱟᱨᱯᱚᱛᱤ ᱡᱮᱹ ᱥᱨᱤᱫᱮᱹᱵᱤᱭᱟᱜ ᱵᱮᱧᱪ ᱨᱮ ᱱᱚᱣᱟ ᱢᱟᱢᱞᱟ ᱨᱟᱠᱟᱵ ᱞᱮᱱ ᱛᱟᱦᱮᱱ ᱾ ᱟᱨ ᱱᱚᱣᱟ ᱜᱷᱚᱴᱚᱱ ᱛᱟᱭᱚᱢ ᱠᱩᱠᱞᱤ ᱨᱟᱠᱟᱵ ᱠᱮᱫᱟᱭ ᱵᱚᱞᱤᱭᱩᱰ ᱰᱤᱨᱮᱹᱠᱴᱚᱨ ᱨᱟᱢᱜᱳᱯᱟᱞ ᱵᱚᱨᱢᱟ ᱾ ᱩᱱᱤᱭᱟᱜ ᱞᱟᱹᱭ ᱠᱩᱢᱵᱷᱚ ᱢᱮᱞᱟ ᱨᱮᱦᱚᱸ ᱟᱹᱰᱤ ᱡᱟᱹᱥᱛᱤ ᱵᱷᱤᱲ ᱧᱮᱞᱚᱜ ᱜᱮᱭᱟᱹ ᱚᱸᱰᱮ ᱡᱩᱫ ᱡᱟᱦᱟᱸᱭ ᱵᱷᱤᱲ ᱨᱮ ᱦᱚᱲᱟᱜ ᱞᱮᱵᱮᱫ ᱛᱮ ᱡᱤᱣᱤ ᱪᱟᱞᱟᱜ ᱛᱟᱭᱟ ᱛᱚᱵᱮ ᱪᱮᱫ ᱪᱟᱸᱫᱳ ᱵᱚᱸᱜᱟ ᱠᱚ ᱮᱨᱮᱹᱥᱴᱮᱭᱟ ?
ᱨᱟᱢᱜᱳᱯᱟᱞᱟᱜ ᱫᱚᱥᱟᱨ ᱠᱩᱠᱞᱤ
ᱨᱟᱡᱽᱼᱟᱹᱨᱤ ᱡᱚᱢᱮᱹᱞᱟᱭ ᱨᱮ ᱡᱟᱦᱟᱸᱭ ᱡᱩᱫᱤ ᱱᱚᱝᱠᱟ ᱜᱮ ᱦᱚᱲᱟᱜ ᱵᱷᱤᱲ ᱨᱮ ᱞᱮᱵᱮᱫ ᱛᱮ ᱡᱤᱣᱤ ᱪᱟᱞᱟᱜ ᱛᱟᱠᱚᱣᱟ ᱛᱚᱵᱮ ᱪᱮᱫ ᱨᱟᱡᱽᱼᱟᱹᱨᱤ ᱱᱮᱛᱟ ᱠᱚ ᱮᱨᱮᱹᱥᱴ ᱠᱚᱣᱟ ?
ᱨᱟᱢᱜᱳᱯᱟᱞᱟᱜ ᱛᱮᱥᱟᱨ ᱠᱩᱠᱞᱤ
ᱥᱤᱱᱮᱹᱢᱟ ᱤᱫᱤ ᱠᱟᱛᱮ ᱪᱟᱞᱟᱜ ᱡᱟᱦᱟᱱ ᱠᱟᱹᱢᱤᱦᱚᱨᱟ ᱨᱮ ᱡᱟᱦᱟᱸᱭ ᱡᱩᱫᱤ ᱞᱮᱵᱮᱫ ᱛᱮ ᱜᱩᱡᱩᱜᱼᱟᱭ ᱛᱚᱵᱮ ᱪᱮᱫ ᱥᱤᱱᱮᱹᱢᱟ ᱨᱮᱱ ᱦᱤᱨᱳᱼᱦᱤᱨᱳᱭᱤᱱ ᱵᱟᱨ ᱦᱚᱲ ᱜᱮᱠᱚ ᱮᱨᱮᱹᱥᱴ ᱠᱤᱱᱟᱹ ᱾ ᱯᱩᱞᱤᱥ ᱟᱨ ᱚᱱᱟ ᱠᱟᱹᱢᱤᱦᱚᱨᱟ ᱥᱟᱯᱲᱟᱣ ᱟᱠᱟᱫ ᱟᱭᱳᱡᱚᱠ ᱵᱮᱜᱚᱨ ᱟᱨ ᱚᱠᱚᱭ ᱠᱚ ᱥᱟᱢᱲᱟᱣ ᱫᱟᱲᱮᱭᱟᱜᱼᱟ ᱾
