ᱵᱤᱨᱟᱴ ᱠᱳᱦᱞᱤ ᱛᱟᱭᱚᱢ ᱡᱚᱥᱯᱨᱤᱛ ᱵᱩᱢᱨᱟ ᱥᱟᱶ ᱡᱷᱟᱢᱮᱞᱟ ᱨᱮᱭ ᱡᱚᱲᱟᱣᱮᱱᱟ ᱥᱮᱢ ᱠᱚᱱᱥᱴᱟᱥ ᱾ ᱥᱤᱰᱱᱤ ᱴᱮᱹᱥᱴ ᱨᱮ ᱵᱮᱴᱤᱝ ᱟᱲᱜᱳ ᱠᱟᱛᱮ ᱵᱩᱢᱨᱟ ᱥᱟᱶ ᱠᱟᱛᱷᱟ ᱨᱟᱯᱟᱪᱟᱜ ᱨᱮᱭ ᱡᱚᱯᱲᱟᱣ ᱞᱮᱱᱟ ᱠᱚᱱᱥᱴᱟᱥ ᱾ ᱵᱟᱱᱟ ᱦᱚᱲ ᱵᱷᱮᱜᱟᱨ ᱞᱟᱹᱜᱤᱫ ᱛᱮ ᱫᱟᱹᱲ ᱟᱹᱜᱩ ᱞᱟᱜᱟᱣ ᱞᱮᱫᱮᱭᱟ ᱟᱢᱯᱟᱭᱟᱨ ᱾ ᱯᱨᱚᱥᱤᱫᱷ ᱠᱨᱤᱥᱱᱚ ᱦᱚᱸᱭ ᱞᱟᱦᱟ ᱦᱮᱡ ᱞᱮᱱᱟ ᱩᱱᱠᱤᱱ ᱪᱷᱟᱰᱟ ᱞᱟᱹᱜᱤᱫ ᱾ ᱡᱚᱫᱤᱭᱳ ᱛᱚᱨᱠᱚ ᱨᱮ ᱡᱚᱲᱟᱣ ᱛᱟᱭᱚᱢ ᱯᱟᱞᱴᱟ ᱟᱠᱨᱚᱢᱚᱱ ᱞᱟᱹᱜᱤᱫ ᱡᱟᱹᱥᱛᱤ ᱚᱠᱛᱚ ᱵᱟᱭ ᱦᱟᱛᱟᱣ ᱟᱠᱟᱫᱟ ᱵᱩᱢᱨᱟ ᱾ ᱵᱩᱢᱨᱟ ᱟᱣᱩᱴ ᱠᱮᱫᱮᱭᱟᱭ ᱩᱥᱢᱟᱱ ᱠᱷᱳᱣᱟᱡᱟ ᱾
ᱪᱮᱫ ᱜᱷᱚᱴᱟᱣ ᱞᱮᱱᱟ ?
ᱯᱳᱭᱞᱳ ᱢᱟᱦᱟ ᱨᱮᱱᱟᱜ ᱮᱠᱫᱚᱢ ᱢᱩᱪᱟᱹᱫ ᱚᱵᱷᱟᱨ ᱨᱮ ᱜᱷᱚᱴᱚᱱᱟ ᱜᱷᱚᱴᱟᱣ ᱞᱮᱱᱟ ᱾ ᱵᱷᱟᱨᱚᱛ ᱯᱳᱭᱞᱳ ᱫᱤᱱ ᱨᱮ ᱢᱤᱫᱴᱮᱱ ᱩᱭᱠᱮᱹᱴ ᱛᱩᱞᱟᱹᱣ ᱨᱮᱱᱟᱜ ᱠᱚ ᱪᱮᱥᱴᱟ ᱞᱮᱫᱟ ᱾ ᱟᱥᱚᱠᱟᱭᱛᱮ ᱳᱯᱮᱹᱱᱤᱝ ᱡᱩᱴᱤ ᱨᱟᱹᱯᱩᱫ ᱞᱟᱹᱜᱤᱫ ᱟᱹᱰᱤ ᱠᱩᱨᱩᱢᱩᱴᱩᱨᱮ ᱛᱟᱦᱮᱸ ᱠᱟᱱᱟᱭ ᱵᱩᱢᱨᱟ ᱾ ᱢᱩᱪᱟᱹᱫ ᱵᱚᱞ ᱡᱚᱠᱷᱚᱱ ᱨᱟᱱᱼᱟᱯᱮ ᱦᱟᱛᱟᱣᱮᱫᱟ ᱩᱱ ᱚᱠᱛᱚ ᱩᱭᱠᱮᱹᱴ ᱵᱟᱝ ᱧᱟᱢ ᱵᱟᱵᱚᱫᱮ ᱪᱤᱲᱦᱟᱹᱣᱮ ᱠᱟᱱ ᱛᱟᱦᱮᱸᱫ ᱥᱴᱨᱟᱭᱠᱤᱝ ᱮᱱᱰ ᱨᱮᱭ ᱛᱟᱦᱮᱸ ᱠᱟᱱ ᱠᱚᱱᱥᱴᱟᱥ ᱾ ᱩᱱ ᱚᱠᱛᱚ ᱧᱮᱞ ᱮᱱᱟ ᱵᱩᱢᱨᱟ ᱦᱚᱸ ᱟᱹᱰᱤ ᱮᱫᱽᱨᱮ ᱥᱟᱞᱟᱜᱮ ᱠᱚᱭᱚᱜ ᱞᱮᱫᱟ ᱟᱨ ᱵᱟᱱᱟ ᱦᱚᱲ ᱛᱟᱞᱟ ᱨᱮ ᱚᱼᱤᱛᱟᱹᱫ ᱨᱮᱱᱟᱜ ᱪᱤᱛᱟᱹᱨ ᱧᱮᱞ ᱞᱮᱱᱟ ᱾ ᱚᱱᱟ ᱚᱠᱛᱚ ᱩᱱᱠᱤᱱ ᱪᱷᱟᱰᱟᱣ ᱠᱤᱱ ᱞᱟᱹᱜᱤᱫ ᱛᱮ ᱯᱨᱚᱥᱤᱫᱷ ᱟᱨ ᱟᱢᱯᱟᱭᱟᱨ ᱵᱟᱱᱟᱦᱚᱲ ᱠᱤᱱ ᱥᱮᱴᱮᱨ ᱞᱮᱱᱟ ᱾
ᱚᱱᱟ ᱛᱟᱭᱚᱢ ᱵᱚᱞ ᱨᱮᱜᱮ ᱵᱩᱢᱨᱟ ᱠᱷᱳᱣᱟᱡᱟᱭ ᱟᱣᱩᱴ ᱞᱮᱫᱮᱭᱟ ᱾ ᱟᱣᱩᱴ ᱛᱟᱭᱚᱢ ᱧᱮᱞᱮᱱᱟ ᱠᱚᱱᱥᱴᱟᱥ ᱥᱮᱫ ᱫᱟᱹᱲ ᱥᱮᱱ ᱠᱟᱛᱮᱭ ᱥᱮᱹᱞᱤᱵᱨᱮᱹᱴ ᱮᱫᱟ ᱾ ᱩᱱᱤ ᱟᱴᱚᱠᱮ ᱞᱟᱹᱜᱤᱫ ᱛᱮ ᱵᱤᱨᱟᱴ ᱠᱳᱦᱞᱤ ᱦᱚᱸᱭ ᱞᱟᱦᱟ ᱦᱮᱡ ᱾
ᱢᱮᱹᱞᱵᱳᱨᱱ ᱴᱮᱹᱥᱴ ᱨᱮ ᱵᱤᱨᱟᱴ ᱠᱳᱦᱞᱤ ᱥᱟᱶ ᱠᱚᱱᱥᱴᱟᱥᱟᱜ ᱫᱷᱟᱠᱠᱟ ᱵᱟᱵᱚᱫᱽ ᱮᱛᱚᱦᱚᱵ ᱟᱠᱟᱱᱟ ᱡᱷᱟᱢᱮᱞᱟ ᱾ ᱰᱟᱸᱰᱚᱢ ᱦᱚᱸ ᱦᱩᱭ ᱟᱠᱟᱱᱟ ᱵᱤᱨᱟᱴ ᱠᱳᱦᱞᱤ ᱾ ᱚᱱᱟ ᱛᱟᱭᱚᱢ ᱢᱮᱪ ᱢᱩᱪᱟᱹᱫ ᱠᱟᱛᱮ ᱫᱚᱨᱥᱚᱠ ᱥᱮᱫ ᱠᱚᱭᱚᱜ ᱠᱟᱛᱮ ᱪᱮᱪᱟᱣᱮ ᱢᱮᱛᱟᱫᱮ ᱛᱟᱦᱮᱸᱫ, ᱟᱭᱢᱟ ᱫᱷᱟᱣ ᱚᱱᱟ ᱜᱷᱚᱴᱚᱱᱟᱭ ᱩᱫᱜ ᱞᱮᱫᱟ ᱠᱚᱱᱥᱴᱟᱥ ᱾ ᱱᱚᱣᱟ ᱡᱮ ᱩᱥᱠᱟᱹᱣ ᱛᱟᱦᱮᱸ ᱠᱟᱱᱟ ᱚᱱᱟ ᱟᱹᱰᱤ ᱵᱷᱟᱜᱮ ᱵᱷᱟᱵᱽᱛᱮ ᱵᱟᱰᱟᱭ ᱞᱮᱱᱟ ᱾ ᱚᱱᱟ ᱛᱟᱭᱚᱢ ᱠᱚᱱᱥᱴᱟᱥ ᱢᱮᱹᱞᱵᱳᱨᱱ ᱨᱮ ᱫᱚᱥᱟᱨ ᱤᱱᱤᱝᱥ ᱨᱮ ᱨᱩᱣᱟᱹᱲ ᱛᱟᱭᱚᱢ ᱩᱱᱤᱦᱚᱸ ᱯᱟᱞᱴᱟᱭ ᱥᱞᱮᱹᱡᱽ ᱞᱮᱫᱮᱭᱟ ᱵᱩᱢᱨᱟ ᱾ ᱟᱨ ᱢᱩᱪᱟᱹᱫ ᱴᱮᱹᱥᱴ ᱨᱮ ᱵᱩᱢᱨᱟ ᱥᱟᱞᱟᱜ ᱠᱷᱟᱹᱯᱟᱹᱨᱤ ᱨᱮᱭ ᱡᱚᱲᱟᱣᱮᱱᱟ ᱠᱚᱱᱥᱴᱟᱥ ᱾ ᱫᱚᱥᱟᱨ ᱦᱤᱞᱳᱜ ᱵᱩᱢᱨᱟ ᱵᱚᱱᱟᱢ ᱠᱚᱱᱥᱴᱟᱥ ᱡᱚᱢᱠᱟᱣ ᱜᱚᱫᱚᱜᱼᱟ ᱢᱮᱱᱛᱮ ᱢᱚᱱᱮ ᱦᱩᱭᱩᱜ ᱠᱟᱱᱟ ᱾
