CASTE CENSUS BEFORE BIHAR ELECTION : ᱵᱤᱦᱟᱨ ᱵᱤᱫᱷᱟᱱ ᱥᱚᱵᱷᱟ ᱞᱟᱦᱟ ᱨᱮ ᱠᱮᱱᱫᱨᱤᱭᱚ ᱢᱚᱱᱛᱨᱤ ᱥᱚᱵᱷᱟᱼᱟᱜ ᱢᱟᱨᱟᱝ ᱥᱤᱫᱫᱷᱟᱱᱛᱚ᱾ ᱦᱩᱭᱩᱜᱼᱟ ᱡᱟᱹᱛᱤ ᱜᱚᱱᱚᱱᱟ᱾ ᱛᱚᱵᱮ ᱡᱟᱹᱛᱤ ᱜᱚᱱᱚᱱᱟ ᱤᱫᱤ ᱠᱟᱛᱮᱡ ᱚᱠᱟ ᱛᱚᱛᱷᱚ ᱜᱮ ᱵᱮᱜᱷᱟᱨ ᱛᱮ ᱵᱟᱝ ᱩᱪᱟᱹᱱ ᱦᱩᱭᱩᱜᱼᱟ᱾ ᱠᱮᱱᱫᱨᱤᱭᱚ ᱢᱚᱱᱛᱨᱤ ᱥᱚᱵᱷᱟ ᱨᱮᱭᱟᱜ ᱨᱟᱡᱽᱟᱹᱨᱤ ᱠᱚᱢᱤᱴᱤ ᱟᱜ ᱵᱚᱭᱴᱷᱚᱠ ᱠᱷᱚᱱ ᱱᱚᱣᱟ ᱥᱤᱫᱫᱷᱟᱱᱛᱚ ᱫᱚ ᱦᱟᱛᱟᱶ ᱦᱩᱭ ᱟᱠᱟᱱᱟ᱾ ᱠᱮᱱᱫᱨᱤᱭᱚ ᱢᱚᱱᱛᱨᱤ ᱥᱚᱵᱷᱟ ᱭᱟᱜ ᱵᱚᱭᱴᱷᱚᱠ ᱛᱟᱭᱚᱢ ᱢᱚᱱᱛᱨᱤ ᱥᱚᱵᱷᱟ ᱨᱮ ᱜᱚᱴᱟ ᱟᱠᱟᱱ ᱚᱱᱟ ᱠᱟᱛᱷᱟᱭ ᱞᱟᱹᱭ ᱥᱚᱫᱚᱨ ᱠᱮᱫᱟ ᱨᱮᱞ ᱢᱚᱱᱛᱨᱤ ᱚᱥᱱᱤ ᱵᱚᱭᱥᱱᱚᱵᱽ (ASHWINI VAISHNAW)᱾
ᱛᱚᱵᱮ ᱞᱟᱹᱭ ᱜᱟᱱᱚᱼᱟ ᱟᱹᱰᱤ ᱟᱭᱢᱟ ᱫᱤᱱ ᱠᱷᱚᱱ ᱡᱟᱹᱛᱤ ᱜᱚᱱᱚᱱᱟ ᱨᱮᱭᱟᱜ ᱫᱟᱵᱤ ᱠᱚ ᱨᱟᱠᱟᱵ ᱞᱮᱫ ᱛᱟᱦᱮᱱᱟ ᱟᱭᱢᱟ ᱨᱟᱡᱽᱟᱹᱨᱤ ᱫᱚᱞ ᱜᱮ᱾ ᱚᱠᱟ ᱚᱠᱟ ᱨᱟᱡᱡᱚ ᱨᱮ ᱟᱵᱟᱨ ᱵᱮᱜᱷᱟᱨ ᱛᱮ ᱡᱟᱹᱛᱤ ᱜᱚᱱᱚᱱᱟ ᱨᱮᱭᱟᱜ ᱫᱟᱵᱤ ᱦᱚᱸ ᱨᱟᱠᱟᱵ ᱞᱮᱱ ᱛᱟᱦᱮᱱᱟ, ᱟᱨ ᱚᱱᱟ ᱠᱚ ᱢᱩᱫ ᱨᱮ ᱡᱚᱛᱚ ᱠᱷᱚᱱ ᱞᱟᱦᱟ ᱨᱮ ᱢᱮᱱᱟᱜᱼᱟ ᱵᱤᱦᱟᱨ ᱯᱚᱱᱚᱛ᱾ ᱵᱤᱦᱟᱨ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱢᱮᱱᱫᱚ ᱵᱤ ᱡᱮ ᱯᱤ ᱨᱮᱱ ᱡᱳᱴᱥᱚᱝᱜᱤ ᱱᱤᱛᱤᱥ ᱠᱩᱢᱟᱨ (NITISH KUMAR) ᱦᱚᱸ ᱡᱟᱹᱛᱤ ᱜᱚᱱᱚᱱᱟ ᱨᱮᱭᱟᱜ ᱫᱟᱵᱤ ᱟᱭᱢᱟ ᱫᱷᱟᱭ ᱨᱟᱠᱟᱵ ᱞᱮᱫ ᱛᱟᱦᱮᱱᱟ ᱟᱨ ᱟᱡᱟᱜ ᱨᱟᱡᱡᱚ ᱵᱤᱦᱟᱨ ᱨᱮ ᱡᱟᱹᱛᱤ ᱥᱚᱢᱤᱠᱷᱟ ᱨᱮᱭᱟᱜ ᱛᱚᱛᱷᱚ ᱦᱚᱭ ᱩᱪᱟᱹᱱ ᱞᱮᱫ ᱛᱟᱦᱮᱱᱟ᱾ ᱱᱚᱣᱟ ᱥᱮᱨᱢᱟ ᱨᱮᱜᱤ ᱢᱮᱱᱟᱜᱼᱟ ᱵᱤᱦᱟᱨ ᱨᱮ ᱵᱤᱫᱷᱟᱱ ᱥᱚᱵᱷᱟ ᱮᱞᱮᱠᱥᱚᱱ᱾ ᱟᱨ ᱚᱱᱟ ᱞᱟᱦᱟ ᱨᱮ ᱱᱤᱛᱤᱥ ᱠᱩᱢᱟᱨ ᱥᱟᱱᱛᱚ ᱫᱚᱦᱚ ᱞᱟᱹᱜᱤᱛ ᱛᱮᱜᱤ ᱡᱟᱹᱛᱤ ᱜᱚᱱᱚᱱᱟ ᱨᱮᱭᱟᱜ ᱜᱚᱴᱟ ᱠᱮᱫᱟ ᱠᱮᱱᱫᱨᱤ ᱢᱚᱱᱛᱨᱤ ᱥᱚᱵᱷᱟ ᱢᱮᱱᱛᱮ ᱱᱚᱱᱠᱟ ᱠᱩᱠᱞᱤ ᱨᱟᱠᱟᱵ ᱦᱟᱡᱩᱠ ᱠᱟᱱᱟ ᱟᱹᱰᱤ ᱜᱟᱱ ᱢᱚᱦᱚᱞ ᱠᱷᱚᱱ᱾
ᱡᱟᱹᱛᱤ ᱜᱚᱱᱚᱱᱟ ᱨᱮᱭᱟᱜ ᱫᱟᱹᱵᱤ ᱟᱭᱢᱟ ᱫᱷᱟᱭ ᱨᱟᱠᱟᱵ ᱟᱠᱟᱱ ᱨᱮᱦᱚᱸ ᱚᱱᱟ ᱫᱟᱹᱵᱤ ᱨᱮᱭᱟᱜ ᱥᱚᱨᱟᱥᱚᱨᱤ ᱵᱤᱨᱳᱫᱽ ᱵᱤ ᱡᱮ ᱯᱤ ᱵᱟᱝ ᱠᱚ ᱠᱚᱨᱟᱶ ᱟᱠᱟᱫᱟ᱾ ᱛᱚᱵᱮ ᱢᱳᱫᱤ ᱠᱮᱵᱤᱱᱮᱴᱼᱟᱜ ᱱᱚᱣᱟ ᱥᱤᱫᱫᱷᱟᱱᱛᱚ ᱤᱫᱤ ᱠᱟᱛᱮᱡ ᱦᱚᱸ ᱠᱩᱠᱞᱤ ᱫᱚ ᱨᱟᱠᱟᱵ ᱦᱟᱡᱩᱠ ᱠᱟᱱ ᱜᱮᱭᱟ, ᱪᱮᱫᱟᱜ ᱥᱮ ᱯᱟᱨᱚᱢᱮᱱ ᱢᱤᱫ ᱫᱚᱥᱚᱠ ᱠᱷᱚᱱ ᱠᱷᱚᱢᱚᱛᱟ ᱨᱮ ᱢᱮᱱᱟᱭ ᱠᱚ ᱢᱳᱫᱤ ᱥᱚᱨᱠᱟᱨ ᱟᱜ ᱱᱚᱣᱟ ᱥᱤᱫᱫᱷᱟᱱᱛᱚ ᱵᱤᱦᱟᱨ ᱨᱮᱭᱟᱜ ᱨᱟᱡᱽᱟᱹᱨᱤ ᱢᱤᱫ ᱢᱟᱨᱟᱝ ᱥᱩᱢᱤᱠᱚᱨᱚᱱ ᱥᱤᱨᱡᱟᱶ ᱟᱠᱟᱫᱟᱭ᱾
ᱡᱟᱹᱛᱤ ᱜᱚᱱᱚᱱᱟ ᱨᱮᱭᱟᱜ ᱜᱚᱴᱟ ᱟᱠᱟᱫ ᱨᱮᱦᱚᱸ ᱠᱚᱝᱜᱨᱮᱥ ᱪᱮᱛᱟᱱ ᱠᱟᱛᱷᱟᱭ ᱛᱮᱨᱟᱝ ᱟᱠᱟᱫᱟ ᱢᱳᱫᱤ ᱢᱚᱱᱛᱨᱤ ᱥᱚᱵᱷᱟ ᱨᱮᱱ ᱨᱮᱞ ᱢᱚᱱᱛᱨᱤ ᱚᱥᱱᱤ ᱵᱚᱭᱥᱱᱚᱵᱽ (ASHWINI VAISHNAW )᱾ ᱨᱮᱞ ᱢᱚᱱᱛᱨᱤ ᱟᱜ ᱫᱟᱹᱵᱤ, ᱡᱟᱦᱟ ᱚᱠᱛᱚ ᱠᱚᱝᱜᱨᱮᱥ ᱠᱷᱚᱢᱚᱛᱟ ᱨᱮᱠᱚ ᱛᱟᱦᱮ ᱠᱟᱱᱟ ᱩᱱ ᱚᱠᱛᱚ ᱠᱚᱝᱜᱨᱮᱥ ᱦᱚᱸ ᱵᱟᱨ ᱵᱟᱨ ᱡᱟ,ᱛᱤ ᱜᱚᱱᱚᱱᱟ ᱨᱮᱭᱟᱜ ᱠᱚ ᱟᱯᱚᱛᱤ ᱞᱮᱫ ᱛᱟᱦᱮᱱᱟ᱾
