ᱟᱭᱢᱟ ᱮᱴᱠᱮᱴᱚᱬᱮ ᱛᱟᱭᱚᱢ ᱥᱟᱦᱮᱸᱫ ᱠᱮᱫᱟᱭ ᱠᱚᱝᱜᱚᱱᱟ ᱾ ᱟᱭᱢᱟ ᱫᱤᱱ ᱠᱷᱚᱱ ᱜᱮ ᱱᱤᱡᱮᱨᱟᱜ ᱥᱤᱱᱮᱹᱢᱟ ᱤᱢᱟᱨᱡᱮᱢᱥᱤ ᱵᱟᱵᱚᱫᱽ ᱛᱮ ᱟᱹᱰᱤ ᱠᱩᱨᱩᱢᱩᱴᱩ ᱨᱮᱭ ᱛᱟᱦᱮᱸ ᱠᱟᱱᱟ ᱾ ᱥᱤᱱᱮᱹᱢᱟ ᱨᱤᱞᱤᱡᱽ ᱞᱟᱹᱜᱤᱫ ᱛᱮᱭᱟᱨ ᱦᱚᱸ ᱛᱟᱦᱸ ᱠᱟᱱᱟ ᱾ ᱨᱤᱞᱤᱡᱽ ᱨᱮᱱᱟᱜ ᱠᱟᱛᱷᱟ ᱛᱟᱦᱮᱸ ᱠᱟᱱᱟ ᱪᱟᱞᱟᱜ ᱠᱟᱱ ᱥᱮᱨᱢᱟ ᱖ ᱥᱮᱹᱯᱴᱮᱢᱹᱵᱚᱨ ᱾ ᱢᱮᱱᱠᱷᱟᱱ ᱡᱟᱸᱜᱮ ᱫᱟᱨᱟᱢᱮ ᱛᱤᱸᱜᱩ ᱞᱮᱱᱟ ᱟᱭᱤᱱᱤ ᱡᱚᱴᱤᱞᱚᱛᱟ ᱾ ᱢᱮᱱᱠᱷᱟᱱ ᱞᱟᱦᱟ ᱪᱟᱸᱫᱳ ᱜᱮ ᱟᱭᱤᱱᱤ ᱡᱚᱴ ᱠᱟᱴᱟᱣ ᱨᱮᱱᱟᱜ ᱠᱟᱛᱷᱟᱭ ᱩᱪᱷᱟᱹᱱ ᱞᱮᱫᱟ ᱠᱚᱝᱜᱚᱱᱟ ᱾ ᱚᱱᱟ ᱥᱟᱶᱛᱮ ᱥᱮᱱᱥᱚᱨ ᱵᱳᱨᱰ ᱨᱮ ᱪᱷᱟᱲᱯᱚᱛᱨᱚ ᱧᱟᱢ ᱨᱮᱱᱟᱜ ᱠᱟᱛᱷᱟ ᱦᱚᱸᱭ ᱢᱮᱱ ᱞᱮᱫᱟ ᱾ ᱮᱱᱦᱚᱸ ᱟᱭᱤᱱᱤ ᱡᱚᱴ ᱠᱷᱟᱹᱛᱤᱨ ᱛᱮ ᱵᱟᱨᱼᱵᱟᱨ ᱨᱤᱞᱤᱡᱽ ᱨᱮᱱᱟᱜ ᱢᱟᱦᱟᱼᱢᱟᱹᱦᱤᱛ ᱛᱟᱭᱚᱢ ᱟᱠᱟᱱᱟ ᱾ ᱱᱤᱭᱟᱹᱵᱟᱨ ᱫᱚ ᱥᱤᱱᱮᱹᱢᱟ ᱨᱤᱞᱤᱡᱽ ᱨᱮᱱᱟᱜ ᱢᱟᱹᱦᱤᱛ ᱴᱷᱟᱹᱣᱠᱟᱹᱭᱮᱱᱟ ᱾ ᱫᱟᱨᱟᱭᱠᱟᱱ ᱑᱗ ᱡᱟᱱᱩᱣᱟᱨᱤ ᱨᱤᱞᱤᱡᱚᱜ ᱠᱟᱱᱟ ᱤᱢᱟᱨᱡᱮᱱᱥᱤ, ᱩᱪᱷᱟᱹᱱ ᱠᱮᱫᱟᱭ ᱠᱚᱝᱜᱚᱱᱟ ᱾
ᱤᱱᱥᱴᱟᱜᱨᱟᱢ ᱨᱮ ᱯᱳᱥᱴᱟᱨ ᱥᱮᱭᱟᱨ ᱠᱟᱛᱮᱭ ᱚᱞ ᱟᱠᱟᱫᱟ, “ᱵᱷᱟᱨᱚᱛ ᱨᱮᱱ ᱡᱚᱛᱚᱠᱷᱚᱱ ᱫᱟᱲᱮᱭᱟᱱ ᱛᱤᱨᱞᱟᱹ ᱵᱟᱵᱚᱫᱽ ᱛᱮᱭᱟᱨ ᱥᱤᱱᱮᱹᱢᱟ ᱨᱤᱞᱤᱡᱚᱜ ᱠᱟᱱᱟ ᱒᱐᱒᱕ ᱨᱮᱱᱟᱜ ᱑᱗ ᱡᱟᱱᱩᱣᱟᱨᱤ ᱾ ᱧᱮᱞᱧᱟᱢᱚᱜᱼᱟ ᱮᱢᱚᱱ ᱠᱤᱪᱷᱤ ᱡᱤᱱᱤᱥ ᱡᱟᱦᱟᱸ ᱵᱷᱟᱨᱚᱛ ᱨᱮᱱᱟᱜ ᱵᱷᱟᱜᱽᱜᱚᱭ ᱱᱤᱨᱫᱷᱟᱨᱚᱱ ᱞᱮᱫᱟ ᱾
ᱱᱚᱣᱟ ᱥᱤᱱᱮᱹᱢᱟ ᱨᱮ ᱵᱷᱟᱨᱚᱛ ᱨᱮᱱ ᱥᱮᱫᱟᱭ ᱢᱟᱨᱟᱝ ᱢᱚᱱᱛᱨᱤ ᱤᱱᱫᱤᱨᱟ ᱜᱟᱱᱫᱷᱤᱣᱟᱜ ᱪᱩᱨᱤᱛ ᱨᱮᱭ ᱚᱵᱷᱤᱱᱚᱭ ᱟᱠᱟᱫᱟ ᱠᱚᱝᱜᱚᱱᱟ ᱾ ᱥᱠᱨᱤᱱᱯᱞᱮᱹ ᱦᱚᱸ ᱟᱡᱜᱮᱭ ᱚᱞ ᱟᱠᱟᱫᱟ ᱾ ᱥᱤᱱᱮᱹᱢᱟ ᱨᱮᱱᱟᱜ ᱪᱷᱟᱲᱯᱚᱛᱨᱚ ᱧᱟᱢ ᱛᱟᱭᱚᱢ ᱠᱚᱝᱜᱚᱱᱟᱭ ᱚᱞ ᱞᱮᱫᱟ, “ᱟᱞᱮ ᱟᱞᱮᱭᱟᱜ ᱥᱤᱱᱮᱹᱢᱟ ‘ᱤᱢᱟᱨᱡᱮᱱᱥᱤ’ ᱞᱟᱹᱜᱤᱫ ᱥᱮᱱᱥᱚᱨ ᱵᱳᱨᱰ ᱠᱷᱚᱱ ᱪᱷᱟᱲᱯᱚᱛᱨᱚᱭ ᱧᱟᱢ ᱟᱠᱟᱱᱟ ᱾ ᱟᱹᱰᱤ ᱞᱚᱜᱚᱱ ᱜᱮ ᱥᱤᱱᱮᱹᱢᱟ ᱨᱤᱞᱤᱡᱽ ᱨᱮᱱᱟᱜ ᱢᱟᱹᱦᱤᱛ ᱦᱚᱸᱞᱮ ᱩᱪᱷᱟᱹᱱᱟ ᱾ ᱟᱯᱮᱭᱟᱜ ᱛᱟᱺᱜᱤ ᱛᱟᱲᱟᱜ ᱟᱨ ᱜᱚᱲᱚ ᱠᱷᱟᱹᱛᱤᱨ ᱟᱹᱰᱤ ᱟᱭᱢᱟ ᱥᱟᱨᱦᱟᱣ ᱾”
ᱠᱚᱝᱜᱚᱱᱟᱣᱟᱜ ᱱᱚᱣᱟ ᱥᱤᱱᱮᱹᱢᱟ ᱥᱤᱠᱷ ᱵᱷᱟᱵᱟᱵᱮᱹᱜᱽ ᱨᱮ ᱟᱜᱷᱟᱛ ᱟᱠᱟᱫᱟᱭ ᱢᱮᱱᱛᱮ ᱥᱤᱨᱳᱢᱚᱱᱤ ᱟᱠᱟᱞᱤ ᱫᱚᱞᱟᱜ ᱟᱯᱷᱚᱫᱽ ᱾ ᱮᱢᱚᱱ ᱪᱮᱫ ᱱᱚᱣᱟ ᱥᱤᱱᱮᱹᱢᱟ ᱞᱟᱹᱜᱤᱫ ᱵᱟᱝᱢᱟ ᱦᱩᱢᱠᱤ ᱦᱚᱸ ᱧᱟᱢ ᱟᱠᱟᱫᱟᱭ ᱠᱚᱝᱜᱚᱱᱟ ᱾ ᱱᱚᱣᱟ ᱛᱟᱭᱚᱢ ᱥᱮᱱᱥᱚᱨ ᱵᱳᱨᱰ ᱥᱟᱶ ᱟᱭᱢᱟᱫᱤᱱ ᱟᱫᱟᱞᱚᱛ ᱨᱮ ᱵᱤᱵᱟᱹᱫᱽ ᱪᱟᱞᱟᱣ ᱟᱠᱟᱱᱟ ᱱᱤᱨᱢᱟᱛᱟ ᱠᱚᱣᱟᱜ ᱾ ᱠᱚᱝᱜᱚᱱᱟ ᱟᱯᱷᱚᱫᱽ ᱞᱮᱫᱟᱭ, ᱥᱮᱱᱥᱚᱨ ᱵᱳᱨᱰ ᱠᱷᱟᱹᱞᱤᱼᱠᱷᱟᱹᱞᱤ ᱪᱷᱚᱵᱤ ᱨᱮᱱᱟᱜ ᱪᱷᱟᱲᱯᱚᱛᱨᱚ ᱵᱟᱭ ᱮᱢᱚᱜ ᱠᱟᱱᱟ ᱾ ᱥᱮᱱᱥᱚᱨ ᱵᱳᱨᱰ ᱯᱟᱦᱴᱟ ᱨᱮᱱ ᱟᱭᱤᱱᱡᱤᱵᱤ ᱚᱵᱷᱤᱱᱚᱵᱽ ᱪᱚᱱᱫᱨᱚᱪᱩᱲ ᱟᱫᱟᱞᱚᱛᱮ ᱵᱟᱰᱟᱭ ᱦᱚᱪᱚ ᱞᱮᱫᱮᱭᱟ, ᱱᱚᱣᱟ ᱥᱤᱱᱮᱹᱢᱟ ᱪᱷᱟᱲᱯᱚᱛᱨᱚ ᱮᱢ ᱜᱟᱱᱚᱜᱼᱟ ᱾ ᱢᱮᱱᱠᱷᱟᱱ, ᱚᱱᱟ ᱞᱟᱹᱜᱤᱫ ᱠᱤᱪᱷᱩᱜᱟᱱ ᱥᱤᱱ ᱜᱮᱫ ᱞᱟᱜᱟᱜᱼᱟ ᱾ ᱢᱩᱪᱟᱹᱫ ᱨᱮ ᱚᱱᱟ ᱪᱷᱟᱲᱯᱚᱛᱨᱚ ᱧᱟᱢ ᱠᱟᱛᱮ ᱥᱤᱱᱮᱹᱢᱟ ᱨᱤᱞᱤᱡᱽ ᱨᱮᱱᱟᱜ ᱢᱟᱦᱟ ᱦᱚᱸ ᱩᱪᱷᱟᱹᱱ ᱦᱩᱭᱮᱱᱟ ᱾ ᱠᱚᱝᱜᱚᱱᱟᱣᱟᱜ ᱰᱤᱨᱮᱹᱠᱥᱚᱱ ᱛᱮ ᱱᱚᱣᱟ ᱨᱮᱠᱚ ᱠᱟᱹᱢᱤᱭᱟᱠᱟᱫᱟ ᱚᱱᱩᱯᱚᱢ ᱠᱷᱮᱹᱨ, ᱢᱤᱞᱤᱱᱫᱽ ᱥᱳᱢᱟᱱ, ᱥᱨᱮᱹᱭᱚᱥ ᱛᱟᱞᱯᱟᱲᱮᱹ ᱾
