ᱜᱟᱭᱵᱟᱸᱫᱷᱟ ᱜᱳᱵᱤᱱᱫᱽᱜᱚᱸᱡᱽ ᱨᱮᱱᱟᱜ ᱨᱟᱡᱟ ᱵᱤᱨᱟᱴ ᱟᱛᱳ ᱨᱮ ᱥᱟᱱᱛᱟᱲ ᱪᱮᱛᱟᱱ ᱦᱟᱢᱞᱟ ᱵᱟᱵᱚᱫᱽ ᱨᱟᱡᱽᱥᱟᱦᱤ ᱨᱮ ᱨᱟᱸᱜᱟᱣᱱᱟ ᱠᱟᱹᱢᱤᱦᱚᱨᱟ ᱢᱮᱱᱫᱚ ᱢᱟᱱᱚᱵᱽᱵᱚᱱᱫᱷᱚᱱ ᱠᱟᱹᱢᱤᱦᱚᱨᱟ ᱥᱟᱯᱲᱟᱣᱮᱱᱟ ᱾ ᱚᱛᱮ ᱢᱟᱦᱟ ᱥᱮᱛᱟᱜ ᱨᱮ ᱥᱟᱦᱮᱵᱽ ᱵᱟᱡᱟᱨ ᱡᱤᱨᱳ ᱯᱚᱭᱮᱱᱴ ᱨᱮ ᱱᱚᱣᱟ ᱨᱟᱸᱜᱟᱣᱱᱟ ᱠᱟᱹᱢᱤᱦᱚᱨᱟ ᱠᱚ ᱥᱟᱹᱛᱼᱥᱟᱯᱲᱟᱣ ᱞᱮᱫᱟ ᱦᱤᱭᱩᱢᱮᱱ ᱨᱟᱭᱤᱴᱥ ᱰᱤᱯᱷᱮᱱᱰᱟᱨᱥ ᱯᱷᱳᱨᱟᱢ ᱯᱟᱦᱟᱴᱟ ᱠᱷᱚᱱ ᱾
ᱟᱹᱜᱩᱣᱟᱹᱱ ᱠᱚᱣᱟᱜ ᱫᱟᱹᱵᱤ
ᱢᱟᱱᱚᱵᱽᱵᱚᱱᱫᱷᱚᱱ ᱨᱮᱱ ᱟᱹᱜᱩᱣᱟᱹᱱ ᱠᱚᱣᱟᱜ ᱞᱟᱹᱭ, ᱯᱟᱨᱚᱢᱮᱱ ᱡᱟᱹᱨᱩᱢ ᱢᱟᱦᱟ ᱦᱤᱞᱳᱜ ᱨᱟᱡᱟᱦᱟᱨ ᱤᱭᱩᱱᱤᱭᱚᱱ ᱯᱚᱨᱤᱥᱚᱫᱽ ᱨᱮᱱ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢᱟᱜ ᱫᱩᱼᱫᱮᱞᱟ ᱛᱮ ᱟᱹᱫᱤᱵᱟᱹᱥᱤ ᱟᱛᱳ ᱨᱮ ᱦᱟᱢᱞᱟ ᱦᱩᱭ ᱟᱠᱟᱱᱟ ᱾ ᱱᱚᱣᱟ ᱚᱠᱛᱚ ᱟᱭᱢᱟ ᱦᱚᱲ ᱪᱮᱛᱟᱱ ᱨᱮᱜᱮ ᱱᱟᱦᱟᱪᱟᱨ ᱪᱟᱞᱟᱣᱟᱠᱟᱱᱟ ᱾ ᱩᱱᱠᱩ ᱢᱩᱫᱽ ᱨᱮ ᱯᱷᱤᱞᱳᱢᱤᱱᱟ ᱦᱟᱸᱥᱫᱟ ᱧᱩᱛᱩᱢᱟᱱ ᱢᱤᱫ ᱟᱹᱫᱤᱵᱟᱹᱥᱤ ᱛᱤᱨᱞᱟᱹ ᱦᱟᱥᱯᱟᱛᱟᱞ ᱨᱮ ᱵᱷᱩᱨᱛᱤ ᱦᱩᱭ ᱟᱠᱟᱱᱟ ᱾ ᱱᱟᱦᱟᱜ ᱚᱱᱟ ᱟᱹᱫᱤᱵᱟᱹᱥᱤ ᱟᱛᱳ ᱨᱮ ᱥᱟᱱᱟᱢ ᱠᱚᱜᱮ ᱱᱟᱯᱟᱭ ᱢᱮᱱᱟᱜ ᱠᱚᱣᱟ ᱾
ᱟᱹᱜᱩᱣᱟᱹᱱ ᱠᱚᱣᱟᱜ ᱞᱟᱹᱭ, ᱥᱮᱫᱟᱭ ᱨᱟᱡᱟ ᱵᱤᱨᱟᱴ ᱟᱛᱳ ᱨᱮ ᱟᱹᱰᱤᱜᱟᱱ ᱥᱟᱱᱛᱟᱲ ᱜᱷᱟᱨᱚᱸᱡᱽ ᱠᱚ ᱛᱟᱦᱮᱸ ᱠᱟᱱᱟ ᱾ ᱫᱤᱥᱚᱢ ᱯᱷᱩᱨᱜᱟᱹᱞ ᱛᱟᱭᱚᱢ ᱥᱟᱱᱛᱟᱲ ᱦᱚᱯᱚᱱᱟᱜ ᱯᱨᱟᱭ ᱒᱕᱐ ᱵᱤᱜᱷᱟᱹ ᱦᱟᱥᱟ ᱠᱚ ᱫᱚᱠᱷᱚᱞ ᱟᱠᱟᱫᱟ ᱯᱨᱚᱵᱷᱟᱵᱽᱥᱟᱞᱤ ᱦᱚᱲ ᱠᱚ ᱾ ᱚᱱᱟ ᱚᱡᱮ ᱛᱮ ᱚᱸᱰᱮ ᱠᱷᱚᱱ ᱟᱭᱢᱟ ᱜᱷᱟᱨᱚᱸᱡᱽ ᱮᱴᱟᱜ ᱥᱮᱫ ᱠᱚ ᱥᱮᱱ ᱟᱠᱟᱱᱟ ᱾ ᱱᱚᱣᱟ ᱥᱩᱡᱳᱜᱽ ᱨᱮ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢ ᱡᱟᱭᱜᱟ ᱫᱚᱠᱷᱚᱞ ᱨᱮᱱᱟᱜᱼᱮ ᱯᱷᱩᱱᱫᱤᱭᱟᱠᱟᱫᱟ ᱾ ᱪᱮᱭᱟᱨᱢᱮᱱ ᱟᱨ ᱩᱱᱤ ᱨᱮᱱ ᱦᱚᱲ ᱯᱞᱮᱱ ᱢᱟᱯᱷᱤᱠ ᱵᱨᱤᱴᱤᱥ ᱥᱚᱨᱮᱱ ᱟᱡ ᱟᱭᱳ ᱠᱚ ᱫᱟᱞ ᱟᱠᱟᱫᱮᱭᱟ ᱟᱨ ᱚᱲᱟᱜ ᱨᱮ ᱥᱮᱸᱜᱮᱞ ᱠᱚ ᱫᱷᱚᱨᱟᱣᱟᱠᱟᱫᱟ ᱾
ᱚᱱᱟ ᱢᱟᱱᱚᱵᱽᱵᱚᱱᱫᱷᱚᱱ ᱠᱷᱚᱱ ᱫᱟᱹᱵᱤᱭᱟᱠᱟᱫᱟᱠᱚ ᱡᱟᱛᱮ ᱟᱹᱰᱤ ᱞᱚᱜᱚᱱ ᱦᱟᱢᱞᱟᱠᱟᱨᱤ ᱠᱚ ᱜᱨᱮᱹᱯᱷᱛᱟᱨ ᱦᱩᱭᱩᱜ ᱢᱟ ᱢᱮᱱᱛᱮ ᱾ ᱱᱚᱣᱟ ᱠᱟᱹᱢᱤᱦᱚᱨᱟ ᱨᱮ ᱥᱚᱵᱷᱟᱯᱚᱛᱤᱛᱛᱚ ᱟᱠᱟᱫᱟᱭ ᱪᱷᱳᱴᱚᱱ ᱥᱚᱨᱫᱟᱨ ᱾ ᱵᱚᱠᱛᱟ ᱞᱮᱠᱟ ᱛᱮᱠᱚ ᱛᱟᱦᱮᱸ ᱠᱟᱱᱟᱼ ᱵᱤᱨ ᱢᱩᱠᱛᱤ ᱡᱳᱫᱽᱫᱷᱟ ᱥᱟᱦᱡᱟᱦᱟᱱ ᱟᱞᱤ ᱵᱚᱨᱡᱟᱦᱟᱱ, ᱟᱹᱫᱤᱵᱟᱹᱥᱤ ᱱᱮᱛᱟ ᱜᱚᱱᱮᱥ ᱢᱟᱨᱰᱤ, ᱵᱤᱢᱚᱞ ᱪᱚᱱᱫᱨᱚ ᱨᱟᱡᱳᱣᱟᱲ, ᱟᱱᱰᱤᱭᱟᱥ ᱵᱤᱥᱥᱟᱥ, ᱥᱟᱱᱛᱟ ᱵᱤᱥᱥᱟᱥ ᱮᱢᱟᱱ ᱾
ᱵᱟᱰᱟᱭ ᱡᱚᱝ ᱞᱟᱹᱜᱽ ᱠᱟᱱᱟ ᱚᱱᱟ ᱟᱹᱫᱤᱵᱟᱹᱥᱤ ᱟᱛᱳ ᱨᱮ ᱦᱟᱢᱞᱟ ᱜᱷᱚᱴᱚᱱ ᱨᱮ ᱧᱩᱦᱩᱢ ᱢᱟᱦᱟ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢ ᱟᱨ ᱩᱱᱤ ᱨᱮᱱ ᱛᱩᱨᱩᱭ ᱵᱚᱭᱦᱟ ᱟᱥᱟᱢᱤ ᱠᱟᱛᱮ ᱢᱟᱢᱞᱟᱭ ᱠᱚᱨᱟᱭ ᱟᱠᱟᱫᱟ ᱯᱷᱤᱞᱳᱢᱤᱱᱟ ᱥᱚᱨᱮᱱ ᱨᱮᱱ ᱦᱚᱯᱚᱱ ᱡᱩᱞᱤᱭᱟᱥ ᱥᱚᱨᱮᱱ ᱾ ᱨᱚᱯᱷᱤᱠᱩᱞ ᱤᱭᱩᱱᱤᱭᱚᱱ ᱵᱤᱹᱮᱱᱹᱯᱤ ᱨᱮᱱ ᱡᱩᱜᱽᱢᱚ ᱥᱟᱫᱷᱟᱨᱚᱱ ᱥᱚᱢᱯᱟᱫᱚᱠ ᱟᱨ ᱩᱯᱚᱡᱮᱞᱟ ᱵᱤᱹᱮᱱᱹᱯᱤ ᱨᱮᱱ ᱟᱦᱦᱟᱭᱚᱠ ᱠᱚᱢᱤᱴᱤ ᱨᱮᱱ ᱢᱟᱲᱛᱮᱭ ᱛᱟᱦᱮᱸ ᱠᱟᱱᱟ ᱾ ᱦᱟᱢᱞᱟ ᱜᱷᱚᱴᱚᱱ ᱯᱚᱨᱮᱨ ᱫᱤᱱᱜᱮ ᱵᱚᱦᱤᱥᱠᱟᱨ ᱟᱠᱟᱫᱮᱭᱟᱠᱚ ᱡᱮᱞᱟ ᱵᱤᱹᱮᱱᱹᱯᱤ ᱾
