Mission Ol Chiki 2025 : ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟ.ᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱑᱙᱒᱕ ᱥᱟᱺᱦᱤᱛᱨᱮ ᱚᱞᱪᱤᱠᱤ ᱞᱤᱯᱤᱭ ᱥᱤᱨᱡᱚᱱ ᱟᱠᱟᱫᱼᱟ ᱾ ᱚᱞᱪᱤᱠᱤ ᱥᱤᱨᱡᱚᱱ ᱨᱮᱱᱟᱜ ᱑᱐᱐ ᱥᱮᱨᱢᱟ ᱱᱮᱥ ᱥᱮᱴᱮᱨ ᱟᱠᱟᱱᱟ ᱾
ᱚᱞᱪᱤᱠᱤ ᱪᱷᱟᱨᱟᱣ ᱯᱟᱥᱱᱟᱣ ᱟᱨ ᱵᱮᱵᱷᱟᱨ ᱧᱩᱛᱩᱢ ᱛᱮ ᱮᱦᱚᱵ ᱟᱠᱟᱱ ᱠᱟ.ᱢᱤᱦᱚᱨᱟ ᱡᱚᱥ ᱚᱞᱪᱤᱠᱤᱼ᱒᱐᱒᱕ ᱜᱮᱞᱮᱵᱤᱞᱤ ᱞᱟ.ᱜᱤᱫ ᱟᱭᱢᱟ ᱠᱟ.ᱢᱤᱦᱚᱨᱟ ᱫᱤᱥᱚᱢ ᱡᱟᱠ ᱨᱮ ᱥᱟᱯᱲᱟᱣ ᱦᱩᱭᱩᱜ ᱠᱟᱱᱟ ᱾ ᱚᱱᱠᱟ ᱜᱮ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱠᱩᱞᱤᱼᱟᱱᱟ ᱵᱚᱱᱚᱛ ᱛᱚᱞᱠᱷᱚ ᱟ.ᱛᱩᱨᱮ ᱠᱷᱮᱨᱚᱣᱟᱲ ᱵᱤᱨ ᱴᱨᱟᱥᱴ ᱦᱚᱛᱮᱛᱮ ᱡᱚᱥ ᱚᱞᱪᱤᱠᱤᱼ᱒᱐᱒᱕ ᱜᱮᱞᱮᱵᱤᱞᱤ ᱤᱫᱤ ᱠᱟᱛᱮ ᱢᱤᱫ ᱠᱟ.ᱢᱤᱦᱚᱨᱟ ᱪᱟᱞᱟᱣᱮᱱ ᱢᱟ. ᱖ᱼ᱔ᱼ᱒᱐᱒᱕ ᱦᱤᱛ ᱦᱤᱞᱚᱜ ᱚᱸᱰᱮᱱᱟᱜ ᱠᱷᱮᱨᱣᱟᱲ ᱵᱤᱨ ᱚᱞ ᱤᱛᱩᱱ ᱟᱥᱲᱟᱨᱮ ᱥᱟᱯᱲᱟᱣ ᱦᱩᱭ ᱟᱠᱟᱱᱟ ᱾ ᱚᱱᱟ ᱫᱩᱯᱲᱩᱵ ᱨᱮ ᱢᱟᱨᱟᱝᱯᱮᱲᱟ ᱞᱮᱠᱟᱛᱮ ᱠᱩᱞᱤᱼᱟᱱᱟ ᱵᱤ.ᱰᱤ.ᱳ. ᱢᱟᱱ ᱡᱤᱛᱮᱱᱫᱽᱨᱚ ᱢᱩᱨᱢᱩ ᱜᱚᱢᱠᱮᱭ ᱥᱮᱞᱮᱫ ᱞᱮᱱᱟ ᱾ ᱚᱱᱟ ᱥᱟᱶᱛᱮ ᱠᱩᱞᱤᱼᱟᱱᱟ ᱵᱚᱱᱚᱛ ᱨᱤᱱ ᱟ.ᱛᱳ ᱢᱟ.ᱡᱷᱤ ᱵᱟᱵᱟ, ᱯᱤᱲ ᱯᱟᱨᱜᱟᱱᱟ, ᱥᱚᱨᱯᱚᱸᱪ, ᱯᱤ.ᱮᱥ. ᱥᱚᱦᱮᱛ, ᱟᱢᱟ.ᱞᱤᱭᱟ., ᱢᱟᱪᱮᱛ, ᱚᱞᱪᱤᱠᱤ ᱫᱩᱞᱟ.ᱲᱤᱭᱟ., ᱜᱩᱱᱢᱟᱱ ᱜᱚᱢᱠᱮ ᱮᱢᱟᱱ ᱥᱮᱞᱮᱫ ᱠᱚ ᱛᱟᱦᱮᱸ ᱠᱟᱱᱟ ᱾
ᱪᱤᱨ ᱦᱤᱯᱤᱲ ᱛᱟᱭᱚᱢ ᱱᱚᱣᱟ ᱥᱟ.ᱜᱩᱱ ᱚᱠᱛᱚᱨᱮ ᱡᱚᱥ ᱚᱞᱪᱤᱠᱤᱼ᱒᱐᱒᱕ ᱨᱮᱱᱟᱜ ᱢᱤᱫ ᱨᱮᱰᱤᱭᱚᱢ ᱥᱟᱭᱤᱱ ᱵᱳᱰ ᱫᱚ ᱛᱚᱞᱠᱷᱚ ᱟ.ᱛᱳ ᱠᱩᱞᱦᱤ ᱮᱦᱚᱵ ᱨᱮ ᱵᱟᱭᱥᱟᱣ ᱦᱩᱭ ᱟᱠᱟᱱᱟ ᱾
ᱚᱞᱪᱤᱠᱤ ᱪᱷᱟᱨᱟᱣ ᱯᱟᱥᱱᱟᱣ ᱟᱨ ᱞᱟᱦᱟᱱᱛᱤᱨᱮ ᱥᱚᱨᱮᱥ ᱮᱱᱮᱢ ᱢᱮᱱᱟᱜ ᱟᱠᱟᱫ ᱜᱚᱢᱠᱮ ᱠᱚᱫᱚ ᱵᱟᱦᱟ ᱛᱷᱩᱯᱱᱟᱜ, ᱢᱟ.ᱱ ᱥᱟᱠᱟᱢ ᱟᱨ ᱢᱚᱢᱮᱱᱴᱚ ᱮᱢ ᱠᱟᱛᱮ ᱠᱚ ᱢᱟ.ᱱ ᱥᱟᱨᱦᱟᱣ ᱞᱮᱫ ᱠᱚᱣᱟ ᱾
ᱱᱚᱣᱟ ᱫᱩᱯᱲᱩᱵ ᱨᱮ ᱱᱤᱴ (ᱜᱚᱴᱟ) ᱦᱟᱠᱟᱱ ᱠᱟᱛᱷᱟ ᱠᱚᱫᱚ ᱦᱩᱭᱩᱜ ᱠᱟᱱᱟ ᱺ-
᱑. ᱥᱟᱱᱟᱢ ᱟ.ᱛᱳ ᱚᱲᱟᱜ ᱨᱮ ᱚᱞᱪᱤᱠᱤ ᱪᱮᱫᱚᱜ ᱨᱮᱱᱟᱜ ᱵᱮᱣᱨᱟ ᱥᱮᱴᱮᱨ ᱦᱩᱭᱩᱜᱼᱟ ᱾ ᱤᱛᱩᱱ ᱟᱥᱲᱟᱨᱮ ᱯᱟᱲᱦᱟᱣ ᱥᱟᱶᱛᱮ ᱵᱤᱱᱤᱰ ᱠᱚ ᱮᱢ ᱚᱪᱚ ᱦᱩᱭᱩᱜᱼᱟ ᱾ ᱵᱤᱱᱤᱰ ᱚᱨᱡᱚ ᱩᱪᱷᱟ.ᱱ ᱛᱟᱭᱚᱢ ᱥᱤᱫ ᱥᱟᱠᱟᱢ ᱦᱚᱸ ᱮᱢ ᱦᱩᱭᱩᱜᱼᱟ ᱾
᱒. ᱥᱟᱱᱟᱢ ᱚᱲᱟᱜ ᱵᱷᱤᱛ ᱯᱚᱛᱟᱣᱨᱮ ᱚᱞᱪᱤᱠᱤ ᱛᱮ ᱵᱟ.ᱠᱷᱩᱞ ᱧᱩᱛᱩᱢ, ᱥᱟᱸᱫᱮᱥ ᱮᱢᱟᱱ ᱠᱚ ᱚᱞ ᱦᱩᱭᱩᱜᱼᱟ ᱾
᱓. ᱥᱟᱱᱟᱢ ᱟ.ᱛᱳ ᱮᱦᱚᱵ ᱨᱮ ᱟ.ᱛᱳ ᱨᱮᱱᱟᱜ ᱧᱩᱛᱩᱢ ᱥᱟᱭᱤᱱ ᱵᱳᱰ ᱚᱞᱪᱤᱠᱤ ᱥᱟᱶ ᱤᱸᱜᱽᱞᱤᱥ ᱛᱮ ᱚᱞ ᱦᱩᱭᱩᱜᱼᱟ ᱾
᱔. ᱜᱩᱜᱩᱞ ᱢᱮᱯ ᱨᱮ ᱟ.ᱛᱩ ᱨᱮᱱᱟᱜ ᱧᱩᱛᱩᱢ ᱟᱨ ᱡᱟᱦᱮᱨ ᱠᱚᱫᱚ ᱚᱞᱪᱤᱠᱤ ᱛᱮ ᱚᱞ ᱥᱚᱫᱚᱨ ᱦᱩᱭᱩᱜ-ᱟ ᱾
᱕. ᱟ.ᱛᱳ ᱨᱮᱱᱟᱜ ᱜᱟᱶᱛᱟ/ᱥᱮᱢᱞᱮᱫ ᱮᱢᱟᱱ ᱦᱚᱛᱮᱛᱮ ᱯᱟᱨᱥᱟᱞᱚᱜ ᱠᱟᱱ ᱵᱚᱞ ᱮᱱᱮᱡ, ᱤᱥᱯᱳᱴ, ᱛᱟᱢᱥᱟ ᱡᱟᱛᱨᱟ ᱯᱟᱛᱟ ᱮᱢᱟᱱ ᱨᱮᱱᱟᱜ ᱪᱷᱤᱛᱭᱟ.ᱣ ᱥᱟᱠᱟᱢ ᱠᱚᱫᱚ ᱥᱟᱱᱛᱟᱲᱤ ᱯᱟ.ᱨᱥᱤ – ᱚᱞᱪᱤᱠᱤ ᱛᱮ ᱯᱟᱨᱥᱟᱞ ᱦᱩᱭᱩᱜ-ᱟ ᱾
᱖. ᱟ.ᱨᱡᱤ ᱥᱟᱠᱟᱢ ᱠᱚᱫᱚ ᱥᱟᱱᱛᱟᱲᱤ (ᱚᱞᱪᱤᱠᱤ) ᱛᱮ ᱚᱞ ᱠᱟᱛᱮ ᱡᱚᱲᱟᱣᱟᱱ ᱩᱯᱤᱥ ᱨᱮ ᱫᱟᱠᱷᱚᱞ ᱦᱩᱭᱩᱜᱼᱟ ᱾
᱗. ᱟᱯᱟᱱ ᱟ.ᱯᱤᱱ ᱟᱛᱳ ᱨᱮᱱᱟᱜ ᱡᱟᱦᱮᱨ ᱫᱟᱨᱮ ᱧᱮᱞ ᱦᱩᱭᱩᱜᱼᱟ ᱟᱨ ᱥᱮᱨᱢᱟ ᱯᱤᱪᱷᱤ ᱕ ᱜᱚᱴᱟᱝ ᱠᱟᱛᱮ ᱥᱟᱨᱡᱚᱢ, ᱢᱟᱛᱠᱚᱢ, ᱢᱮᱨᱟᱞ ᱮᱢᱟᱱ ᱯᱚᱦᱟ ᱫᱟᱨᱮ ᱨᱚᱦᱚᱭ ᱤᱫᱤ ᱦᱩᱭᱩᱜᱼᱟ ᱾
ᱱᱚᱣᱟ ᱠᱟ.ᱢᱤ ᱠᱚ ᱛᱩᱱᱠᱷᱤ ᱛᱚᱞᱟᱥ ᱞᱟ.ᱜᱤᱫ ᱢᱤᱫ ᱠᱩᱢᱩᱴ ᱦᱚᱸ ᱵᱮᱨᱮᱫ ᱟᱠᱟᱱᱟ ᱾
ᱠᱩᱞᱤᱼᱟᱱᱟ ᱵᱚᱱᱚᱛ ᱨᱮ ᱡᱚᱥ ᱚᱞᱪᱤᱠᱤᱼ᱒᱐᱒᱕ ᱜᱮᱞᱮᱵᱤᱞᱤ ᱨᱮᱱᱟᱜ ᱠᱟ.ᱢᱤᱦᱚᱨᱟ ᱞᱮᱠᱟ ᱮᱴᱟᱜ ᱵᱚᱱᱚᱛ ᱨᱮᱦᱚᱸ ᱥᱟᱯᱲᱟᱣ ᱞᱟ.ᱠᱛᱤᱜ ᱠᱟᱱᱟ ᱾ ᱱᱚᱣᱟ ᱤᱫᱤ ᱠᱟᱛᱮ ᱵᱤᱥᱛᱤ ᱵᱟᱰᱟᱭ ᱞᱟ.ᱜᱤᱫ ᱟᱞᱮ ᱥᱟᱶ ᱯᱷᱳᱱ ᱛᱮ ᱜᱟᱞᱢᱟᱨᱟᱣ ᱛᱟᱵᱚᱱ ᱯᱮ ᱾
