ᱠᱟᱛᱷᱟᱭ ᱫᱚᱦᱚ ᱠᱮᱫᱟ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱮᱱᱟᱨᱡᱤ ᱾ ᱥᱚᱱᱛᱳᱥ ᱠᱟᱯ ᱡᱤᱛᱠᱟᱹᱨᱟᱠᱟᱱ ᱵᱟᱝᱞᱟ ᱨᱮᱱ ᱯᱷᱩᱴᱵᱚᱞᱟᱨ ᱠᱚ ᱮᱢᱟᱜ ᱠᱚᱣᱟᱭ ᱥᱚᱨᱠᱟᱨᱤ ᱪᱟᱹᱠᱨᱤ ᱨᱮᱱᱟᱜ ᱡᱚᱭᱮᱱᱤᱝ ᱞᱮᱴᱟᱨ ᱾ ᱯᱩᱞᱤᱥᱟᱜ ᱪᱟᱹᱠᱨᱤ ᱠᱚ ᱧᱟᱢ ᱠᱮᱫᱟ ᱵᱟᱝᱞᱟ ᱨᱮᱱ ᱯᱷᱩᱴᱵᱚᱞᱟᱨ ᱠᱚ ᱾ ᱥᱮᱪᱮᱫ ᱡᱳᱜᱽᱜᱚᱛᱟ ᱞᱮᱠᱟᱛᱮ ᱚᱠᱚᱭ ᱫᱚ ᱥᱟᱵᱽᱼᱤᱱᱥᱯᱮᱠᱴᱚᱨ ᱟᱨ ᱚᱠᱚᱭ ᱠᱚᱫᱚ ᱠᱚᱱᱥᱴᱮᱵᱚᱞ ᱦᱩᱫᱟᱹ ᱨᱮᱠᱚ ᱧᱟᱢ ᱠᱮᱫᱟ ᱪᱟᱹᱠᱨᱤ ᱾
ᱥᱚᱧᱡᱚᱭ ᱥᱮᱱᱟᱜ ᱠᱳᱪᱤᱝ ᱨᱮ ᱟᱭᱢᱟ ᱫᱤᱱ ᱛᱟᱭᱚᱢ ᱥᱚᱱᱛᱳᱥ ᱴᱨᱚᱯᱷᱤ ᱠᱚ ᱡᱤᱛᱠᱟᱹᱨᱮᱱᱟ ᱵᱟᱝᱞᱟ ᱾ ᱯᱷᱟᱭᱱᱟᱞ ᱨᱮ ᱨᱚᱵᱤ ᱦᱟᱸᱥᱫᱟᱣᱟᱜ ᱜᱳᱞ ᱛᱮ ᱠᱮᱨᱚᱞ ᱦᱟᱨᱟᱣ ᱠᱟᱛᱮ ᱡᱤᱛᱠᱟᱹᱨᱟᱠᱟᱱᱟᱠᱚ ᱥᱚᱧᱡᱚᱭ ᱥᱮᱱ ᱨᱮᱱ ᱫᱚᱞ ᱾ ᱚᱱᱟ ᱛᱟᱭᱚᱢ ᱜᱮ ᱥᱤᱨᱟᱹ ᱢᱚᱱᱛᱨᱤ ᱠᱟᱛᱷᱟᱭ ᱮᱢ ᱞᱮᱫᱟ ᱥᱚᱱᱛᱳᱥ ᱠᱟᱯ ᱡᱤᱛᱠᱟᱹᱨᱤᱭᱟᱹ ᱠᱚ ᱮᱢᱟ ᱠᱚᱣᱟᱭ ᱥᱚᱨᱠᱟᱨᱤ ᱪᱟᱹᱠᱨᱤ ᱾ ᱥᱤᱨᱟᱹ ᱢᱚᱱᱛᱨᱤ ᱥᱟᱹᱜᱩᱱ ᱵᱮᱣᱨᱟ ᱪᱟᱞ ᱠᱟᱛᱮ ᱮᱠᱥ ᱦᱮᱱᱰᱮᱞ ᱨᱮ ᱚᱞ ᱞᱮᱫᱟᱭ, ‘ᱨᱚᱵᱤ ᱦᱟᱸᱥᱫᱟᱣᱟᱜ ᱜᱳᱞ ᱛᱮ ᱜᱚᱴᱟᱭᱮᱱᱟ ᱡᱤᱛᱠᱟᱹᱨ, ᱡᱟᱦᱟᱸᱭ ᱴᱩᱨᱱᱟᱢᱮᱱᱴ ᱨᱮ ᱡᱚᱛᱚᱠᱷᱚᱱ ᱡᱟᱹᱥᱛᱤ ᱑᱓ ᱜᱚᱴᱟᱝ ᱜᱳᱞ ᱠᱟᱛᱮ ᱜᱳᱞᱰᱮᱱ ᱵᱩᱴᱮ ᱧᱟᱢᱟᱠᱟᱫᱟ ᱾ ᱠᱳᱪ ᱥᱚᱧᱡᱚᱭ ᱥᱮᱱ ᱞᱟᱹᱜᱤᱫ ᱚᱱᱛᱚᱨ ᱩᱡᱟᱹᱲ ᱥᱟᱹᱜᱩᱱ ᱵᱮᱣᱨᱟ ᱾’ ᱛᱟᱭᱚᱢ ᱛᱮ ᱩᱱᱠᱩ ᱥᱟᱶ ᱱᱚᱵᱟᱱᱱᱚ ᱨᱮᱭ ᱧᱟᱯᱟᱢᱮᱱᱟ ᱢᱚᱢᱚᱛᱟ ᱵᱮᱱᱟᱨᱡᱤ ᱾ ᱕᱐ ᱞᱟᱠᱷ ᱴᱟᱠᱟ ᱠᱟᱹᱣᱰᱤ ᱥᱤᱨᱳᱯᱟ ᱦᱚᱸᱭ ᱩᱪᱷᱟᱹᱱ ᱾ ᱠᱷᱮᱹᱞ ᱢᱚᱱᱛᱨᱤ ᱚᱨᱩᱯ ᱵᱤᱥᱥᱟᱥ ᱟᱸᱫᱮ ᱦᱚᱸᱭ ᱮᱢᱟᱫᱮ ᱛᱟᱦᱮᱸᱫ ᱥᱟᱱᱟᱢ ᱠᱚ ᱞᱟᱹᱜᱤᱫ ᱥᱚᱨᱠᱟᱨᱤ ᱪᱟᱹᱠᱨᱤ ᱨᱮᱱᱟᱜ ᱵᱮᱵᱚᱥᱛᱷᱟ ᱾ ᱚᱱᱟ ᱞᱮᱠᱟᱛᱮ ᱱᱤᱭᱳᱜᱽ ᱠᱟᱹᱢᱤᱦᱚᱨᱟ ᱦᱚᱸ ᱮᱛᱚᱦᱚᱵ ᱟᱠᱟᱱᱟ ᱾ ᱧᱩᱦᱩᱢ ᱢᱟᱦᱟ ᱦᱤᱞᱳᱜ ᱟᱭᱹᱮᱯᱷᱹᱮ ᱫᱚᱯᱛᱚᱨ ᱨᱮ ᱥᱚᱨᱠᱟᱨᱤ ᱠᱟᱜᱚᱡᱽ ᱥᱟᱠᱟᱢ ᱨᱮᱠᱚ ᱥᱩᱦᱤ ᱠᱮᱫᱟ ᱯᱷᱩᱴᱵᱚᱞᱟᱨ ᱠᱚ ᱾ ᱟᱨ ᱥᱟᱹᱜᱩᱱ ᱢᱟᱦᱟ ᱫᱷᱚᱱᱚᱫᱷᱟᱱᱱᱚ ᱚᱰᱤᱴᱳᱨᱤᱭᱟᱢ ᱨᱮ ᱥᱤᱨᱟᱹ ᱢᱚᱱᱛᱨᱤ ᱯᱷᱩᱴᱵᱚᱞᱟᱨ ᱠᱚᱣᱟᱜ ᱛᱤ ᱨᱮ ᱪᱟᱞᱟᱜ ᱠᱚᱣᱟᱭ ᱡᱚᱭᱮᱱᱤᱝ ᱞᱮᱴᱟᱨ ᱾
ᱥᱟᱹᱜᱩᱱ ᱢᱟᱦᱟ ᱛᱤᱠᱤᱱ ᱵᱮᱲᱟ ᱫᱷᱚᱱᱚᱫᱷᱚᱱᱱᱚ ᱚᱰᱤᱴᱳᱨᱤᱭᱟᱢ ᱨᱮ ᱠᱳᱪ ᱥᱚᱧᱡᱚᱭ ᱥᱮᱱ ᱥᱟᱶᱛᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱥᱟᱱᱟᱢ ᱯᱷᱩᱴᱵᱚᱞᱟᱨ ᱠᱚ ᱾ ᱠᱮᱯᱴᱮᱱ ᱪᱟᱠᱩ ᱢᱟᱱᱰᱤ, ᱥᱳᱣᱨᱚᱵᱷ ᱥᱟᱢᱚᱱᱛᱚ, ᱟᱫᱤᱛᱛᱚ ᱯᱟᱛᱨᱚ ᱾ ᱯᱩᱞᱤᱥ ᱨᱮ ᱪᱟᱹᱠᱨᱤ ᱠᱚ ᱧᱟᱢ ᱠᱮᱫᱟ ᱯᱷᱩᱴᱵᱚᱞᱟᱨ ᱠᱚ ᱾ ᱥᱮᱪᱮᱫ ᱡᱳᱜᱽᱜᱚᱛᱟ ᱞᱮᱠᱟᱛᱮ ᱥᱟᱵᱽᱼᱤᱱᱥᱯᱮᱠᱴᱚᱨ ᱟᱨ ᱠᱚᱱᱥᱴᱮᱵᱚᱞ ᱦᱩᱫᱟᱹ ᱨᱮ ᱪᱟᱹᱠᱨᱤ ᱮᱢ ᱦᱩᱭᱮᱱᱟ ᱾ ᱥᱟᱹᱜᱩᱱ ᱢᱟᱦᱟ ᱥᱚᱱᱛᱳᱥ ᱡᱤᱛᱠᱟᱹᱨ ᱯᱷᱩᱴᱵᱚᱞᱟᱨ ᱠᱚᱣᱟᱜ ᱠᱩᱠᱢᱩ ᱯᱩᱨᱟᱹᱣᱮᱱ ᱛᱟᱠᱚᱣᱟ ᱾
