(PAPUL MURMU) Sunita Williams Nasa : ᱠᱟᱛᱷᱟ ᱛᱟᱦᱮᱸ ᱠᱟᱱᱟ ᱫᱤᱥᱚᱢ ᱨᱮ ᱨᱩᱣᱟᱹᱨ ᱠᱟᱛᱮᱫ ᱚᱲᱟᱜ ᱨᱮᱜᱮ ᱠᱟᱹᱞᱤᱯᱩᱡᱟᱹ ᱢᱟᱱᱟᱣ ᱨᱮᱭᱟᱜ, ᱢᱮᱱᱠᱷᱟᱱ ᱯᱨᱚᱡᱩᱠᱛᱤ ᱠᱷᱟᱹᱛᱤᱨ ᱢᱚᱦᱟᱠᱟᱥ ᱨᱮᱜᱮ ᱛᱟᱦᱮᱱ ᱦᱩᱭᱩᱜ ᱠᱟᱱ ᱛᱟᱭᱟ ᱥᱩᱱᱤᱛᱟ ᱩᱭᱞᱤᱭᱟᱢ ᱾ ᱵᱟᱝ ᱨᱩᱣᱟᱹᱲ ᱠᱷᱟᱹᱛᱤᱨ ᱢᱚᱦᱟᱠᱟᱥ ᱠᱷᱚᱱ ᱜᱮ ᱫᱤᱯᱟᱵᱚᱞᱤ ᱨᱮᱭᱟᱜ ᱥᱟᱹᱜᱩᱱ ᱵᱮᱣᱨᱟᱭ ᱪᱟᱞᱟᱫ ᱠᱚᱣᱟ ᱜᱚᱴᱟ ᱵᱤᱥᱥᱚᱵᱟᱥᱤ ᱾ ᱵᱤᱥᱥᱚᱵᱟᱥᱤ ᱥᱟᱹᱜᱩᱱ ᱵᱮᱣᱨᱟ ᱪᱟᱞ ᱚᱠᱛᱚ ᱨᱮ ᱥᱩᱱᱤᱛᱟᱣᱟᱜ ᱞᱟᱹᱭ ᱫᱤᱯᱟᱵᱚᱞᱤ ᱞᱮᱠᱟᱱ ᱚᱠᱛᱚ ᱨᱮ ᱟᱡᱟᱜ ᱚᱲᱟᱜ ᱨᱮᱭᱟᱜ ᱠᱟᱛᱷᱟ ᱟᱹᱰᱤ ᱩᱭᱦᱟᱹᱨᱮᱫᱟ, ᱩᱭᱦᱟᱹᱨ ᱦᱤᱡᱩᱜ ᱠᱟᱱ ᱛᱟᱭᱟ ᱟᱡ ᱨᱮᱱ ᱜᱚᱜᱚᱼᱵᱟᱵᱟᱣᱟᱜ ᱠᱟᱛᱷᱟ ᱾
ᱯᱟᱨᱚᱢᱮᱱ ᱥᱮᱨᱢᱟ ᱠᱚ ᱞᱮᱠᱟ ᱜᱮ ᱱᱮᱥ ᱦᱚᱸ ᱟᱢᱮᱹᱨᱤᱠᱟ ᱨᱮᱱ ᱨᱟᱥᱴᱨᱚᱯᱚᱛᱤ ᱚᱲᱟᱜ ᱨᱮ ᱢᱟᱱᱟᱣ ᱦᱩᱭᱩᱜ ᱠᱟᱱᱟ ᱫᱤᱯᱟᱵᱚᱞᱤ ᱞᱮᱠᱟᱱ ᱢᱟᱨᱟᱝ ᱯᱚᱨᱚᱵᱽ, ᱟᱨ ᱚᱱᱟ ᱨᱮ ᱢᱚᱦᱟᱠᱟᱥ ᱠᱷᱚᱱ ᱜᱮ ᱵᱷᱤᱰᱤᱭᱳ ᱠᱚᱞ ᱛᱟᱞᱟ ᱛᱮᱭ ᱥᱮᱞᱮᱫ ᱞᱮᱱᱟ ᱥᱩᱱᱤᱛᱟ ᱩᱭᱞᱤᱭᱟᱢ ᱾ ᱵᱷᱤᱰᱤᱭᱳ ᱠᱚᱞ ᱛᱟᱞᱟ ᱛᱮᱜᱮ ᱤᱱᱴᱟᱨᱱᱮᱥᱱᱟᱞ ᱥᱯᱮᱹᱥ ᱥᱮᱱᱴᱟᱨ ᱠᱷᱚᱱ ᱫᱤᱥᱚᱢ ᱨᱮᱱ ᱥᱟᱱᱟᱢ ᱦᱚᱲ ᱥᱟᱹᱜᱩᱱ ᱵᱮᱣᱨᱟᱭ ᱪᱟᱞ ᱟᱠᱟᱫ ᱠᱚᱣᱟ ᱾ ᱢᱚᱦᱟᱠᱟᱥ ᱨᱮ ᱪᱟᱞᱟᱣ ᱠᱟᱛᱮᱫ ᱯᱩᱭᱞᱩ ᱫᱷᱟᱣ ᱫᱤᱯᱟᱵᱚᱞᱤ ᱯᱟᱞᱚᱱ ᱦᱩᱭᱩᱜ ᱠᱟᱱ ᱛᱟᱭᱟ ᱥᱩᱱᱤᱛᱟ ᱭᱩᱞᱤᱭᱟᱢ ᱾ ᱫᱤᱥᱚᱢ ᱨᱮᱱ ᱦᱚᱲ ᱫᱤᱯᱟᱵᱚᱞᱤ ᱨᱮᱭᱟᱜ ᱥᱟᱹᱜᱩᱱ ᱵᱮᱣᱨᱟ ᱪᱟᱞ ᱚᱠᱛᱚ ᱯᱩᱭᱞᱩ ᱨᱮᱜᱮ ᱥᱩᱱᱤᱛᱟᱣᱟᱜ ᱞᱟᱹᱭ ᱫᱤᱥᱟᱹ ᱦᱤᱡᱩᱜ ᱠᱟᱱ ᱛᱟᱭᱟ ᱟᱡ ᱵᱟᱵᱟᱣᱟᱜ ᱠᱟᱛᱷᱟ ᱾ ᱵᱷᱟᱨᱚᱛ ᱠᱷᱚᱱ ᱟᱢᱮᱹᱨᱤᱠᱟ ᱨᱮᱭ ᱪᱟᱞᱟᱣ ᱞᱮᱱᱟ ᱥᱩᱱᱤᱛᱟ ᱟᱡ ᱵᱟᱵᱟ ᱫᱤᱯᱚᱠ ᱯᱟᱱᱰᱤᱭᱟ, ᱟᱨ ᱦᱩᱰᱤᱧ ᱠᱷᱚᱱ ᱫᱤᱯᱟᱵᱚᱞᱤ ᱢᱟᱱᱟᱣᱮ ᱪᱮᱫ ᱟᱠᱟᱫᱟ ᱥᱩᱱᱤᱛᱟ ᱩᱭᱞᱤᱭᱟᱢ ᱾
ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱗ ᱡᱩᱱ ᱤᱱᱴᱟᱨᱱᱮᱥᱱᱟᱞ ᱥᱯᱮᱹᱥ ᱥᱮᱱᱴᱟᱨ ᱞᱟᱹᱜᱤᱫ ᱛᱮ ᱢᱚᱦᱟᱠᱟᱥᱮ ᱪᱟᱞᱟᱣ ᱞᱮᱱᱟ ᱥᱩᱱᱤᱛᱟ ᱩᱭᱞᱤᱭᱟᱢ ᱟᱨ ᱵᱩᱪ ᱩᱭᱤᱞᱢᱚᱨ ᱾ ᱢᱚᱦᱟᱠᱟᱥ ᱥᱮᱫ ᱪᱟᱞᱟᱣ ᱚᱠᱛᱚ ᱨᱮᱜᱮ ᱨᱚᱠᱮᱴ ᱨᱮ ᱟᱹᱰᱤ ᱜᱟᱱ ᱡᱟᱱᱛᱨᱤᱠ ᱵᱷᱩᱞ ᱥᱟᱵ ᱧᱟᱢ ᱞᱮᱱ ᱛᱟᱦᱮᱱᱟ, ᱢᱮᱱᱠᱷᱟᱱ ᱪᱟᱞᱟᱜ ᱚᱠᱛᱚ ᱨᱮ ᱵᱟᱝ ᱡᱟᱹᱯᱤᱫ ᱠᱟᱛᱮᱫ ᱱᱤᱡᱮᱨ ᱛᱮᱜᱮ ᱟᱹᱠᱤᱱᱟᱜ ᱨᱚᱠᱮᱴ ᱨᱮᱭᱟᱜ ᱡᱩᱡᱩᱛ ᱠᱤᱱ ᱮᱛᱚᱦᱚᱵ ᱞᱮᱫᱟ ᱥᱩᱱᱤᱛᱟ ᱛᱟᱠᱤᱱᱱ᱾ ᱛᱚᱵᱮ ᱛᱟᱭᱚᱢ ᱛᱮ ᱟᱨᱦᱚᱸ ᱟᱹᱰᱤ ᱜᱟᱱ ᱵᱟᱹᱲᱤᱡ ᱧᱟᱢ ᱠᱷᱟᱹᱛᱤᱨ ᱢᱚᱠᱟᱠᱟᱥ ᱨᱮᱜᱮ ᱟᱴᱠᱟᱣ ᱢᱮᱱᱟᱭᱟ ᱥᱩᱱᱤᱛᱟ ᱾
ᱡᱟᱱᱛᱨᱤᱠ ᱛᱨᱩᱴᱤ ᱠᱷᱟᱹᱛᱤᱨ ᱥᱩᱱᱤᱛᱟ ᱩᱭᱞᱤᱭᱟᱢ ᱢᱚᱦᱟᱠᱟᱥ ᱨᱮᱭ ᱟᱴᱠᱟᱣᱮᱱ ᱛᱟᱭᱚᱢ ᱥᱯᱮᱹᱥ ᱥᱮᱱᱴᱟᱨ ᱱᱟᱥᱟᱣᱟᱜ ᱞᱟᱹᱭ ᱵᱷᱟᱹᱵᱤᱛ ᱨᱮᱭᱟᱜ ᱫᱚ ᱪᱮᱫ ᱦᱚᱸ ᱵᱟᱹᱱᱩᱜᱼᱟ, ᱪᱮᱫᱟᱜ ᱥᱮ ᱚᱠᱥᱤᱡᱮᱱ, ᱡᱚᱢᱼᱧᱩ ᱠᱷᱚᱱ ᱮᱛᱚᱦᱚᱵ ᱠᱟᱛᱮᱫ ᱠᱤᱪᱨᱤᱡ ᱥᱟᱱᱟᱢ ᱞᱮᱠᱟᱱ ᱥᱟᱢᱟᱱ ᱠᱟᱨᱜᱳ ᱯᱷᱞᱟᱭᱤᱴ ᱛᱮ ᱥᱮᱴᱮᱨ ᱦᱩᱭᱩᱜ ᱠᱟᱱᱟ ᱢᱚᱦᱟᱠᱟᱥ ᱨᱮ ᱾
