ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱱ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹᱣᱟᱜ ᱑᱗᱐ ᱟᱱᱟᱜ ᱡᱟᱱᱟᱢ ᱢᱟᱦᱟ ᱠᱚ ᱢᱟᱱᱟᱣ ᱠᱮᱫᱟ ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹ ᱴᱨᱟᱥᱴ ᱾ ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹᱣᱟᱜ ᱵᱩᱠᱟᱹ ᱛᱚᱯᱟ ᱟᱹᱛᱩ ᱠᱟᱹᱲᱩᱣᱟᱹᱠᱟᱴᱟ ᱨᱮ ᱡᱟᱱᱟᱢ ᱢᱟᱦᱟ ᱢᱟᱱᱟᱣᱼᱵᱟᱛᱟᱣ ᱨᱮᱱᱟᱜ ᱠᱟᱹᱢᱤᱦᱚᱨᱟ ᱠᱚ ᱥᱟᱹᱛᱼᱥᱟᱯᱲᱟᱣ ᱞᱮᱫᱟ ᱾ ᱱᱚᱣᱟ ᱟᱠᱷᱲᱟ ᱨᱮ ᱢᱟᱨᱟᱝ ᱯᱮᱲᱟ ᱞᱮᱠᱟᱛᱮ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱵᱤᱫᱷᱟᱭᱚᱠ ᱟᱨᱵᱟᱝ ᱡᱚᱞ ᱥᱟᱫᱷᱚᱱ ᱢᱚᱱᱛᱨᱤ ᱨᱟᱢᱫᱟᱥ ᱥᱚᱨᱮᱱ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱨᱩᱻᱨᱩ ᱥᱟᱯᱟᱵ ᱛᱩᱢᱫᱟᱜᱼᱴᱟᱢᱟᱠ ᱨᱩ ᱛᱟᱞᱟᱛᱮ ᱢᱟᱨᱟᱝ ᱯᱮᱲᱟ ᱥᱟᱶᱛᱮ ᱱᱮᱣᱛᱟ ᱯᱮᱲᱟ ᱠᱚ ᱟᱛᱟᱝ ᱫᱟᱨᱟᱢ ᱠᱮᱫ ᱠᱚᱣᱟ ᱾ ᱚᱱᱟ ᱛᱟᱭᱚᱢ ᱮᱱᱮᱡ ᱥᱮᱨᱮᱧ ᱛᱟᱞᱟᱛᱮ ᱱᱚᱣᱟ ᱟᱠᱷᱲᱟ ᱠᱚ ᱥᱟᱹᱠᱷᱤ ᱥᱚᱵᱷᱟ ᱠᱮᱫᱟ ᱾
ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹ ᱞᱟᱭᱵᱨᱮᱨᱤ
ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹᱣᱟᱜ ᱢᱩᱴᱷᱟᱹᱱ ᱨᱮ ᱵᱟᱦᱟᱢᱟᱞᱟ ᱟᱨᱟᱣ ᱠᱟᱛᱮᱫ ᱢᱟᱹᱱᱮ ᱪᱟᱞ ᱢᱚᱱᱛᱨᱤ ᱨᱟᱢᱫᱟᱥ ᱥᱚᱨᱮᱱ ᱾ ᱢᱟᱨᱟᱝ ᱯᱮᱲᱟ ᱞᱮᱠᱟᱛᱮ ᱥᱮᱴᱮᱨᱮ ᱛᱟᱦᱮᱸᱞᱮᱱ ᱢᱚᱱᱛᱨᱤ ᱨᱟᱢᱫᱟᱥ ᱥᱚᱨᱮᱱᱮ ᱢᱮᱱ ᱠᱮᱫᱟ, ᱥᱟᱱᱟᱢ ᱟᱹᱛᱩ ᱨᱮ ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹᱣᱟᱜ ᱡᱟᱱᱟᱢ ᱢᱟᱦᱟ ᱢᱟᱱᱟᱣ ᱞᱟᱹᱠᱛᱤ ᱠᱟᱱᱟ ᱾ ᱥᱟᱱᱟᱢ ᱴᱚᱴᱷᱟ ᱨᱮ ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹ ᱧᱩᱛᱩᱢ ᱛᱮ ᱞᱟᱭᱵᱨᱮᱨᱤ ᱵᱮᱱᱟᱣ ᱦᱩᱭᱩᱜ ᱢᱟ ᱾ ᱡᱟᱦᱟᱸ ᱛᱤᱱᱟᱹᱜ ᱜᱚᱲᱚ ᱞᱟᱜᱟᱜᱼᱟ ᱥᱟᱱᱟᱢ ᱞᱮᱠᱟᱱ ᱜᱚᱲᱚᱼᱥᱚᱯᱚᱦᱚᱫᱼᱮ ᱮᱢᱚᱜᱼᱟ ᱾ ᱩᱱᱤᱭᱟᱜ ᱟᱨᱦᱚᱸ ᱞᱟᱭ ᱱᱤᱡᱮ ᱞᱟᱦᱟᱛᱮ ᱥᱤᱠᱷᱱᱟᱹᱛᱚᱜ ᱦᱩᱭᱩᱜᱼᱟ, ᱟᱯᱱᱟᱨ ᱟᱹᱛᱩ ᱨᱮ ᱞᱟᱦᱟ ᱡᱩᱢᱤᱫᱚᱜ ᱦᱩᱭᱩᱜᱼᱟ ᱾ ᱚᱱᱟ ᱛᱟᱭᱚᱢ ᱱᱤᱡᱮ ᱞᱟᱦᱟ ᱪᱤᱨᱜᱟᱹᱞᱚᱜ ᱦᱩᱭᱩᱜᱼᱟ ᱛᱚᱵᱮᱭᱟᱹᱱᱤᱡ ᱜᱮ ᱯᱚᱱᱚᱛ ᱨᱮᱱᱟᱜ ᱦᱚᱸ ᱵᱷᱟᱹᱞᱟᱹᱭ ᱦᱩᱭ ᱫᱟᱲᱮᱭᱟᱜᱼᱟ ᱾
ᱩᱯᱨᱩᱢ ᱟᱨ ᱥᱟᱶᱦᱮᱫ ᱪᱟᱨᱪᱟᱣ ᱨᱮ ᱢᱟᱹᱡᱷᱤ ᱨᱟᱢᱫᱟᱥ
ᱛᱮᱦᱮᱧ ᱞᱮᱠᱟᱱ ᱫᱤᱱ ᱨᱮ ᱢᱮᱱᱫᱚ ᱑᱘᱕᱔ ᱥᱟᱹᱦᱤᱛ ᱨᱮᱱᱟᱜ ᱒ ᱨᱟ ᱚᱠᱴᱳᱵᱚᱨ ᱨᱮ ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹᱭ ᱡᱟᱱᱟᱢ ᱞᱮᱱᱟ ᱾ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱦᱮᱫ ᱨᱮ ᱮᱛᱚᱦᱚᱵ ᱩᱛᱟᱹᱨ ᱨᱮᱱ ᱥᱟᱱᱛᱟᱲᱤ ᱚᱱᱚᱞᱤᱭᱟᱹᱣᱟᱜ ᱧᱩᱛᱩᱢ ᱞᱟᱹᱭ ᱞᱮᱠᱷᱟᱱ ᱜᱮ ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟᱹᱥᱠᱟᱹᱣᱟᱜ ᱧᱩᱛᱩᱢ ᱧᱩᱢᱩᱜᱼᱟ ᱾ ᱵᱟᱰᱟᱭ ᱧᱟᱢ ᱟᱠᱟᱱᱟ ᱨᱟᱹᱥᱠᱟᱹ ᱜᱚᱝᱠᱮᱭᱟᱜ ᱚᱠᱛᱚ ᱨᱮ ᱥᱟᱱᱛᱟᱲ ᱫᱚ ᱠᱷᱮᱨᱣᱟᱞ ᱠᱚ ᱢᱮᱛᱟᱠᱚ ᱛᱟᱦᱮᱸᱫ ᱾ ᱱᱩᱠᱩᱣᱟᱜ ᱯᱟᱹᱨᱥᱤ, ᱫᱷᱚᱨᱚᱢ, ᱥᱟᱶᱛᱟ, ᱥᱮᱨᱣᱟ, ᱟᱹᱨᱤᱪᱟᱹᱞᱤ ᱥᱟᱱᱟᱢᱟᱜ ᱜᱮ ᱡᱩᱫᱟᱹ ᱜᱮᱭᱟ ᱾ ᱯᱩᱭᱞᱩ ᱨᱮ ᱨᱟᱹᱥᱠᱟᱹ ᱜᱚᱝᱠᱮ ᱟᱹᱭᱠᱟᱹᱣ ᱞᱮᱫᱟᱭ ᱦᱤᱨᱤᱡᱼᱯᱟᱹᱥᱤᱨ ᱢᱮᱱᱟᱜ ᱥᱟᱱᱛᱟᱲᱤ ᱦᱚᱲ ᱥᱮᱨᱮᱧ, ᱥᱮᱨᱣᱟᱼᱟᱹᱨᱤᱪᱟᱹᱞᱤ, ᱫᱷᱚᱨᱚᱢᱼᱠᱚᱨᱚᱢ ᱮᱢᱟᱱᱠᱚ ᱢᱤᱫᱴᱷᱮᱱ ᱟᱹᱜᱩᱭ ᱨᱮᱱᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱚᱱᱟᱛᱮ ᱑᱙᱐᱐ ᱥᱟᱹᱦᱤᱛ ᱨᱮ (ᱢᱚᱛᱟᱱᱛᱚᱨ ᱑᱘᱙᱔ᱼ᱙᱕) ᱠᱷᱮᱨᱣᱟᱞ ᱵᱚᱝᱥᱚ ᱫᱷᱚᱨᱚᱢ ᱯᱩᱛᱷᱤᱭ ᱥᱟᱯᱲᱟᱣ ᱞᱮᱫᱟ ᱾ ᱢᱮᱱᱫᱚ ᱩᱱ ᱚᱠᱛᱚ ᱥᱟᱱᱛᱟᱲ ᱦᱚᱯᱚᱱᱟᱜ ᱫᱷᱚᱨᱚᱢᱼᱠᱚᱨᱚᱢ, ᱨᱟᱭᱼᱨᱤᱛ, ᱟᱹᱨᱤᱪᱟᱹᱞᱤ ᱮᱢᱟᱱ ᱥᱟᱵᱼᱥᱟᱢᱴᱟᱣ ᱨᱮᱱᱟᱜᱼᱮ ᱠᱩᱨᱩᱢᱩᱴᱩ ᱞᱮᱫᱟ ᱾ ᱟᱨ ᱚᱱᱟ ᱯᱩᱛᱷᱤ ᱜᱮ ᱛᱮᱦᱮᱧ ᱥᱟᱱᱛᱟᱲ ᱦᱚᱯᱚᱱ ᱴᱷᱮᱱ ᱢᱤᱫ ᱫᱚᱞᱤᱞ ᱠᱟᱱᱟ ᱾ ᱚᱱᱟ ᱵᱮᱜᱚᱨ ᱦᱚᱸ ᱨᱟᱹᱥᱠᱟᱹ ᱜᱚᱝᱠᱮᱭᱟᱜ “ᱠᱷᱮᱨᱣᱟᱞ ᱵᱚᱝᱥᱟ ᱫᱷᱚᱨᱚᱢᱱᱟᱴ” ᱧᱩᱛᱢᱟᱱ ᱜᱟᱭᱟᱱ ᱯᱩᱛᱷᱤ ᱦᱚᱸᱭ ᱚᱞ ᱦᱚᱴᱚᱣᱟᱠᱟᱫᱟ ᱾ ᱢᱮᱱᱠᱷᱟᱱ ᱑᱒ ᱢᱮᱹ ᱑᱙᱕᱑ ᱥᱟᱹᱦᱤᱛ ᱨᱮ ᱱᱚᱣᱟ ᱫᱷᱩᱲᱤᱼᱫᱷᱟᱹᱨᱛᱤ ᱨᱮᱱᱟᱜ ᱢᱟᱭᱟ ᱱᱟᱹᱲᱤ ᱛᱚᱯᱟᱜ ᱠᱟᱛᱮᱫ ᱦᱟᱱᱟ ᱯᱩᱨᱤᱛᱮᱭ ᱥᱮᱱ ᱞᱮᱱᱟ ᱾
