ᱴᱮᱹᱥᱴ ᱛᱟᱭᱚᱢ ᱴᱤᱼᱴᱩᱭᱮᱱᱴᱤ ᱾ ᱤᱱᱰᱤᱭᱟᱱ ᱥᱠᱳᱣᱟᱰ ᱨᱮ ᱵᱚᱫᱚᱞ ᱦᱩᱭ ᱟᱠᱟᱱᱟ ᱾ ᱯᱟᱨᱝᱯᱷᱚᱨᱢᱮᱱᱥ ᱫᱚ ᱵᱟᱝ ᱾ ᱵᱟᱝᱞᱟᱫᱮᱹᱥ ᱵᱤᱨᱩᱫᱷ ᱴᱮᱹᱥᱴ ᱨᱮ 2ᱼ0 ᱛᱮᱠᱚ ᱡᱤᱛᱠᱟᱹᱨ ᱟᱠᱟᱱᱟ ᱤᱱᱰᱤᱭᱟ ᱾ ᱚᱱᱟ ᱢᱩᱫᱽ ᱨᱮ ᱠᱟᱱᱯᱩᱨ ᱨᱮᱱᱟᱜ ᱴᱮᱹᱥᱴ ᱨᱮᱴᱤᱼᱴᱩᱭᱮᱱᱴᱤ ᱞᱮᱠᱟᱠᱚ ᱵᱮᱴᱮᱫ ᱛᱟᱦᱮᱸᱫ ᱤᱱᱰᱤᱭᱟ ᱾ ᱵᱟᱰᱟᱭ ᱧᱟᱢᱚᱜ ᱠᱟᱱ ᱛᱟᱦᱮᱸᱫ ᱜᱮ ᱡᱮ, ᱴᱮᱹᱥᱴ ᱨᱮᱜᱮ ᱡᱩᱫᱤ ᱚᱱᱠᱟ ᱵᱮᱴᱤᱝ ᱛᱟᱦᱚᱞᱮ ᱴᱤᱼᱴᱩᱭᱮᱱᱴᱤ ᱨᱮ ᱚᱠᱟᱞᱮᱠᱟ ᱦᱩᱭᱩᱜᱼᱟ ᱾ ᱡᱩᱫᱤᱭᱳ ᱩᱱᱟᱹᱜ ᱢᱟᱠᱟᱴᱟᱨᱤ ᱵᱮᱴᱤᱝ ᱨᱮᱱᱟᱜ ᱞᱟᱹᱠᱛᱤ ᱵᱟᱝ ᱯᱟᱲᱟᱣ ᱞᱮᱱᱟ ᱾ ᱵᱳᱞᱟᱨ ᱠᱚᱣᱟᱜ ᱱᱟᱯᱟᱭ ᱯᱟᱨᱯᱷᱚᱨᱢᱮᱱᱥ ᱛᱮ ᱦᱩᱰᱤᱧ ᱢᱟᱪᱷᱟ ᱴᱟᱨᱜᱮᱹᱴ ᱠᱚ ᱧᱟᱢ ᱞᱮᱫᱟ ᱾ 49 ᱵᱚᱞ ᱛᱟᱦᱮᱱ ᱛᱮᱜᱮ ᱴᱟᱨᱜᱮᱹᱴ ᱨᱮᱠᱚ ᱥᱮᱴᱮᱨᱮᱱᱟ ᱴᱤᱢ ᱤᱱᱰᱤᱭᱟ ᱾ ᱵᱮᱴ ᱥᱟᱵ ᱠᱟᱛᱮᱫ ᱵᱷᱚᱨᱥᱟᱭ ᱮᱢ ᱠᱮᱫᱟ ᱦᱟᱨᱫᱤᱠ ᱯᱟᱱᱰᱤᱭᱟ ᱾
ᱴᱚᱥ ᱡᱤᱛᱟᱹᱣ ᱠᱟᱛᱮ ᱨᱟᱱ ᱪᱮᱡᱽ ᱨᱮᱱᱟᱜ ᱠᱟᱰᱮᱨᱮ ᱦᱟᱛᱟᱣ ᱠᱮᱯᱴᱮᱱ ᱥᱠᱟᱭ ᱾ ᱞᱮᱸᱜᱽᱲᱟ ᱯᱮᱥᱟᱨ ᱚᱨᱥᱚᱫᱤᱯ ᱥᱤᱝᱼᱟᱜ ᱫᱷᱟᱠᱠᱟ ᱛᱮ ᱯᱩᱭᱞᱩ ᱨᱮᱜᱮ ᱵᱟᱨᱭᱟ ᱳᱯᱮᱱᱟᱨᱟᱜ ᱭᱠᱮᱹᱴ ᱠᱚ ᱟᱫ ᱠᱮᱫᱟ ᱵᱟᱝᱞᱟᱫᱮᱹᱥ ᱾ ᱠᱮᱯᱴᱮᱱ ᱱᱟᱡᱽᱢᱩᱞ ᱦᱟᱥᱟᱱ ᱥᱟᱱᱛᱚ ᱵᱷᱟᱜᱮᱭ ᱵᱮᱴᱤᱝᱼᱮᱫ ᱛᱟᱦᱮᱸᱫ ᱾ ᱢᱮᱱᱠᱷᱟᱱ ᱩᱱᱟᱹᱜ ᱜᱮ ᱵᱟᱹᱲᱤᱡ ᱥᱚᱴ ᱥᱤᱞᱮᱠᱥᱮᱱ ᱛᱮᱭ ᱟᱣᱩᱴ ᱮᱱᱟ ᱾ ᱣᱟᱥᱤᱝᱴᱚᱱ ᱥᱩᱱᱫᱚᱨᱟᱜ ᱵᱚᱞ ᱨᱮ ᱠᱮᱪ ᱯᱨᱮᱠᱴᱤᱥ ᱮᱢ ᱠᱟᱛᱮᱭ ᱪᱟᱞᱟᱣᱮᱱᱟ ᱾ ᱵᱟᱝᱞᱟᱫᱮᱹᱥ ᱤᱱᱤᱝᱥ ᱨᱮ ᱡᱚᱛᱚᱠᱷᱚᱱ ᱡᱟᱹᱥᱛᱤ ᱨᱟᱱᱮ ᱠᱚᱨᱟᱣ ᱞᱮᱫᱟ ᱢᱮᱦᱮᱫᱤ ᱦᱟᱥᱟᱱ ᱢᱤᱨᱟᱡᱽ ᱾ 32 ᱵᱚᱞ ᱨᱮ 35 ᱨᱟᱱᱮ ᱠᱚᱨᱟᱣ ᱞᱮᱫᱟ ᱢᱤᱨᱟᱡᱽ ᱾ 19.5 ᱳᱵᱷᱟᱨ ᱨᱮ 127 ᱨᱟᱱ ᱨᱮᱜᱮ ᱚᱞᱼᱟᱣᱩᱴ ᱮᱱᱟᱠᱚ ᱵᱟᱝᱞᱟᱰᱮᱹᱥ ᱾
ᱤᱱᱰᱤᱭᱟᱱ ᱤᱱᱤᱝᱥ ᱨᱮᱦᱚᱸ ᱟᱸᱥ ᱞᱮᱠᱟᱛᱮ ᱳᱯᱮᱹᱱᱤᱝ ᱠᱤᱱ ᱟᱲᱜᱳ ᱞᱮᱱᱟ ᱚᱵᱷᱤᱥᱮᱹᱠ ᱥᱚᱨᱢᱟ ᱟᱨ ᱥᱚᱧᱡᱩ ᱥᱮᱢᱥᱚᱱ ᱾ ᱢᱮᱱᱠᱷᱟᱱ ᱟᱹᱠᱤᱱ ᱛᱟᱞᱟᱨᱮ ᱛᱟᱞᱼᱢᱮᱹᱞ ᱨᱮᱱᱟᱜ ᱟᱱᱟᱴ ᱠᱷᱟᱹᱛᱨ ᱨᱟᱱ ᱟᱣᱩᱴᱮᱱᱟᱭ ᱚᱵᱷᱤᱥᱮᱹᱠ ᱥᱚᱨᱢᱟ ᱾ 7 ᱵᱚᱞ ᱨᱮ 16 ᱨᱟᱱᱮ ᱠᱚᱨᱟᱣ ᱞᱮᱫᱟ ᱾ ᱥᱚᱧᱡᱩ ᱥᱮᱢᱥᱚᱱ 19 ᱵᱚᱞ ᱨᱮ 29 ᱟᱨ ᱠᱮᱯᱴᱮᱱ ᱥᱠᱭ 14 ᱵᱚᱞ ᱨᱮ 29 ᱨᱟᱱ ᱠᱟᱛᱮᱭ ᱟᱣᱩᱴ ᱞᱮᱱᱟ ᱾ ᱯᱩᱱ ᱱᱟᱢᱵᱟᱨ ᱨᱮ ᱠᱩᱞ ᱦᱩᱭ ᱞᱮᱱᱟ ᱱᱤᱛᱤᱥ ᱨᱮᱹᱰᱰᱤ ᱟᱨ ᱢᱚᱲᱮ ᱱᱟᱢᱵᱟᱨ ᱨᱮ ᱦᱟᱨᱫᱤᱠ ᱯᱟᱱᱰᱤᱭᱟ ᱾ ᱯᱮ ᱭᱠᱮᱹᱴ ᱧᱩᱨ ᱠᱷᱟᱹᱛᱤᱨ ᱵᱟᱝᱠᱚ ᱟᱹᱴᱩᱯᱟᱹᱴᱩ ᱟᱠᱟᱱᱟ ᱴᱤᱢ ᱤᱱᱰᱤᱟ ᱾ ᱞᱟᱹᱭ ᱜᱟᱱᱚᱜᱼᱟ ᱱᱤᱛᱤᱥ ᱫᱚᱭ ᱪᱟᱪᱞᱟᱣ ᱤᱫᱤ ᱠᱮᱫᱟ ᱟᱨ ᱦᱟᱨᱫᱤᱠ ᱯᱟᱱᱰᱤᱭᱟ ᱫᱚᱭ ᱦᱚᱴᱟᱜ ᱯᱟᱹᱥᱤᱨ ᱤᱫᱤ ᱠᱮᱫᱟ ᱾ ᱢᱟᱛᱨᱚ 16 ᱵᱚᱞ ᱨᱮ 39 ᱨᱟᱱ ᱨᱮ ᱛᱟᱦᱮᱸᱭᱮᱱᱟᱭ ᱱᱚᱴ ᱟᱣᱩᱴ ᱟᱨ ᱱᱤᱛᱤᱥᱮ ᱛᱟᱦᱮᱸᱭᱮᱱᱟ 16 ᱨᱟᱱ ᱨᱮ ᱱᱚᱴ ᱟᱣᱩᱴ ᱾ ᱢᱮᱱᱫᱚ 49 ᱵᱚᱞ ᱥᱟᱨᱮᱡ ᱛᱟᱦᱮᱱ ᱨᱮᱜᱮ 7 ᱭᱠᱮᱹᱴ ᱛᱮᱠᱚ ᱡᱤᱛᱠᱟᱹᱨᱮᱱᱟ ᱴᱤᱢ ᱤᱱᱰᱤᱭᱟ ᱾
