(PAPUL MURMU) INDIAN CRICKET TEST MATCH : ᱱᱤᱭᱩᱡᱤᱞᱮᱱᱰ ᱴᱷᱮᱱ ᱴᱮᱹᱥᱴ ᱥᱤᱨᱤᱡᱽ ᱠᱚ ᱦᱟᱨᱟᱣᱮᱱᱟ ᱵᱷᱟᱨᱚᱛ, ᱚᱱᱟᱛᱮ ᱵᱤᱥᱥᱚ ᱴᱮᱹᱥᱴ ᱪᱟᱢᱯᱤᱭᱚᱱᱥᱤᱯ ᱯᱷᱟᱭᱱᱟᱞ ᱨᱮ ᱠᱷᱮᱹᱞ ᱞᱟᱹᱜᱤᱫ ᱟᱹᱰᱤ ᱢᱩᱥᱠᱤᱞ ᱨᱮᱠᱚ ᱯᱟᱲᱟᱣᱮᱱᱟ ᱨᱳᱦᱤᱛ ᱥᱚᱨᱢᱟᱣᱟᱜ ᱵᱷᱟᱨᱚᱛᱤᱭᱚ ᱴᱤᱢ ᱾ ᱛᱚᱵᱮ ᱱᱤᱛ ᱦᱚᱸ ᱯᱷᱟᱭᱱᱟᱞ ᱨᱮ ᱠᱷᱮᱹᱞ ᱞᱟᱹᱜᱤᱫ ᱥᱩᱡᱳᱜᱽ ᱢᱮᱱᱟᱜ ᱟᱠᱟᱫᱟ ᱵᱷᱟᱨᱚᱛᱤᱭᱚ ᱴᱤᱢ ᱴᱷᱮᱱ ᱾
ᱚᱥᱴᱨᱮᱹᱞᱤᱭᱟ ᱥᱟᱶ ᱴᱮᱹᱥᱴ ᱠᱷᱮᱹᱞᱳᱱᱰ ᱨᱮ ᱢᱤᱫ ᱢᱮᱪ ᱦᱚᱸ ᱦᱟᱨᱟᱣ ᱵᱟᱝ ᱜᱟᱱᱚᱜᱼᱟ ᱵᱷᱟᱨᱚᱛ ᱨᱮᱱ ᱴᱤᱢᱟᱜ ᱾
ᱴᱚᱢ ᱞᱟᱛᱷᱟᱢ ᱨᱮᱱ ᱫᱚᱞ ᱓ᱼ᱐ ᱛᱮᱠᱚ ᱦᱟᱨᱟᱚ ᱞᱮᱠᱚ ᱠᱷᱟᱱ ᱚᱥᱴᱨᱮᱹᱞᱤᱭᱟ ᱥᱚᱯᱷᱚᱨ ᱨᱮ ᱪᱟᱯ ᱵᱟᱝ ᱛᱟᱦᱮᱸ ᱠᱚᱜ ᱛᱟᱠᱚᱣᱟ ᱨᱳᱦᱤᱛ ᱥᱚᱨᱢᱟ ᱛᱟᱠᱚᱣᱟᱜ ᱾ ᱢᱚᱬᱮ ᱜᱚᱴᱟᱝ ᱴᱮᱹᱥᱴ ᱥᱤᱨᱤᱡᱽ ᱢᱩᱫᱽ ᱨᱮ ᱢᱤᱫ ᱢᱮᱪ ᱨᱮ ᱡᱤᱛᱠᱟᱹᱨ ᱟᱨ ᱵᱟᱨᱭᱟ ᱢᱮᱪ ᱠᱚ ᱰᱨᱚ ᱫᱟᱲᱮᱭᱟᱜ ᱠᱷᱟᱱᱜᱮ ᱯᱷᱟᱭᱱᱟᱞ ᱠᱷᱮᱹᱞ ᱞᱟᱹᱜᱤᱫ ᱡᱟᱭᱜᱟ ᱯᱟᱠᱠᱟ ᱠᱚᱜ ᱛᱟᱠᱚᱣᱟ ᱨᱳᱦᱤᱛ ᱥᱚᱨᱢᱟ ᱛᱟᱠᱚᱣᱟᱜ ᱾ ᱢᱮᱱᱠᱷᱟᱱ ᱐ᱼ᱓ ᱛᱮ ᱦᱟᱨᱟᱣᱮᱱ ᱠᱷᱟᱹᱛᱤᱨ ᱴᱮᱹᱥᱴ ᱵᱤᱥᱥᱚᱠᱟᱯ ᱨᱮᱭᱟᱜ ᱯᱷᱟᱭᱱᱟᱞ ᱨᱮ ᱠᱷᱮᱹᱞ ᱞᱟᱹᱜᱤᱫ ᱵᱮᱹᱥ ᱠᱚᱴᱷᱤᱱ ᱨᱮᱠᱚ ᱯᱟᱲᱟᱣᱮᱱᱟ ᱵᱷᱟᱨᱚᱛ ᱨᱮᱱ ᱠᱨᱤᱠᱮᱹᱴ ᱴᱤᱢ ᱾
ᱚᱥᱴᱨᱮᱹᱞᱤᱭᱟ ᱥᱟᱶ ᱠᱷᱮᱹᱞᱳᱱᱰ ᱨᱮ ᱔ᱼ᱐ ᱨᱮᱭᱟᱜ ᱯᱷᱤᱜᱟᱨ ᱛᱮ ᱥᱤᱨᱤᱡᱽ ᱠᱚ ᱡᱤᱛᱠᱟᱹᱨ ᱞᱮᱱᱠᱷᱟᱱ ᱴᱮᱹᱥᱴ ᱵᱤᱥᱥᱚᱠᱟᱯ ᱨᱮᱭᱟᱜ ᱯᱷᱟᱭᱱᱟᱞ ᱨᱮᱠᱚ ᱨᱟᱠᱟᱵᱽ ᱫᱟᱲᱮᱭᱟᱜᱼᱟ ᱨᱳᱦᱤᱛ ᱥᱚᱨᱢᱟᱣᱟᱜ ᱫᱚᱞ ᱾ ᱟᱨ ᱚᱱᱠᱟ ᱦᱩᱭ ᱞᱮᱱᱠᱷᱟᱱ ᱚᱠᱟ ᱫᱚᱞ ᱨᱮᱭᱟᱜ ᱨᱮᱡᱟᱞᱴ ᱥᱮᱫ ᱵᱟᱝ ᱠᱚᱭᱚᱜ ᱦᱩᱭᱩᱜ ᱛᱟᱠᱚᱣᱟ ᱨᱳᱦᱤᱛ ᱥᱚᱨᱢᱟ ᱛᱟᱠᱚ ᱾
ᱚᱥᱴᱨᱮᱹᱞᱤᱭᱟ ᱞᱮᱠᱟᱱ ᱫᱤᱥᱚᱢ ᱨᱮ ᱪᱟᱞᱟᱣ ᱠᱟᱛᱮᱫ ᱯᱮᱴ ᱠᱟᱢᱤᱱᱥ ᱞᱮᱠᱟᱱ ᱫᱚᱞ ᱔ᱼ᱐ ᱯᱷᱤᱜᱟᱨ ᱛᱮ ᱦᱟᱨᱟᱣ ᱫᱚ ᱟᱹᱰᱤ ᱢᱩᱥᱠᱤᱞ ᱫᱚ ᱵᱟᱝ ᱚᱥᱚᱢᱵᱷᱚᱵᱽ ᱠᱟᱱᱟ ᱾ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱴᱮᱹᱥᱴ ᱜᱟᱛᱮᱜ ᱨᱮᱭᱟᱜ ᱢᱤᱫᱴᱟᱝ ᱥᱤᱨᱤᱡᱽ ᱜᱮ ᱵᱟᱹᱠᱤ ᱢᱮᱱᱟᱜᱼᱟ ᱵᱷᱟᱨᱚᱛᱤᱭᱚ ᱫᱚᱞ ᱴᱷᱮᱱ ᱾ ᱵᱷᱟᱨᱚᱛ ᱨᱮ ᱦᱮᱡ ᱠᱟᱛᱮᱫ ᱨᱳᱦᱤᱛ ᱥᱚᱨᱢᱟ ᱛᱟᱠᱚ ᱦᱟᱨᱟᱣ ᱠᱟᱛᱮᱫ ᱴᱮᱹᱥᱴ ᱵᱤᱥᱥᱚᱠᱟᱯ ᱨᱮᱭᱟᱜ ᱯᱷᱟᱭᱱᱟᱞ ᱞᱟᱹᱜᱤᱫ ᱯᱩᱱ ᱟᱱᱟᱝ ᱴᱷᱟᱶ ᱨᱮᱠᱚ ᱨᱟᱠᱟᱵᱽ ᱮᱱᱟ ᱱᱤᱭᱩᱡᱤᱞᱮᱱᱰ ᱾
