(PAPUL MURMU) Priyanka’s first speech in Lok Sabha : ᱚᱣᱟᱭᱱᱟᱲ ᱨᱮᱭᱟᱜ ᱵᱟᱭ ᱤᱞᱮᱠᱥᱚᱱ ᱨᱮ ᱡᱤᱛᱠᱟᱹᱨ ᱛᱟᱭᱚᱢ ᱥᱤᱛᱠᱟᱞᱤᱱ ᱚᱫᱷᱤᱵᱮᱥᱚᱱ ᱨᱮᱜᱮ ᱥᱚᱯᱚᱛᱷᱮ ᱦᱟᱛᱟᱣ ᱞᱮᱫᱟ ᱯᱨᱤᱭᱟᱝᱠᱟ᱾ ᱟᱨ ᱛᱮᱦᱮᱧ ᱞᱳᱠᱥᱚᱵᱷᱟ ᱨᱮ ᱯᱩᱭᱞᱩ ᱵᱷᱟᱥᱚᱱᱮ ᱮᱢ ᱠᱮᱫᱟ ᱯᱨᱤᱭᱟᱝᱠᱟ᱾ ᱛᱚᱵᱮ ᱵᱷᱟᱥᱚᱱ ᱮᱛᱚᱦᱚᱵ ᱠᱮᱫᱟᱭ ᱵᱤᱨᱳᱫᱷᱤ ᱥᱤᱵᱤᱨ ᱠᱷᱚᱱ ᱥᱚᱝᱵᱤᱫᱷᱟᱱ ᱵᱤᱛᱚᱨᱠᱚ ᱤᱫᱤ ᱠᱟᱛᱫ᱾
ᱥᱚᱝᱵᱤᱫᱷᱟᱱ ᱦᱟᱛᱟᱣ ᱨᱮᱭᱟᱜ ᱗᱕ ᱥᱮᱨᱢᱟ ᱯᱩᱨᱟᱹᱣ ᱤᱫᱤ ᱠᱟᱛᱮᱫ ᱡᱟᱹᱨᱩᱢ ᱢᱟᱦᱟ ᱠᱷᱚᱱ ᱵᱟᱨ ᱢᱟᱦᱟ ᱨᱮᱭᱟᱜ ᱜᱟᱯᱟᱞᱢᱟᱨᱟᱣ ᱮᱛᱚᱦᱚᱵ ᱟᱠᱟᱱᱟ ᱥᱚᱝᱥᱚᱫᱽ ᱨᱮᱭᱟᱜ ᱵᱟᱱᱟᱨ ᱠᱚᱠᱠᱷᱚ ᱨᱮ᱾ ᱥᱚᱨᱠᱟᱨ ᱯᱟᱥᱴᱟ ᱠᱷᱚᱱ ᱜᱟᱯᱟᱞᱢᱟᱨᱟᱣᱮ ᱮᱛᱚᱦᱚᱵ ᱞᱮᱫᱟ ᱯᱨᱚᱛᱤᱨᱚᱠᱷᱟ ᱢᱚᱱᱛᱨᱤ ᱨᱟᱡᱽᱱᱟᱛᱷ ᱥᱤᱝ᱾ ᱟᱨ ᱩᱱᱤ ᱛᱟᱭᱚᱢ ᱜᱮ ᱵᱤᱨᱳᱫᱷᱤ ᱯᱟᱥᱴᱟ ᱠᱷᱚᱱ ᱨᱚᱨᱚᱲᱮ ᱮᱛᱚᱦᱚᱵ ᱠᱮᱫᱟ ᱯᱨᱤᱭᱟᱝᱠᱟ ᱜᱟᱱᱫᱷᱤ᱾ ᱨᱚᱲ ᱨᱮᱭᱟᱜ ᱯᱩᱭᱞᱩ ᱨᱮᱜᱮ ᱥᱯᱤᱠᱟᱨ ᱢᱟᱹᱱ ᱮᱢ ᱥᱟᱶᱛᱮ ᱒᱐᱐᱑ ᱥᱟᱞ ᱨᱮᱭᱟᱜ ᱑᱓ ᱰᱤᱥᱮᱢᱵᱚᱨ ᱥᱚᱝᱥᱚᱫᱽ ᱨᱮ ᱡᱚᱝᱜᱤ ᱦᱟᱢᱞᱟ ᱛᱮ ᱜᱚᱡ ᱟᱠᱟᱱ ᱱᱤᱨᱟᱯᱚᱛᱛᱟ ᱠᱚᱨᱢᱤ ᱠᱚᱦᱚᱸ ᱢᱟᱹᱱᱮ ᱪᱟᱞ ᱟᱠᱟᱫ ᱠᱚᱣᱟ᱾ ᱟᱨ ᱚᱱᱟ ᱛᱟᱭᱚᱢ ᱜᱮ ᱥᱚᱨᱠᱟᱨ ᱪᱮᱛᱟᱱ ᱠᱟᱛᱷᱟ ᱛᱮᱨᱟᱝᱼᱮ ᱮᱛᱚᱦᱚᱵ ᱠᱮᱫᱟ ᱯᱨᱤᱭᱟᱝᱠᱟ᱾ ᱵᱤ ᱟᱨ ᱟᱢᱵᱮᱫᱽᱠᱟᱨ, ᱟᱵᱩᱞ ᱠᱟᱞᱟᱢ ᱟᱡᱟᱫᱽ, ᱟᱨ ᱱᱮᱦᱮᱨᱩ ᱥᱚᱝᱵᱤᱫᱷᱟᱱ ᱨᱚᱪᱚᱱᱟ ᱛᱟᱞᱟ ᱛᱮ ᱵᱷᱟᱨᱚᱛᱵᱟᱹᱥᱤ ᱱᱮᱭ ᱨᱮᱭᱟᱜ ᱡᱟᱦᱟᱸ ᱨᱚᱠᱠᱷᱟᱠᱚᱵᱚᱡᱽ ᱢᱮᱱᱟᱜᱼᱟ ᱚᱱᱟ ᱢᱤᱫ ᱫᱚᱥᱚᱠ ᱠᱷᱚᱱ ᱱᱚᱨᱮᱱᱫᱨᱚ ᱢᱳᱫᱤᱣᱟᱜ ᱡᱟᱢᱟᱱᱟ ᱨᱮ ᱯᱚᱨᱤᱠᱚᱞᱯᱚᱱᱟ ᱠᱟᱛᱮᱫ ᱚᱱᱟ ᱥᱚᱝᱵᱤᱫᱷᱟᱱ ᱫᱩᱨᱵᱚᱞ ᱠᱚᱨᱟᱣ ᱦᱩᱭᱩᱜ ᱠᱟᱱᱟ ᱾ ᱩᱱᱱᱟᱣ ᱠᱷᱚᱱ ᱮᱛᱚᱦᱚᱵ ᱠᱟᱛᱮᱫ ᱦᱟᱛᱷᱨᱟᱥ ᱟᱨ ᱥᱚᱢᱵᱚᱞ ᱠᱷᱚᱱ ᱢᱚᱱᱤᱯᱩᱨ ᱯᱚᱨᱤᱥᱛᱷᱤᱛᱤ ᱨᱮᱭᱟᱜ ᱠᱟᱛᱷᱟ ᱥᱟᱵ ᱨᱟᱠᱟᱵ ᱠᱟᱛᱮᱫ ᱠᱮᱱᱫᱨᱚ ᱨᱮᱱ ᱥᱟᱥᱚᱠ ᱫᱚᱞ ᱪᱮᱛᱟᱱ ᱠᱟᱛᱷᱟᱭ ᱛᱮᱨᱟᱝ ᱠᱮᱫᱟ ᱯᱨᱤᱭᱟᱝᱠᱟ ᱜᱟᱱᱫᱷᱤ᱾
ᱯᱨᱤᱭᱟᱝᱠᱟᱣᱟᱜ ᱞᱟᱹᱭ ᱢᱳᱫᱤ ᱡᱟᱢᱟᱱᱟ ᱨᱮ ᱱᱤᱛ ᱫᱤᱥᱚᱢ ᱨᱮ ᱵᱚᱛᱚᱨ ᱨᱮᱭᱟᱜ ᱢᱤᱫ ᱯᱚᱨᱤᱥᱛᱷᱤᱛᱤ ᱛᱮᱭᱟᱨ ᱟᱠᱟᱱᱟ ᱡᱟᱦᱟᱸ ᱫᱚ ᱵᱨᱤᱴᱤᱥ ᱡᱟᱢᱟᱱᱟ ᱠᱷᱚᱱ ᱵᱟᱝ ᱠᱚᱢᱟ ᱢᱮᱱ ᱛᱮᱭ ᱞᱟᱹᱭ ᱠᱮᱫᱟ ᱯᱨᱤᱭᱟᱝᱠᱟ ᱜᱟᱱᱫᱷᱤ᱾
