(PAPUL MURMU) Omar Abdullah took oath Chief Minister Of J&K : ᱡᱚᱢᱢᱩ ᱠᱟᱥᱢᱤᱨ ᱨᱮᱱ ᱱᱟᱣᱟ ᱥᱤᱨᱟᱹ ᱢᱚᱱᱛᱨᱤ ᱞᱮᱠᱟᱛᱮ ᱠᱤᱨᱭᱟᱹᱭ ᱦᱟᱛᱟᱣ ᱠᱮᱫᱟ ᱳᱢᱚᱨ ᱟᱵᱽᱫᱩᱞᱞᱟ ᱾ ᱡᱚᱢᱢᱩ ᱠᱟᱥᱢᱤᱨ ᱠᱷᱚᱱ ᱫᱷᱟᱨᱟ ᱓᱗᱐ ᱚᱪᱚᱜ ᱠᱟᱛᱮᱫ ᱯᱩᱭᱞᱩᱫᱷᱟᱣ ᱵᱷᱳᱴ ᱦᱩᱭᱮᱱᱟ ᱯᱟᱦᱟᱲᱤ ᱨᱟᱡᱽᱡᱚ ᱨᱮ ᱾ ᱟᱨ ᱚᱱᱟ ᱵᱷᱳᱴ ᱨᱮ ᱡᱤᱛᱠᱟᱹᱨ ᱠᱟᱛᱮᱫ ᱥᱚᱨᱠᱟᱨ ᱠᱚ ᱜᱚᱴᱷᱚᱱ ᱠᱮᱫᱟ ᱵᱤ ᱡᱮ ᱯᱤ ᱵᱤᱨᱳᱫᱷᱤ ᱤᱱᱰᱤᱭᱟ ᱡᱳᱴ ᱾ ᱠᱚᱝᱜᱨᱮᱹᱥ ᱟᱨ ᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ ᱡᱳᱴ ᱠᱟᱛᱮᱫ ᱵᱟᱪᱷᱱᱟᱣ ᱨᱮᱠᱤᱱ ᱞᱟᱹᱲᱦᱟᱹᱭ ᱟᱠᱟᱱ ᱨᱮᱦᱚᱸ ᱥᱚᱨᱠᱟᱨ ᱨᱮ ᱵᱟᱝᱼᱮ ᱛᱟᱦᱮᱱ ᱠᱟᱱᱟ ᱠᱚᱝᱜᱨᱮᱹᱥ ᱛᱚᱵᱮ ᱵᱟᱨᱦᱮ ᱠᱷᱚᱱ ᱫᱚ ᱥᱚᱢᱚᱨᱛᱷᱚᱱ ᱫᱚ ᱛᱟᱦᱮᱱ ᱠᱟᱱ ᱜᱮᱭᱟ ᱢᱮᱱᱛᱮ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾
ᱥᱟᱹᱨᱫᱤ ᱢᱟᱦᱟ ᱦᱤᱞᱳᱜ ᱥᱮᱹᱨᱼᱤᱼᱠᱟᱥᱢᱤᱨ ᱤᱱᱴᱟᱨᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ ᱥᱮᱱᱴᱟᱨ ᱨᱮ ᱥᱤᱨᱟᱹ ᱢᱚᱱᱛᱨᱤᱣᱟᱜ ᱠᱤᱨᱭᱟᱹ ᱠᱟᱹᱢᱤᱦᱚᱨᱟ ᱫᱚ ᱥᱟᱯᱨᱟᱣ ᱞᱮᱱ ᱛᱟᱦᱮᱱᱟ ᱾ Lieutenant Governor ᱢᱚᱱᱳᱡᱽ ᱥᱤᱱᱦᱟ ᱴᱷᱮᱱ ᱯᱩᱭᱞᱩ ᱨᱮ ᱠᱤᱨᱭᱟᱹᱭ ᱦᱟᱛᱟᱣ ᱠᱮᱫᱟ ᱳᱢᱚᱨ ᱟᱵᱽᱫᱩᱞᱞᱟ ᱾ ᱟᱨ ᱚᱱᱟ ᱛᱟᱭᱚᱢ ᱠᱤᱨᱭᱟᱹ ᱠᱚ ᱦᱟᱛᱟᱣ ᱠᱮᱫᱟ ᱥᱟᱠᱤᱱᱟ ᱤᱴᱳ (Sakina Ito) , ᱡᱟᱵᱷᱤᱫᱽ ᱫᱟᱨ (Javid Dar), ᱥᱩᱨᱤᱱᱫᱨᱚ ᱪᱳᱣᱫᱷᱩᱨᱤ (Surindra Chowdhury ) ᱡᱟᱵᱷᱤᱫᱽ ᱨᱟᱱᱟ (Javid Rana) ᱮᱢᱟᱱ ᱵᱤᱫᱷᱟᱭᱚᱠ ᱠᱚ ᱾ ᱡᱟᱦᱟᱸᱭ ᱵᱤᱫᱷᱟᱭᱚᱠ ᱢᱚᱱᱛᱨᱤ ᱞᱮᱠᱟᱛᱮ ᱠᱤᱨᱭᱟᱹ ᱠᱚ ᱦᱟᱛᱟᱣ ᱠᱮᱫᱟ ᱩᱱᱠᱩ ᱥᱟᱱᱟᱢ ᱵᱤᱫᱷᱟᱭᱚᱠ ᱜᱮ ᱱᱮᱥᱱᱟᱞ ᱠᱚᱱᱯᱷᱟᱨᱮᱱᱥ ᱨᱮᱱ ᱠᱟᱱᱟ ᱠᱚ ᱾ ᱡᱚᱢᱢᱩ ᱠᱟᱥᱢᱤᱨ ᱨᱮ ᱳᱢᱚᱨ ᱟᱵᱽᱫᱩᱞᱞᱟᱣᱟᱜ ᱢᱚᱱᱛᱨᱤ ᱥᱚᱵᱷᱟ ᱨᱮ ᱢᱤᱫ ᱱᱤᱨᱫᱚᱞ ᱵᱤᱫᱷᱟᱭᱚᱠ ᱦᱚᱸ ᱢᱚᱱᱛᱨᱤ ᱞᱮᱠᱟᱛᱮ ᱠᱤᱨᱭᱟᱹᱭ ᱦᱟᱛᱟᱣ ᱠᱮᱫᱟ ᱾
ᱳᱢᱚᱨ ᱟᱵᱽᱫᱩᱞᱞᱟᱣᱟᱜ ᱠᱤᱨᱹᱭᱟ ᱦᱟᱛᱟᱣ ᱠᱟᱹᱢᱤᱦᱚᱨᱟ ᱨᱮ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱤᱱᱰᱤᱭᱟ ᱡᱳᱴ ᱨᱮᱱ ᱢᱤᱫ ᱡᱷᱟᱸᱠ ᱱᱮᱛᱟ ᱠᱚ ᱾ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱠᱚᱝᱜᱨᱮᱹᱥ ᱥᱚᱵᱷᱟᱯᱚᱛᱤ ᱢᱚᱞᱞᱤᱠᱟᱨᱡᱩᱱ ᱠᱷᱟᱲᱜᱮᱹ, ᱨᱟᱦᱩᱞ ᱜᱟᱱᱫᱷᱤ ᱟᱨ ᱯᱨᱤᱭᱟᱝᱠᱟ ᱜᱟᱱᱫᱷᱤ ᱾ ᱠᱚᱝᱜᱨᱮᱹᱥ ᱵᱟᱫᱽ ᱠᱟᱛᱮᱫ ᱦᱚᱸ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱥᱚᱢᱟᱡᱽᱵᱟᱫᱤ ᱯᱟᱨᱴᱤ ᱨᱮᱱ ᱢᱩᱠᱷᱤᱭᱟᱹ ᱚᱠᱷᱤᱞᱮᱹᱥ ᱡᱟᱫᱟᱵᱽ, ᱮᱱ ᱥᱤ ᱯᱤ ᱠᱷᱚᱱ ᱥᱩᱯᱨᱤᱭᱟ ᱥᱩᱞᱮᱹ, ᱥᱤ ᱯᱤ ᱟᱭ ᱱᱮᱛᱟ ᱰᱤ ᱨᱟᱡᱟ ᱟᱨ ᱟᱢ ᱟᱫᱽᱢᱤ ᱯᱟᱨᱴᱤ ᱠᱷᱚᱱ ᱥᱚᱧᱡᱚᱭ ᱥᱤᱝ ᱦᱚᱸ ᱥᱮᱴᱮᱨᱮᱮ ᱛᱟᱦᱮᱸ ᱠᱟᱱᱟ ᱾ ᱛᱚᱵᱮ ᱯᱚᱪᱤᱢ ᱵᱟᱝᱞᱟ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱮᱱᱟᱨᱡᱤ ᱥᱮᱴᱮᱨ ᱵᱟᱝᱼᱮ ᱛᱟᱦᱮᱸ ᱠᱟᱱ ᱨᱮᱦᱚᱸ ᱥᱳᱥᱟᱞ ᱢᱤᱰᱤᱭᱟ ᱛᱟᱞᱟ ᱛᱮ ᱡᱚᱢᱢᱩ ᱠᱟᱥᱢᱤᱨ ᱨᱮᱱ ᱱᱟᱣᱟ ᱥᱤᱨᱟᱹ ᱢᱚᱱᱛᱨᱤ ᱥᱩᱵᱮᱪᱪᱷᱟᱭ ᱵᱟᱰᱟᱭ ᱚᱪᱚ ᱟᱠᱟᱫᱮᱭᱟ ᱾ ᱡᱚᱢᱢᱩ ᱠᱟᱥᱢᱤᱨ ᱨᱮᱭᱟᱜ ᱱᱟᱣᱟ ᱢᱚᱱᱛᱨᱤ ᱥᱚᱵᱷᱟ ᱨᱮ ᱠᱚᱝᱜᱨᱮᱹᱥ ᱯᱟᱥᱴᱟ ᱠᱷᱚᱱ ᱥᱚᱨᱠᱟᱨ ᱨᱮ ᱛᱟᱦᱮᱱ ᱨᱮᱭᱟᱜ ᱠᱟᱛᱷᱟ ᱛᱟᱦᱮᱸ ᱠᱟᱱ ᱨᱮᱦᱚᱸ ᱢᱩᱪᱟᱹᱫ ᱚᱠᱛᱚ ᱦᱟᱹᱵᱤᱡ ᱥᱚᱨᱠᱟᱨ ᱨᱮ ᱵᱟᱝ ᱠᱚ ᱛᱟᱦᱮᱸ ᱞᱮᱱᱟ ᱠᱚᱝᱜᱨᱮᱹᱥ ᱾ ᱢᱮᱱᱠᱷᱟᱱ ᱵᱟᱨᱦᱮ ᱠᱷᱚᱱ ᱥᱚᱨᱠᱟᱨ ᱥᱚᱢᱚᱨᱛᱷᱚᱱ ᱠᱚ ᱮᱢᱟᱭᱟ ᱾
