(PAPUL MURMU) ED searches 14 places for ration corruption : ᱯᱚᱥᱪᱤᱢ ᱵᱟᱱᱝᱞᱟ ᱨᱮ ᱨᱮᱥᱚᱱ ᱫᱩᱨᱱᱤᱛᱤ ᱨᱮᱭᱟᱜ ᱠᱟᱛᱷᱟ ᱱᱟᱣᱟ ᱜᱮ ᱟᱸᱡᱚᱢ ᱧᱚᱜ ᱠᱟᱱᱟ ᱱᱚᱝᱠᱟ ᱫᱚ ᱵᱟᱝ ᱠᱟᱱᱟ ᱾ ᱱᱚᱣᱟ ᱞᱟᱦᱟ ᱟᱭᱢᱟ ᱫᱷᱟᱣ ᱟᱭᱢᱟ ᱴᱚᱴᱷᱟ ᱥᱮ ᱱᱮᱛᱟ ᱠᱚᱣᱟᱜ ᱚᱲᱟᱜ ᱠᱚᱨᱮ ᱛᱚᱞᱞᱟᱥᱤ ᱠᱚ ᱪᱟᱞᱟᱣ ᱟᱠᱟᱫᱟ ED, ᱢᱮᱱᱠᱷᱟᱱ ᱫᱮᱵᱤ ᱯᱩᱡᱟᱹ ᱛᱟᱭᱚᱢ ᱟᱨᱦᱚᱸ ᱮᱠᱥᱮᱱ ᱢᱩᱰ ᱨᱮᱠᱚ ᱡᱮᱞᱚᱜ ᱠᱟᱱᱟ ED ᱾ ᱠᱳᱞᱠᱟᱛᱟ ᱥᱟᱶᱛᱮ ᱯᱟᱨᱥᱚᱵᱚᱨᱛᱤ ᱡᱮᱞᱟ ᱠᱚᱨᱮ ED
ᱢᱤᱫ ᱥᱟᱶᱛᱮ ᱑᱔ ᱜᱚᱴᱟᱝ ᱴᱷᱟᱶ ᱨᱮ ᱛᱚᱞᱞᱟᱥᱤ ᱠᱚ ᱪᱟᱞᱟᱣ ᱠᱮᱫᱟ ᱮᱱᱯᱷᱚᱨᱥᱢᱮᱱᱴ ᱰᱤᱨᱮᱠᱴᱚᱨᱮᱹᱴ (ED) ᱾
ᱥᱟᱹᱨᱫᱤ ᱢᱟᱦᱟ ᱥᱮᱛᱟᱜ ᱵᱮᱲᱟ ᱢᱚᱦᱮᱱᱫᱨᱚ ᱟᱜᱟᱨᱣᱟᱞ ᱧᱩᱛᱩᱢᱟᱱ ᱢᱤᱫ ᱵᱮᱯᱟᱨᱤᱭᱟᱹᱣᱟᱜ ᱚᱲᱟᱨ ᱨᱮ ᱪᱷᱟᱯᱟᱢᱟᱨᱤ ᱠᱚ ᱪᱟᱞᱟᱣ ᱠᱮᱫᱟ ED ᱾ ᱵᱟᱰᱟᱭ ᱧᱟᱢᱚᱜ ᱠᱟᱱᱟ ᱵᱟᱝᱢᱟ ᱩᱱᱤ ᱢᱚᱦᱮᱱᱫᱨᱚ ᱟᱜᱟᱨᱣᱟᱞ ᱫᱚ ᱨᱮᱥᱚᱱ ᱫᱩᱨᱱᱤᱛᱤ ᱨᱮᱭᱟᱜ ᱴᱟᱠᱟ ᱯᱟᱪᱟᱨ ᱥᱟᱶᱛᱮ ᱡᱚᱯᱲᱟᱣᱮ ᱛᱟᱦᱮᱸ ᱠᱟᱱᱟ ᱾ ᱢᱚᱦᱮᱱᱫᱨᱚ ᱟᱜᱟᱨᱣᱟᱞ ᱵᱟᱫᱽ ᱠᱟᱛᱮᱫ ᱦᱚᱸ ᱦᱟᱣᱲᱟ ᱨᱮᱭᱟᱜ ᱯᱟᱪᱞᱟ ᱨᱮ ᱞᱳᱠᱱᱟᱛᱷ ᱥᱟᱦᱟ ᱧᱩᱛᱩᱢᱟᱱ ᱢᱤᱫ ᱨᱮᱥᱚᱱ ᱰᱤᱞᱟᱨᱟᱜ ᱚᱲᱟᱨ ᱨᱮᱦᱚᱸ ᱛᱚᱞᱞᱟᱥᱤ ᱠᱚ ᱪᱟᱞᱟᱣ ᱟᱠᱟᱫᱟ ᱮᱱᱯᱷᱚᱨᱥᱢᱮᱱᱴ ᱰᱤᱨᱮᱠᱴᱚᱨᱮᱹᱴ ᱾ ᱛᱚᱵᱮ ᱞᱳᱠᱱᱟᱛᱷ ᱥᱟᱦᱟᱣᱟᱜ ᱚᱲᱟᱜ ᱨᱮ ᱡᱟᱦᱟᱸ ᱚᱠᱛᱚ ED ᱠᱚ ᱥᱮᱴᱮᱨ ᱞᱮᱱᱟ ᱩᱱᱚᱠᱛᱮ ᱞᱳᱠᱱᱟᱛᱷ ᱥᱟᱦᱟᱣᱟᱜ ᱚᱲᱟᱜ ᱨᱮ ᱵᱟᱝᱮ ᱛᱟᱦᱮᱸ ᱠᱟᱱᱟ ᱾ ᱛᱚᱵᱮ ᱛᱟᱭᱚᱢ ᱛᱮ ᱩᱱᱤ ᱚᱲᱟᱜᱼᱮ ᱨᱩᱣᱟᱹᱲ ᱞᱮᱱᱠᱷᱟᱱ ᱩᱱᱤᱣᱟᱜ ᱜᱩᱫᱟᱢ ᱨᱮᱦᱚᱸ ᱠᱚ ᱦᱟᱱᱟ ᱞᱮᱫᱟ ED ᱾
ᱨᱮᱥᱚᱱ ᱫᱩᱨᱱᱤᱛᱤ ᱨᱮᱱ ᱟᱵᱷᱤᱡᱩᱠᱛᱚ ᱵᱟᱠᱤᱵᱩᱨ ᱨᱚᱦᱚᱢᱟᱱ ᱡᱟᱢᱤᱱᱮ ᱧᱟᱢ ᱟᱠᱟᱫ ᱨᱮᱦᱚᱸ ᱩᱱᱤ ᱨᱮᱱ ᱥᱚᱦᱚᱡᱳᱜᱤ ᱟᱱᱤᱥᱩᱨ ᱨᱚᱦᱚᱢᱟᱱ ᱟᱨ ᱟᱞᱤᱯ ᱱᱩᱨ ᱮᱨᱮᱹᱥᱴ ᱚᱪᱚᱣ ᱠᱟᱱᱟ ᱠᱤᱱ ED ᱴᱷᱮᱱ ᱾ ᱛᱚᱵᱮ ᱵᱟᱱᱟᱦᱚᱲ ᱜᱮ ᱫᱮᱣᱜᱚᱝᱜᱟ ᱨᱮᱱ ᱛᱨᱤᱱᱚᱢᱩᱞ ᱱᱮᱛᱟ ᱠᱟᱱᱟ ᱠᱤᱱ ᱾ ᱵᱟᱠᱤᱵᱩᱨ ᱡᱟᱢᱤᱱᱮ ᱧᱟᱢ ᱟᱠᱟᱫ ᱨᱮᱦᱚᱸ ᱨᱮᱥᱚᱱ ᱫᱩᱨᱱᱤᱛᱤ ᱥᱟᱶ ᱧᱩᱛᱩᱢ ᱡᱚᱯᱲᱟᱣ ᱟᱠᱟᱱ ᱯᱚᱱᱚᱛ ᱨᱮᱱ ᱢᱟᱨᱮ ᱢᱚᱱᱛᱨᱤ ᱡᱚᱛᱤᱯᱨᱤᱭᱚ ᱢᱚᱞᱞᱤᱠ ᱫᱚ ᱱᱤᱛ ᱦᱚᱸ ᱡᱟᱢᱤᱱ ᱫᱚ ᱵᱟᱝᱮ ᱧᱟᱢ ᱟᱠᱟᱫᱟ ᱾
ᱛᱮᱦᱮᱧ ᱡᱟᱦᱟᱸ ᱑᱔ ᱜᱚᱴᱟᱝ ᱴᱷᱟᱶ ᱨᱮ ED ᱛᱚᱞᱞᱟᱥᱤ ᱠᱚ ᱪᱟᱞᱟᱣ ᱟᱠᱟᱫ ᱚᱱᱟ ᱤᱫᱤ ᱠᱟᱛᱮᱫ ᱠᱮᱱᱫᱨᱤᱭᱚ ᱯᱨᱚᱛᱤᱢᱚᱱᱛᱨᱤ ᱥᱩᱠᱟᱱᱛᱚ ᱢᱚᱡᱩᱢᱫᱟᱨᱟᱜ ᱞᱟᱹᱭ ᱨᱮᱥᱚᱱ ᱫᱩᱨᱱᱤᱛᱤ ᱨᱮ ᱥᱚᱴᱷᱤᱠ ᱛᱚᱞᱞᱟᱥᱤ ᱦᱩᱭ ᱞᱮᱱ ᱠᱷᱟᱱ ᱯᱚᱱᱚᱛ ᱨᱮᱭᱟᱜ ᱡᱚᱛᱚ ᱡᱮᱞᱟ ᱨᱮᱜᱮ ᱨᱮᱥᱚᱱ ᱫᱩᱨᱱᱤᱛᱤ ᱨᱮᱭᱟᱜ ᱢᱩᱱᱟᱯᱷᱟ ᱠᱚ ᱧᱟᱢ ᱟᱠᱟᱫ ᱦᱚᱲ ᱠᱚ ᱦᱤᱢᱩᱜᱼᱟ ᱾ ᱟᱨ ᱩᱱᱠᱩᱣᱟᱜ ᱥᱟᱱᱟᱢ ᱦᱚᱲ ᱠᱚᱣᱟᱜ ᱚᱲᱟᱨ ᱨᱮ ᱛᱚᱞᱞᱟᱥᱤ ᱦᱩᱭᱩᱜ ᱦᱚᱸ ᱞᱟᱹᱠᱛᱤ ᱠᱟᱱᱟ ᱾
