ᱨᱚᱦᱚᱢᱟᱱᱤ ᱪᱷᱟᱹᱲ ᱧᱟᱢ ᱛᱟᱭᱚᱢ ᱪᱤᱠᱮᱱᱥ ᱱᱮᱹᱠ ᱜᱮ ᱛᱟᱦᱮᱸ ᱠᱟᱱᱟ ᱞᱚᱞᱚᱼᱦᱟᱛᱟᱝᱤᱭᱟᱹ ᱠᱚᱣᱟᱜ ᱡᱚᱥ (intelligence report)

ᱡᱚᱥ ᱪᱤᱠᱮᱱ ᱱᱮᱹᱠ ᱾
ᱵᱟᱝᱞᱟᱫᱮᱹᱥ ᱨᱮᱱᱟᱜ ᱞᱚᱞᱚᱼᱦᱟᱛᱟᱝᱤᱭᱟᱹ ᱜᱚᱱᱚᱴᱷᱚᱱ “ᱟᱱᱥᱟᱨᱩᱞᱞᱟ ᱵᱟᱝᱞᱟ ᱴᱤᱢ” ᱥᱮ ᱮᱹᱵᱤᱹᱴᱤ ᱱᱚᱣᱟ ᱯᱚᱱᱚᱛ ᱨᱮ ᱥᱞᱤᱯᱟᱨ ᱥᱮᱹᱞ ᱠᱚ ᱛᱮᱭᱟᱨᱮᱫ ᱛᱟᱦᱮᱸᱫ ᱾ ᱡᱚᱥ ᱛᱟᱦᱮᱸ ᱠᱟᱱᱟ ᱩᱠᱩ ᱨᱮ ᱜᱚᱱᱚᱴᱷᱚᱱ ᱵᱟᱹᱲᱛᱤ ᱠᱟᱛᱮ ᱥᱤᱞᱤᱜᱩᱲᱤ ᱠᱚᱨᱤᱰᱚᱨ ᱪᱤᱠᱮᱱᱥ ᱱᱮᱹᱠ ᱨᱮ ᱦᱤᱥᱟᱹ ᱯᱟᱥᱱᱟᱣ ᱨᱮᱱᱟᱜ ᱠᱚ ᱠᱩᱨᱩᱢᱩᱴᱩᱭᱟ ᱾ ᱱᱚᱣᱟ ᱨᱮᱛᱮᱫ ᱵᱟᱰᱟᱭ ᱦᱚᱪᱚ ᱠᱟᱛᱮᱫ ᱡᱟᱹᱨᱩᱢ ᱢᱟᱦᱟ ᱦᱤᱞᱳᱜ ᱵᱷᱚᱵᱟᱱᱤ ᱵᱷᱚᱵᱚᱱ ᱨᱮ ᱢᱤᱫ ᱠᱷᱚᱵᱚᱨᱤᱭᱟᱹ ᱫᱩᱯᱩᱲᱩᱵ ᱨᱮ ᱯᱚᱱᱚᱛ ᱯᱩᱞᱤᱥ ᱨᱮᱱ ᱰᱤᱹᱡᱤ (ᱫᱚᱠᱠᱷᱤᱱ ᱵᱚᱝᱜᱚ) ᱥᱩᱯᱨᱚᱛᱤᱢ ᱥᱚᱨᱠᱟᱨ ᱫᱟᱹᱵᱤ ᱟᱠᱟᱫᱟᱭ, ᱚᱥᱚᱢ ᱯᱩᱞᱤᱥ ᱡᱟᱦᱟᱸᱭ ᱤᱨᱟᱹᱞ ᱦᱚᱲ ᱮᱹᱵᱤᱹᱴᱤ ᱨᱮᱱ ᱨᱟᱹᱥᱭᱟᱹ ᱠᱚ ᱜᱨᱮᱹᱯᱷᱛᱟᱨ ᱟᱠᱟᱫ ᱠᱚᱣᱟ, ᱩᱱᱠᱩ ᱡᱮᱨᱟ ᱠᱟᱛᱮ ᱜᱮ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ ᱥᱞᱤᱯᱟᱨ ᱥᱮᱹᱞ ᱛᱟᱞᱟᱛᱮ ᱩᱠᱩᱼᱩᱠᱩᱛᱮ ᱦᱟᱹᱛᱭᱟᱹᱨ ᱥᱚᱝᱜᱨᱚᱦᱚ ᱠᱟᱛᱮ ᱵᱷᱟᱨᱚᱛ ᱵᱤᱨᱩᱫᱷ ᱠᱟᱹᱢᱤᱦᱚᱨᱟ ᱠᱚᱨᱟᱣ ᱦᱚᱸ ᱛᱟᱦᱮᱸ ᱠᱟᱱ ᱛᱟᱠᱚᱣᱟ ᱡᱚᱥ ᱾ ᱛᱷᱟᱹᱱᱤᱛ ᱨᱮᱱ ᱡᱩᱣᱟᱹᱱ ᱠᱚ ᱯᱷᱩᱥᱞᱟᱹᱣ ᱠᱟᱛᱮ ᱦᱟᱹᱛᱭᱟᱹᱨ ᱡᱚᱜᱟᱲ ᱨᱮᱱᱟᱜ ᱠᱟᱹᱢᱤ ᱨᱮ ᱟᱲᱜᱳ ᱨᱮᱱᱟᱜ ᱠᱚ ᱨᱤᱠᱟᱹ ᱞᱮᱫᱟ ᱾
ᱯᱟᱨᱚᱢᱮᱱ ᱥᱟᱹᱜᱩᱱ ᱟᱨ ᱥᱟᱹᱨᱫᱤ ᱢᱟᱦᱟ ᱦᱤᱞᱳᱜ ᱚᱥᱚᱢ ᱯᱩᱞᱤᱥ ᱨᱮᱱ ᱮᱥᱹᱴᱤᱹᱮᱯᱷ ᱚᱥᱚᱢ, ᱠᱮᱨᱚᱞ ᱟᱨ ᱯᱟᱪᱷᱮ ᱵᱟᱝᱞᱟ ᱠᱷᱚᱱ ᱤᱨᱟᱹᱞ (8) ᱜᱚᱴᱟᱝ ᱞᱚᱞᱚᱼᱦᱟᱛᱟᱝᱤᱭᱟᱹ ᱠᱚ ᱟᱴᱚᱠ ᱟᱠᱟᱫ ᱠᱚᱣᱟ ᱾ ᱚᱥᱚᱢ ᱞᱮᱠᱟ ᱱᱚᱣᱟ ᱯᱚᱱᱚᱛ ᱨᱮᱦᱚᱸ ᱥᱞᱤᱯᱟᱨ ᱥᱮᱹᱞ ᱮᱠᱴᱤᱵᱷ ᱨᱮᱱᱟᱜ ᱠᱚ ᱨᱤᱠᱟᱹ ᱞᱮᱫᱟ ᱾ ᱱᱚᱣᱟ ᱞᱟᱹᱜᱤᱫ ᱛᱮᱠᱚ ᱵᱟᱪᱷᱟᱣ ᱞᱮᱫᱟ ᱢᱩᱨᱥᱤᱫᱟᱵᱟᱫᱽ ᱟᱨ ᱟᱞᱤᱯᱩᱨᱫᱩᱣᱟᱨ ᱾ ᱵᱟᱱᱟᱨ ᱴᱷᱟᱶ ᱨᱮᱜᱮ ᱛᱷᱟᱹᱱᱤᱛ ᱡᱩᱣᱟᱹᱱ ᱠᱚ ᱜᱚᱱᱚᱴᱷᱚᱱ ᱨᱮ ᱥᱮᱞᱮᱫ ᱠᱟᱛᱮ ᱠᱚ ᱠᱟᱹᱢᱤ ᱦᱚᱪᱚᱭᱮᱫ ᱠᱚ ᱛᱟᱦᱮᱸᱫ ᱾ ᱢᱮᱱᱠᱷᱟᱱ ᱛᱤᱱᱟᱹᱜ ᱜᱟᱱ ᱦᱚᱲ ᱠᱚ ᱟᱠᱚᱣᱟᱜ ᱜᱚᱱᱚᱴᱷᱚᱱ ᱨᱮᱠᱚ ᱟᱹᱜᱩ ᱞᱮᱫ ᱠᱚᱣᱟ ᱚᱱᱟᱫᱚ ᱵᱟᱝᱠᱚ ᱵᱟᱰᱟᱭᱟ ᱜᱳᱭᱮᱱᱫᱟ ᱾ ᱮᱹᱵᱤᱹᱴᱤ ᱨᱮᱱ ᱯᱨᱚᱫᱷᱟᱱ ᱡᱚᱥᱤᱢᱩᱫᱽᱫᱤᱱ ᱨᱚᱦᱚᱢᱟᱱᱤ ᱵᱟᱝᱞᱟᱫᱮᱹᱥ ᱥᱚᱨᱠᱟᱨ ᱵᱚᱫᱚᱞ ᱛᱟᱭᱚᱢ ᱡᱮᱹᱞ ᱠᱷᱚᱱ ᱪᱷᱟᱹᱲ ᱧᱟᱢ ᱛᱟᱭᱚᱢ ᱜᱮ ᱵᱷᱟᱨᱚᱛ ᱵᱤᱨᱩᱫᱷ ᱨᱮ ᱠᱟᱹᱢᱤᱼᱦᱚᱨᱟᱭ ᱮᱛᱚᱦᱚᱵ ᱟᱠᱟᱫᱟ ᱢᱮᱱᱛᱮ ᱜᱳᱭᱮᱱᱫᱟ ᱠᱚ ᱵᱟᱰᱟᱭ ᱟᱠᱟᱱᱫᱟ ᱾ ᱩᱱᱤᱭᱟᱜ ᱟᱸᱫᱮ ᱛᱮᱜᱮ ᱞᱚᱞᱚᱼᱦᱟᱛᱟᱝᱤᱭᱟᱹ ᱢᱚᱦᱚᱢᱢᱚᱫᱽ ᱥᱟᱫᱽ ᱨᱟᱰᱤ ᱱᱚᱣᱟ ᱫᱤᱥᱚᱢ ᱨᱮ ᱵᱚᱞᱚ ᱠᱟᱛᱮ ᱜᱚᱱᱚᱴᱷᱚᱱ ᱨᱮᱱᱟᱜ ᱠᱟᱹᱢᱤᱭ ᱮᱛᱚᱦᱚᱵ ᱟᱠᱟᱫᱟ ᱢᱮᱱᱛᱮ ᱵᱟᱰᱟᱭ ᱟᱠᱟᱱᱟ ᱾ ᱫᱟᱱᱟᱝ ᱰᱚᱜᱚᱨ ᱨᱮᱱᱟᱜ ᱨᱮᱛᱮᱫ ᱞᱮᱠᱟᱛᱮ ᱠᱮᱨᱚᱞ ᱠᱷᱚᱱ ᱢᱚᱦᱚᱢᱢᱚᱫᱽ ᱥᱟᱫᱽ ᱠᱚ ᱜᱨᱮᱹᱯᱷᱛᱟᱨ ᱟᱠᱟᱫᱮᱭᱟ ᱚᱥᱚᱢ ᱯᱩᱞᱤᱥ ᱾
ᱦᱟᱞᱮᱜᱮ ᱵᱟᱝᱞᱟᱫᱮᱹᱥ ᱨᱮᱱ ᱟᱭᱢᱟ ᱱᱮᱛᱟ ᱪᱤᱠᱮᱱ ᱱᱮᱹᱠ ᱱᱤᱥᱟᱱᱟ ᱠᱟᱛᱮ ᱠᱟᱛᱷᱟ ᱠᱚ ᱨᱚᱲ ᱟᱠᱟᱫᱟ ᱾ ᱮᱢᱚᱱ ᱪᱮᱫ ᱚᱱᱟ ᱫᱤᱥᱚᱢ ᱨᱮᱱ ᱠᱚᱭᱮᱠᱡᱚᱱ ᱫᱷᱚᱨᱚᱢᱤᱭᱟᱹ ᱟᱹᱜᱩᱣᱟᱹᱱ ᱪᱤᱠᱮᱱ ᱱᱮᱹᱠ ᱫᱚᱠᱷᱚᱞ ᱠᱟᱛᱮ ᱩᱛᱛᱚᱨᱼᱯᱩᱨᱵᱚ ᱵᱷᱟᱨᱚᱛ ᱨᱮᱱᱟᱜ ᱗ ᱜᱚᱴᱟᱝ ᱯᱚᱱᱚᱛ ᱫᱚᱠᱷᱚᱞ ᱨᱮᱱᱟᱜ ᱠᱟᱛᱷᱟ ᱠᱚ ᱢᱮᱱ ᱟᱠᱟᱫᱟ ᱾ ᱯᱩᱞᱤᱥᱟᱜ ᱞᱟᱹᱭ ᱥᱤᱠᱤᱭᱩᱨᱤᱴᱤ ᱞᱮᱠᱟᱛᱮ ᱪᱤᱠᱮᱱ ᱱᱮᱹᱠ ᱟᱹᱰᱤ ᱜᱮ ᱡᱟᱹᱨᱩᱲᱟᱱᱟ ᱾ ᱥᱤᱞᱤᱜᱩᱲᱤ ᱨᱮᱱᱟᱜ ᱢᱤᱫ ᱠᱟᱹᱢᱤᱼᱦᱚᱨᱟ ᱨᱮ ᱥᱮᱞᱮᱫ ᱠᱟᱛᱮ ᱱᱚᱣᱟ ᱠᱟᱛᱷᱟᱭ ᱞᱟᱹᱭ ᱟᱠᱟᱫᱟ ᱠᱮᱱᱫᱨᱤᱭᱚ ᱥᱚᱨᱟᱥᱴᱨᱚ ᱢᱚᱱᱛᱨᱤ ᱚᱢᱤᱛ ᱥᱟ ᱦᱚᱸ ᱾
ᱮᱹᱵᱤᱹᱴᱤ ᱨᱮᱱ ᱘ ᱜᱚᱴᱟᱝ ᱞᱚᱞᱚᱼᱦᱟᱛᱟᱝᱤᱭᱟᱹ ᱯᱟᱠᱲᱟᱣ ᱵᱟᱵᱚᱫᱽ ᱵᱟᱝᱞᱟᱫᱮᱹᱥ ᱥᱟᱞᱟᱜ ᱨᱚᱯᱚᱲ ᱦᱩᱭ ᱟᱠᱟᱱᱟ ᱥᱮ ᱵᱟᱝ, ᱠᱩᱠᱞᱤ ᱨᱮ ᱵᱤᱫᱮᱹᱥ ᱢᱚᱱᱛᱨᱚᱠ ᱨᱮᱱ ᱥᱯᱳᱠ ᱯᱟᱨᱥᱚᱱ ᱨᱚᱱᱫᱷᱤᱨ ᱡᱚᱭᱥᱚᱣᱟᱞᱮ ᱞᱟᱹᱭ, ᱱᱮᱥᱚᱱᱟᱞ ᱥᱤᱠᱤᱭᱩᱨᱤᱴᱤ ᱵᱟᱵᱚᱫᱽ ᱡᱟᱦᱟᱱ ᱥᱟᱛᱟᱢ ᱨᱮ ᱩᱱᱟᱹᱜ ᱞᱚᱜᱚᱱ ᱯᱟᱹᱣᱲᱤ ᱵᱟᱝ ᱞᱟᱦᱟᱜᱼᱟ ᱾ ᱱᱚᱣᱟ ᱵᱟᱵᱚᱫᱽ ᱠᱮᱱᱫᱨᱤᱭᱚ ᱥᱚᱝᱥᱛᱷᱟ ᱦᱚᱸ ᱚᱱᱟ ᱜᱮᱠᱚ ᱠᱟᱹᱢᱤᱭᱟᱠᱟᱫᱟ ᱾ ᱚᱱᱟ ᱥᱟᱶᱛᱮ ᱩᱱᱤᱭ ᱞᱟᱹᱭ ᱟᱠᱟᱫᱟ ᱵᱟᱝᱞᱟᱫᱮᱹᱥ ᱥᱟᱞᱟᱜ ᱱᱟᱱᱟᱦᱩᱱᱟᱹᱨ ᱫᱤᱠ ᱨᱚᱯᱚᱲ ᱪᱟᱞᱟᱜᱼᱟ ᱾ ᱦᱟᱞᱮᱜᱮ ᱵᱤᱫᱮᱹᱥ ᱥᱚᱪᱤᱵᱽ ᱵᱤᱠᱨᱚᱢ ᱢᱤᱥᱨᱤ ᱰᱷᱟᱠᱟᱭ ᱪᱟᱞᱟᱣ ᱞᱮᱱᱟ ᱾ ᱚᱸᱰᱮ ᱯᱷᱚᱨᱮᱱ ᱚᱯᱷᱤᱥ ᱠᱚᱱᱥᱟᱞᱴᱮᱥᱚᱱ ᱢᱚᱧᱪᱚ ᱨᱮ ᱥᱟᱱᱟᱢ ᱥᱟᱛᱟᱢ ᱵᱟᱵᱚᱫᱽ ᱵᱤᱪᱷᱱᱟᱹᱣᱛᱮ ᱜᱟᱞᱢᱟᱨᱟᱣ ᱦᱩᱭ ᱟᱠᱟᱱᱟ ᱾