(PAPUL MURMU) Amit Shah on Bengal visit : ᱯᱚᱪᱷᱤᱢ ᱵᱟᱝᱞᱟ ᱨᱮ ᱢᱮᱱᱟᱜᱼᱟ ᱖ ᱜᱚᱴᱟᱝ ᱥᱤᱴ ᱨᱮ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ, ᱟᱨ ᱚᱱᱟ ᱞᱟᱦᱟ ᱵᱚᱝᱜᱚ ᱥᱚᱯᱷᱚᱨ ᱨᱮ ᱦᱮᱡ ᱮᱱᱟᱭ ᱠᱮᱱᱫᱨᱤᱭᱚ ᱥᱚᱨᱟᱥᱴᱨᱚ ᱢᱚᱱᱛᱨᱤ ᱚᱢᱤᱴ ᱥᱟ ᱾ ᱥᱤᱸᱜᱮ ᱢᱟᱦᱟ ᱦᱤᱞᱳᱜ ᱵᱚᱱᱜᱟᱸ ᱥᱤᱢᱟᱱᱛᱚ ᱨᱮ ᱵᱤᱹᱮᱥᱹᱮᱯᱼᱟᱜ ᱢᱤᱫ ᱠᱟᱹᱢᱤᱦᱚᱨᱟ ᱨᱮ ᱥᱮᱞᱮᱫ ᱞᱮᱱ ᱛᱟᱦᱮᱱᱟᱭ ᱾ ᱵᱚᱱᱜᱟᱸ ᱨᱮᱭᱟᱜ ᱚᱱᱟ ᱥᱚᱨᱠᱟᱨᱤ ᱠᱟᱹᱢᱤᱦᱚᱨᱟ ᱠᱷᱚᱱ ᱚᱢᱤᱛ ᱥᱟᱣᱟᱜ ᱵᱷᱟᱥᱚᱱ ᱨᱮ ᱟᱸᱡᱚᱢ ᱮᱱᱟ ᱨᱟᱡᱽᱼᱟᱹᱨᱤ ᱠᱟᱛᱷᱟ ᱾ ᱒᱐᱒᱖ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱛᱟᱞᱟ ᱛᱮ ᱵᱟᱝᱞᱟ ᱨᱮ ᱯᱚᱨᱤᱵᱚᱨᱛᱚᱱ ᱨᱮᱭᱟᱜ ᱠᱟᱛᱷᱟᱭ ᱞᱟᱹᱭ ᱠᱮᱫᱟ ᱥᱟ ᱾ ᱥᱟᱣᱟᱜ ᱞᱟᱹᱭ ᱵᱟᱝᱞᱟ ᱨᱮ ᱵᱤᱹᱡᱮᱹᱯᱤ ᱠᱷᱚᱢᱚᱛᱟ ᱨᱮᱠᱚ ᱦᱮᱡ ᱞᱮᱱ ᱠᱷᱟᱱ ᱯᱚᱱᱚᱛ ᱨᱮ ᱚᱱᱩᱯᱨᱚᱵᱮᱹᱥ ᱪᱟᱵᱟᱜᱼᱟ ᱾ ᱵᱟᱝᱞᱟ ᱨᱮᱭᱟᱜ ᱚᱱᱩᱯᱨᱚᱵᱮᱹᱥ ᱥᱟᱶ ᱥᱟᱶᱛᱮ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱪᱮᱛᱟᱱ ᱦᱚᱸ ᱠᱟᱛᱷᱟᱭ ᱛᱮᱨᱟᱝ ᱠᱮᱫᱟ ᱾
ᱵᱚᱱᱜᱟᱸ ᱨᱮᱭᱟᱜ ᱯᱮᱴᱨᱳᱯᱳᱞ ᱥᱤᱢᱟᱹ ᱨᱮ ᱡᱟᱛᱨᱤ ᱴᱟᱨᱢᱤᱱᱟᱞ ᱵᱷᱚᱵᱚᱱ ᱟᱨ ᱢᱳᱹᱭᱛᱨᱤ ᱫᱟᱨ ᱩᱰᱷᱟᱹᱣ ᱞᱟᱹᱜᱤᱫᱮ ᱥᱮᱱ ᱞᱮᱱᱟ ᱚᱢᱤᱛ ᱥᱟ ᱾ ᱥᱟᱣᱟᱜ ᱞᱟᱹᱭ ᱑᱐ ᱥᱮᱨᱢᱟ ᱠᱷᱚᱱ ᱯᱨᱚᱫᱷᱟᱱ ᱢᱚᱱᱛᱨᱤ ᱱᱚᱨᱮᱱᱫᱨᱚ ᱢᱳᱫᱤ ᱦᱚᱛᱮᱛᱮ ᱫᱤᱥᱚᱢ ᱨᱮ ᱟᱹᱰᱤ ᱜᱟᱱ ᱩᱛᱱᱟᱹᱣ ᱦᱩᱭ ᱟᱠᱟᱱᱟ ᱾ ᱡᱚᱫᱤᱭᱳ ᱵᱟᱝᱞᱟ ᱨᱮᱱ ᱦᱚᱲ ᱚᱱᱟ ᱩᱛᱱᱟᱹᱣ ᱨᱮᱭᱟᱜ ᱥᱤᱵᱤᱞ ᱵᱟᱝᱠᱚ ᱧᱟᱢ ᱟᱠᱟᱫᱟ ᱾ ᱛᱚᱵᱮ ᱪᱤᱱᱛᱟᱹ ᱨᱮᱭᱟᱜ ᱠᱟᱨᱚᱱ ᱵᱟᱹᱱᱩᱜᱼᱟ, ᱒᱐᱒᱖ ᱨᱮ ᱯᱚᱨᱤᱵᱚᱨᱛᱚᱱ ᱦᱩᱭ ᱞᱮᱱᱠᱷᱟᱱ ᱜᱮ ᱵᱤᱹᱡᱮᱹᱯᱤ ᱥᱚᱨᱠᱟᱨ ᱚᱱᱟ ᱩᱛᱱᱟᱹᱣᱮ ᱯᱩᱨᱟᱹᱣᱟ ᱢᱮᱱᱛᱮ ᱠᱮᱱᱫᱨᱤᱭᱚ ᱥᱚᱨᱟᱥᱴᱨᱚ ᱢᱚᱱᱛᱨᱤ ᱚᱢᱤᱛ ᱥᱟᱣᱟᱜ ᱞᱟᱹᱭ ᱾
ᱵᱤ ᱡᱮ ᱯᱤ ᱨᱮᱱ ᱠᱮᱱᱫᱨᱤᱭᱚ ᱱᱮᱛᱟ ᱠᱚ ᱵᱟᱝᱞᱟ ᱨᱮᱭᱟᱜ ᱩᱛᱱᱟᱹᱣ ᱤᱫᱤ ᱠᱟᱛᱮᱫ ᱠᱚ ᱞᱟᱹᱭ ᱨᱮᱦᱚᱸ ᱴᱤᱹᱮᱢᱹᱥᱤᱣᱟᱜ ᱚᱵᱷᱤᱡᱳᱜᱽ ᱵᱤᱹᱡᱮᱹᱯᱤ ᱪᱮᱛᱟᱱ ᱜᱮ, ᱴᱤᱹᱮᱢᱹᱥᱤᱣᱟᱜ ᱞᱟᱹᱭ ᱵᱟᱝᱞᱟ ᱨᱮᱭᱟᱜ ᱯᱨᱟᱯᱯᱚ ᱴᱟᱠᱟ ᱠᱮᱱᱫᱨᱚ ᱨᱮᱱ ᱵᱤᱹᱡᱮᱹᱯᱤ ᱥᱚᱨᱠᱟᱨ ᱵᱟᱝᱼᱮ ᱮᱢᱚᱜ ᱠᱟᱱᱟ ᱾ ᱥᱟᱣᱟᱜ ᱞᱟᱹᱭ ᱑᱐ ᱥᱮᱨᱢᱟ ᱠᱷᱚᱱ ᱵᱟᱝᱞᱟ ᱨᱮᱱ ᱦᱚᱲ ᱪᱮᱫᱼᱮ ᱮᱢ ᱟᱠᱟᱫ ᱠᱚᱣᱟ ᱢᱚᱢᱚᱛᱟ ᱵᱮᱱᱟᱨᱡᱤ ᱾ ᱛᱨᱤᱱᱚᱢᱩᱞ ᱛᱚ ᱠᱚᱝᱜᱨᱮᱹᱥ ᱥᱟᱞᱟᱜ ᱡᱳᱴ ᱨᱮ ᱢᱮᱱᱟᱭᱟ ᱾ ᱠᱮᱱᱫᱨᱚ ᱨᱮ ᱡᱟᱦᱟᱸ ᱚᱠᱛᱚ ᱠᱚᱝᱜᱮᱹᱥᱟᱜ ᱥᱚᱨᱠᱟᱨ ᱛᱟᱦᱮᱸ ᱠᱟᱱᱟ ᱩᱱ ᱚᱠᱛᱚ ᱵᱟᱝᱞᱟ ᱞᱟᱹᱜᱤᱫ ᱴᱟᱠᱟ ᱠᱚ ᱮᱢ ᱞᱮᱱᱟ ᱒ᱹ᱙ ᱞᱟᱠᱷ ᱠᱳᱴᱤ, ᱢᱮᱱᱠᱷᱟᱱ ᱑᱐ ᱥᱮᱨᱢᱟ ᱨᱮ ᱢᱳᱫᱤ ᱥᱚᱨᱠᱟᱨ ᱯᱚᱥᱪᱤᱢ ᱵᱚᱝᱜᱚ ᱩᱛᱱᱟᱹᱣ ᱞᱟᱹᱜᱤᱫ ᱗ᱹ᱗᱔ ᱞᱟᱠᱷ ᱠᱳᱴᱤ ᱴᱟᱠᱟᱭ ᱮᱢ ᱟᱠᱟᱱᱟ ᱾ ᱵᱤᱹᱡᱮᱹᱯᱤᱣᱟᱜ ᱱᱮᱛᱨᱤᱛᱛᱟᱫᱷᱤᱱ ᱢᱳᱫᱤ ᱥᱚᱨᱠᱟᱨ ᱵᱟᱝᱞᱟ ᱩᱛᱱᱟᱹᱣ ᱞᱟᱹᱜᱤᱫ ᱡᱟᱦᱟᱸ ᱴᱟᱠᱟᱭ ᱮᱢ ᱟᱠᱟᱱᱟ ᱚᱱᱟ ᱫᱚ ᱵᱟᱝᱞᱟ ᱨᱮᱱ ᱱᱮᱛᱟ ᱠᱚ ᱫᱩᱨᱱᱤᱛᱤ ᱛᱮᱜᱮ ᱠᱚ ᱪᱟᱵᱟᱭᱮᱫᱟ ᱢᱮᱱᱛᱮ ᱞᱟᱹᱭ ᱠᱮᱫᱟᱭ ᱚᱢᱤᱫ ᱥᱟ ᱾
