(PAPUL MURMU) Maldives India Relations : ᱯᱩᱱ ᱢᱟᱦᱟ ᱨᱮᱭᱟᱜ ᱵᱷᱟᱨᱛ ᱥᱚᱯᱷᱚᱨ ᱛᱮᱭ ᱦᱮᱡ ᱟᱠᱟᱱᱟ ᱢᱚᱞᱫᱤᱯ ᱨᱮᱱ ᱨᱟᱥᱴᱨᱚᱯᱚᱛᱤ ᱢᱚᱦᱚᱢᱢᱚᱫᱽ ᱢᱩᱭᱡᱩ ᱾ ᱵᱷᱟᱨᱚᱛ ᱥᱚᱯᱷᱚᱨ ᱨᱮ ᱦᱮᱡ ᱛᱟᱭᱚᱢ ᱜᱮ ᱢᱩᱭᱡᱩ ᱫᱚ ᱯᱨᱚᱫᱷᱟᱱ ᱢᱚᱱᱛᱨᱤ ᱢᱳᱫᱤ ᱥᱟᱶᱛᱮ ᱧᱟᱯᱟᱢ ᱟᱠᱟᱱᱟ ᱾ ᱦᱟᱯᱮᱱ ᱫᱤᱱ ᱨᱮ ᱵᱟᱱᱟᱨ ᱫᱤᱥᱚᱢ ᱢᱩᱫᱽ ᱨᱮᱜᱮ ᱟᱹᱰᱤ ᱜᱟᱱ ᱩᱛᱱᱟᱹᱣ ᱟᱱᱟᱝ ᱯᱨᱚᱠᱚᱞᱯᱚ ᱤᱫᱤ ᱠᱟᱛᱮᱫ ᱜᱚᱲᱚ ᱥᱚᱯᱚᱦᱚᱫ ᱨᱮᱠᱤᱱ ᱛᱟᱦᱮᱱᱟ ᱢᱩᱭᱡᱩ ᱥᱟᱶ ᱫᱩᱯᱲᱩᱵ ᱛᱟᱭᱚᱢ ᱞᱟᱹᱭ ᱠᱮᱫᱟᱭ ᱱᱚᱨᱮᱱᱫᱨᱚ ᱢᱳᱫᱤ ᱾ ᱥᱤᱸᱜᱮ ᱢᱟᱦᱟ ᱦᱤᱞᱳᱜ ᱟᱡᱤᱡ ᱚᱲᱟᱜ ᱮᱨᱟ ᱥᱟᱶᱛᱮ ᱫᱤᱞᱞᱤ ᱵᱤᱢᱟᱱ ᱵᱚᱱᱫᱚᱨ ᱨᱮᱭ ᱥᱮᱴᱮᱨ ᱞᱮᱱᱟ ᱢᱩᱭᱡᱩ ᱾ ᱟᱨ ᱚᱸᱰᱮ ᱩᱱᱤ ᱟᱛᱟᱝ ᱫᱟᱨᱟᱢ ᱞᱟᱹᱜᱤᱫ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱠᱮᱱᱫᱤᱨᱤᱭᱚ ᱵᱤᱫᱮᱹᱥ ᱫᱚᱯᱛᱚᱨ ᱨᱮᱱ ᱯᱨᱚᱛᱤ ᱢᱚᱱᱛᱨᱤ ᱠᱤᱨᱤᱴᱤ ᱥᱤᱝ ᱵᱚᱨᱫᱷᱚᱱ ᱾ ᱵᱷᱟᱨᱚᱛ ᱨᱮᱱ ᱵᱤᱫᱮᱹᱥ ᱢᱚᱱᱛᱨᱤ ᱮᱥ ᱡᱚᱭᱥᱚᱝᱠᱚᱨ ᱥᱟᱶᱛᱮ ᱦᱚᱸ ᱢᱤᱫ ᱫᱚᱯᱷᱟ ᱵᱚᱭᱴᱷᱚᱠ ᱦᱩᱭ ᱥᱟᱹᱛ ᱟᱠᱟᱱᱟ ᱢᱚᱦᱚᱢᱢᱚᱫ ᱢᱩᱭᱡᱩᱣᱟᱜ ᱾ ᱚᱱᱟ ᱛᱟᱭᱚᱢ ᱫᱤᱞᱞᱤ ᱨᱮᱭᱟᱜ ᱨᱟᱡᱽᱜᱷᱟᱴ ᱨᱮ ᱢᱚᱦᱟᱛᱢᱟ ᱜᱟᱱᱫᱷᱤᱭᱟᱜ ᱥᱚᱢᱟᱫᱷᱤ ᱨᱮ ᱪᱟᱞᱟᱣ ᱠᱟᱛᱮᱫ ᱢᱟᱹᱱ ᱮᱢ ᱛᱟᱭᱚᱢ ᱨᱟᱥᱴᱨᱚᱯᱚᱛᱤ ᱵᱷᱚᱵᱚᱱ ᱨᱮ ᱨᱟᱥᱴᱨᱚᱯᱚᱛᱤ ᱵᱷᱚᱵᱚᱱ ᱯᱟᱥᱴᱟ ᱠᱷᱚᱱ ᱥᱚᱝᱵᱚᱨᱫᱷᱚᱱᱟ ᱦᱚᱸ ᱮᱢ ᱪᱟᱞ ᱦᱩᱭ ᱟᱠᱟᱱᱟ ᱾
ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ ᱫᱟᱨᱟᱭ ᱠᱟᱱ ᱑᱐ ᱚᱠᱴᱳᱵᱚᱨ ᱦᱟᱹᱵᱤᱡ ᱛᱮ ᱵᱷᱟᱨᱚᱛ ᱥᱚᱯᱷᱚᱨ ᱨᱮᱜᱮ ᱛᱟᱦᱮᱱᱟᱭ ᱢᱩᱭᱡᱩ ᱾ ᱛᱚᱵᱮ ᱢᱚᱞᱫᱤᱯ ᱨᱮᱱ ᱨᱟᱥᱴᱨᱚᱯᱚᱛᱤ ᱵᱚᱨᱟᱵᱚᱨ ᱪᱤᱱ ᱜᱷᱚᱱᱤᱥᱴᱚ ᱞᱮᱠᱟ ᱛᱮᱜᱮ ᱩᱯᱨᱩᱯ ᱢᱮᱱᱟᱜ ᱟᱠᱟᱫ ᱛᱟᱭᱟ ᱾ ᱟᱨ ᱩᱱᱤ ᱢᱩᱭᱡᱩ ᱜᱮ ᱢᱚᱞᱫᱤᱯ ᱨᱮᱭᱟᱜ ᱠᱷᱚᱢᱚᱛᱟ ᱨᱮ ᱦᱮᱡ ᱠᱟᱛᱮᱫ ᱵᱷᱟᱨᱚᱛ ᱨᱮᱭᱟᱜ ᱪᱤᱱᱛᱟᱹ ᱟᱹᱰᱤ ᱵᱟᱹᱲᱛᱤ ᱟᱠᱟᱱᱟ ᱾ ᱟᱨ ᱚᱱᱟ ᱠᱷᱟᱹᱛᱤᱨ ᱢᱩᱭᱡᱩᱣᱟᱜ ᱵᱷᱟᱨᱚᱛ ᱥᱚᱯᱷᱚᱨ ᱪᱮᱛᱟᱱ ᱨᱮ ᱱᱚᱡᱚᱨ ᱢᱮᱱᱟᱜᱼᱼᱼᱼᱼ ᱟ ᱥᱟᱱᱟᱢ ᱠᱚᱣᱟᱜ ᱾ ᱪᱮᱫᱟᱜ ᱥᱮ ᱯᱩᱱ ᱪᱟᱸᱫᱳ ᱢᱩᱫᱽ ᱨᱮ ᱫᱚᱥᱟᱨ ᱵᱷᱟᱨᱚᱛ ᱥᱚᱯᱷᱚᱨ ᱠᱟᱱᱟ ᱢᱚᱞᱫᱤᱯ ᱨᱮᱱ ᱨᱟᱥᱴᱨᱚᱯᱚᱛᱤᱣᱟᱜ ᱾ ᱱᱚᱣᱟ ᱞᱟᱦᱟ ᱡᱩᱱ ᱪᱟᱸᱫᱳ ᱨᱮ ᱯᱨᱚᱫᱷᱟᱱ ᱢᱚᱱᱛᱤᱨᱤᱭᱟᱜ ᱥᱚᱯᱚᱛᱷ ᱠᱟᱹᱢᱤᱦᱚᱨᱟ ᱨᱮ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱢᱚᱦᱚᱢᱢᱚᱫᱽ ᱢᱩᱭᱡᱩ ᱾
