ᱵᱷᱩᱢᱤᱡᱽ ᱯᱟᱹᱨᱥᱤ ᱯᱚᱱᱚᱛ ᱨᱮ ᱫᱚᱥᱟᱨ ᱨᱟᱡᱽ ᱵᱷᱟᱥᱟ ᱟᱨ ᱠᱮᱱᱫᱨᱚ ᱨᱮ ᱤᱨᱟᱹᱞᱟᱱᱟᱜ ᱛᱷᱚᱠ ᱨᱮ ᱥᱮᱞᱮᱫ ᱨᱮᱱᱟᱜ ᱫᱟᱹᱵᱤ ᱠᱚ ᱨᱟᱠᱟᱵ ᱠᱮᱫᱟ ᱵᱷᱩᱢᱤᱡᱽ ᱥᱚᱢᱟᱡᱽ ᱨᱮᱱ ᱢᱟᱹᱱᱢᱤ ᱠᱚ ᱾ ᱢᱮᱱᱫᱚ ᱒᱐᱑᱘ ᱥᱟᱹᱦᱤᱛ ᱨᱮᱱᱟᱜ ᱕ ᱚᱠᱴᱳᱵᱚᱨ ᱦᱤᱞᱳᱜ ᱩᱱ ᱚᱠᱛᱚ ᱨᱮᱱ ᱡᱷᱟᱲᱠᱷᱚᱸᱰ ᱥᱚᱨᱠᱟᱨ ᱡᱷᱟᱲᱠᱷᱚᱸᱰ ᱨᱮ ᱵᱷᱩᱢᱤᱡᱽ ᱯᱟᱹᱨᱥᱤ ᱫᱚᱥᱟᱨ ᱨᱟᱡᱽ ᱵᱷᱟᱥᱟ ᱨᱮᱱᱟᱜ ᱢᱟᱹᱱᱮ ᱮᱢ ᱟᱠᱟᱫᱟ ᱾ ᱚᱱᱟᱛᱮ ᱕ ᱚᱠᱴᱳᱵᱚᱨ ᱦᱤᱞᱳᱜ ᱫᱤᱥᱚᱢ ᱨᱮᱱᱟᱜ ᱟᱭᱢᱟ ᱴᱷᱟᱶ ᱞᱮᱠᱟ ᱵᱟᱸᱠᱩᱲᱟ ᱨᱮᱱᱟᱜ ᱨᱟᱱᱤᱵᱟᱸᱫᱷ ᱨᱮᱦᱚᱸ ᱵᱷᱩᱢᱤᱡᱽ ᱯᱟᱹᱨᱥᱤ ᱢᱟᱦᱟ ᱠᱚ ᱢᱟᱱᱟᱣ ᱠᱮᱫᱟ ᱾ ᱚᱱᱟ ᱥᱟᱶᱛᱮ ᱵᱷᱩᱢᱤᱡᱽ ᱜᱟᱛᱟᱠ ᱨᱮᱱ ᱟᱹᱜᱩᱣᱟᱹᱱ ᱠᱚ ᱟᱯᱱᱟᱨᱟᱜ ᱚᱼᱤᱛᱟᱹᱫ ᱠᱚ ᱥᱚᱫᱚᱨ ᱟᱠᱟᱫᱟ ᱾ ᱩᱱᱠᱩᱣᱟᱜ ᱢᱮᱱ ᱵᱷᱩᱢᱤᱡᱽ ᱯᱟᱹᱨᱥᱤᱼᱞᱟᱠᱪᱟᱨ ᱨᱩᱠᱷᱤᱭᱟᱹ ᱨᱮ ᱯᱚᱱᱚᱛ ᱟᱨ ᱛᱟᱞᱢᱟ ᱥᱚᱨᱠᱟᱨᱟᱜ ᱡᱟᱦᱟᱱ ᱠᱩᱨᱩᱢᱩᱴᱩ ᱜᱮ ᱵᱟᱝ ᱧᱮᱞᱚᱜ ᱠᱟᱱᱟ ᱾ ᱚᱱᱟ ᱠᱷᱟᱹᱛᱤᱨ ᱛᱮ ᱟᱯᱱᱟᱨᱟᱜ ᱯᱟᱹᱨᱥᱤ ᱢᱟᱹᱱ ᱮᱢ ᱨᱮᱱᱟᱜ ᱠᱚ ᱫᱟᱹᱵᱤᱭᱟᱠᱟᱫᱟ ᱾
ᱮᱴᱟᱜ ᱥᱮᱫ ᱵᱷᱩᱢᱤᱡᱽ ᱯᱟᱹᱨᱥᱤ ᱢᱟᱦᱟ ᱢᱟᱱᱟᱣ ᱵᱟᱛᱟᱣᱮᱱᱟ ᱯᱩᱨᱩᱞᱤᱭᱟᱹ ᱡᱮᱞᱟ ᱨᱮᱱᱟᱜ ᱵᱚᱨᱟᱵᱟᱡᱟᱨ ᱨᱮ ᱾ ᱵᱚᱨᱟᱵᱟᱡᱟᱨ ᱜᱚᱝᱜᱟ ᱱᱟᱨᱟᱭᱚᱱ ᱥᱴᱮᱹᱰᱤᱭᱟᱢ ᱨᱮ ᱵᱚᱨᱟᱵᱟᱡᱟᱨ ᱵᱞᱚᱠ ᱠᱚᱢᱤᱴᱤᱭᱟᱜ ᱩᱫᱽᱜᱟᱹᱣ ᱛᱮ ᱧᱩᱦᱩᱢ ᱢᱟᱦᱟ ᱦᱤᱞᱳᱜ ᱢᱟᱱᱟᱣ ᱵᱟᱛᱟᱣ ᱦᱩᱭᱮᱱᱟ ᱾ ᱱᱚᱣᱟ ᱢᱟᱦᱟ ᱨᱮ ᱵᱤᱨᱼᱵᱟᱱᱴᱟ ᱠᱚᱣᱟᱜ ᱢᱩᱴᱷᱟᱹᱱ ᱨᱮ ᱵᱟᱦᱟᱼᱢᱟᱞᱟ ᱟᱨᱟᱣ ᱠᱟᱛᱮᱫ, ᱟᱯᱱᱟᱨᱟᱜ ᱯᱟᱹᱨᱥᱤ ᱛᱮ ᱥᱮᱨᱮᱧ ᱥᱟᱶᱛᱮ ᱮᱱᱮᱡ ᱮᱢᱟᱱ ᱠᱚ ᱛᱟᱞᱟᱛᱮ ᱟᱹᱰᱤ ᱨᱚᱢᱡᱷᱚᱢ ᱠᱚ ᱢᱟᱱᱟᱣ ᱵᱟᱛᱟᱣ ᱠᱮᱫᱟ ᱾
