ᱵᱮᱝᱜᱚᱞ ᱦᱚᱠᱤ ᱨᱮᱱ ᱥᱚᱵᱷᱟᱯᱚᱛᱤ ᱛᱟᱦᱮᱸ ᱠᱟᱱᱟᱭ ᱵᱟᱵᱩᱱ᱾ ᱢᱚᱢᱚᱛᱟ ᱨᱮᱱ ᱵᱚᱭᱦᱟ ᱵᱟᱵᱩᱱ ᱚᱪᱚᱜ ᱠᱟᱛᱮᱫ ᱱᱟᱣᱟ ᱥᱚᱵᱷᱟᱯᱚᱛᱤ ᱦᱩᱭ ᱮᱱᱟᱭ ᱢᱚᱱᱛᱨᱤ ᱥᱩᱡᱤᱛ ᱵᱚᱥᱩ
(PAPUL MURMU) West Bengal Hockey India : ᱵᱮᱝᱜᱚᱞ ᱦᱚᱠᱤ ᱨᱮ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱨᱮᱱ ᱵᱚᱭᱦᱟ ᱥᱚᱯᱚᱱ ᱵᱮᱱᱟᱨᱡᱤ ᱚᱪᱚᱜ ᱠᱟᱛᱮᱫ ᱱᱟᱣᱟ ᱥᱚᱵᱷᱟᱯᱚᱛᱤ ᱞᱮᱠᱟᱛᱮ ᱫᱟᱭᱵᱷᱟᱨᱮ ᱧᱟᱢ ᱠᱮᱫᱟ ᱯᱚᱱᱚᱛ ᱨᱮᱱ ᱫᱚᱢᱠᱚᱞ ᱢᱚᱱᱛᱨᱤ ᱥᱚᱡᱤᱛ ᱵᱚᱥᱩ (Sujit Bose) ᱾ ᱛᱚᱵᱮ ᱠᱳᱞᱠᱟᱛᱟ ᱨᱮᱭᱟᱜ ᱢᱚᱭᱫᱟᱱ ᱨᱮ ᱥᱚᱯᱚᱱᱟᱜ ᱩᱯᱨᱩᱢ ᱫᱚ ᱵᱟᱵᱩᱱ ᱧᱩᱛᱩᱢ ᱛᱮᱜᱮ ᱾ ᱧᱩᱦᱩᱢ ᱢᱟᱦᱟ (Saturday) ᱦᱤᱞᱳᱜ ᱯᱚᱥᱪᱤᱢ ᱵᱟᱝᱞᱟ ᱦᱚᱠᱤ ᱥᱚᱝᱥᱛᱷᱟ ᱨᱮᱭᱟᱜ ᱥᱚᱵᱷᱟ ᱨᱮ ᱥᱩᱡᱤᱛ ᱵᱚᱥᱩᱣᱟᱜ ᱧᱤᱛᱩᱢ ᱥᱚᱵᱷᱟᱯᱚᱛᱤ ᱞᱮᱠᱟᱛᱮ ᱩᱪᱷᱟᱹᱱ ᱟᱠᱟᱱᱟ ᱾
ᱜᱮᱞᱵᱟᱨ ᱥᱮᱨᱢᱟ ᱠᱷᱚᱱ ᱵᱮᱝᱜᱚᱞ ᱦᱚᱠᱤ ᱨᱮᱱ ᱥᱚᱵᱷᱟᱯᱚᱛᱤ ᱞᱮᱠᱟᱛᱮᱭ ᱛᱟᱦᱮᱸ ᱠᱟᱱᱟ ᱵᱟᱵᱩᱱ ᱾ ᱢᱮᱱᱠᱷᱟᱱ ᱪᱮᱫ ᱠᱷᱟᱹᱛᱤᱨ ᱟᱪᱠᱟ ᱜᱮ ᱚᱪᱚᱜ ᱦᱩᱭ ᱮᱱᱟ ᱚᱱᱟ ᱜᱮ ᱵᱷᱟᱹᱵᱤᱛ ᱨᱮᱭᱟᱜ ᱠᱟᱛᱷᱟ ᱾ ᱪᱮᱫᱟᱜ ᱥᱮ ᱵᱟᱵᱩᱱ ᱥᱚᱵᱷᱟᱯᱚᱛᱤ ᱛᱟᱦᱮᱱ ᱚᱠᱛᱚ ᱨᱮᱜᱮ ᱵᱮᱝᱜᱚᱞ ᱦᱚᱠᱤᱣᱟᱜ ᱟᱹᱰᱤ ᱜᱮ ᱰᱮᱵᱷᱞᱚᱯ ᱦᱩᱭ ᱟᱠᱟᱱᱟ ᱾ ᱟᱨ ᱚᱱᱟ ᱠᱷᱟᱹᱛᱤᱨ ᱩᱱᱤ ᱚᱪᱚᱜ ᱤᱫᱤ ᱠᱟᱛᱮᱫ ᱟᱹᱰᱤ ᱜᱮ ᱠᱩᱠᱞᱤ ᱨᱟᱠᱟᱵ ᱦᱤᱡᱩᱜ ᱠᱟᱱᱟ ᱾ ᱒᱐᱑᱒ ᱥᱟᱹᱦᱤᱛ ᱨᱮ Hockey Association ᱨᱮᱱ ᱥᱚᱵᱷᱟᱯᱚᱛᱤ ᱵᱟᱪᱷᱱᱟᱣ ᱞᱮᱱᱟᱭ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱨᱮᱱ ᱦᱩᱰᱤᱧ ᱵᱚᱭᱦᱟ ᱵᱟᱵᱩᱱ ᱾ ᱢᱮᱱᱠᱷᱟᱱ ᱱᱤᱛ ᱚᱱᱟ ᱥᱚᱝᱥᱛᱷᱟ ᱨᱮᱭᱟᱜ ᱧᱩᱛᱩᱢ ᱵᱚᱫᱚᱞ ᱠᱟᱛᱮᱫ ᱦᱩᱭ ᱟᱠᱟᱱᱟ ᱦᱚᱠᱤ ᱵᱮᱝᱜᱚᱞ ᱾ ᱜᱮᱞᱵᱟᱨ ᱥᱮᱨᱢᱟ ᱠᱷᱚᱱ ᱵᱟᱵᱩᱱ ᱟᱡᱟᱜ ᱚᱠᱛᱚᱨᱮ ᱦᱚᱠᱤ ᱜᱟᱛᱮᱜ ᱞᱟᱹᱜᱤᱫ ᱛᱮ ᱵᱟᱨᱭᱟ Astro Turf Stadium ᱵᱮᱱᱟᱣ ᱨᱮᱭᱟᱜ ᱠᱩᱨᱩᱢᱩᱴᱩ ᱦᱟᱛᱟᱣ ᱞᱮᱫᱟᱭ ᱟᱨ ᱚᱱᱟ ᱨᱮᱭᱟᱜ ᱠᱟᱹᱢᱤ ᱢᱩᱪᱟᱹᱫ ᱚᱠᱛᱚ ᱨᱮ ᱢᱮᱱᱟᱜ ᱟᱠᱟᱫᱟ ᱾ ᱡᱟᱦᱟᱸ ᱫᱚ ᱚᱱᱟ ᱵᱮᱱᱟᱣ ᱞᱟᱹᱜᱤᱫ ᱛᱮ ᱵᱟᱵᱩᱱ ᱥᱚᱨᱟᱥᱚᱨᱤ ᱥᱤᱨᱟᱹ ᱢᱚᱱᱛᱨᱤ ᱥᱟᱶᱛᱮ ᱠᱟᱛᱷᱟ ᱨᱚᱯᱚᱲ ᱠᱟᱛᱮᱫᱼᱮ ᱮᱛᱚᱦᱚᱵ ᱞᱮᱫ ᱛᱟᱦᱮᱱᱟ ᱾
ᱟᱨ ᱢᱤᱫᱴᱟᱝ ᱵᱮᱱᱟᱣᱟᱠᱟᱱᱟ Dumurjala Stadium ᱯᱟᱥᱮ ᱨᱮ ᱾ ᱡᱟᱦᱟᱸᱫᱚ ᱵᱮᱱᱟᱜ ᱠᱟᱱᱟ ᱦᱤᱴᱠᱳᱣᱟᱜ ᱡᱟᱭᱜᱟ ᱨᱮ ᱾
ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱯᱟᱨᱚᱢᱮᱱ ᱞᱳᱠᱥᱚᱵᱷᱟ ᱵᱟᱪᱷᱱᱟᱣ ᱚᱠᱛᱚ ᱨᱮ ᱢᱚᱢᱚᱛᱟ ᱥᱟᱶ ᱵᱤᱛᱚᱨᱠᱚ ᱨᱮ ᱡᱚᱯᱲᱟᱣ ᱞᱮᱱᱟᱭ ᱵᱟᱵᱩᱱ ᱾ ᱦᱟᱣᱲᱟ ᱞᱳᱠᱥᱚᱵᱷᱟ ᱠᱮᱱᱫᱨᱚ ᱠᱷᱚᱱ ᱴᱤᱹᱮᱢᱹᱥᱤ ᱯᱟᱥᱴᱟ ᱠᱷᱚᱱ ᱴᱤᱠᱤᱴ ᱵᱟᱝᱼᱮ ᱧᱟᱢ ᱞᱮᱫ ᱛᱮ ᱱᱤᱨᱫᱚᱞ ᱠᱮᱹᱱᱰᱤᱰᱮᱹᱴ ᱞᱮᱠᱟᱛᱮ ᱛᱤᱸᱜᱩ ᱨᱮᱭᱟᱜ ᱠᱟᱛᱷᱟ ᱞᱟᱹᱭ ᱞᱮᱫᱟᱭ ᱵᱟᱵᱩᱱ ᱾ ᱟᱨ ᱚᱱᱟ ᱛᱟᱭᱚᱢ ᱜᱮ ᱵᱟᱵᱩᱱ ᱥᱟᱶᱛᱮ ᱥᱟᱱᱟᱢ ᱞᱮᱠᱟᱱ ᱥᱟᱹᱜᱟᱭᱮ ᱛᱚᱯᱟᱜ ᱞᱮᱫᱟ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱮᱱᱟᱨᱡᱤ ᱾
