(Papul murmu) HARYANA ELECTION : ᱯᱟᱨᱚᱢᱮᱱ ᱘ ᱥᱮᱯᱴᱮᱹᱢᱵᱚᱨ ᱜᱮ ᱩᱪᱷᱟᱹᱱ ᱟᱠᱟᱱᱟ ᱦᱚᱨᱤᱭᱟᱱᱟ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱨᱮᱭᱟᱜ ᱚᱨᱡᱚ ᱟᱨ ᱚᱱᱟ ᱠᱷᱚᱢᱚᱛᱟ ᱠᱚ ᱥᱟᱵ ᱫᱚᱦᱚ ᱠᱮᱫᱟ ᱵᱤ ᱡᱮ ᱯᱤ ᱾ ᱙᱐ ᱜᱚᱴᱟᱝ ᱥᱤᱴ ᱢᱩᱫᱽ ᱨᱮ ᱦᱚᱨᱤᱭᱟᱱᱟ ᱨᱮ ᱵᱤ ᱡᱮ ᱯᱤ ᱔᱘ ᱜᱚᱴᱟᱝ ᱥᱤᱴ ᱠᱚ ᱡᱤᱛᱠᱟᱹᱨ ᱟᱠᱟᱱᱟ ᱡᱟᱦᱟᱸ ᱫᱚ ᱒᱐᱑᱙ ᱨᱮᱭᱟᱜ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱠᱷᱚᱱ ᱘ ᱜᱚᱴᱟᱝ ᱵᱟᱹᱲᱛᱤ ᱾ ᱟᱨ ᱠᱚᱝᱜᱨᱮᱹᱥᱟᱜ ᱵᱤᱡᱚᱭᱨᱚᱛᱷ ᱒᱐᱑᱙ ᱨᱮ ᱓᱑ ᱜᱚᱴᱟᱝ ᱥᱤᱴ ᱠᱚ ᱡᱤᱛᱠᱟᱹᱨ ᱞᱮᱱᱟ, ᱢᱮᱱᱠᱷᱟᱱ ᱱᱤᱭᱟᱹᱫᱷᱟᱣ ᱖ ᱜᱚᱴᱟᱝ ᱥᱤᱴ ᱵᱟᱹᱲᱛᱤ ᱠᱚ ᱡᱤᱴᱠᱟᱹᱨ ᱟᱠᱟᱱ ᱨᱮᱦᱚᱸ ᱓᱗ ᱜᱚᱴᱟᱝ ᱥᱤᱴ ᱨᱮᱜᱮ ᱠᱚ ᱛᱤᱸᱜᱩ ᱛᱟᱦᱮᱸᱭᱮᱱᱟ ᱾
ᱢᱮᱱᱠᱷᱟᱱ ᱦᱚᱨᱤᱭᱟᱱᱟ ᱨᱮᱭᱟᱜ ᱚᱨᱡᱚ ᱤᱫᱤ ᱠᱟᱛᱮᱫ ᱠᱚᱝᱜᱨᱮᱹᱥ ᱦᱟᱭ ᱠᱚᱢᱟᱱᱰ ᱦᱟᱨᱟᱣ ᱨᱮᱱᱟᱜ ᱚᱡᱮ ᱛᱩᱱᱠᱷᱤ ᱠᱚ ᱮᱛᱚᱦᱚᱵ ᱠᱮᱫᱟ ᱾
ᱚᱱᱟ ᱛᱩᱱᱠᱷᱤ ᱜᱮ ᱮᱛᱚᱦᱚᱵ ᱮᱱᱟ ᱠᱚᱝᱜᱨᱮᱹᱥ ᱯᱟᱥᱴᱟ ᱠᱷᱚᱱ᱾ᱦᱚᱨᱤᱭᱟᱱᱟ ᱨᱮ ᱑᱐ ᱥᱮᱨᱢᱟ ᱠᱷᱚᱱ ᱵᱤ ᱡᱮ ᱯᱤᱭᱟᱜ ᱜᱮ ᱥᱚᱨᱠᱟᱨ ᱛᱟᱦᱮᱸ ᱠᱟᱱᱟ, ᱟᱨ ᱵᱤ ᱡᱮ ᱯᱤ ᱥᱚᱨᱠᱟᱨ ᱪᱮᱛᱟᱱ ᱦᱚᱨᱤᱭᱟᱱᱟ ᱨᱮᱱ ᱥᱟᱫᱷᱟᱨᱚᱱ ᱡᱚᱲ ᱠᱚᱣᱟᱜ ᱟᱹᱲᱤᱥ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱚᱱᱟ ᱥᱩᱡᱳᱜᱽ ᱠᱟᱹᱢᱤ ᱨᱮ ᱵᱟᱝᱠᱚ ᱞᱟᱜᱟᱣ ᱫᱟᱲᱮᱭᱟᱫᱟ ᱠᱚᱝᱜᱨᱮᱹᱥ ᱾ ᱪᱮᱫᱟᱜ ᱵᱟᱠᱚ ᱞᱟᱜᱟᱣ ᱫᱟᱲᱮᱭᱟᱫᱟ |
ᱨᱟᱡᱽᱼᱟᱹᱨᱤ ᱢᱚᱦᱚᱞ ᱨᱮᱱ ᱟᱹᱰᱤ ᱜᱟᱱ ᱦᱚᱲ ᱠᱚᱣᱟᱜ ᱞᱟᱹᱭ, ᱦᱚᱨᱤᱭᱟᱱᱟ ᱨᱮ ᱠᱚᱝᱜᱨᱮᱹᱥ ‘ᱡᱟᱴ’ ᱱᱮᱛᱟ ᱟᱨᱵᱟᱝ ᱦᱚᱨᱤᱭᱟᱱᱟ ᱨᱮᱱ ᱢᱟᱨᱮ ᱥᱤᱨᱟᱹ ᱢᱚᱱᱛᱨᱤ ᱵᱷᱩᱯᱮᱱᱫᱨᱚ ᱥᱤᱝ ᱦᱩᱰᱰᱟ ᱪᱮᱛᱟᱱ ᱜᱮ ᱵᱟᱹᱲᱛᱤ ᱜᱩᱨᱩᱛᱛᱚ ᱠᱚ ᱮᱢ ᱞᱮᱫ ᱛᱟᱦᱮᱱᱟ, ᱚᱱᱟ ᱠᱷᱟᱹᱛᱤᱨ ᱮᱴᱟᱜ ᱱᱮᱛᱟ ᱠᱚ ᱵᱟᱪᱷᱱᱟᱣ ᱚᱠᱛᱚ ᱨᱮ ᱯᱨᱚᱪᱟᱨ ᱨᱮ ᱵᱟᱝᱠᱚ ᱧᱮᱞᱧᱟᱢ ᱟᱠᱟᱱᱟ ᱾ ᱚᱱᱟ ᱨᱮᱭᱟᱜ ᱥᱩᱡᱳᱜᱽ ᱜᱮ ᱵᱤ ᱡᱮ ᱯᱤ ᱠᱟᱹᱢᱤ ᱨᱮᱠᱚ ᱞᱟᱜᱟᱣ ᱞᱮᱫ ᱛᱟᱦᱮᱱᱟ, ᱢᱮᱱᱫᱚ ‘ᱚᱼᱡᱟᱴ’ ᱵᱷᱳᱴ (ᱡᱟᱦᱟᱸᱟᱭ ᱫᱚ ᱡᱟᱴ ᱵᱟᱝ ᱠᱟᱱᱟ ᱠᱚ) ᱟᱠᱚᱣᱟᱜ ᱵᱷᱳᱴ ᱵᱮᱝᱠ ᱠᱚ ᱵᱮᱱᱟᱣ ᱠᱮᱫᱟ ᱾ ᱚᱱᱟ ᱵᱟᱫᱽ ᱠᱟᱛᱮᱫ ᱦᱚᱸ ᱦᱚᱨᱤᱭᱟᱱᱟ ᱵᱟᱪᱷᱱᱟᱣ ᱨᱮ ᱡᱟᱹᱛᱤ ᱵᱷᱤᱛᱛᱤᱠ ᱢᱮᱨᱩᱠᱚᱨᱚᱱ ᱥᱟᱶᱛᱮ ᱵᱟᱪᱷᱱᱟᱣ ᱢᱟᱲᱟᱝ ᱨᱮ ᱯᱨᱚᱪᱟᱨ ᱞᱟᱹᱜᱤᱫ ᱠᱚᱝᱜᱨᱮᱹᱥ ᱱᱮᱛᱟ ᱠᱚ ᱢᱩᱫᱽ ᱨᱮ ᱛᱟᱞᱢᱤᱞ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱟᱹᱰᱤ ᱜᱟᱱ ᱠᱚᱝᱜᱨᱮᱹᱥ ᱯᱨᱟᱨᱛᱷᱤ ᱠᱚᱣᱟᱜ ᱠᱮᱱᱫᱨᱚ ᱨᱮ ᱨᱟᱡᱽᱡᱚ ᱥᱛᱚᱨ ᱨᱮᱱ ᱱᱮᱛᱟ ᱠᱚᱣᱟᱜ ᱯᱨᱚᱪᱟᱨ ᱵᱟᱝ ᱧᱮᱞ ᱟᱠᱟᱱᱟ ᱾ ᱵᱟᱪᱷᱱᱟᱣ ᱞᱟᱦᱟ ᱨᱮ ᱠᱚᱝᱜᱨᱮᱹᱥ ᱱᱮᱛᱟ ᱠᱚ ᱢᱩᱫᱽ ᱜᱚᱴᱟ ᱞᱮᱱ ᱛᱟᱦᱮᱱᱟ ᱡᱮ ᱟᱠᱚᱣᱟᱜ ᱢᱮᱱᱩᱷᱮᱥᱴᱳ ᱨᱮ ᱥᱚᱫᱚᱨ ᱟᱠᱟᱱ ᱗ ᱜᱚᱴᱟᱝ ᱜᱮᱨᱮᱱᱴᱤ ᱨᱮᱭᱟᱜ ᱠᱟᱛᱷᱟ ᱟᱹᱛᱩ ᱨᱮ ᱪᱟᱞᱟᱣ ᱠᱟᱛᱮᱫ ᱛᱤᱨᱞᱟᱹ ᱴᱷᱮᱱ ᱥᱚᱫᱚᱨ ᱞᱟᱹᱜᱤᱫ, ᱪᱮᱫᱟᱜ ᱥᱮ ᱚᱱᱟ ᱰᱟᱦᱟᱨ ᱟᱯᱱᱟᱨ ᱠᱟᱛᱮᱫ ᱠᱚᱨᱱᱟᱴᱚᱠ ᱟᱨ ᱛᱮᱞᱟᱝᱜᱟᱱᱟ ᱨᱮ ᱠᱚᱝᱜᱨᱮᱹᱥ ᱠᱚ ᱡᱤᱛᱠᱟᱹᱨ ᱞᱮᱱ ᱛᱟᱦᱮᱱᱟ ᱾ ᱢᱮᱱᱠᱷᱟᱱ ᱦᱚᱨᱤᱭᱟᱱᱟ ᱨᱮ ᱚᱱᱠᱟ ᱞᱮᱠᱟᱱ ᱠᱟᱹᱢᱤ ᱜᱮ ᱵᱟᱝ ᱧᱮᱞ ᱞᱮᱱᱟ ᱾
ᱦᱚᱨᱤᱭᱟᱱᱟ ᱵᱟᱪᱷᱱᱟᱣ ᱨᱮ ᱠᱚᱝᱜᱨᱮᱹᱥ ᱦᱟᱨᱟᱣ ᱨᱮᱭᱟᱜ ᱯᱮᱭᱟ ᱠᱟᱨᱚᱱ ᱥᱟᱢᱟᱝ ᱨᱮ ᱨᱟᱠᱟᱵ ᱦᱮᱡ ᱟᱠᱟᱱᱼ
(᱑) ᱠᱚᱝᱜᱨᱮᱹᱥ ᱦᱟᱭ ᱠᱚᱢᱟᱱᱰ ᱦᱩᱰᱰᱟ ᱯᱚᱨᱤᱵᱟᱨ ᱪᱮᱛᱟᱱ ᱨᱮᱜᱮ ᱯᱟᱹᱛᱭᱟᱹᱣ ᱠᱚ ᱫᱚᱦᱚ ᱞᱮᱫᱟ ᱾
(2) ᱯᱨᱚᱪᱟᱨ ᱨᱮ ᱜᱟᱹᱯᱷᱤᱞᱚᱛᱤ ᱟᱨ ᱱᱮᱛᱟ ᱠᱚᱣᱟᱜ ᱛᱟᱞᱢᱤᱞ ᱵᱟᱝ ᱛᱟᱦᱮᱸ ᱠᱟᱱᱟ ᱾
(᱓) ᱠᱚᱝᱜᱨᱮᱹᱥ ᱫᱚᱞ ᱢᱩᱫᱽ ᱨᱮ ᱪᱟᱞᱟᱜ ᱠᱟᱱ ᱮᱯᱮᱨᱦᱮᱰᱮᱡ ᱡᱟᱦᱟᱸ ᱫᱚ ᱵᱟᱪᱷᱱᱟᱣ ᱞᱟᱦᱟ ᱨᱮ ᱵᱟᱝ ᱠᱚ ᱥᱚᱞᱦᱮ ᱫᱟᱲᱮᱭᱟᱜ ᱛᱟᱦᱮᱸᱫ ᱾
ᱦᱚᱨᱤᱭᱟᱱᱟ ᱨᱮ ᱠᱚᱝᱜᱨᱮᱹᱥ ᱟᱠᱚᱣᱟᱜ ᱦᱟᱹᱱ ᱵᱟᱝ ᱠᱚ ᱢᱟᱱᱟᱣ ᱫᱟᱲᱮᱭᱟᱜ ᱠᱟᱱᱟ ᱾ ᱪᱮᱫᱟᱜ ᱥᱮ ᱞᱳᱠᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱜᱚᱴᱟ ᱫᱤᱥᱚᱢ ᱨᱮ ᱠᱚᱝᱜᱨᱮᱹᱥᱟᱜ ᱡᱟᱦᱟᱸ ᱞᱮᱠᱟ ᱡᱤᱛᱠᱟᱹᱨ ᱧᱮᱞ ᱞᱮᱱᱟ ᱚᱱᱟ ᱨᱟᱥ ᱦᱚᱨᱤᱭᱟᱱᱟ ᱵᱤᱫᱷᱟᱱ ᱥᱚᱵᱷᱟ ᱨᱮ ᱵᱟᱝ ᱠᱚ ᱥᱟᱵ ᱫᱚᱦᱚ ᱫᱟᱲᱮᱭᱟᱫᱟ ᱾ ᱥᱟᱢᱟᱝ ᱨᱮᱜᱮ ᱢᱚᱦᱟᱨᱟᱥᱴᱨᱚ ᱟᱨ ᱡᱷᱟᱲᱠᱷᱚᱱᱰ ᱨᱮ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ, ᱚᱱᱟ ᱛᱮ ᱦᱚᱨᱤᱭᱟᱱᱟ ᱨᱮ ᱠᱚᱝᱜᱨᱮᱹᱥ ᱡᱤᱛᱠᱟᱹᱨ ᱠᱟᱛᱮᱫ ᱥᱚᱨᱠᱟᱨ ᱠᱚ ᱵᱮᱱᱟᱣᱟ ᱟᱨ ᱚᱱᱟ ᱨᱮᱭᱟᱜ ᱠᱨᱮᱹᱰᱤᱴ ᱨᱟᱦᱩᱞ ᱜᱟᱱᱫᱷᱤ ᱜᱮ ᱮᱢ ᱨᱮᱭᱟᱜ ᱠᱩᱨᱩᱢᱩᱴᱩ ᱦᱟᱛᱟᱣ ᱞᱮᱱ ᱛᱟᱦᱮᱱᱟ ᱾ ᱟᱨ ᱚᱱᱠᱟ ᱦᱩᱭ ᱞᱮᱱᱠᱷᱟᱱ ᱡᱟᱛᱤᱭᱚ ᱨᱟᱡᱽᱱᱤᱛᱤ ᱨᱮ ᱨᱟᱦᱩᱞ ᱜᱟᱱᱫᱷᱤᱭᱟᱜ ᱵᱷᱟᱵᱽᱢᱩᱨᱛᱤ ᱱᱚᱝᱠᱟᱱ ᱡᱟᱭᱜᱟ ᱨᱮ ᱥᱮᱴᱮᱨ ᱠᱚᱜᱼᱟ ᱡᱟᱦᱟᱸᱫᱚ ᱦᱟᱯᱮᱱ ᱫᱤᱱ ᱨᱮ ᱢᱳᱫᱤ ᱟᱨ ᱚᱢᱤᱛ ᱥᱟ ᱢᱩᱥᱠᱤᱞ ᱨᱮᱠᱤᱱ ᱯᱟᱲᱟᱣ ᱫᱟᱲᱮ ᱠᱚᱜᱼᱟ ᱾
