(PAPUL MURMU) Ayushman Bharat Health Insurance Scheme: ᱥᱚᱨᱠᱟᱨᱤ ᱞᱮᱠᱟᱛᱮ ᱠᱚᱞᱞᱟᱱᱤ AIIMS ᱮ ᱩᱰᱷᱟᱹᱣ ᱠᱮᱫᱟ ᱯᱨᱚᱫᱷᱟᱱ ᱢᱚᱱᱛᱨᱤ ᱱᱚᱨᱮᱱᱫᱨᱚ ᱢᱳᱫᱤ, ᱛᱚᱵᱮ ᱩᱰᱷᱟᱹᱣ ᱚᱠᱛᱚ ᱠᱟᱹᱞᱤᱯᱩᱡᱟᱹ ᱞᱟᱦᱟ ᱨᱮ ᱵᱟᱝᱞᱟ ᱟᱨ ᱫᱤᱞᱞᱤ ᱨᱮᱱ ᱩᱢᱮᱹᱨᱟᱱ ᱦᱚᱲ ᱴᱷᱮᱱ ᱤᱠᱟᱹᱭ ᱦᱟᱛᱟᱣ ᱠᱮᱫᱟ ᱢᱳᱫᱤ ᱾ ᱢᱳᱫᱤᱣᱟᱜ ᱞᱟᱹᱭ ᱯᱚᱥᱪᱤᱢ ᱵᱟᱝᱞᱟ ᱟᱨ ᱫᱤᱞᱞᱤ ᱨᱮᱱ ᱥᱤᱨᱟᱹᱢᱚᱱᱛᱨᱤ ᱛᱟᱹᱠᱤᱱ ᱠᱮᱱᱫᱨᱤᱭᱚ ᱥᱚᱨᱠᱟᱨᱟᱜ ᱟᱭᱩᱥᱢᱟᱱ ᱵᱷᱟᱨᱚᱛ ᱯᱨᱚᱠᱚᱞᱯᱚ ᱵᱟᱝ ᱠᱤᱱ ᱞᱟᱹᱜᱩᱭᱮᱫᱟ ᱟᱠᱤᱱᱟᱜ ᱯᱚᱱᱚᱛ ᱨᱮ ᱚᱱᱟ ᱛᱮ ᱩᱢᱮᱹᱨᱟᱱ ᱦᱚᱲ ᱠᱚ ᱟᱭᱩᱥᱢᱟᱱ ᱵᱷᱟᱨᱚᱛ ᱦᱚᱛᱮᱛᱮ ᱧᱟᱢᱚᱜ ᱛᱤᱠᱪᱷᱟᱹ ᱨᱮᱭᱟᱜ ᱥᱩᱵᱤᱫᱷᱟ ᱠᱷᱚᱱ ᱠᱚ ᱵᱚᱧᱪᱤᱛᱚᱜ ᱠᱟᱱᱟ ᱾
ᱛᱚᱵᱮ ᱯᱨᱚᱫᱷᱟᱱ ᱢᱚᱱᱛᱨᱤᱣᱟᱜ ᱚᱵᱷᱤᱡᱳᱜᱽ ᱤᱫᱤ ᱠᱟᱛᱮᱫ ᱛᱨᱤᱱᱚᱢᱩᱞ ᱥᱯᱳᱠᱯᱟᱨᱥᱮᱱ ᱠᱩᱱᱟᱞ ᱜᱷᱳᱥᱟᱜ ᱞᱟᱹᱭ ᱵᱟᱝᱞᱟ ᱨᱮᱱ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱚᱱᱫᱳᱯᱟᱫᱽᱫᱷᱟᱭᱟᱭᱟᱜ ᱨᱟᱡᱽᱡᱚ ᱨᱮ ᱥᱟᱥᱛᱷᱚ ᱥᱟᱛᱷᱤ ᱯᱨᱚᱠᱚᱞᱯᱚ ᱪᱟᱹᱞᱩ ᱢᱮᱱᱟᱜ ᱟᱠᱟᱫᱟ, ᱡᱟᱦᱟᱸ ᱥᱟᱥᱛᱷᱚ ᱥᱟᱛᱷᱤ ᱛᱮ ᱜᱷᱟᱨᱚᱸᱡᱽ ᱨᱮᱱ ᱥᱟᱱᱟᱢ ᱦᱚᱲ ᱛᱤᱠᱪᱷᱟᱹ ᱨᱮᱭᱟᱜ ᱥᱩᱵᱤᱫᱷᱟ ᱠᱚ ᱧᱟᱢᱮᱫᱟ ᱾ ᱠᱩᱱᱟᱞᱟᱜ ᱞᱟᱹᱭ ᱯᱨᱚᱫᱷᱟᱱ ᱢᱚᱱᱛᱨᱤ ᱟᱭᱩᱥᱢᱟᱱ ᱵᱷᱟᱨᱚᱛ ᱡᱳᱡᱚᱱᱟ ᱨᱮ ᱩᱞᱞᱮᱠᱷ ᱜᱮ ᱵᱟᱹᱱᱩᱜᱼᱟ ᱡᱮ ᱜᱷᱟᱨᱚᱸᱡᱽ ᱨᱮᱱ ᱛᱤᱱᱟᱹᱜ ᱦᱚᱲ ᱛᱤᱠᱪᱟᱹ ᱨᱮᱭᱟᱜ ᱥᱩᱵᱤᱫᱷᱟ ᱠᱚ ᱧᱟᱢᱟ ᱾ ᱥᱟᱶᱛᱮ ᱱᱚᱣᱟ ᱦᱚᱸᱭ ᱞᱟᱹᱭ ᱟᱠᱟᱫᱟ ᱡᱮ ᱯᱚᱥᱪᱤᱢ ᱵᱟᱝᱜᱟᱞ ᱟᱨ ᱫᱤᱞᱞᱤ ᱪᱮᱛᱟᱱ ᱯᱨᱚᱫᱷᱟᱱ ᱢᱚᱱᱛᱨᱤ ᱡᱟᱦᱟᱸ ᱚᱵᱷᱤᱡᱳᱜᱮ ᱨᱟᱠᱟᱵ ᱟᱠᱟᱫᱟ ᱚᱱᱟ ᱫᱚ ᱵᱷᱤᱛᱛᱤᱦᱤᱱ ᱠᱟᱱᱟ ᱢᱮᱱᱛᱮᱭ ᱞᱟᱹᱭ ᱟᱠᱟᱫᱟ ᱾
ᱢᱳᱫᱤ ᱥᱚᱨᱠᱟᱨᱟᱜ ᱟᱭᱩᱥᱢᱟᱱ ᱵᱷᱟᱨᱚᱛ ᱵᱤᱢᱟ ᱯᱨᱚᱠᱚᱞᱯᱚ ᱨᱮ ᱠᱮᱱᱫᱨᱤᱭᱚ ᱥᱚᱨᱠᱟᱨ ᱴᱟᱨᱜᱮᱹᱴᱮ ᱦᱟᱛᱟᱣ ᱟᱠᱟᱫᱟ ᱡᱮ ᱕᱕ ᱠᱳᱴᱤ ᱦᱚᱲ ᱟᱹᱜᱩ ᱨᱮᱭᱟᱜ, ᱢᱮᱱᱠᱷᱟᱱ ᱯᱚᱥᱪᱤᱢ ᱵᱚᱝᱜᱚ ᱟᱨ ᱫᱤᱞᱞᱤ ᱥᱚᱨᱠᱟᱨ ᱚᱱᱟ ᱵᱤᱢᱟ ᱯᱨᱚᱠᱚᱞᱯᱚ ᱨᱮᱭᱟᱜ ᱥᱩᱵᱤᱫᱷᱟ ᱵᱟᱝ ᱠᱤᱱ ᱦᱟᱛᱟᱣ ᱟᱠᱟᱫ ᱠᱷᱟᱹᱛᱤᱨ ᱓᱕ ᱠᱳᱴᱤ ᱓᱖ ᱞᱟᱠᱷ ᱦᱚᱲ ᱟᱭᱩᱥᱢᱟᱱ ᱵᱷᱟᱨᱚᱛ ᱯᱨᱚᱠᱚᱞᱯᱚ ᱨᱮᱠᱚ ᱦᱮᱡ ᱟᱠᱟᱱᱟ ᱾
